Junio

Jesús chayta nispa, yachachisqasninta maytachá kallpacharqa. Imajtinchus payqa tumpamantawan wañuchisqa kanan karqa. Chayta Jesuspa yachachisqasnin mana sutʼita entiendejtinkupis, Jehová paykunata yanapanman karqa predicanallankupajpuni. Ajinapunitaj karqa, Jesús wañupusqantawan yachachisqasnin Jehová Diosmanta mana manchachikuspa predicanallankupajpuni mañakojtinku, Jehová Dios paykunata yanaparqa (Hech. 4:29, 31). Kay tiempopipis Jehová Diosqa, wakichisqa kashan imatachus mañakusqanchejta qonawanchejpaj. Sichus Dios yanapanawanchejta mañakusunchej chayqa, pay yanapawasunchej predicanallapajpuni runas predicacionpi churanakuwajtinchejpis chayri mana uyariwajtinchejpis (Fili. 4:13). Chantapis sinchʼita sayaspa predicallasunpuni chayqa, Jesuspa amigollanpuni kasunchej. Jesuspa amigon kayta atisqanchejta yachay, mañakusqanchejtataj Jehová Dios uyarisqanta yachayqa, mayta kallpachawanchej predicamunallapajpuni (Sant. 1:17). w18.05 pág. 21 párrs. 17, 18

Phishqa watanman jina, Diospa jatun pʼunchaynin chayamorqa. Chayqa karqa 70 watapi. Chaypacha Jehová Diosqa romanosnejta Jerusalenta thuñerqa. Cristianostaj Jesuspa nisqanta kasukuspa Jerusalenmanta ayqekorqanku. Cristianosqa ichá chaypiraj repararqanku kallpachanakunanku kasqanta (Hech. 2:19, 20; Luc. 21:20-22). Noqanchejpis qhepa pʼunchaykunapi kausakushanchej. Tumpamantawantaj Jehová Diospa pʼunchaynin chayamonqa. Chay diataj manchachikuna pʼunchay kanqa (Joel 2:11). Chaymanta parlaspa profeta Sofonías jinata nerqa: “Tata Diospa jatun pʼunchaynenqa qayllamushanña. Qayllapiña kashan, usqhayllatataj chayamushan”, nispa (Sof. 1:14). Chayrayku ujkuna ujkunawan “purajmanta qhawarinakunachej, ajinamanta astawan munakuy kananpaj, allin ruwaykunatataj ruwananchejpaj” (Heb. 10:24). Arí, purajmanta astawan qhawarinakunachej kallpachanakunapaj. w18.04 pág. 20 párrs. 1, 2

Jehová Diosqa Josueta kallpacharqa llajtanta manaraj sumaj jallpʼaman pusaykushaspa. Chantapis Jehová Diosqa mana uj, iskay runasllatachu kallpacharqa, manaqa llajtantapis. Uj pacha Diospa llajtanqa, Babiloniapi presochasqa kasharqa. Chay kutipitaj Jehová Diosqa, llajtanta mayta kallpacharqa, ajinata nispa: “Qanqa ama manchachikuychu, imaraykuchus noqaqa qanwampuni kashani. Ama sonqoyki qʼenaqakuchunchu, imaraykuchus noqaqa Diosniyki kani. Noqa kallpachasqayki, yanapallasqaykitaj; justiciata ruwaj paña makiywan sayachillasqaykipuni”, nispa (Isa. 41:10). Jehová Diosqa, kay tiempopipis mayta kallpachashallawanchejtaj, imaynatachus ñaupa tiempomanta cristianosta kallpacharqa, ajinata (2 Cor. 1:3, 4). Jehová Diosqa Jesustapis kallpachallarqataj. Jesús bautizakushajtin, Jehová Diosqa ajinata kallpacharqa: “Kaymin munasqa Wawayqa, paytaqa allinpaj qhawani”, nispa (Mat. 3:17). Chayqa Jesusta maytachá kallpacharqa, tukuy sonqo Tatanmanta willananpaj. w18.04 pág. 16 párrs. 3-5

May chhika runasqa yuyanku, Jehová Adanta Evatawan munayninkuta ruwajta mana saqesqanta. Chaywanpis ajinata yuyajkunaqa pantashanku. Imajtinchus Adanwan Evawanqa ajllayta aterqanku Jehovata kasukuytachus manachus. Chaywanpis mana derechoyojchu karqanku, ninankupaj imachus allin kasqanta, imatajchus mana allin kasqanta. Imajtinchus Jehová Dioslla chayta ninanpaj derechoyoj. Chayrayku payqa, Edén huertapi “allin kajta mana allin kajta yachanamanta” sachʼata wiñacherqa (Gén. 2:9). Jehová Diosqa, Adantawan Evatawan kamacherqa, payta kasukunankutapuni kusisqa kanankupaj. Adanwan Evawanqa, Jehová Diosta mana kasukusqankurayku ñakʼarerqanku. Reparanchej jina, Adanwan Evawanqa munaynillankuta ruwasqankurayku juchaj esclavollanman tukorqanku. w18.04 págs. 5, 6 párrs. 9-12

Jehovaqa kamachisnin sufrejtinku, mana llakikullanchu, manaqa yanaparinpuni. Israelitas Egiptopi esclavos kashajtinku, Jehovaqa sonqonta nanachikorqa, kacharicherqataj. Payqa Moisesman nerqa: “Cheqamanta noqa rikuni imaynatachus israelita wawasniy Egiptopi ñakʼarishasqankuta. Uyarini mayta qhaparikusqankuta”, “allinta yachani ñakʼarisqankuta”. “Chayrayku uraykʼamuni egipciospa makinmanta, atiyninmanta ima paykunata orqhonaypaj”, nispa (Éxo. 3:7, 8). Jehovaqa israelitasta khuyakusqanrayku, egipciospa makinkumanta kacharicherqa. Chaymanta unay watasninman, israelitas Sumaj Jallpʼapiña kashajtinku, waj llajtasmanta runasñataj paykunata ñakʼaricherqanku. Jehová Dios, ¿llakiyninkuta qhawakullarqachu? Mana. Bibliaqa nin, ‘sinchʼi ñakʼariypi waqasqasninkuta uyarispa, paykunata khuyakusqantaʼ. Jehová Diosqa israelitasta enemigosninkumanta librananpaj, juezkunata kacharqa (Jue. 2:16, 18). w19.03 pág. 15 párrs. 4, 5

Jehová Diosqa kamacherqa: “Noqamanta jawaqa waj diosniyki ama kachunchu. Ama ni ima lantita ruwakunkichu”, nispa. Chay iskay kamachiykunaqa chunka kamachiykunamanta ñaupaj kaj karqanku (Éxo. 20:3-6). Chay kamachiykunaqa mana Jehová Diospa allinninpajchu karqa, manachayqa israelitaspa allinninkupaj karqa. Israelitasqa waj nacionesmanta llulla diosesta yupaychaspa ñakʼarej kanku. Chaywanpis Jehová Diosqa israelitasta bendicerqa kasukojtinku, cheqan kajtataj ruwajtinku (1 Rey. 10:4-9). Jehová Dios mana juchayojchu uj hermano kamachiykunasninta pʼakisqanmanta, chay hermanonejta waj hermanos ñakʼarisqankumantapis. Chaywanpis Jehová Diosqa munakuwanchej, yachantaj pikunachus qhasimanta ñakʼarishasqankuta. Payqa sufrejtinchej uj mamamanta nisqa astawan llakikun. Ichapis Jehová Diosqa mana castiganqapachachu mana cheqan kajta ruwajkunata, mana pesachikojkunatapis. Chaywanpis maychus tiemponpi justiciata ruwanqa. w19.02 págs. 22, 23 párrs. 13-15

Jesuspa Wañuyninta Yuyarinapaj tantakuypaj semanas faltashajtin, tantakuykunapi Jesusmanta astawan yachakunchej, yachakullanchejtaj Jesús kʼumuykukoj sonqo kasqanrayku kausayninta qosqanta. Chantapis kallpachakuyta munanchej Jesús jina llampʼu sonqo kanapaj, imapi rikukuspapis Diospa munayninta ruwanapaj ima. Jesús mana manchachikoj runa kasqanqa sutʼi yachakorqa manaraj wañuchisqa kashajtin. Payqa yacharqa enemigosnin kʼumuykachachinankuta, jasutʼinankuta, wañuchinankutataj (Mat. 20:17-19). Chaywanpis wañuchisqa kayta mana manchachikorqachu. Chayrayku Getsemaní huertapi japʼichisqa kananpajña kashajtin apostolesninman nerqa: “Sayariychej, jaku ripuna. ¡Qhawaychej! Japʼichiwajqa qayllaykamunña”, nispa (Mat. 26:36, 46). Jinapi ashkha runas Jesusta japʼej chayarqanku. Jesustaj ñaupajman thaskirispa paykunata nerqa: ‘Noqa Jesús kani’, nispa. Chantá nillarqataj: “Saqeychej yachachisqasniy ripunankuta”, nispa (Juan 18:3-8). Chayqa sutʼita reparachiwanchej Jesús mana manchachikoj runa kasqanta. Noqanchejqa ajllasqa cristianos kaspapis chayri waj ovejasmanta kaspapis mayta kallpachakunanchej kashan Jesús jina mana manchachikunapaj. w19.01 págs. 27, 28 párrs. 7, 8

Uj cuadrota pintanapajqa mana uj colorllatachu necesitanchej, manaqa ashkha coloresta. Llampʼu sonqo kanapajpis ashkha imas necesitakun. Llampʼu sonqo kanapajqa mana kʼacha runasllachu kananchej tiyan. Manaqa kʼumuykukoj sonqo, kasukoj, kʼacha sonqoyoj, mana manchachikojtaj kananchej tiyan. Kʼumuykukoj sonqo runaslla Diosta kasukunku, munaynintataj ruwanku. Jehová Diostaj munan kʼacha sonqoyoj kananchejta (Gál. 5:22; 2 Tim. 2:24). Chaywanpis Satanasqa mayta phiñakun Diospa munayninta ruwajtinchej. Chayrayku kʼumuykukoj sonqo kajtinchejpis chayri kʼachas kajtinchejpis kay mundomanta runas chejnikuwasunchejpuni (Juan 15:18, 19). Chaynejta mana manchachikoj runas kananchej tiyan. Rumi sonqoyoj runasqa runaykachanku, phiñarpakullanku, mana Jehová Diostapis kasukunkuchu. Satanasqa chay runas jina. Chantachá llampʼu sonqoyoj runasta chejnikun. Llampʼu sonqoyoj runasqa ruwasqasninkuwan rikuchinku Satanás manchay sajra kasqanta. Rikuchillankutaj Satanás llulla kasqanta. Imaraykuchus Satanasqa imata nejtinpis chayri imata ruwajtinpis llampʼu sonqoyojkunata mana Jehová Diosmanta karunchachiyta atinchu (Job 2:3-5). w19.02 págs. 8, 9 párrs. 3-5

Jehová Diosqa yacharqa babilonios manchariymanta kharkatinankuta. Imaraykuchus Medopersiamanta soldados babiloniosta atacananku karqa. Jehová Diosqa Medopersiamanta soldadoswan judiosta librananta nerqa (Isa. 41:2-4). Babiloniamanta runas, waj llajtayoj runaspis, enemigosninku qayllaykamushasqankuta reparaspa, mana manchachikunankupaj ninakorqanku: “Kallpachakuy”, nispa. Chantapis ashkha santosta ruwakorqanku: Kay dioskuna enemigosninchejmanta jarkʼawasunchej, nispa (Isa. 41:5-7). Jehová Diostajrí kamachisninta mana manchachikunankupaj nerqa: “Qanrí Israel, [waj llajtasmanta nisqaqa] kamachiy kanki”, nispa. Chantapis nillarqataj: Ama phutikuychu, noqaqa Diosniyki kani, nispa (Isa. 41:8-10). “Diosniyki kani” nispaqa, payta kasukoj judiosman nisharqa paykunamanta mana qonqakusqanta, llajtallanpunitaj kasqankuta. Chantá paykunaman nillarqataj: “Tukuy imapi yanapasqaykichej, librasqaykichejtaj”, nispa. Judiosqa Jehová Diosta uyarispa maytachá kallpachakorqanku (Isa. 46:3, 4). w19.01 pág. 4 párr. 8

Marcos 1:9-11 versiculosqa Jehová Dios, Jesús bautizakushajtin ñaupaj kutipi cielomantapacha parlamusqanta willawanchej. Diosqa Jesusman nerqa: “Qanmin munasqa Waway kanki. Qantaqa allinpaj qhawayki”, nispa. Jesusqa chayta uyarispa maytachá kusikorqa. Imajtinchus Jehovapuni nimorqa, Jesús Wawan kasqanta, payta munakusqanta, allinpaj qhawasqanta ima. Jehová nerqa: “Waway kanki”. Jesusqa manaraj jallpʼaman jamushaspa, cielopi uj ángel karqa, nisunman Diospa wawasninmanta ujnin karqa. Chanta, ¿imajtintaj Jehová Dios, Jesús bautizakushajtin “Waway kanki” nispa nerqa? Imajtinchus chay kutipi, Jehová Diosqa atiyninta Jesusman qorqa. Ajinamanta payta ajllarqa, cieloman kutipuspa Reytaj, Kuraj kaj Sacerdotetaj kananpaj. Chayrayku Jehová Diosqa, Jesusta ‘qanmin Waway kanki’ nispa nerqa (Luc. 1:31-33; 3:22; Heb. 1:8, 9; 2:17). w19.03 pág. 8 párrs. 3, 4

Satanasqa qallariymantapacha runasta mana allinta yuyaychaspa pantacherqa. Payqa Evaman nerqa: ‘Kusisqa kausakunaykichejpajqa mana Diostapunichu kasukunaykichej tiyan’, nispa (Gén. 3:1-6). Chaywanpis Satanasqa payllapi yuyasharqa. Satanasqa ni imata runasrayku ruwaspapis, munarqa Adanwan Evawan mirayninwan ima, payta kasukunankuta, yupaychanankutataj, Diosta yupaychanankumantaqa. Jehová Diostajrí tukuy imata runasrayku ruwarqa. Diosqa Adanman Evata yanapananpaj qorqa, paykunatataj uj kʼachitu huertaman churarqa, chaypitaj mana viejoyaspa wiñay wiñaypaj tiyakunankupaj. Chaywanpis Adanwan Evawanqa mana Diosta kasukorqankuchu. Jinamantataj Diosmanta karunchakorqanku, chaymantataj viejoyaspa wañuporqanku, imaynatachus uj kʼuturpasqa tʼikita qawirpapuspa chʼakipun, ajinata. Chaynejta noqanchejpis sufrishanchej (Rom. 5:12). May chhika runasqa mana Diosta kasukunkuchu, munaynillankutataj ruwanku (Efe. 2:1-3). Chaytaj kay diapaj texto nisqanman jinapuni. w18.12 pág. 20 párrs. 3, 4

Apóstol Pabloqa profesional karqa, griego parlayta, hebreo parlaytapis sumajta parlarqa (Hech. 5:34; 21:37, 39; 22:2, 3). Chaywanpis Pabloqa mana kay mundomanta runas jinachu yuyarqa, manaqa Dios jina yuyarqa. Chayrayku Diospa Palabranman jinapuni kausakorqa (Hech. 17:2; 1 Cor. 2:6, 7). Chantapis predicacionpi allinpuni rerqa, wiñay kausayta Diosninchej qonantataj suyakorqa (2 Tim. 4:8). Jehová Dios jina yuyajtillanchej allin riwasunchej, kusisqastaj kasunchej. Chayrayku Diospa kamachiykunasninta kasukunanchej kashan. Chaywanpis Jehová Diosqa mana pay jina yuyanapaj obligawanchejchu. ‘Allin kamachi yuyayniyojpis’, ancianospis mana obligawanchejchu Dios jina yuyanapaj (Mat. 24:45; 2 Cor. 1:24). Chayrayku sapa ujninchej kallpachakunanchej tiyan Jehová Dios jina yuyanapaj. w18.11 págs. 20, 21 párrs. 12, 13

Jehová Diosqa profeta Isaiasnejta nerqa israelitas jallpʼankuman kutipojtinku manaña chʼajwas kananta. Chantapis nerqa manaña sajra animalespis, sajra runaspis kananta. Nillarqataj wawaspis, awelitospis ni imamanta manchachikunankuta (Isa. 11:6-9; 35:5-10; 51:3). Chantapis Isaías nerqa: “Tukuy jallpʼaqa Tata Diosta rejsiywan juntʼa kanqa, imaynatachus mama qochaman yaku juntʼaykun, ajinata”, nispa. Chaytaj reparachiwanchej mana Israel nacionllachu Diosta rejsiywan juntʼa kananta, manaqa jallpʼantin. Chayrayku nisunman chay profeciaqa tumpamantawanraj juntʼakunanta. Isaiasqa watejmanta nillarqataj Babiloniamanta kutipoj israelitastaqa ni pi imanananta, ni sajra animalespis. Chantapis nerqa Edén huertapi jina jallpʼasninkupi tukuy ima poqonanta, yakupis ashkha kananta (Gén. 2:10-14; Jer. 31:12). Kay profeciasqa israelitaspa tiemponpi juntʼakorqa, aswan qhepamanpis juntʼakullanqataj. Chantapis profeta Isaías nerqa ciegospis, cojospis, joqʼaraspis chayri lojtʼituspis sanoyapunankuta. Chaytaj mana israelitaspa tiemponpichu juntʼakorqa. Imajtinchus Dios nerqa tukuy imaymana onqoykunata aswan qhepamanraj tukuchinanta. w18.12 pág. 5 párrs. 11, 12

¿Imastataj ruwasunman Diosninchejpa ñannillantapuni purinapaj? Jehová Diosninchejmanta ni jaykʼaj karunchakunapajqa, Bibliata estudianallapuni, yachakusqanchejpitaj tʼukurina. Chaypajqa tiempochakunanchej tiyan. Bibliata astawan estudiaspaqa astawan entiendesunchej, nitaj Jehová Diosninchejmanta karunchakuyta yuyallasunpischu. Bibliapis niwanchej: “Cheqa kajta rantikuy, amataj kacharikuychu yachaymanta, unanchaymanta, yuyaychaymanta ima”, nispa (Pro. 23:23). Bibliamantaqa mana yachakunallanchejchu tiyan. Manaqa yachakusqanchejman jina kausakunanchej tiyan. Bibliaj yuyaychaykunasninta entiendespaqa, aswan yachayniyojman tukusunchej. Yachayniyoj kaspataj Bibliaman jina kausakusunchej. Chantapis reparakusunchej kausayninchejpi wakin cambiostawan ruwananchej kasqanta. Ajinata reparakuspaqa Bibliata kasukunanchejpacha tiyan, imaraykuchus Bibliaj nisqasnenqa qolqemanta nisqaqa aswan allin (Pro. 8:10). w18.11 pág. 9 párr. 3; pág. 11 párrs. 13, 14

Jehová Diosninchejman qayllaykusqanchejqa ni imawan kikinchakunchu. Paymantataj ni imarayku karunchakuyta munasunmanchu. Chantapis mayta kusikunchej Bibliaj nisqasninta entiendespa. Imajtinchus Bibliata entiendesqanchejrayku Diosman qayllaykuyta atinchej (Col. 1:9, 10). Jehová Diosqa Sumaj Yachachej kasqanrayku Bibliaj nisqasninta entiendechiwanchej. Payqa Bibliapi sutinta yachachiwanchej. Yachachillawanchejtaj pay kʼacha kasqanta, munakuyniyoj kasqanta, pacienciayoj kasqanta, may atiyniyoj kasqanta, waj imastawan. Yachachillawanchejtaj mayta munakuwasqanchejrayku kʼata Wawanta qosqanta. Chantapis Bibliapi yachachiwanchej Jesús cielopi gobernashasqantaña, tumpamantawantaj kay jallpʼata gobernamunanta. Yachachillawanchejtaj imastachus ruwana kasqanta allinta kausakunapaj. Tukuy chaykunata yachaytaj Jehová Diospa qayllallanpipuni kanapaj yanapawanchej, aswan kusisqa kausakunapajtaj. w18.11 pág. 3 párrs. 1, 2

Llullakoj runasqa runasta engañayta atinkuman, chaywanpis Jehová Diosninchejtaqa mana engañayta atinkumanchu. Bibliaqa nin: “Tukuy ima, paypa qhawayninpi qhatarasqa kashan, sutʼipachataj”, nispa (Heb. 4:13). Ananiasmanta Safiramantawan parlarina. Paykunaqa jallpʼankuta venderqanku, chay vendesqankumantataj wakin qolqellata apostolesman qorqanku. Chay tiempomanta hermanoswan allinpaj qhawachikuyta munasqankuraykutaj, llullakuspa apostolesman nerqanku jallpʼa vendesqanku qolqeta enteronta jaywashasqankuta. Chaywanpis Jehová Diosninchejqa yacharqa llullakusqankuta, chayrayku paykunata wañucherqa (Hech. 5:1-10). Diablowan, mana pesachikoj llulla runaswan imaqa, “azufre nina qochaman” wijchʼusqas kanqanku. Nisunman wiñaypaj chinkachisqa kanqanku (Apo. 20:10; 21:8; Sal. 5:6). Jehová Diosninchejqa “mana wañoj runa jinachu llullakunampaj”. “Payqa mana jaykʼaj llullakunchu” (Núm. 23:19; Heb. 6:18). Jehová Diosqa chejnikun “llulla parlaykunata” (Pro. 6:16, 17). Jehová Diosninchejta kusichinapajqa cheqan kajtapuni parlananchej tiyan, manataj purajmanta llullanakunanchejchu tiyan. w18.10 pág. 8 párrs. 10-13

Ichapis patronninchej niwasunman cuotata churanata uj santota fiestachanapaj. Manaraj ajinapi rikukushaspaqa, allin kanman kunanmantapacha yuyaychakunanchej imatachus ruwananchejpi, ninanchejpipis. Ajinamanta Jehová Dios yuyasqanman jina ruwananchejpaj. Jehová Dios jina yuyasunchej chayqa, ni imarayku yawarta churachikusunchu. Nillataj churachikusunchu yawarmanta orqhokoj glóbulos rojos nisqata, glóbulos blancos nisqata, plaquetas nisqata, plasma nisqatapis (Hech. 15:28, 29). Chaywanpis sapa ujninchej ajllananchej tiyan imaynatachus operachikunanchejta, imaynatachus doctores yawarninchejta apaykachanankuta, waj imastawan. Chaykunata Diospa munasqanman jina ajllanapajqa, ñaupajmantaña Bibliaj yuyaychaykunasninta qhawarinanchej tiyan. Chaypajqa yawarmanta parlaj yachaqanasta publicacionespi estudiananchej tiyan. Chantapis yawarta mana churachikunapaj DPA nisqata juntʼachinanchej tiyan, doctorninchejwanpis parlarinanchej tiyan. Ajinamanta operachikuna patapi mana musphaykachashasunchu, nitaj manchachikusunchu imatachus ruwananchejmanta. w18.11 pág. 24 párr. 5; pág. 26 párrs. 15, 16

Jehová Diosqa tukuy imaymanamanta cuidawanchej, imaynatachus uj ovejero munakuywan ovejasninta cuidan, ajinata. Jehová Diosqa enemigosninchejmanta jarkʼawanchej. Chayta yachaytaj yanapawanchej mana imamantapis manchachikuspa tiyakunapaj. Astawanraj tukukuy pʼunchaykunapi tiyakushasqanchejrayku. Jehová Diosqa jatun ñakʼariy tiempopipis jarkʼallawasunpuni (Apo. 7:9, 10). Chayrayku jóvenes kaspapis, viejitos kaspapis, onqosqas kaspapis, suchus kaspapis, mana makiyoj kaspapis jatun ñakʼariy tiempopeqa mana manchachikusunchu. Astawanpis Jesuspa nisqanta yuyarikusunchej, pay nerqa: “Cheqanta sayaykuychej, umaykichejta oqharispa, imaraykuchus kacharichisqa kanaykichejqa qayllamushanña”, nispa (Luc. 21:28). Magogmanta Gog chinkachiyta munawajtinchejpis Jehová Diospi tukuy sonqo atienekusunchej. Magogmanta Gogqa ninakun may atiyniyoj uj qotu nacioneswan (Eze. 38:2, 14-16). Chay qotu naciones chinkachiyta munawajtinchejqa, Diosninchej salvanawanchejmanta mana iskaychakunanchejchu kanqa. Imaraykuchus yachanchej Jehová Dios kikillanpuni kasqanta. Payqa kamachisninta khuyakunpuni, salvanpunitaj (Isa. 26:20). w18.09 pág. 26 párrs. 15, 16

Israelitasqa kay pʼunchaypaj textopi imatachus Jehová Dios nisqanta uyarispa maytachá kusikorqanku. Amapuni qonqanachu Jehová Dios sapa ujninchejta munakuwasqanchejta. Bibliaqa niwanchej: “Payqa atiyniyoj, salvasonqataj. Tata Diosqa kusikonqa qanmanta”, nispa (Sof. 3:16, 17). Diosqa niwanchej ima problemapi rikukojtinchejpis kallpachanawanchejta, sonqochanawanchejtataj. Bibliaqa niwanchej: “Qankunaqa ñuñoj wawas jina kusikunkichej, makisninwan marqʼarikusonqachej, arphin patapitaj chhukurisonqachej. Imaynatachus mamaqa wawanta sonqochan, ajinallatataj noqapis qankunataqa sonqochasqaykichej”, nispa (Isa. 66:12, 13). Uj mamaqa munakuywan ñuñoj wawitanta marqʼarikuspa cuidan. Ajinallatataj Jehová Diospis munakuywan cuidawanchej. Arí, Jehová Diosqa maytapuni munakuwanchej (Jer. 31:3). w18.09 pág. 13 párrs. 6, 7

Unay tiempopi israelitasqa tukuy imaymanamanta yanapakuspa Diosta yupaychayta aterqanku (Éxo. 36:2; Neh. 11:2). Noqanchejpis kay tiempopi tukuy imaymanamanta yanapakuspa Diosta yupaychayta atinchej. Diostaqa jatunchasunman tukuy tiemponchejwan, kapuwasqanchejwan, imastachus ruwayta yachasqanchejwan ima. Chay jinamanta Diosta jatunchaspaqa sonqo juntʼasqa kasunchej, ashkha bendicionestataj japʼisunchej. Tantakuna Wasista ruwaysikuspa yanapakojkunaqa ashkha amigosta ruwakunku. Hermananchej Margiemanta parlarina. Payqa 18 watasta Tantakuna Wasista ruwaysikuspa yanapakusqa. Chay wataspeqa ashkha jovencitasta construccionmanta yachachisqa. Chaymanta parlaspa nin: “Jovencitaswan trabajaspaqa creeypi mayta kallpachanakoj kayku”, nispa (Rom. 1:12). Margie llakiykunapi rikukoshajtenqa, chay amigasnin mayta yanapasqanku, sonqochasqankutaj. Noqanchejpis Tantakuna Wasista ruwaysikuspa yanapakusunman. w18.08 págs. 25, 26 párrs. 9, 11

Apóstol Pablo chayta nishajtin Timoteoqa treintayoj jina kanman karqa. Timoteo jovenllaraj kajtinpis, Pabloqa congregacionpi jatun cargota qorqa. Chayta yachayqa reparachiwanchej jovenesta mana pisipaj qhawana kasqanta. Señorninchej Jesuspis treinta y tresniyojllaraj kashaspa ashkha imasta ruwarqa. Wakin lugarespi runasqa jovenesta mana respetankuchu. Chayraykutaj chay lugaresmanta wakin ancianospis, ichá mana munankumanchu jóvenes ancianos kanankuta chayri siervos ministeriales kanankuta wakichisqaña kajtinkupis. Bibliapeqa mana ninchu uj hermano anciano chayri siervo ministerial kananpaj, mashkha watayojpunichus kananta (1 Tim. 3:1-10, 12, 13; Tito 1:5-9). w18.08 págs. 11, 12 párrs. 15, 16

Ima noticiallatapis uyarishaspaqa allintapuni qhawarikunanchej tiyan, mana llulla noticiaswan umanchejta muyuchikushanapaj (Fili. 4:8, 9). Chayrayku ama tiemponchejta usuchinachu qhasi manakaj noticiasta Internetpi qhawaspa chayri mensajesta leespa. Chantapis allinta qhawarikunanchej tiyan Internetpi Diosta wasanchajkuna llullasta churasqankuta ama leenapaj chayri qhawanapaj. Diosta wasanchajkunaqa creeyninchejta llauchʼiyachiyta munanku Bibliamanta llullasta parlasqankuwan. Chayrayku llulla noticiasmanta allinta qhawarikuna. Imajtinchus chay noticiasqa Diosmanta karunchawasunman. Moisespa tiemponmanta parlarina. Moisesqa 12 israelitasta kacharqa Sumaj Jallpʼata qhawamunankupaj. Chay jallpʼamanta kutimuytawantaj, chunka qhawamojkunaqa llullasta parlaspa israelitasta manchacherqanku (Núm. 13:25-33). Jinamantataj israelitasqa “tutantin mayta qhaparerqanku, waqarqankutaj” (Núm. 14:1-4, 6-10). Israelitasqa chay chunka qhawamojkunaj nisqanku cheqachus manachus kasqanta yachanankumantaqa creeykorqankupacha, nitaj Jehová Diospi atienekorqankuchu. w18.08 pág. 4 párrs. 4, 5

Casi tukuy runaspis kʼachas kanku. Mundomanta wakin runasqa mana sajra imastapunichu ruwanku. Chaywanpis piensarinanchej tiyan chay jina runaswan masichakunanchej allinninchejpajchus manachus kananpi. Piensarillasunmantaj chay jina runas Diosman qayllaykunapaj yanapanawanchejpichus manachus. Chantapis qhawarisunman imastachus ñaupajman churashasqankuta, imasmantatajchus astawan parlasqankuta. Ichapis astawan parlanku ropamanta, qolqemanta, computadorata, celularta, tabletata rantiymanta, fiestasman riymanta, pujllaymanta chayri waj imasmanta. Qhawarinallanchejtaj tiyan wasa rimakuchus kasqankuta, millaytachus chansakusqankutapis. Imajtinchus Jesús nerqa: “Sonqopi imachus juntʼa kashan, chaymanta simeqa parlan”, nispa (Mat. 12:34). Amigosninchej Diosmanta karunchashawasqanchejta reparanchej chayqa, amaña paykunawan purinachu (Pro. 13:20). w18.07 pág. 19 párr. 11

Moisés 80 watasniyoj kashajtin, Jehová Diosqa payman nerqa: “Qanta kachasqayki Faraonman, Israelpa miraynin wawasniyta Egiptomanta orqhomunaykipaj”, nispa (Éxo. 3:10). Moisesqa chayta uyarispa mana ruwananpaj imaymana achakista churarqa. Chaywanpis Jehová Diosqa Moiseswan pacienciakorqa. Milagrosta ruwananpajpis atiyta qorqa (Éxo. 4:2-9, 21). Jehová Diosqa may atiyniyoj kasqanrayku Moisesta Egiptoman kachananpaj mancharichinman karqa, munajta mana munajtataj kachanman karqa. Chaywanpis Jehová Diosqa mana chaytachu ruwarqa. Astawanpis Moiseswan pacienciakorqa, kʼacha karqa, mana saqerpanantataj nerqa. Moisestaj Jehová Dios paywan kʼacha kasqanrayku israelitasta sumajta kamacherqa. Kallpachakorqataj Jehová Dios jina kʼacha kananpaj, llampʼu sonqo kananpaj, wajkunaj llakiykunasnintapis entiendenanpaj. Sichus qosa, tata chayri anciano kanki chayqa, Jehová Diosmanta mayta yachakuwaj. Kallpachakuy Jehová Dios jina señoraykita, wawasniykita, hermanosta ima kʼachamanta parlapayanaykipaj, pacienciakunaykipaj, khuyakunaykipaj, llakiyninkuta entiendenaykipaj ima (Col. 3:19-21; 1 Ped. 5:1-3). Jehová Dios jina, Jesucristo jinataj kanki chayqa, wajkuna qayllaykamullasonqanku llakiykunasninkuta willarisunankupaj. Paykunatataj kallpachayta atillanki (Mat. 11:28, 29). w18.09 págs. 24, 25 párrs. 7-10

Hermanosninchejwan uj sonqolla kʼachata kausakusunman. Chaypajqa hermanosninchejta kʼachamanta parlapayana, paykunamantataj khuyakuna. Ajinamanta congregacionpi hermanosninchejwan allinta kausakusunchej, ujchasqataj kasunchej. Chayrayku kallpachakuna tukuy hermanosta allinta rejsinapaj (2 Cor. 6:11-13). Tukuy tiempo kʼachas kanapaj kallpachakuna. Ichapis vecinosninchejqa kʼachas kasqanchejta reparaspa Jehová Diosmanta yachakuyta munankuman. Chayrayku allin kanman piensarinanchej vecinosninchej kʼacha runasta jinachus chayri sajra runasta jinachus qhawawasqanchejpi. Piensarillasunmantaj vecinosninchej allin ñawiwan qhawanawanchejpaj, wasinchejta kʼuchunchasqatachus chayri tʼustitachus japʼisqanchejpi. Chantapis piensarisunman wajkuna yanapanata necesitashajtinku yanapasqanchejpichus manachus. Chantapis allin kanman hermanosninchejta tapurinanchej, kʼachata kausakusqankurayku vecinosninku, escuelamanta compañerosninku, trabajomanta compañerosninku, familiaresninku ima imastachus paykunamanta nisqankuta (Efe. 5:9). w18.06 págs. 23, 24 párrs. 13, 14

Discípulo Estebanta wañuchejkunaqa Diosta yupaychashasqankuta yuyarqanku (Hech. 6:8, 12; 7:54-60). Tiempo pasasqanman jinataj, cristiano nichikojkuna ashkha runasta wañucherqanku Jehová Diosta yupaychashasqankuta yuyasqankurayku. Chaywanpis paykunaqa, runasta wañuchispa Diospa leyesninta pʼakisharqanku (Éxo. 20:13). Chaytaj reparachiwanchej, chay runasqa imachus allin kasqanta, imatajchus mana allin kasqanta mana reparayta atisqankuta. Mana pantanapajqa Diospa leyesnin, yuyaychaykunasnin ima mayta yanapawasunchej. Diospa Palabranqa may sumaj kashan “yachachinapaj, juchata reparachinapaj, tukuy imata cheqanchanapaj, cheqan kajta ruwayta yachachinapaj ima” (2 Tim. 3:16). Chayrayku Bibliataqa estudianapuni, yachakusqanchejpitaj tʼukurina, yachakusqanchejman jinataj kausakuna. Chayta ruwasunchej chayqa, imaynatachus Jehová Dios yuyasqanta entiendesunchej, pay jinataj yuyayta qallarisunchej. Ajinamanta cheqan kajtapuni ruwasunchej, pantajtinchejtaj sonqonchej juchachawasunchej. w18.06 págs. 16, 17 párrs. 3, 4

Romamanta soldadospa espadasninkoqa, 50 centimetrosniyoj jina karqa. Soldadosqa espadankuta sumajta apaykachaj kanku. Imajtinchus sapa día amañaj kanku. Apóstol Pabloqa, Diospa Palabran uj espada jina kasqanta nerqa. Chaytataj Jehová Dios qowarqanchej. Chaywanpis Diospa Palabrantaqa sumajta rejsinanchej tiyan. Ajinamanta pipis imapichus creesqanchejmanta tapuwajtinchej sumajta sutʼinchanapaj chayri pantasqa yuyaykunasninchejta cheqanchanapaj (2 Cor. 10:4, 5; 2 Tim. 2:15). Satanasta, supaykunatawan mana manchachikunanchejchu tiyan. Imajtinchus paykuna atiyniyoj kajtinkupis, Jehová Dioslla aswan atiyniyoj. Tumpamantawantaj Jesús gobernashajtin Satanaswan, supaykunawanqa presochasqa kanqanku. Waranqa watas juntʼakojtintaj chinkachisqa kanqanku (Apo. 20:1-3, 7-10). Arí, Jehová Diospa yanapayninwanqa Satanaspa contranpi sinchʼita sayaykusunman. Imajtinchus yachanchej Satanás ima mañasniyojchus kasqanta, jinallataj imatachus ruwayta munawasqanchejtapis. w18.05 pág. 30 párr. 15; pág. 31 párrs. 19-21

Adanqa yacharqa kataris mana parlayta atisqankuta. Chayrayku Adanqa, Eva uj katariwan parlasqanta nishajtin, repararqachá Evawan mana kataripunichu parlasqanta, manaqa uj ángel chay katarinejta parlasqanta (Gén. 3:1-6). Adanwan Evawantaj, pichus chay ángel kasqanta mana yacharqankuchu. Chaywanpis Adanqa, chay angelpa nisqanta kasuspa Diospa contranpi oqharikorqa (1 Tim. 2:14). Chayrayku Jehová Diosqa, nerqa chay sajra angelta chinkachinanta. Nillarqataj chay sajra ángel kamachisninman churanakunanta (Gén. 3:15). Jehová Diosqa mana jaykʼajpis nerqachu imachus chay sajra angelpa sutin kasqanta. Chaywanpis Adanwan Evawan juchallikusqankumantapacha 2.500 watasninman jina, nerqa pichus chay sajra ángel kasqanta (Job 1:6). w18.05 pág. 22 párrs. 1, 2

Wakin kuteqa mayta llakikunchej, predicashajtinchej runas Diospa Gobiernonmanta mana uyariyta munasqankurayku. Apóstol Pablopis mayta llakikorqa ajinapi rikukuspa. Payqa 30 watasta jina Diosmanta willarqa, ashkha runastataj yanaparqa cristianosman tukunankupaj (Hech. 14:21; 2 Cor. 3:2, 3). Jinapis wakin judiosllata cristianos kanankupaj yanaparqa. Imajtinchus ashkha judiosqa Pablota mana uyariyta munarqankuchu, astawanpis wakin judiosqa qhatiykacharqanku (Hech. 14:19; 17:1, 4, 5, 13). Ajinapi rikukuspataj Pablo nerqa: ‘Noqaqa Cristoj yachachisqan jina cheqata parlashani, llakiyniy jatun, sonqoypitaj mana tukukoj nanay tiyan’, nispa (Rom. 9:1-3). Arí, Pabloj sonqonqa mayta nanarqa Diospa khuyakuyninta judíos qhesachasqankumanta. Imajtinchus Pabloqa runasta munakusqanrayku mayta predicayta munaj. Noqanchejpis Pablo jinallataj, runasta munakusqanchejrayku predicamunchej (Mat. 22:39; 1 Cor. 11:1). w18.05 pág. 13 párrs. 4, 5

Apóstol Pablo nerqa, congregacionta ñaupajman apajkunapis kallpacharinata necesitasqankuta. Apóstol Pabloqa Romapi kaj hermanosman jinata nerqa: “Noqaqa rikuytapuni munashaykichej, Diosmanta qankunawan parlarinaypaj. Ajinamanta sinchʼita sayanaykichejpaj, astawanqa purajmanta kallpachanakunanchejpaj, qankunapis noqapis kikin creeyniyoj kasqanchejrayku”, nispa (Rom. 1:11, 12). Reparanchej jina, apóstol Pablopis kallpacharinata necesitarqa (Rom. 15:30-32). Noqanchejqa kallpachasunman Jehová Diospaj tiempo juntʼasqata trabajaj hermanosta. Wakin hermanosqa, “Señorllapi” nisunman Jehová Diosninchejta sirvejllawan casarakuyta munasqankurayku solteros qhepakunku. Chay hermanostapis kallpacharillasunmantaj (1 Cor. 7:39). Kallpachallasunmantaj creeyninkurayku qhatiykachasqa kaj hermanosta, onqosqa hermanostapis (2 Tes. 1:3-5). w18.04 pág. 21 párrs. 3-5