1 Nisqaykichejta juntʼaychej

¿IMA NIYTA MUNAN?

Casarakushaspaqa qharipis warmipis ninku, wañunankukama khuska kanankuta. Chayta mana qonqaj qhariwarmisqa, mana separakuypi piensankuchu. Ima problema rikhurejtinpis, khuskallapuni kanku, manataj wasanchanakunkuchu.

Qhariwarmisqa khuska kananku tiyan mana runasta manchachikusqankuraykuchu, manachayqa munanakusqankurayku, respetanakusqankuraykutaj.

BIBLIA NIWANCHEJ: “Qosataj warminta ama saqerparichunchu” (1 Corintios 7:11).

Miqueas nin: “Casarakushaspa imatachus nisqanchejta mana qonqanchejchu chayqa, mana chay rato phiñakunchejchu. Pantaspapis perdonakuyta atillanchej. Ima problema kajtintaj, mana separakuypipachachu yuyanchej”, nispa.

¿YANAPAWANCHEJCHU?

Casado kausayta pisipaj qhawajkunaqa, ima problemita rikhurejtinpis ninku: “Manapuni entiendenakuykuchu, tʼaqanakusqaykuchá”, nispa.

Juanaa nin: “Ashkha runas divorciopi yuyaspaña casarakunku. Ajina yuyaywan casarakojkunaqa, uj tiempollapaj casaranku”, nispa.

KAYTA RUWAWAJCHEJ

PIENSARIY

Chʼajwashajtiykichej, ¿kayta niyta yachankichu?

• “¡Imapaj kaywan casararqaniri!”

• “Wajwan casarayman karqa chayqa, nichá ajinachu kashayman karqa”.

• “¡Saqerparisqayki!” “¡Wajta maskʼakamusaj!”

Ajinata niyta yachanki chayqa, casarakushaspa imatachus nisqaykimanta yuyarikuy.

PARLARIKUYCHEJ

• Casarakushaspaqa “ni jaykʼaj saqerparisqaykichu” ninakorqanchej. ¿Chayta qonqakushanchejchu? ¿Imaraykutaj?

• ¿Imatá ruwasunman chay nisqanchejta mana qonqanapaj?

YUYAYCHAYKUNA

• Qosaykiman chayri señoraykiman munakusqaykita niy.

• Señoraykej chayri qosaykej fotonta trabajoykiman apakuy.

• Karupi kashaspa wajyarinakuychejpuni.

BIBLIA NIWANCHEJ: “Diospa ujchasqantaqa, ama pipis tʼaqachunchu” (Mateo 19:6).