Diciembre

Wakin kutisqa Bibliamanta wakin imasta mana entiendeyta atillanchejchu. Chayrí Jehovaqa mana munasqanchejman jinachu mañakusqanchejman kutichiwanchej. Chayrayku ichá iskay sonqolla kanchej. Ajinallapuni kasunman chayqa, creeyninchej pisiyanman, Jehová Diosmantapis karunchakusunman (Sant. 1:7, 8). Jina kajtintaj, wiñay kausayta japʼinanchejmanta iskayrayasunman. Apóstol Pabloqa wiñay kausayta suyakusqanchejta, barco sayachina ganchowan kikincharqa (Heb. 6:19). Chay ganchoqa, barcoman uj cadenawan japʼisqa kayta yachan. Barcota apaykachajkunaqa, sinchʼi wayras kajtin chay ganchota yakuman wijchʼuykunku. Ajinamanta barcoqa kikinpi sayan, nitaj wayrawan maymanpis apachikunchu. Jinapis ganchoj cadenan sarruyaykunman chayqa, pʼitikapunman, niñataj barcota sayachinmanchu. Ajinallataj noqanchejwanpis kanman. Imamantapis iskayrayasunman chayqa, creeyninchej pisiyanman. Llakiykuna jamuwajtinchejtaj, niña Jehovapi atienekusunmanchu, nitaj wiñay kausayta japʼinanchejpi creesunmanñachu. Ajina kaspaqa, ni jaykʼaj kusisqachu kasun. w21.02 pág. 30 párrs. 14, 15

Abrahanwan familianwan Ur llajtamanta llojsipushajtinku, Abrahanqa 70 kuraj watasniyojsina karqa, 175 watasniyojtaj wañuporqa (Gén. 11:31–12:4; 25:7). Payqa 100 watasta jina toldospi tiyakuspa Canaán jallpʼapi purerqa. Abrahanqa mana rikorqachu, Jehová Dios chay jallpʼata mirayninman qosqanta. Nillataj rikorqachu “sumaj cimientosniyoj llajtata”, nisunman Diospa Gobiernon sayachisqa kasqanta. Jinapis Abrahanqa, tukuy chay tiempopi Jehová Diospi pacienciawan suyakorqa. Biblia nin: “Abrahamqa wañuporqa allin wañuypi, allin machuña”, nispa (Gén. 25:8). Abrahanqa ashkha llakiykunasniyoj kaspapis, sinchʼi creeyniyojllapuni karqa, Diospa nisqasnin juntʼakunantataj pacienciawan suyakorqa. ¿Pitaj chaypaj yanaparqa? Jehová Dios. Payqa Abrahanta cuidarqa, amigonpajtaj qhawarqa (Gén. 15:1; Isa. 41:8; Sant. 2:22). Noqanchejpis Abrahán jinallataj “sumaj cimientosniyoj llajtata”, nisunman Diospa Gobiernonta suyakushanchej (Heb. 11:10). Jinapis mana Diospa Gobiernon sayachisqa kanantachu suyakushanchej. Imaraykuchus chay Gobiernoqa, 1914 watapiña sayachisqa karqa, chaymantapachataj cielopi kamachishanña (Apo. 12:7-10). Jinapis Diospa Gobiernonqa, manaraj kay jallpʼata kamachishanchu. Noqanchejtaj chayta suyakushanchej. w20.08 pág. 4 párrs. 11, 12

Wajkunata sumajta uyarinapajqa, kʼumuykukoj sonqo, pacienciayojtaj kana tiyan. ¿Imaraykutaj wajkunata uyarinapaj kallpachakuna tiyan? Ñaupaj kaj, chayta ruwaspaqa mana wajkunamanta pantasqata yuyasunchu. Iskay kaj, hermanonchejta sumajta uyarispaqa, imaynachus kashasqanta, imaraykuchus imatapis ruwasqantawan yachasun. Chaytaj payta entiendenapaj yanapawasun. Kinsa kaj, hermanonchejta parlajta saqespaqa, imaynachus kashasqanta reparakunanpaj yanapasunman. Wakenqa imaynachus kashasqankumanta parlarisparaj, imajtinchus ajina kashasqankuta reparakunku. Wakin hermanosqa, imachus sonqonkupi kasqanmanta mana parlayta atillankuchu. Ichapis ajina kanku, ñaupajta imaynatachus kausakusqankurayku chayri imaynachus kasqankurayku. Ichá paykunaqa mana chay ratochu imaynachus kashasqankuta willariwasun. Jinapis Jehová Dios jina pacienciayoj kasunchej chayqa, imaynachus kashasqankuta willariwasun. Chayta ruwajtinkutaj, paykunata sumajta uyarina. w20.04 págs. 15, 16 párrs. 6, 7

Pescadosqa mana ima yakupipis kausallankuchu. Chantapis maypichá paykunapaj mikhuna tiyan, chaypi kanku. Pescadosta japʼejkunaqa, ima horastachus pescaj rinankutapis yachanallankutaj karqa. Chayta astawan entiendenapaj, pescayta yachaj hermanomanta parlarina. Payqa Pacífico nisqa mar kantupi tiyakun. Chay hermanoqa uj misionero hermanoman pescadota japʼej rinankuta nisqa. Misionerotaj nisqa: “Ya, qʼaya 9 de la mañanata tiempituy kanman. Chay horasta risunman”, nispa. Hermanotaj nisqa: “Chay horastaqa mana pescadota tarisunchu. Qhasillata risunman”, nispa. Jesuspa yachachisqasnenqa, sumaj pescadores jina karqanku. Paykunaqa maypichus, ima horastatajchus runasta tarinankupi piensaj kanku. Chayman jinataj predicaj kanku. Chayrayku paykunaqa predicarqanku templopi, sinagogaspi, wasimanta wasi, mercado plazaspi ima (Hech. 5:42; 17:17; 18:4). Noqanchejpis predicanchej chay lugarpi, ima horastachus runasta tarinanchejta yachananchej tiyan. Chay horaspitaj predicaj rinanchej tiyan (1 Cor. 9:19-23). w20.09 pág. 4 párrs. 8, 9

Cristoj hermanosninta yanapashanchej, Diospa llajtan imatachus kamachiwasqanchejta kasukuspa. Jesusqa congregacionpa uman. Chayrayku cuidanawanchejpaj churan chay hermanosta kasukuspa, paypa sumaj amigosnin kasunman (Efe. 4:16). ¿Imaynatá Diospa llajtanta kasukusunman? Diospa llajtanqa Tantakuna Wasis necesitakusqanman jinalla ruwakunanpaj, wakin congregacionesta ujllaman tukuchin. Ajinamantataj churasqanchej qolqeta mana qhasita gastakushanchu. Chayta ruwakusqanrayku, ashkha hermanosqa waj congregacionman rinanku karqa. Ichapis paykunaqa congregacionninkupi unaytaña karqanku, chaypi kaj hermanoswanpis sumaj amigos karqanku. Jinapis paykunaqa Diospa llajtanta kasukunku, mayqen congregacionmanchus kachasqa kanku, chaymantaj rinku. Jesusqa chayta rikuspa, maytachá kusikun. w20.04 pág. 24 párr. 14

Wichaynejmanta reywan uraynejmanta reywanqa, mundontinpi atiyniyoj kayta munaspa japʼinakushallankupuni. Kaypi piensarina: Segunda Guerra Mundial pasayta, Unión Soviética, payman ujchasqa suyuspiwan, Europamanta ashkha suyusta dominayta qallarerqanku. Chayta rikuspa, uray ladomanta reypis waj suyuswan ujchaykukorqa. Paykunaqa uj tratota ruwarqanku, enemigosninkumanta jarkʼakunankupaj. Chay tratoqa, Organización del Tratado del Atlántico Norte (OTAN) nisqa sutikun. Iskaynin reyestaj astawan ashkha soldadosniyoj, armasniyojtaj kanankupaj, may chhika qolqeta gastashallankupuni. Chantapis Africapi, Asiapi, América Latinapiwan guerrasman chayri chʼajwasman satʼikorqanku. Ajinamanta chay iskay reyesqa, purajmanta maqanakorqanku. Kay qhepa watasllapi, Rusia, paywan ujchasqa suyuspiwan mundontinpi may atiyniyojman tukorqanku. Chantapis uray ladomanta reywan computadorasnejta maqanakushanku. Iskaynin reyestaj Internetnejta imaymana programasta apaykachasqankumanta tumpanakunku. Ninkutaj chay programasnejta qolqenkuta pierdechiyta munasqankuta, gobiernonkutapis urmachiyta munasqankuta. w20.05 pág. 13 párrs. 5, 6

Profeta Isaiaspa tiemponpi, Jehová Diosqa llajtanman nerqa: “Uj warmeqa wawitanta qonqarparinmanchu?”, nispa. Chantá nillarqataj: “Pay qonqapunman chaypis, noqaqa ni jaykʼaj qonqasqaykichu”, nispa (Isa. 49:15). Jehová Diosqa chay kutillapi uj mamawan kikinchakorqa. ¿Imaraykutaj chayta ruwarqa? Imaynatachus uj mama ñuñoj wawitanta mayta munakun, ajinallatataj kamachisninta munakusqanta rikuchiyta munarqa. Hermananchej Jasmín nin: “Uj mama wawitanta ñuñuchejtin, astawan ujchasqa kanku. Purajmanta munanakusqankutaj ni jaykʼaj tukukunchu”, nispa. Ashkha hermanaspis pay jinallatajchá ninkuman. Jehová Diosqa sumajta yachan, sichus uj wawan tantakuykunaman, predicacionman ima manaña rinchu chayqa. Chiriyapoj hermanosmanta ashkhasqa, Jehová Diospa llajtanman kutinpunku. Chaytaj mayta kusichiwanchej. Jehová Diosqa mayta munan chay hermanos kutinpunankuta. Noqanchejpis chayta munallanchejtaj (1 Ped. 2:25). w20.06 pág. 18 párrs. 1-3

Aswan valorniyoj imastaqa, mana ñawisninchejwan rikuyta atinchejchu. Jesusqa uj orqopi yachachishaspa, cielopi valorniyoj imasmanta parlarqa. Chaykunataj kapuyniyoj kaymanta nisqa, aswan valorniyoj. Chantá pay nerqa: “Maypichá valorniyoj imasniyki kashan, chayllapitaj sonqoykipis kanqa”, nispa (Mat. 6:19-21). Sonqonchejqa imastachus may valorniyojpaj qhawanchej, chayman aysawanchej. ¿Imatá ruwasunman ‘valorniyoj imasta cielopi tantanapaj’? Jehová Diospa ñaupaqenpi sumaj runapaj rejsisqa kanapaj chayri allinpaj qhawasqa kanapaj kallpachakuna. Cielopi valorniyoj imas kapuwasun chayqa, Jesús nerqa jina, mana pipis chaykunata qhechuwasunchu, nitaj chinkanqachu. Apóstol Pablo nerqa: “Yuyayninchejqa mana rikukoj imaspi kashan”, nispa. Chayta ruwanapajtaj kallpachakunanchej tiyan (2 Cor. 4:17, 18). Jehová Diosqa paraisopi ashkha bendicionesta qonawanchejta niwanchej. Chay bendicionesta manaraj rikojtinchejpis, manchay valorniyoj kanku. Chay imasmantataj mayta agradecekunchej. w20.05 pág. 26 párrs. 1, 2

Moisesqa israelitasman Jehovamanta, sutinmantawan yachacherqa. Israelitaspajtaj chayqa “qhora patapi chhillchi jina” karqa. Imajtinchus paykunata sonqocharqa, creeyninkutataj kallpacharqa. ¿Imaynatá runasta ajinallatataj yachachisunman? Wasimanta wasi chayri ashkha runas purinku chaypi willashaspaqa, runasman Jehová Diospa sutinta Bibliawan yachachina. Paykunaman publicacionesninchejta jaywasunman, chayri kʼachitu videosninchejta rikuchisunman. Manachayrí jw.org nisqaman yaykunankuta nisunman. Chay paginanchejqa Jehová Diosninchejta jatunchan. Chantapis trabajopi, escuelapi, chayri viajashaspapis, munasqa Tatanchejmanta parlarina. Runasman willarina Diosninchej may kʼacha kasqanta, kay jallpʼata uj paraisoman tukuchinanta, sumaj kausaytataj apamunanta. Ichapis paykunaqa ni jaykʼaj chayta uyarerqankuchu. Jinapis willarejtinchej, paykunaqa Jehová mayta munakuwasqanchejta reparanqanku. Munakuyniyoj Tatanchej Jehovamanta cheqa kajta yachachispaqa, paypa sutinta jatunchanchej. Chantapis qhasimanta tumpasqankuta rikuchinchej. Ni imapis Bibliaj yachachisqan jinaqa runasta kallpachanmanchu (Isa. 65:13, 14). w20.06 pág. 10 párrs. 8, 9

¿Imaynataj kananchej tiyan Diosman kutinpuyta munajkunata yanapanapaj? Jesuspa ujnin kikinchayninmanta mayta yachakusunman. Payqa chay kikinchaypi wasinmanta ripoj jovenmanta parlarqa (Luc. 15:17-24). Chay kikinchaymanta jovenqa, tukuy kapuyninta usucherqa. Jinapis yuyayninman churakuspa, tatanpa wasinman kutiporqa. Tatantaj payta rikuytawan, taripamuspa abrazaykorqa, muchʼaykorqataj. Ajinamanta wawanta mayta munakusqanta rikucherqa. Jovenqa tatanman nerqa: “Tatáy, Diospa contranta, qanpa contraykitawan juchallikuni. Manaña ‘wawáy’ ninawaykipaj jinachu kani”, nispa. Tatantajrí wawanmanta mayta khuyakorqa. Chayrayku wawanta kusiywan japʼikaporqa. Payqa mana uj peonninta jinachu japʼikaporqa, manaqa munasqa wawanta jina. Chayta rikuchinanpajtaj, aswan sumaj ropata churaykorqa, anillotapis qorqa, uj fiestatataj ruwaporqa. Jehová Diosninchejqa, chinkaj jovenpa tatan jina. Payqa chiriyapoj hermanosta, hermanastapis mayta munakun, congregacionman kutinpunankutataj munan. Noqanchejpis pay jina kanapaj kallpachakuna, chay hermanostataj congregacionman kutinpunankupaj yanaparina. Paykunata yanapanapajqa, paykunawan pacienciakuna. Chantapis paykunata khuyakuna, entiendena, munakunataj. w20.06 págs. 25, 26 párrs. 8, 9

Jesús nerqa wakin runas Diospa palabranta “kusiywan” japʼikuspapis, llakiykunapi kaspa urmanankuta (Mat. 13:3-6, 20, 21). Ichapis wakenqa mana entiendenkuchu, Jesuspa yachachisqasnin llakiykunasniyoj kanankuta (Mat. 16:24). Chayrí piensarqanku, testigos kaspa ni ima llakiyniyoj kanankuta. Manachayrí piensarqanku, Jehová Dios tukuy problemasninkuta chinkachinanta. Jinapis kay sajra mundopi kausakusqanchejrayku, llakiykunaqa kapuwasunpuni. Chantapis kausayninchejpi imapis kanqapuni. Chayrayku mana tukuy tiempochu kusisqa kasun (Sal. 6:6; Ecl. 9:11). Casi tukuy hermanosninchej, testigospuni cheqa religión kasqanta creenku. Chayrayku uj hermano sonqonkuta nanachejtinpis chayri pantajtinpis, creeyninkoqa sinchʼillapuni (Sal. 119:165). Llakiykunapi kajtinkutaj, creeyninkoqa astawan sinchʼiyan (Sant. 1:2-4). Creeyninchej ajina sinchʼi kananpaj kallpachakuna. w20.07 pág. 8 párr. 1; pág. 9 párrs. 4, 5

Niraj Bibliata leeshaspa, Jehovamanta mañakuna sumaj yuyaychaykunata tarinapaj yanapanawanchejta. Ichapis uj llakiyniyoj kashanchej, nitaj yachanchejchu imatachus ruwananchejta. Jina kajtin, Jehovamanta mañakusunman, Palabranpi ima yuyaychayllatapis tarinapaj yanapanawanchejta (Fili. 4:6, 7). Jehová Diosqa rikushasunmanpis jina yuyanapaj ruwawarqanchej. Bibliata leeshaspaqa, imaschus kashasqanpi piensarina. Pimantachus leeshanchej, chay runapis kasunman jina yuyana. Imastachus rikushasqanpi tʼukurina. Llakisqachus kusisqachus kashasqanta reparana. Chay imasta ruwaspaqa, Bibliaj nisqanta astawan sutʼita entiendesun. Chantá leesqanchejpi tʼukurina. Imaynatachus chayman jina ruwanapipis piensarina. Chayta ruwaspaqa, imatachus leesqanchejta aswan sumajta entiendesun. Bibliata leeyqa wasita ruwanapaj materialesta wakichiy jina. Tʼukuriytaj chay materialeswan wasita ruway jina. Tʼukurispaqa Bibliata aswan sumajta entiendesun. w21.03 pág. 15 párrs. 3-5

Apóstol Pabloqa mana nerqachu: “Kayta chayri jaqayta ruwayman karqa chayqa, nichá carcelpi kashaymanchu karqa”, nispa. Payqa manallataj Asiamanta hermanos saqerparisqankumanta phiñakorqachu. Nillataj yuyarqachu waj amigosninpis kikillantaj kasqankuta. Pabloqa wañuchinankuta yachaspapis, Jehová Diosta jatunchayta ñaupajman churarqa. Chantapis wajkunata kallpachaypi piensarqa. Pabloqa Jehovapi atienekusqanrayku, paymanta kutin kutita mañakorqa. Chantá saqerparej amigosninpi yuyananmantaqa, payta yanaparej amigosninman tukuy sonqo agradecekorqa. Chantapis Pabloqa Diospa Palabranta estudiallarqapuni (2 Tim. 3:16, 17; 4:13). Jehovawan Jesuswan payta munakusqankumantapis, mana iskayrayarqachu. w21.03 pág. 18 párrs. 17, 18

Apóstoles wañupusqankumanta qhepaman, llulla cristianosqa congregacionman juntʼaykorqanku. Paykunaqa llulla religionmanta jamoj yachachiykunata japʼikorqanku, Diospa Palabranmanta cheqa yachachiykunatataj qʼewerqanku. Chay tiempomanta 1870 wata chaynejkama, mana yachakorqachu pikunachus Jehová Diospa cheqa kamachisnin kasqankuta. Llulla cristianosqa cizaña qhora jina wiñarqanku. Cheqa cristianostaj chinkapuspa jinarqanku (Mat. 13:36-43). Chayta yachayqa rikuchiwanchej, 100 watamanta 1870 watakama, ni mayqen gobiernopis Daniel 11 capitulomanta wichaynejmanta reywan, jinallataj uraynejmanta reywan ninakusqanta. Imaraykuchus chay wataspeqa, mana yachakorqachu pikunachus Diospa llajtan kasqankuta. Jina kajtintaj, ni mayqen gobiernopis paykunata ñakʼarichiyta aterqachu. Chayrayku mana yachakorqachu, mayqen gobiernochus wichaynejmanta rey chayri uraynejmanta rey kasqanta. Jinapis 1870 watamantapacha, chayqa yachakuyta aterqa. w20.05 pág. 3 párr. 5

Profeta Joelqa, may chhika langostas Israelman juntʼaykunankuta nerqa. Chay khurusqa Israel jallpʼata qʼarallata saqenanku karqa (Joel 1:4). Ashkha watasta entienderqanchej, chay profeciaqa mana saykʼuspa predicasqanchejwan ninakusqanta. ¿Imaraykutaj ajinata entiendej kanchej? Imaraykuchus Diospa llajtanqa, chay langostas jina jarkʼaykunata atipanku, predicallankupunitaj. Chantapis predicasqanchejwanqa, cristiano nichikoj iglesiaspa yupaychayninku mana allinchu kasqanta sutʼiman orqhonchej. Jinapis chay profeciamanta parlaj tukuynin versiculosta leespaqa, waj jinamanta entiendenanchej kasqanta reparasun. Jehová Diosqa langostasmanta nerqa: “Wichaynejmanta jamoj langostastaqa karunchasaj qankunamanta”, nispa (Joel 2:20). Chay langostas Jehovaj testigosninwan ninakun chay, ¿imajtintaj Jehová Dios langostasta karunchananta chayri wijchʼunanta nin? Jehovaj testigosnenqa, Jesús kamachiwasqanchejrayku runasman Diosmanta willamunchej, yachachimunchejtaj (Eze. 33:7-9; Mat. 28:19, 20). Chantapis Jehová Diosqa, imaschus chayri pikunachus llajtanta ñakʼarichinku, chayllata wijchʼunman. w20.04 págs. 2, 3 párrs. 3-5

Ichapis yuyanchej, Jehová Dios mana uyariwasqanchejta. Jina kajtin, discípulo Santiagoj nisqanta kasukuna, ‘mañakunallapunitaj’. Tatanchej Jehovaqa, kutin kutita mañakojtinchejpis mana phiñakunchu. Astawanpis yachayninta “mana michʼakuspa” qowasun. Chayrayku mana saykʼuspa mañakunallapuni (Sal. 25:12, 13). Payqa ima llakiykunasniyojchus kasqanchejta yachan, maytataj yanapayta munawanchej. Chayta yachayqa, ¡mayta kusichiwanchej! Jehovaqa Palabrannejta yachayta qowanchej (Pro. 2:6). Chayrayku Bibliata, publicacionesta ima estudiananchej tiyan. Jinapis mana chayllatachu ruwana tiyan, manaqa chay yachakusqanchejman jina ruwananchej tiyan. Santiago nerqa: “Diospa palabranta kasukojkuna kaychej, manataj uyarejkunallachu”, nispa (Sant. 1:22). Diospa nisqanta kasukuspaqa, tukuywan allinta kausakusun, khuyakuyniyoj kasun, nitaj nisqanchejtapuni valechiyta munasunchu (Sant. 3:17). Chaytaj ima llakiytapis kusiywan aguantanapaj yanapawasun. w21.02 pág. 29 párrs. 10, 11

Tukuy hermanos yanapakojtinku, estudiosqa bautismoman chayayta atenqanku. Congregación wiñananpajqa, tukuyninchej yanapakuyta atinchej. Uj precursora nin: “Runasqa niyta yachanku: ‘Uj wawata uywanapajqa, rancho entero yanapakun’, nispa. Bibliamanta yachakojkunawanpis kikillantaj kasqanta niyman. Uj runa bautismoman chayananpajqa, tukuynin congregación yanapakun”, nispa. ¿Imaynatataj uj rancho entero yanapakun uj wawa sumajta wiñananpaj? Uj wawataqa, tatan, maman, tatasninpa rejsisqasnin, profesoresnin ima kallpacharinku, yachachinkutaj. Ajinamantataj chay wawaqa sumajta wiñakun. Ajinallataj Bibliamanta yachakojkunawanpis. Congregacionpeqa tukuyninchej estudiosta yuyaycharisunman, kallpacharisunman, allin kausayninchejwantaj yachachisunman. Chayta ruwaspaqa, estudiosta bautismoman chayanankupaj yanapasun (Pro. 15:22). Uj runaman Bibliamanta yachachishanchej chay, ¿imaraykutaj waj hermanoswan yanapachikunanchejpuni tiyan? Imaraykuchus paykunaqa, yachachishanchej chay runasta ñauparinankupaj yanapankuman. w21.03 pág. 8 párrs. 1-3

Wakin hermanosqa sumaj cristianosman rijchʼakunku. Jinapis Diospa chejnisqan imasta ruwanku. Mana paykuna jina kanapaj kallpachakunanchej tiyan, jóvenes chayri kurajkuna kaspapis. Apóstol Juanqa, mana puraj uyas kanata nerqa. Chaywanqa nisharqa, cheqa kajpi purishaspa millay kausayniyoj kananchejqa, mana allinchu kasqanta (1 Juan 1:6). Jehová Dios allinpaj qhawanawanchejta munanchej chayqa, rikushawanchejmanpis jina kausakunanchej tiyan. Paypa qhawayninpeqa tukuy ima sutʼipacha kashan. Chayrayku Jehovamantaqa, ni ima juchatapis pakayta atisunmanchu (Heb. 4:13). Kay mundomanta runasqa, juchata niña sajrapajchu qhawanku. Chayrayku mana paykuna jina kanapaj kallpachakuna tiyan. Juanpa tiemponmanta llulla cristianosqa nej kanku: “Juchata ruwajtinchejpis Diosqa allinpaj qhawallawasun”, nispa. Kunanpis ashkha runas kikillantataj ninku. Diospi creesqankuta nispapis, imastachus pay juchapaj qhawasqanta ruwallanku. Jehová Dios khuchichakuy juchamanta imatachus nisqantapis mana kasukunkuchu. Chayrayku khuchichakullanku, ninkutaj: “Sapa ujpis munasqanman jina kausayta atin”, nispa. w20.07 pág. 22 párrs. 7, 8

Hermanasninchej yanapata necesitajtinku, ¿paykunaman kutikunchejchu? Uj casada hermanapi piensarina. Qosan mana testigo kasqanrayku, reunionesman tardellapuni chayamun, tukukusqantawantaj ripunpacha. Wawasnintapis maypi jinalla reunionesman pusamun. Chayrayku wakin hermanos hermanaspis, paypaj rimayta qallarinku, ninkutaj: “Qosanwan kasuchikunan á wawasninta reunionman pusamunanpaj”, nispa. Jinapis hermanitanchejqa, tukuy atisqanta Jehová Diosta sirvishan. Mana paychu tiemponmanta dueña. Chantapis qosanta respetanan tiyan. Chayrayku qosan mana munajtenqa, mana wawasninta reunionman pusamuyta atinmanchu. ¿Imaynatá chay hermanitaman kutikusunman? Jehovata tukuy atisqanta sirvisqanmanta, “allinta ruwashanki hermanitáy” nisunman. Hermanosmanpis nisunman, hermananchej atisqanta ruwashasqanta. Paymanta allinta parlajtinchej, ichá wajkunapis niña paymanta sajrata parlanqankuchu. Ancianospis reparananku tiyan imapichus hermanas yanapata necesitasqankuta. Jehovaqa hermanasta sumajta cuidanankuta munan (Sant. 1:27). Chayrayku ancianosqa Jesús jina kanankupaj kallpachakunku. Kamachiykunata churanankumantaqa, hermanaswan kʼachas kanankupaj, paykunata entiendenankupaj ima kallpachakunku (Mat. 15:22-28). Ancianos hermanasta imitallapipis yanaparejtinkoqa, hermanasqa paykunamanta llakikusqankuta reparanku. w20.09 págs. 24, 25 párrs. 17-19

Profeta Danielqa imata ruwananpajpis, Jehová Diostapuni tapurej. Ajinamanta kʼumuykukoj sonqotaj, llampʼu sonqotaj kasqanta rikucherqa. Uj pacha, Jehovaqa Danielta yanaparqa, rey Nabucodonosorpa mosqoyninta sutʼinchananpaj. Danieltajrí chayta ruwasqanmanta llampʼu sonqowan nerqa, Jehová Diospa yanapaynillanwan chayta sutʼinchasqanta (Dan. 2:26-28). ¿Imatá Danielmanta yachakusunman? Pillapis sumaj discursota qosqanchejta niwajtinchej, chayri willaypi allin riwajtinchejqa, Jehová Diosta jatunchananchej kasqanta. Llampʼu sonqos kana, reparakunataj Jehová Diospa yanapaynillanwan imatapis sumajta ruwasqanchejta (Fili. 4:13). Ajinamanta Jesús jina ruwasun. Payqa mana imapipis pantajchu. Jinapis Jehová Diospipuni atienekorqa (Juan 5:19, 30). Jesusqa mana yuyallarqapischu Tatanpa kamachiyninta qhechuyta. Filipenses 2:6 paymanta nin: “Payqa Diosman rijchʼakuspapis, mana yuyallarqapischu Dios jina kaytaqa”, nispa. Jesusqa wakin imasta ruwananpaj, mana derechoyojchu kasqanta sumajta entienderqa. Chayrayku Tatanpa kamachiyninta respetaj, kʼumuykukoj sonqowantaj kasukoj. w20.08 pág. 11 párrs. 12, 13

Kausayman pusaj ñanpi correjkunamanta parlarina. Wakin hermanospa llakiyninkoqa mana reparanapaj jinallachu. Ichapis llakiykunasninchejrayku, Jehová Diosta mana munasqanchejman jinachu yupaychashanchej, piensanchejtaj ni pi entiendewasqanchejta. Jina kajtenqa, Mefibosetpa kausaynin mayta yanapawasunman (2 Sam. 4:4). Payqa cojito karqa, rey Davidtaj mana allinta yachaspalla payta juchacharqa, jallpʼasnintapis qhechukaporqa. Jinapis mana chay llakiypi piensaspachu kausarqa. Astawanpis payqa, imaspichus allin risqanmanta kusikorqa. Chantapis David aswan ñaupajpi khuyakusqanmanta agradecekorqa (2 Sam. 9:6-10). Chayrayku David mana allinta yachaspalla payta juchachajtin, Mefibosetqa mana phiñakorqachu. Chantapis mana Davidta sajra ñawiwanchu qhawarqa, nitaj Jehovatapis juchacharqachu. Astawanpis Diospa ajllasqan reyta yanapayta munarqa (2 Sam. 16:1-4; 19:24-30). Jehovataj Mefibosetpa kausayninta Bibliapi qhelqacherqa, noqanchej yachakunanchejpaj (Rom. 15:4). w20.04 pág. 26 párr. 3; pág. 30 párrs. 18, 19

Congregacionninchejpeqa ichá tiyan misioneros, precursores especiales, chayri precursores regulares. Paykunaqa ashkha horasta predicanku, runasmanpis astawan yachachinku. Chay hermanosmanta ashkhasqa, pisi imasllawan kausakunku. Jinapis Jehová Diosqa paykunata mayta bendecin (Mar. 10:29, 30). Noqanchejtaj chay hermanosninchejta mayta munakunchej. Chantapis mayta kusikunchej, chay hermanos congregacionninchejpi kasqankumanta. Jehová Diospa llajtanta ñaupajman apajkuna, paypaj astawan llankʼajkunapis, congregacionpi mayta yanapakunku. Jinapis, ¿paykunallachu valorniyoj kanku? Mana. Jehová Diosqa paymanta tukuy willajkunata may valorniyojpaj qhawan (Rom. 10:15; 1 Cor. 3:6-8). Imaraykuchus bautizasqa kaspapis chayri manapis, tukuyninku paypa qosqan llankʼayta ñaupajman churanankupaj kallpachakunku (Mat. 24:14). Chay llankʼaytaj kashan, runasta Jesuspa yachachisqasninman tukuchimuy (Mat. 28:19, 20; 1 Tim. 2:4). w20.08 pág. 21 párrs. 7, 8

Kay pʼunchaypaj textopi nin jina, llakiykunapi kashajtinchej Jesús yanapawasun. Jesuspa nisqanqa mayta kallpachawanchej. Imaraykuchus tukuypuni maykʼajllapis sinchʼi llakiykunapi kanchej. Wakenqa ujnin familiarninchej wañupusqanrayku, may llakisqa kashanchej. Chay llakiytaj mana chay ratochu tukukapun, ichá watasta llakisqallapuni kanchej. Wakintajrí ichá viejitosña kasqanchejrayku sufrishanchej. Wakintaj sinchʼita llakikusqanchejrayku, ichá wakin días niña kausaytapis munanchejchu. Jinapis Jesús noqanchejwan “tuta pʼunchay” kasqanrayku, may jina llakiyniyoj kaspapis ñaupajllamanpuni rinchej (Mat. 11:28-30). Diospa Palabranqa niwanchej, Jehovaqa angelesnejta yanapawasqanchejta (Heb. 1:7, 14). Angelesqa ‘Diospa Gobiernonmanta sumaj willaykunata’ willanapaj yanapawanchej. Paykuna yanapawasqanchejrayku, “tukuy nacionesman, tukuy ayllusman, tukuy laya parlayniyojkunaman” ima willashanchej (Mat. 24:13, 14; Apo. 14:6). w20.11 págs. 13, 14 párrs. 6, 7

Estudionchejqa Bibliamantapuni yachakushasqanta entiendenan tiyan (1 Tes. 2:13). Chaypajqa yachakusqanmanta imatapunichus yuyasqanta yachananchej tiyan. ¿Imaynatá chayta yachasunman? Bibliaj versiculosninta noqallanchej sutʼinchanamantaqa, estudionchejta nina payñataj sutʼincharinawanchejta. Chantapis tapurisunman: “¿Imaynatá kay versículo nisqanman jina ruwawaj?”, nispa. Leesqan textosmanta imatachus piensasqanta yachanapajtaj, willarinawanchejpaj jina tapuykunata ruwasunman (Luc. 10:25-28). Wakin tapuykuna kanman: “¿Imatá kay versículo Jehová Diosmanta yachachiwanchej?”, “¿Imaynatá kay versiculoj nisqan yanapasunkiman?”, “¿Imatá niwaj kay yachakusqaykimanta?”. Estudionchejqa mana Bibliaj nisqasninta yachanallanchu tiyan, manaqa chay yachachiykunata sonqonpi japʼikunan tiyan, chayman jinataj kausakunan tiyan. Chayrayku Bibliawanpuni yachachina. Sumaj yachachejkuna kanapajqa, kʼumuykukoj sonqo kana tiyan. w20.10 págs. 15, 16 párrs. 5, 6

Jehová Diosqa uj fechata churanña Gobiernonmanta willayta tukunanchejpaj. Noej tiemponmanta watejmanta parlarina. Jehová Diosqa chay kutipi maychus tiemponpipuni nisqanta juntʼarqa. Payqa Jatun Para qallarinanpaj 120 watas faltashajtinña, runasta chinkachinanta willarqa. Aswan qhepatataj, Noeman arcata ruwananta nerqa. Noetaj 40 chayri 50 watasta mana saykʼuspa trabajarqa. Payqa runas mana uyarejtinkupis, predicallarqapuni. Chaytataj ruwarqa, arcaman yaykunankama. Chantá Jehová Diosqa, maychus tiemponpi “arcaj punkunta wisqʼaykorqa” (Gén. 6:3; 7:1, 2, 16). Tumpamantawan Jehová Diosqa, sumaj willaykunata willayta tukusqanchejtaña niwasun. Chantá Satanaspa sajra mundonta chinkachenqa, uj mosoj mundotataj sayarichenqa. Chaypitaj Diosta kasukoj runasllaña kausanqanku. Chay tiempo chayamunankamaqa Noé jina, Diospa waj kamachisnin jinataj willanallapuni. Chay llankʼayta kausayninchejpi ñaupajman churana, pacienciayojtaj kana. Chantapis Jehová Diospi, nisqasninpiwan sinchʼita creena. w20.09 pág. 13 párrs. 18, 19

Manachus Jehová wakinman kamachinapaj atiyta qonman chayqa, familianpeqa chʼajwaslla kanman, nitaj kusisqachu kausakunkuman. Sapa ujpis munaynillanta ruwayta munanman, nitaj pipis kanmanchu imatachus ruwanankuta nejqa. Jehová Diosqa familias allinta kausakunankupaj qharista umas kanankupaj churan. Jinapis ashkha warmisqa ninku: “Qosayqa mayta ultrajawan. Noqamantaqa mana allinchu qosas uma kanankoqa”, nispa. ¿Imaraykutaj ashkha warmis ajinata yuyanku? Imaraykuchus ashkha qosasqa, mana Jehová Diospa kamachisqanta kasukunkuchu. Astawanpis costumbresninkuman jinalla familiankuta uywanku. Chantapis wajkunawan allinpaj qhawachikuyta munaspa, warminkuta kʼumuykachachinku. Wakin qosasqa, “noqaqa qhari kani” nispa warminkuta ultrajanku. Wakintaj ninku: “Warmiywan mana kasuchikusajchu chayqa, ‘kayqa mana qharichu’ niwanqanku”, nispa. Chay qosasqa, ichapis ajinata yuyanku: “Amapis warmiy munakuwachunchu, pero manchikunawan tiyan”, nispa. Warminkuta manchachispataj, paywan munasqankuta ruwanku. Chayta ruwaj qosasqa, mana warminkuta respetashankuchu, nitaj Jehová Diospa nisqanta kasukushankuchu (Efe. 5:25, 28). w21.02 pág. 3 párrs. 6, 7

Problemasninchejrayku llakisqa kaspaqa, Jehová Diosmanta tukuy sonqo yanapata mañakuna. Paytaj mana anchata llakikunapaj yanapawasun. Jehovaqa orakojtinchej ‘sonqo tiyaykuyta qowasun, mayqentachus runas mana entiendeyta atinkuchu, chayta’ (Fili. 4:6, 7). Chantapis payqa, atiyninnejta mana anchata phutikunapaj yanapawasun (Gál. 5:22). Orakushaspaqa Jehová Diosman imaynachus kashasqanchejta willarina. Payman tukuy llakiyninchejta willakuna, chay llakiyrayku imayna phutisqachus kasqanchejtapis sutʼita nina. Problemanchej allinchanapaj jina kajtenqa, Jehová Diosmanta yuyayta mañakuna imatachus ruwananchejta yachanapaj. Chantá chayta ruwanapaj kallpata mañakunallataj. Problemanchejta mana allinchayta atispataj, mana anchata llakikunapaj Diosmanta yanapata mañakuna. Orakushaspa llakiyninchejta Diosman sutʼita willakojtinchejqa, pay uyariwasqanchejta astawan reparasun. Mañakuyninchejman mana usqhayta kutichiwajtinchejtaj, mana saykʼuspa orakunallapuni. Jehovaqa llakiyninchejta willakunanchejta munaspapis, kutin kutita mañakunanchejta munallantaj (Luc. 11:8-10). w21.01 pág. 3 párrs. 6, 7

Congregacionespeqa qhariwarmis, wawasniyoj familiaspis tiyan. Jinapis kallantaj soltera hermanas, soltero hermanospis. ¿Imaynatá paykunata qhawananchej tiyan? Chayta yachanapajqa, imatachus Jesús soltero kaymanta yuyasqanta qhawarina. Jesusqa kay jallpʼapi kashaspa ni jaykʼaj casarakorqachu. Soltero kasqanraykutaj, tukuy tiemponta churarqa Diospa kamachisqanta juntʼananpaj. Jesusqa ni jaykʼaj yachacherqachu solteropuni kakuna kasqanta. Nillataj yachacherqachu casarakunapuni kasqanta. Jinapis nerqa, wakin cristianosqa paykunapuni solteros kakuyta ajllanankuta (Mat. 19:12). Jesusqa solteros kajkunata respetarqa. Payqa mana yuyarqachu, casadosqa solterosmanta nisqa astawan valesqankuta. Apóstol Pablopis Jehová Diosta Jesús jinallataj soltero sirverqa. Payqa ni jaykʼaj yachacherqachu, casarakoyqa jucha kasqanta. Astawanpis nerqa, casarakuytachus manachus sapa uj ajllananta. w20.08 pág. 28 párrs. 7, 8

Apóstol Juanqa unayta kausakorqa, kausayninpitaj ashkha imasta rikorqa. Payqa ashkha llakiykunasniyoj karqa. Chaytaj ichá creeyninta pisiyachinman karqa. Jinapis Juanqa Jesuspa kamachiykunasninta juntʼananpaj mayta kallpachakorqa. Chay kamachiykunamanta ujqa, hermanosta munakuy karqa. Juanqa chayta kasukusqanrayku, yacharqa Jehová Dioswan Jesuswan payta munakusqankuta. Payqa yachallarqataj, paykunaj yanapayninkuwan ima llakiytapis atipananta (Juan 14:15-17; 15:10). Juanqa mana simillamantachu hermanosta munakorqa, manaqa ruwasqanwanpis. Chay munakuytataj ni Satanaspis, nitaj mundonpis jarkʼayta aterqachu. Noqanchejpis apóstol Juan jinallataj Satanaspa mundonpi kausashanchej. Satanastaj ni pita munakunchu (1 Juan 3:1, 10). Payqa mayta munarishan hermanosninchejta chejnikunanchejta. Jinapis noqanchejmanta kashan, paywan apaykachachikusunchus manachus chayqa. Chayrayku hermanosninchejta tukuy sonqo munakunallapuni. Chaytataj parlasqanchejwan, ruwasqanchejwantaj rikuchina. Chayta ruwaspaqa, Diospa familiallanpipuni kasun, kusisqataj kausakusun (1 Juan 4:7). w21.01 pág. 13 párrs. 18, 19

Kay mundoqa Satanaspa makinpi kashan. Chayrayku kausayqa, manchay llakiy. Wakin kutistaj llakiykunaqa atipayta munawanchej (2 Tim. 3:1). Jinapis ama anchata llakikunachu, nitaj manchikunachu. Jehovaqa yachan ima llakiykunasniyojchus kashasqanchejta, paña wakinwan japʼinawanchejtataj niwanchej (Isa. 41:10, 13). Chayrayku mana iskayrayanchejchu Jehová yanapanawanchejmanta. Payqa llakiykunasninchejta aguantanapaj Palabrannejta kallpachawanchej. Diospa kamachisninmanta yachakunapajqa, kapuwanchej videos, Bibliamanta dramas, Creeyninkumanta yachakunachej nisqa libropis. Chay yanapasqa, Bibliapi parlakusqan runasmanta sumajta sutʼinchariwanchej. Jinapis niraj qhawarishaspa, Jehovamanta mañakuna yanapanawanchejpaj jina yuyaychaykunata tarinapaj. Chantapis pimantachus yachakushanchej, chay runapis kasunman jina piensarina. Imatachus ruwasqanpi tʼukurina. Chantá imaynatachus Jehová llakiyninta aguantananpaj yanapasqanpi piensarina. Chaymantataj yachakusqanchejman jina ruwana. Jehová yanapariwasqanchejmantapis agradecekuna, wajkunata kallpacharispa, yanaparispa ima. w21.03 pág. 19 párrs. 22, 23

Wawasniyoj kayta munaj qhariwarmisqa, allin kanman sonqonkupi tapurikunanku: “¿Llampʼu sonqo runaschu kanchej? ¿Jehová Diosta, Palabrantapis munakunchejchu? ¿Jehová Dios uj wawitata uywanapaj confiawasunmanchu?” (Sal. 127:4). Wawasniyojña kajkunatajrí, kay tapuykunapi piensarinkuman: “¿Wawasniyta trabajayta yachachinichu?” (Ecl. 3:12, 13). “¿Wawasniyta kay mundopi sajra imasmanta jarkʼanichu?” (Pro. 22:3). Tatamamasqa mana tukuy imamantapunichu wawasninkuta jarkʼayta atenqanku. Jinapis wawasninkuta yachachinkuman, kay mundoj imasninta atipanankupaj. Chaypajtaj llakiykunapi tarikuspa, Bibliapipuni yanapata maskʼayta yachachinkuman (Pro. 2:1-6). ¿Imaynatá chayta ruwankuman? Ichá familiamanta pillapis, Jehová Diosta yupaychayta saqepun. Jina kajtin, tatasqa wawasninkuman Bibliapi rikuchinkuman, imajtinchus Jehová Diosta kasukuy aswan allin kasqanta (Sal. 31:23). Mayqen familiarninku wañupojtintaj, wawasninkuta yanapankuman Bibliapi sonqochayta tarinankupaj (2 Cor. 1:3, 4; 2 Tim. 3:16). w20.10 pág. 27 párr. 7