Mayo

Pasaj wataspi ashkha runasqa waj llajtasman ayqekorqanku. Chayrayku parlayninkupi imaynatachus saludarinata yachakusunman. Chantapis parlayninkupi wakin tapuykunata yachakusunman. Chaymantataj Internetpi jw.org nisqapi videosta, publicacionesta ima parlayninkupi rikuchisunman. Tatanchej Jehová Diosqa sumajta predicayta yachachiwanchej Cristiano Kausayninchej nisqa tantakuynejta. Chay tantakuypeqa yachakunchej imaynatachus uj revisitata ruwananchej kasqanta, imaynatachus runasman Bibliamanta yachachiyta qallarinanchej kasqantapis. Chantapis allin kanman tatas wawasninkuta comentayta yachachinanku. Wakin runasqa Bibliamanta yachakuyta qallarerqanku wawitasta tantakuypi comentajta uyarisqankurayku. Imajtinchus wawitasqa sonqetunkumantapacha comentanku (1 Cor. 14:25). w18.06 pág. 22 párrs. 7-9

Tukuypis niraj Jehová Diosta rejsishaspaqa, Jehová Diosmanta “karunchasqa” karqanchej (Efe. 2:12). Jehová Diostaj munakuywan yanapawarqanchej payman qayllaykunapaj (Ose. 11:4; Juan 6:44). Jesustaj munakuywan japʼikuwarqanchej, Diospa familianmanta kananchejpaj. Pantaj runas kajtinchejpis Jesús munakuywan japʼikuwasqanchejrayku ni pita chejnikunanchejchu tiyan. Juicio pʼunchay qayllitapiña kasqanrayku, runasqa astawan chejninakonqanku, wajkunata sajra ñawiwan qhawanqanku, tʼaqanakonqankutaj (Gál. 5:19-21; 2 Tim. 3:13). Noqanchejtaj Diospa kamachisnin kasqanchejrayku “patamanta jamoj” yachayman jina kausakuyta maskʼananchej tiyan. Ajinamanta allinta kausakunapaj, tukuytataj allinpaj qhawanapaj (Sant. 3:17, 18). Chayrayku waj llajtayoj runaswan amigos ruwakuna, culturankuta ama pisipaj qhawanachu, parlayninkutapis yachakuna. Chaykunata ruwaspaqa allinta kausakusunchej, cheqan kajtataj ruwasunchej (Isa. 48:17, 18). w18.06 pág. 12 párrs. 18, 19

Romamanta soldadosqa jukʼutanku churasqapuni maqanakuman rej kanku. Chay jukʼutankoqa mana pʼitikullajchu imajtinchus sumaj qarasmanta ruwasqa karqa. Manataj chakisninkuta nanachejchu. Chayrayku soldadosqa mana llustʼaspa purillaj kanku. Romamanta soldadosqa, jukʼutankuta churakoj kanku maqanakupi sinchʼita sayanankupaj. Noqanchejpis, “allin kawsaymanta” sumaj willaykunata jukʼutata jina churakusunman predicanallapajpuni (Isa. 52:7; Rom. 10:15). Chaywanpis wakin kutisqa, ichá predicayta manchachikusunman. Chayta astawan entiendenapaj Robertomanta parlarina. Payqa 20 watasniyoj, nintaj: “Colegiopeqa compañerosniyman predicayta pʼenqakoj kani. Mana yachanichu imajtinchus pʼenqakusqayta. Pero kunanqa compañerosniyman predicay mayta gustawan”, nispa. Ashkha cristiano jovenesqa, ninku sumajta wakichikojtinku mana manchachikuspa predicayta atillasqankuta. w18.05 pág. 29 párrs. 9-11

Jesusqa yachachisqasninman nerqa: “Sonqo tiyaykuyniyta qankunaman qoykichej”, nispa (Juan 14:27). Predicallasunpuni chayqa, sonqo tiyasqa kasunchej, Jehová Diosta, Jesustawan kusichisqanchejrayku (Sal. 149:4; Rom. 5:3, 4; Col. 3:15). Jesús yachachisqasninman kusisqallapuni kanankuta niytawan, purajmanta munanakunankuta nerqa (Juan 15:11-13). Chantá Jesusqa yachachisqasninman nerqa: ‘Noqaqa amigosníy niykichej’, nispa. Chaywanpis Jesuspa yachachisqasnin amigosnillanpuni kanankupajqa, poqonallankupuni karqa, nisunman predicanallankupuni karqa (Juan 15:14-16). Iskay wata ñaupajtataj, Jesusqa yachachisqasninman nerqa: “Rishaspataj willamuychej: ‘Cielopi kaj Gobiernoqa qayllapiña kashan’”, nispa (Mat. 10:7). Chayrayku Jesusqa wañuchisqa karqa chay diaj ñaupaj chʼisinpi, yachachisqasninman nerqa sinchʼita sayaspa predicamunallankutapuni (Mat. 24:13; Mar. 3:14). w18.05 págs. 20, 21 párrs. 15, 16

Joven, Jehová Diosta kusichiy, paypaj astawan llankʼanaykipajtaj kallpachakuy. Ashkha jovenesqa munasqallankuta ruwaspa kusirikunku. Chayrayku joven, ichá qantapis imata ruwanankupajpis wajyarikusunkuman, paykunawan kusirikunaykipaj. Chay kutispi ama qonqaychu Jehová Diosninchejta kusichinayki kasqanta, paypaj astawan llankʼanaykipajtaj kallpachakunayki kasqanta. Chayrayku ama waj jóvenes jina munasqaykita ruwaspa musphaykachaychu. Arí, amapuni waj jóvenes jina imatapis ruwaychu kusirikushasqankuta rikusqaykiraykullaqa. Joven, mana waj jóvenes jina imatapis ruwarpanaykipajqa, yuyayniyoj runa jina “sajra kajta rikuspa” pakakuy (Pro. 22:3). Chantapis tʼukuriwaj waj jóvenes jina ruwajtiyki imaspichus rikukunaykipi. Chantapis kʼumuykukoj sonqoyoj kay, kurajkunata kasukuspa. Arí, tatasniykita, congregacionmanta experienciayoj hermanostapis kasukuypuni (1 Ped. 5:5, 6). Chayrayku joven, kʼumuykukoj sonqoyoj kay yuyaychasusqankuta kasukunaykipaj. w18.04 págs. 28, 29 párrs. 14-16

Jesusqa Asia Menorpi kaj wakin congregacionesman nerqa imastachus allinta ruwashasqankuta. Tiatira congregacionmanta parlaspa, Jesusqa nerqa: “Yachani imastachus ruwasqaykita, munakusqaykita, creesqaykita, Diosta sirvisqaykita, aguantasqaykitapis. Yachallanitaj kunallanraj ruwasqasniykipis, ñaupaj ruwasqasniykimanta nisqaqa aswan sumaj kasqanta”, nispa (Apo. 2:19). Jesusqa mana nillarqachu ruwasqasninku, ñaupaj ruwasqasninkumanta nisqaqa aswan sumaj kasqanta. Manachayqa nerqa ajinata ruwanankupaj munakuyninku, creeyninku, aguantasqanku ima yanapasqanta. Jesusqa chay congregacionmanta wakin hermanosta kʼamirispapis paykunata kallpachaspa parlayta qallarerqa, tukucharqataj (Apo. 2:27, 28). Jesusqa congregacionespa uman, nisunman tukuy congregaciones paypa cargonpi kashanku. Chayrayku payqa imastachus payrayku ruwasqanchejmanta mana agradecekunawanchejpunichu tiyan. Chaywanpis payqa agradecekuwanchejpuni. Ancianosqa maytapuni Jesusmanta yachakunkuman. w19.02 pág. 16 párr. 10

Ñaupa tiempopi Jehová Diosqa hermanosta, congregacionesta ñaupajman apajkunatawan apostolesnejta kallpacharqa. Apostolesqa Pedrota, Juantawan kacharqanku. Paykunataj creejkunapaj Diosmanta mañaporqanku, Diospa atiyninta japʼinankupaj (Hech. 8:5, 14-17). Felipewan mosoj hermanoswanqa, may kallpachasqachá kasharqanku apóstoles yanapasqankumanta. Kay tiempopipis Diospa Llajtanta Kamachejkunaqa, mayta kallpachawanchej. Kallpachallankutaj betelitasta, Diospaj astawan llankʼajkunatapis. Noqanchejqa ñaupa tiempomanta cristianos jinallataj mayta kusikunchej, Diospa Llajtanta Kamachejkuna kallpachawasqanchejmanta. Chantapis 2015 watapi Diospa Llajtanta Kamachejkunaqa, Jehová Diosmanta karunchakojkunata kallpachanankupaj Jehovaman kutinpuy nisqa folletota orqhorqanku. w18.04 pág. 19 párrs. 18-20

May chhika runasqa, ninku munaynillankuta ruwaspa kusisqa kanankuta. Chaywanpis munaynillanchejta ruwasunman chayqa, chʼajwasllapichá rikukusunman. Chayrayku tukuynejpi leyesta churakun. Chaymanta parlaspa, uj libro jinata nin: “Sapa lugarpi leyesta churakun, runaspa derechosninkuta valechinapaj. Chantapis waj leyesta churakullantaj, wakin imasta mana ruwanankupaj”, nispa. May chhika leyes mana entiendenapaj jina kasqankurayku, abogados, jueces ima tiyan, chay leyesta valechinankupaj. Uj pacha, Jesús yachachisqasninman jinata nerqa: “Pichus juchata ruwayman yachasqa kajqa, juchaj esclavon”, nispa. Chantapis nillarqataj: “Noqachus kacharichisqaykichej chayqa, cheqamanta kacharichisqa kankichej”, nispa (Juan 8:34, 36). Reparanchej jina, juchamanta kacharichisqa kanapajqa, Jesuspa nisqasninta kasukunanchej tiyan, yachachisqanmantaj tukunanchej tiyan. w18.04 págs. 6, 7 párrs. 13, 14

Wajkuna noqanchejmanta llakikojtinku kusikunchej. Chay jina runasqa, imaynachus kashasqanchejta tapuriwanchej, kallpachakunkutaj entiendenawanchejpaj. Paykunaqa niraj imata nishajtinchej, “noqa yanaparisqayki” niwanchejpacha. Ajina runastaqa munakunchej. Imaraykuchus llakiyninchejta, llakiyninkupis kanman jinata qhawanku, noqanchejwan ‘khuskataj ñakʼarinkuʼ. Tukuy cristianos wajkunamanta llakikunanchejtaj, khuyakunanchejtaj tiyan. Jinapis mana chayta ruwayta atillanchejchu. Juchasapas kasqanchejrayku, noqallanchejpi yuyayman yachasqa kanchej (Rom. 3:23). Wakintaj mana wajkunamanta khuyakuyta atillanchejchu, wasinchejpi mana yachachiwasqanchejrayku, chayri ñaupa kausayninchejrayku. Chantapis kay qhepa pʼunchaykunapi, runasqa “paykunallata munakojkuna” kanku, manataj wajkunapi piensankuchu. Chay jina runas chaupipi kausasqanchejrayku, mana wajkunamanta llakikuyta atillanchejchu (2 Tim. 3:1, 2). Astawan khuyakuyniyoj kanapajqa, Jehová Diosmanta, Jesusmantawan yachakusunman. w19.03 pág. 14 párrs. 1-3

Diosqa kamacherqa: ‘Ama runa masiykej imasninta munapayankichu’, nispa (Deu. 5:21; Rom. 7:7). Jehová Diosqa chayta kamachispa israelitasta nisharqa sonqonkuta waqaychanankuta, nisunman mana sajra imaspi yuyanankuta, nitaj munapayanankuta. Imaraykuchus pay yacharqa sonqonchejpi sajra imas kajtin sajra imasta ruwananchejta. Rey Davidqa mana sajra runachu karqa. Chaywanpis uj kutipi casada warmita munapayarqa. Chay munaynintaj juchallicherqa (Sant. 1:14, 15). Davidqa chay warmiwan puñuykuspa juchallikorqa, chay warmej qosantataj engañayta munarqa, mana engañayta atispataj uj maqanakupi wañuchicherqa (2 Sam. 11:2-4; 12:7-11). Jehová Dios mana rijchʼaynillanchejtachu qhawasqanta, manachayqa sonqonchejta (1 Sam. 16:7). Jehová Diosmantaqa ni imata pakasunmanchu. Payqa yachan imapichus yuyasqanchejta, imatachus munapayasqanchejta, imatachus ruwasqanchejtapis. Chaykunata yachaspapis allin imasta noqanchejpi maskʼan, allin imasta ruwanapajtaj yanapawanchej. Chaywanpis Diosqa munan imaspichus yuyashasqanchejta reparakunanchejta. Munantaj sajra imaspi yuyashasqanchejta reparajtinchej, chay yuyayta wijchʼunanchejta manaraj ima juchatapis ruwashajtinchej (2 Cró. 16:9; Mat. 5:27-30). w19.02 pág. 22 párrs. 9, 11

Biblia niwanchej: “Moisesqa aswan llampʼu sonqoyoj karqa, kay pachapi tukuy runasmanta nisqaqa”, nispa (Núm. 12:3). Llampʼu sonqosmanta parlaspa wakin runasqa ninku paykuna llauchhus, iskayrayajkuna, qʼewastaj kasqankuta. Chaywanpis Moisesqa mana ajinachu karqa. Payqa kallpasapa karqa, manataj iskayrayajchu, nitaj manchachikojchu. Jehová Diospa yanapayninwantaj Egiptoj reyninwan mana manchachikuspa parlamorqa. Chantapis ichá 3 millones runasta jina chʼin pampanta pusarqa, paykunatataj yanaparqa enemigosninkuta atipanankupaj. Problemasninchejqa mana Moisespa problemasnin jinachu kanku. Chaywanpis sapa día sajra runas siminakuwanchej chayri churanakuwanchej. Jinapi rikukuspaqa mana llampʼu sonqo kayta atillanchejchu. Chaywanpis llampʼu sonqo kanapaj kallpachakunanchej tiyan. Imaraykuchus Jehová Dios jinata niwanchej: “Llampʼu sonqoyojkunatajrí kay pachata herenciata jina japʼenqanku”, nispa (Sal. 37:11). Piensarisunman llampʼu sonqo runaschus manachus kasqanchejpi. Piensarillasunmantaj wajkuna llampʼu sonqo runasta jinachus manachus qhawawasqanchejpi. w19.02 pág. 8 párrs. 1, 2

Jehová Diosqa allin kajta, mana allin kajta reparayta atinapaj jina ruwawarqanchej. Adanwan Evawanpis imachus allin kasqanta, imatajchus mana allin kasqanta reparayta aterqanku. Chayrayku Diosta mana kasukojtinku sonqonku juchacharqa, Diosmantataj pakaykukorqanku. Allin kajta, mana allin kajta reparayta atisqanchejrayku, cheqan kajta ruwayta atinchej. Chaywanpis Bibliata mana estudiajtinchejqa, sajra kajta ruwayta qallarisunman. Chayta astawan entiendenapajqa, uj barcomanta parlarina. Barcoj volanten fregasqa kajtenqa, sinchʼi wayra kajtin, yakuspis manchayta qhollchoqeyajtin barcoqa wistʼuykapunman. Barcoj volanten mana fregasqachu kajtinrí, barcoqa cheqanta renqa. Fregasqa volanteqa Bibliata mana estudiasqanchejwan ninakunman. Imajtinchus mana estudiaspaqa chay barco jina wistʼuykapusunman. Bibliata mana estudiasunchu chayqa, sajra kajta mana reparayta atillasunchejchu (1 Tim. 4:1, 2). Chantapis “mana allin kajta” allin kajta jina qhawayta qallarisunman. w18.06 pág. 16 párrs. 1-3

Kay tiempomanta runasqa, mana reparayllata yuyayninkuta chimpaykuchiwasunman. Por ejemplo, wakin noticiastaqa uj partidota apoyachinawanchejpaj jina escribinku. Wakin noticiastataj escribinku profesional kayta chayri qhapaj kayta munachinawanchejpaj jina. Wakin peliculaswan libroswantaj, ruwasqa kashanku allinnillanchejta maskʼayta chayri familianchejpa allinnillanta maskʼayta munachinawanchejpaj. Chaywanpis ajinata yuyayqa mana Bibliaj nisqanman jinachu kashan. Imajtinchus Bibliaqa niwanchej Jehová Diosta munakojtillanchej kusisqa kananchejta (Mat. 22:36-39). Wakin imaswan kusirikoyqa mana juchachu. Chaywanpis sumajta qhawarikunanchej tiyan. Por ejemplo, piensarisunman mundomanta runaspa yuyayninta reparayta atisqanchejpichus manachus. Piensarillasunmantaj wawasninchejman yuyaychashasqanchejpichus manachus wakin peliculasta mana qhawanankupaj, wakin librostapis mana leenankupaj. Chantapis piensarisunman allin peliculastachus qhawashasqanchejpi chayri manachus. Piensarillasunmantaj wawasninchejman Jehová Diospa chejnisqan imasta chejniyta yachachishasqanchejpichus manachus. w18.11 pág. 22 párrs. 18, 19

Jehová Diosninchejqa noqanchejwan kasqanta rikuchinawanchejpaj, munakuwanchej, uyariwanchej, tukuy ima necesitasqanchejtataj qowanchej. Payqa mayta munakuwasqanchejrayku niwanchej: “Noqaj ñawpaqeypi may kʼacha, allintaj kanki, munakuykitaj”, nispa (Isa. 43:4). Jehová Diospa munakuyninmantaqa ni imapis tʼaqawasunmanchu. Chantapis payqa khuyakuwasunchejpuni (Isa. 54:10). Chay versículo nisqanman jina wakin problemasninchejqa mayu jina kanman, wakin problemasninchejtaj laurashaj nina jina kanman. Chaywanpis Jehová Diosqa mana saqenqachu problemaswan atipachikunanchejta chayri anchata sufrinanchejta. Manallataj saqenqachu chay problemasrayku paymanta karunchakunanchejta. Ajina kajtinpis Diosqa mana niwanchejchu problemasninchejta chinkachinanta. Astawanpis niwanchej ima problemapi rikukojtinchejpis noqanchejwan kananta yanapanawanchejpaj. Diosninchejqa wañuy patapiña kashajtinchejpis yanapawasunchej mana anchata llakikunapaj, ni imarayku paymanta karunchakunapajtaj (Isa. 41:13; 43:2). Mana manchachikuspa ima problemata aguantanapajqa Jehová noqanchejwan kashasqanpi atienekuna. w19.01 págs. 3, 4 párrs. 4-6

Profesoreswan, waj runaswanqa jovenesman tukuy imata yuyaychanku. Ichapis ninkuman qhapajyanankupaj profesionales kanankuta. Chaywanpis Jehová Diosqa jovenesman mana runas jinachu yuyaychan. Diosqa munan sumaj estudiantes kanankuta, colegiota tukuytawan trabajoyoj kanankupaj (Col. 3:23). Chantapis Jehová Diosqa munan yuyaychaykunasninman jina imatapis ruwanankuta. Chayrayku jovenesta Bibliawan yuyaychan kay qhepa pʼunchaykunapi payta kusichinankupaj (Mat. 24:14). Jehová Diosqa yachan imachus aswan qhepaman kananta, maykʼajchus kay mundoj imasninpa tukukuynin chayamunantapis (Isa. 46:10; Mat. 24:3, 36). Chantapis Jehová Diosqa jovenesta sumajta rejsin. Payqa yachan imaschus jovenesta kusichinanta, imastajchus llakichinanta. Runasqa imatapis yuyaychallawasunman, chaywanpis chaykunaqa mana allinninchejpajchu kanman. Imaraykuchus runasqa mana Bibliaman jinachu yuyaychawanchej. w18.12 pág. 19 párrs. 1, 2

David nerqa: “Llampʼu sonqoyojkunatajrí kay pachata herenciata jina japʼenqanku, allin kawsaypitaj kusisqa kanqanku”, nispa. Chantapis nerqa: “Cheqan runasqa kay pachata herenciankupaj japʼenqanku, chaypitaj wiñaypaj kawsanqanku”, nispa (Sal. 37:11, 29; 2 Sam. 23:2). Jehová Diospa munayninta ruwajkunataj, chayta yachaspa suyakorqanku kay jallpʼa Edén huertaman jina tukunanta, nisunman uj Paraisoman tukunanta chaypi tiyakunankupaj. Tiemponmantaj ashkha israelitasqa, Jehová Diosmanta karunchakuspa llulla diosesta yupaycharqanku. Chayrayku Jehová Diosqa saqerqa babilonios israelitaspa jallpʼankuta japʼikapunankuta, israelitastataj esclavosta jina apakapunankuta (2 Cró. 36:15-21; Jer. 4:22-27). Chaywanpis Diospa profetasnenqa, nerqanku israelitas 70 watasninman jallpʼankuman kutipunankuta. Chaytaj juntʼakorqapuni. Chaywanpis tumpamantawan chay profeciasqa paraisopi watejmanta juntʼakullanqataj. w18.12 pág. 4 párrs. 9, 10

Kay mundomanta runasqa mana Biblia nisqanman jinachu yuyanku. Chayrayku mana yuyanallanchejpischu tiyan mundomanta runas jina yuyay allin kasqanta. Jesús nerqa: “Uj runaj yachaynenqa cheqan kajta ruwasqanpi yachakun”, nispa (Mat. 11:19). Runas tukuy imata rikhurichejtinkupis mana chinkachiyta atinkuchu guerrasta, chejninakuyta, wañuchinakuyta ima. Chantapis khuchichakuy kausayta mana juchapajchu qhawanku. Chaywanpis runasqa millay imasta ruwaspa kausakusqankurayku familiankupi mana kusisqachu kausakunku, onqonku, waj llakiykunapiwan rikukunku. Jehová Diosta kasukojkunarí mana chay runas jinachu llakiypi rikukunku, manaqa familiankuwan kusisqa kausakunku, hermanoswanpis allinta apanakunku (Isa. 2:4; Hech. 10:34, 35; 1 Cor. 6:9-11). Reparanchej jina Jehová Diospa kamachiykunasninta kasukoyqa allinninchejpaj. w18.11 pág. 20 párrs. 8-10

Tukuypis kallpachakunchej familiaresninchejwan allinta kausakunapaj, miskʼi simiwan parlapanapaj ima. Chaywanpis mana Jehová Diospa kamachiykunasninta pʼakisunmanchu familiaresninchejta kusichinanchejraykullaqa. Chantapis Biblia niwanchej amigosninchej Jehová Diosta sirvejkuna kananku kasqanta. Jehová Diospa ñannillantapuni purinapajqa paypa ñaupaqenpi llimphus kananchej tiyan (Isa. 35:8; 1 Ped. 1:14-16). Bibliamanta yachakuyta qallarishaspaqa, Bibliaj nisqanta kasukunapaj kausayninchejpi cambiosta ruwarqanchej. Wakintaj mayta kallpachakorqanchej millay kausayninchejta saqepunapaj. Chayrayku kunanqa allinta qhawarikunanchej tiyan mana ñaupa kausayninchejman kutirinapaj. Millay juchapi mana urmanapajqa chayri sajra munayninchejwan mana atipachikunapajqa, piensarisunman llimphus kananchejpaj Jehová Dios kʼata Wawanta noqanchejrayku qosqanpi (1 Ped. 1:18, 19). Ni jaykʼaj qonqananchejchu tiyan Señorninchej Jesucristo may valorniyoj yawarninwan juchamanta kacharichiwasqanchejta. Chayta yuyarikuspaqa, Diospa ñaupaqenpi llimphusllapuni kanapaj kallpachakusunchej. w18.11 pág. 11 párrs. 10, 11

Diospaj astawan llankʼajkunaqa ninku, kausayninkupi cambios kajtin kusisqallapuni kanankupaj predicay yanapasqanta. Arí, kausayninchejpi ima cambiopis kajtenqa sonqo tiyaykusqa kayta atisunman. Chaypajqa predicanallanchejpuni tiyan, Jehová Diospitaj atienekunanchej tiyan. Kusiywan ima cambiotapis chayri ima llakiytapis aguantaspaqa, astawan Jehová Diosman qayllaykusunchej. Kay sajra mundopi tiyakusqanchejrayku kaymanta jinalla ima llakiypis chayamuwasunman chayri kausayninchejpi ima cambiopis kanman. Por ejemplo, ichá waj ladopi Diosta sirvinanchejta niwasunman chayri waj ruwanasta japʼisunman manachayri onqorpasunman chayri familiaresninchejta cuidananchej kanqa. Imapi rikukuspapis Jehová Dios maychus tiemponpi yanapanawanchejpi atienekuna. Imajtinchus payqa noqanchejmanta llakikun (Heb. 4:16; 1 Ped. 5:6, 7). Ima llakiypi rikukuspapis ruwanasninchejta juntʼanapaj kallpachakunallapuni. Jehová Diosmantaj llakiyninchejta willakuna, yanapanawanchejpitaj atienekuna. Chaykunata ruwajtinchejqa imapi rikukojtinchejpis Jehová Dios sonqonchejta tiyaykuchenqa. w18.10 pág. 30 párr. 17; pág. 31 párrs. 19, 22

Bibliaqa niwanchej Jehová Dios khuyakuywan kamachisninta yanapasqanta. Jehová Dios Samuelta kʼachallamanta yanapasqanmanta yachakuna. Samueltaqa yanaparqa kuraj kaj sacerdoteta juchachananpaj. Chaytatataj willawanchej 1 Samuel 3:1-18. Jehová Diospa leyninpi wawasman jinata kamacherqa: ‘Machu runastaqa jatunpaj qhawaychej. Nitaj pichus llajtaykita kamachejta maldecinkichu’, nispa (Éxo. 22:28; Lev. 19:32). Chayrayku Samuelqa Diospa nisqasninta mana Eliman willayta atillarqachu. Bibliapis jinata niwanchej: “Samuelqa manchachikorqa Eliman willayta chay mosqoypi jina tukuy rikusqanta”, nispa. Chaywanpis Diosqa Samuelta yanaparqa mana manchachikuspa Eliman willananpaj. Chaypajtaj Diosqa Elita reparacherqa Samuelwan pay parlashasqanta. Ajinamantataj Eliqa Samuelman nerqa: “Tata Diosqa imatataj nisorqa? Mana uj chhikanta pakarispa willariway”, nispa. Samueltaj willarqa tukuyninta, mana uj chhikanta pakarispa. Paypa willasqantaj rijchʼakorqa uj profeta aswan ñaupajta willasqanman (1 Sam. 2:27-36). Samuel wawallaraj kashajtin imaschus pasasqanta yachayqa, reparachiwanchej Jehová Dios may yachayniyoj kasqanta, maykamallachus imatapis ruwayta atisqanchejta entiendesqanta ima. w18.09 pág. 23 párr. 2; pág. 24 párrs. 4, 5

Kay tiempopeqa mana autoridadesllachu llullakunku. Uj rejsisqa revista jinata nin: “Runasqa churasqa kanchej llullakunanchejpaj, nitaj juchata jinachu qhawanchej”, nispa. Chay revista nillantaj: “Runasqa llullakunku mana castigasqas kanankupaj, juchankuta mana rimarinankupaj, sajra ruwayninkuta pakanankupaj, qolqeta astawan gananankupaj chayri imapipis atipanankupaj”, nispa. Chay revista nillantaj wakin runasqa amigosninkuman, familiankuman, trabajomanta compañerosninkuman chayri pillamanpis mana manchachikuspa llullakusqankuta. Llulla runas kasqanrayku runasqa ni pipi confiankuchu, qhariwarmispis separakapunku. Davidqa Jehová Diosman nerqa: “Qanqa munanki runa chʼuwa sonqo kananta”, nispa (Sal. 51:6). Davidqa sutʼita yacharqa Jehová Dios chʼuwa sonqoyoj kananchejta munasqanta. Chayrayku ‘amapuni llullataqa parlanachu ujkuna ujkunawan’ (Zac. 8:16). w18.10 pág. 7 párr. 4; pág. 8 párrs. 9, 10; pág. 10 párr. 19

1513 watapi Jesús niraj jamushajtin, israelitasqa Egiptomanta llojsimorqanku. Paykunaqa 3 millones kuraj karqanku. Paykuna ukhupitaj karqanku wawas, awelitos, onqosqas, cojitospis. Chayrayku israelitasqa uj sumaj kamachejta necesitarqanku. Paykunata kʼachallamanta pusananpaj, llakiykunasninkuta entiendenanpaj ima. Ajinatapunitaj Jehová Dios israelitasta pusarqa Moisesnejta. Israelitasta chʼin pampanejta sumajta pusarqa mana manchachikunankupaj (Sal. 78:52). Chantapis Jehová Diosninchejqa israelitas mana manchachikunankupaj paykunata sumajta organizarqa. “Israelitasqa Egiptomanta sumaj wakichisqas llojserqanku maqanakuman llojsej soldados jina” (Éxo. 13:18). Israelitasqa sumaj organizasqas kasqankurayku repararqanku Jehová Dios enemigosninkumanta jarkʼashasqanta. Chantapis Jehová Diosqa pʼunchaypi “phuyuwan paykunata pusarqa, tutantaj nina kʼanchaywan” (Sal. 78:14). Israelitasqa Jehová Diospi mayta atienekorqanku, atienekunallankupunitaj karqa. w18.09 pág. 26 párrs. 11, 12

Unay tiempomanta Jehová Diosninchejpa kamachisninpis problemaspi rikukuspa wañupullaytaña munarqanku. Por ejemplo Jobqa, manchay llakisqa kashaspa jinata nerqa: “Manaña kayta atinichu, nitaj kawsaytapis munaniñachu”, nispa (Job 7:16). Jonaspis manchay llakisqa kashaspa nerqa: “Tata Dios, mañakuyki wañuchinawaykita; allin kanman wañupunay kawsanaymantaqa”, nispa (Jon. 4:3). Profeta Eliaspis llakisqa kashaspa nerqa: “¡Señor Diosníy, kaykamallaña! Kawsayniyta qechupuway”, nispa (1 Rey. 19:4, Diospa Simin Qelqa, 2004). Chaywanpis Jehová Diosqa kamachisninta munakusqanrayku mana munarqachu wañupunankuta. Nitaj paykunata qhesacharqachu wañupullaytaña munasqankuta nejtinku. Astawanpis Jehová Diosqa paykunata munakuywan yanaparqa, payta tukuy sonqo sirvinallankupajpuni. w18.09 pág. 13 párr. 4

Tatanchej Jehová Dioswan khuska llankʼajkunaqa, wasinkuman wajkunata wajyarikuyta yachanku. Griego parlaypi “wasinchejman wajyarikoyqa”, niyta munallantaj “forasteroswan kʼacha kay” (Heb. 13:2, sutʼinchaynin). Bibliapeqa niwanchej imaynatachus wakin runas wajkunata wasinkuman wajyarikusqankuta chayri wajkunawan kʼachas kasqankuta (Gén. 18:1-5). Chayrayku atishaspaqa, tukuyta yanapana creeypi hermanosninchejpis kachunku chayri manapis (Gál. 6:10). Chantapis Jehová Diosninchejpa munayninta ruwanchej congregacionesta waturikoj hermanosta wasinchejman wajyarikuspa (3 Juan 5, 8). Paykunata wajyarikojtinchejqa, purajmanta kallpachanakuyta atisunchej (Rom. 1:11, 12). Diospa Palabranqa hermanosta yuyaychan, Jehová Diosninchejwan khuska llankʼayta atisqankuta siervos ministeriales, ancianos ima kanankupaj kallpachakuspa (1 Tim. 3:1, 8, 9; 1 Ped. 5:2, 3). Chay ruwaykunata japʼiyta munajkunaqa, hermanosta yanapayta, kallpachayta ima munanku (Hech. 6:1-4). Congregacionpi chay jinasmanta yanapakoj hermanosqa kusisqa kanku. w18.08 pág. 24 párr. 6; pág. 25 párrs. 7, 10

Timoteoqa congregacionpi jatun cargoyoj kaspapis respetowanpuni, munakuywantaj kuraj hermanosta parlapayanan karqa. Ichapis uj kuraj hermano yachashaspa juchallikunman chayri wajkunata Jehová Diosninchejpa contranpi juchallikunankupaj tanqanman. Jehová Diosninchejqa chay jina hermanota juchachanqa kurajña kajtinpis. Chaymanta parlaspa Biblia jinata nin: “Juchasapaqa pachaj watayoj kaspapis maldecisqa kanqa”, nispa (Isa. 65:20, Traducción del Nuevo Mundo de las Santas Escrituras). Profeta Ezequiel mosqoypi jina rikusqanpis, chayqa ajinapuni kananta rikuchin (Eze. 9:5-7). Bibliaqa Jehová Dios ‘Machu Runa’ kasqanta nin, chayrayku payta jatunpaj qhawananchej tiyan (Dan. 7:9, 10, 13, 14). Ajinata Jehová Diosninchejta qhawasunchej chayqa, mana manchachikuspa juchallikoj hermanota cheqan ñanman kutirichimuyta atisunchej kurajninchej kajtinpis (Gál. 6:1). w18.08 pág. 11 párrs. 13, 14

Tukuyninchej sumajta reparayta yachananchej tiyan imatachus uyarisqanchej ciertochus chayri manachus kasqanta (Pro. 3:21-23; 8:4, 5). Mana sumajtachu reparayta yachasunchej chayqa, Kuraj Supaywan mundonpi kaj runaswan ima “qhasi manakaj parlaykunawan” chʼaukiyawasunman (Efe. 5:6; Col. 2:8). Imastachus uyarisqanchej ciertochus manachus kasqanta yachanapajqa, tukuy imataraj sumajta yachananchej tiyan. Kay tiempopi noticiastaqa uyarinchej telenejta, radionejta, Internetnejta, waj imasnejtawan. Amigosninchejpis ichá mensajesta apachimuwasunman uj noticiata willarinawanchejpaj. Chaywanpis wakin runasqa noticiasta yapasqata chayri pantasqata willawasunman. Chayrayku ima noticiatapis uyarispa allinta qhawarikunanchej tiyan. w18.08 pág. 3 párrs. 1, 3

Jehová Diosninchejqa, María sutiyoj doncellata ajllarqa Jesuspa maman kananpaj. Mariaqa wajcha karqa, Nazaret llajtitapitaj tiyakorqa. Chay juchʼuy llajtitaqa Jerusalenmanta, Diospa templonmantawan karupi kasharqa (Luc. 1:26-33). Jehová Diosqa Mariata ‘allinpaj qhawarqa’ munayninman jina kausakusqanrayku. Chayrayku payta ajllarqa Jesuspa maman kananpaj. Mariaqa, Elisabetwan parlaspa sutʼita rikucherqa Diospa munaynintapuni ruwayta munasqanta (Luc. 1:46-55). Jehová Diosqa, Jesús nacekusqanta mana jatun cargoyoj autoridadesmanchu willacherqa. Manaqa lomaspi ovejasta michejkunaman willacherqa angelesninwan (Luc. 2:8-14). Michejkunataj chayta uyarispa usqhayllata nacekoj wawata qhawamoj rerqanku (Luc. 2:15-17). Mariawan Josewantaj maytachá tʼukorqanku chay michejkuna Jesusta qhawaj jamusqankuta rikuspa. w18.07 pág. 9 párrs. 11, 12

¿Imaraykutaj Jehová Dios Salomonpa contranpi phiñakorqa? Biblia nin: “Tata Diosqa Salomonpa contrampi phiñakorqa, paypa sonqon israelitaspa Señorninku Tata Diosmanta karunchakusqanrayku”, nispa. Chaywanpis Jehová Diosqa, Salomonta yanapananpaj payman iskay kutita rikhurerqa. Salomontataj kamacherqa ama waj dioskunata yupaychaspa purinanta. Salomontajrí Jehová Diospa “kamachisqantaqa mana kasorqachu”. Chayrayku Jehová Diosqa Salomonta manaña yanaparqachu, nitaj allin ñawiwan qhawarqachu. Chantapis Jehová Diosqa mana saqerqachu Salomonpa miraynin tukuynin Israel nacionta kamachinanta. Chayraykutaj unayta ashkha problemaspi rikukorqanku (1 Rey. 11:9-13). Amigosninchej Diosta mana kasukojtinku, nitaj Diospa munasqanman jina kausakojtinkoqa, paykuna jina yuyayta qallarisunman, Diosmantapis karunchawasunman. Diosta mana tukuy sonqo yupaychaj hermanospis Diosmanta karunchawasunman. Chantapis familiaresninchej, vecinosninchej, escuelamanta chayri trabajomanta compañerosninchej Diosmanta karunchallawasunmantaj. w18.07 pág. 19 párrs. 9, 10

Satanasqa peliculaswan, telewan ima umanchejta muyuchikunanchejta munan pay jina yuyananchejpaj. Chayrayku Satanás jina yuyajkunaqa peliculaspi cuentitosta churanku pantachinawanchejpaj. Satanasqa yachan imastachus peliculaspi qhawasqanchej, uyarisqanchejpis sonqonchejpi qhepakunanta, chayman jinataj ruwananchejta. Jesuspis yacharqa imatachus uyarisqanchej sonqonchejpi qhepakusqanta. Chayrayku payqa cuentoswan jina yachacherqa. Por ejemplo, kʼacha samaritanomanta, chinkasqa qhari wawamantawan parlarqa (Mat. 13:34; Luc. 10:29-37; 15:11-32). Chayrayku allinta qhawarikunanchej tiyan mana ima peliculallatapis qhawanapaj. Wakin peliculasqa qhawanapaj jinalla kanku, manataj sajra imaspi yuyanapaj tanqawanchejchu. Chayrayku sumajta ajllayta yachananchej tiyan. Ajllashaspaqa piensarinanchej tiyan, chay película yanapanawanchejpichus chayri manachus (Gál. 5:19-21; Efe. 2:1-3). Uj película sajra imasta munapayachinawanchejpaj jina kajtenqa, ama qhawanallachu, astawanpis uj onqoymanta jina jarkʼakuna. w19.01 págs. 15, 16 párrs. 6, 7

Imaynatachus montera uj soldadoj umanta jarkʼaj, ajinallatataj ‘suyakusqanchej salvacionpi’ yuyayqa jarkʼawasunchej mana waj imaspi yuyanapaj (1 Tes. 5:8; Pro. 3:21). Satanasqa suyakusqanchej salvacionta monterata jina mana churakunanchejpaj, waj imaspi yuyachiwasunman. Chayta astawan entiendenapaj Jesusmanta parlarina. Satanasqa yacharqa Jesús rey jina runasta gobernananta. Yachallarqataj Jesús sufrinanta, wañunantataj niraj gobernashajtin. Chantapis yacharqa, Jesús suyakunanraj kasqanta Jehová Dios reyta jina churanankama. Chayrayku Satanasqa, Jesús mana anchata suyakunanpaj, Jesusman nerqa: ‘Sichus qonqoriykukuspa yupaychawanki chayqa, kay tukuynin qanpata kanqa gobernanaykipaj’, nispa (Luc. 4:5-7). Satanasqa yachallantaj Jehová Dios uj sumaj kausayta qonawanchejta. Chay diakamataj suyananchejraj kasqanta. Suyakushaspataj ashkha problemaspi rikukunanchejta. Chayrayku Satanasqa kay tiempopi sumajta kausakuyta atisqanchejta yuyachiwasunman. Payqa munan tukuy imayoj kananchejta, Diospa Gobiernonmantataj qonqapunanchejta (Mat. 6:31-33). w18.05 págs. 30, 31 párrs. 15-17

Jehová Diosqa joven kashajtiyki kusikunaykita munan. Kusisqa kanaykipajqa, Jehová Diospaj astawan llankʼanaykipaj kallpachakunayki tiyan, imata ruwanaykipajpis Jehová Diospi atienekunayki tiyan. Kunanmantapacha Jehová Diospaj astawan llankʼanaykipaj kallpachakunki chayqa, reparanki imaynatachus Jehová Dios ñanninta pusasusqanta, jarkʼasusqanta, bendecisusqantapis. Chayrayku Diospa Palabranta ukhunchaspa miskʼichikuy, kasukuytaj. Biblia nin: “Wayna kashaspa, pichus Ruwasoj Diosmanta yuyarikuy”, nispa (Ecl. 12:1). Tukuy jovenesman niyta munayku allintapuni ruwashasqaykichejta Jehová Diospaj astawan llankʼanaykichejpaj kallpachakushasqaykichejmanta. Imajtinchus waj imaspi musphanaykichejmantaqa, Diosmanta willashallankichejpuni. Chantapis mayta kallpachakushankichej mana kay mundomanta runas jina imatapis ruwanaykichejpaj. Amataj qonqaychejchu tukuy ruwasqasniykichej, Diospaj mana qhasipajchu kasqanta. Amallataj qonqaychejchu tukuy hermanospis yanapasunaykichejpaj wakichisqa kashasqankuta. Chayrayku imata ruwanaykichejpajpis Jehová Diospipuni atienekuychej, paytaj allin risunaykichejpaj yanapasonqachejpuni. w18.04 pág. 29 párrs. 17, 19