12 qhawajkuna

Israelitasqa Sinaí orqomanta riporqanku. Parán nisqa chʼinnejta rispataj, Cadesman chayarqanku. Chaypi Jehová Diosqa Moisesta nerqa: “Israelitasman qosaj chay Canaán jallpʼata qhawamunankupaj 12 qharista kachay, sapa ayllumanta ujta”, nispa. Moisestaj 12 runasta ajllaytawan nerqa: “Canaanta qhawamuychej tarpunapaj sumajchus manachus kasqanta, cananeos imaynachus kasqankuta, llajtasninkupis perqaswan muyurisqachus manachus kasqankuta”, nispa. Chay 12 runastaj qhawaj rerqanku, paykunamanta iskayqa Josuewan Calebwan karqanku.

Chay qhawamojkunaqa 40 diasmanta kutimorqanku. Apamorqankutaj higosta, granadasta, uvasta ima. Paykunaqa nerqanku: “Chay jallpʼaqa sumajpuni. Jinapis chaypi tiyakojkunaqa kallpasniyoj kanku, llajtasninkupis jatuchaj perqasniyoj”, nispa. Calebtaj nerqa: “Paykunataqa atipasunman, jaku rinachej”, nispa. Payqa chayta nerqa, paywan Josuewan Jehová Diospi atienekusqankurayku. Chay 10 runasrí nerqanku: “Ama rinachu. Chay jallpʼaspi tiyakojkunaqa may jatuchaj kanku. Ladonkupeqa saltamontes jinalla kanchej”, nispa.

Chayrayku israelitasqa niña riyta munarqankuchu. Astawanpis quejakorqanku: “Uj kamachejta ajllana, Egiptomantaj kutipuna. ¿Imapajtaj wañoj risunchejri?”, nispa. Josuewan Calebwantaj nerqanku: “Ama Diospa contranta oqharikuychejchu, ama manchikuychejchu. Diosmin yanapawasun”, nispa. Israelitastajrí kasukunankumantaqa paykunata wañuchiyta munarqanku.

Chayrayku Diosqa Moisesman nerqa: “Israelitasqa may chhika sumaj imasta ruwapojtiypis nipuni kasuwankuchu. Chayrayku wañunankukama kay chʼin lugarpi 40 watasta qhepachisaj. Paykunaj wawasninku, Josué, Caleb imalla Sumaj Jallpʼaman yaykonqanku”, nispa.