¿IMATÁ RUWASUNMAN TUKUY IMAPIS VALEYKOJTIN?

Kapuwasqanchej imasllawan kusisqa kana

Kapusqallankuwan kusisqa kausakojkunaqa sonqo juntʼasqa kanku, qolqe pisiyajtintaj pisi imasllawan kausakuyta atinku.

¿IMARAYKUTAJ KAPUWASQANCHEJWAN KUSISQA KANA?

Jessica Koehlerqa phicóloga. Payqa reparasqa kapusqallankuwan kusisqa kausakojkunaqa allin imaspipuni yuyasqankuta, nitaj envidiososchu kasqankuta. Chayraykuchá paykunaqa aswan kusisqas kanku, pisitataj llakikunku. Wajkunamanta nisqa aswan kusisqa kajkunaqa pisi imasllawan kausakunku. Paykunapajqa aswan sumaj familiankuwan amigosninkuwan karikuy. Tiempochakunkupunitaj imaschus aswan importante kashan chayta ruwanankupaj.

“Mikhunayoj, ropayojtaj kaspaqa, chaywan sonqo juntʼasqa kausakuna” (1 Timoteo 6:8).

¿IMATÁ RUWAWAJ?

Ama wajkunawan kikinchakuychu. Sichus qhapaj jina kausakojkunawan kikinchakunki chayqa, ichapis pisi imaslla kapususqanmanta llakikuwaj, paykunamantataj envidiakuwaj. Jinapis chay jinata kikinchakoyqa mana allinchu. Imajtinchus ashkha imasniyoj kajkunaqa may chhika deudasniyoj kashankuman. Chaymanta parlaspa Senegalmanta Nicole sutiyoj warmi nin: “Mana ashkha imastapunichu necesitani kusisqa kanaypaj. Kapuwasqallaywan sonqo juntʼasqa kasqayrayku wajkuna ashkha imasniyoj kajtinkupis kusisqallapuni kani”, nispa.

Kayta ruwawaj: Ama internetpi, redes socialespipis qhawaychu may valesqawan rantisqanku imasta, wajkunaj qhapaj kapuyninkumanta churasqanku imastapis.

“Runaqa ashkha kapuyniyojpis kachun, mana chaychu kausayta qonqa” (Lucas 12:15).

Agradecekuypuni. Agradecekuyta yachajkunaqa kapullasqankuwan kusisqa kausakuyta yachanku, nitaj yuyankuchu waj imastawan necesitasqankuta chayri ashkha imaspuni kapunanku kasqanta. Haitimanta Roberton nin: “Wajkuna familiayrayku, noqarayku imatachus ruwasqankupi piensarinaypaj tiempochakuni. Chaymantataj agradecekuni. Ocho watitasniyoj wawitaytataj imitallatapis qorejtinku agradecekuyta yachachini”, nispa.

Kayta ruwawaj: Sapa día anotakuwaj imasmantachus agradecekuyta munasqaykita. Agradecekuwaj sanito kasqaykimanta, familiayki ujchasqa kasqanmanta, sumaj amigosniyoj kasqaykimanta chayri cielo pukayarisqanmantapis.

“Runaj sonqon kusisqa [kajtenqa] sapa día kusisqa kausakun” (Proverbios 15:15).

Wakin kutisqa ichapis kapuwasqallanchejwan mana sonqo juntʼasqachu kasunman. Jinapis kapuwasqanchej imasllawan sonqo juntʼasqas kasun chayqa, kusisqas kausakusun. Chay kusiytataj mana qolqewan rantiyta atisunmanchu.