Septiembre

Diosqa Jesusman atiyta qon runaspa tukuy llakiyninkuta chinkachinanpaj. Noqanchejqa wakin llakiykunata ni jaykʼaj chinkachiyta atisunmanchu. Jesustajrí milagrosta ruwasqanwan rikucherqa chinkachiyta atisqanta. Runaspa tukuy llakiyninkoqa jucharayku tiyan, Jesustaj atiyniyoj juchata chinkachinanpaj, jucharayku imaschus kasqantapis, nisunman onqoykunata, wañuytapis (Mat. 9:1-6; Rom. 5:12, 18, 19). Milagrosta ruwasqanqa sutʼita rikuchiwanchej “tukuy laya onqoyniyoj runasta” sanoyachiyta atisqanta, wañusqastapis kausarichimuyta atisqanta (Mat. 4:23; Juan 11:43, 44). Payqa atiynillayojtaj sinchʼi loco wayrasta thañichinanpaj, supaykunatapis qharqonanpaj (Mar. 4:37-39; Luc. 8:2). Jehová chay jina atiyta Wawanman qosqanta yachayqa, maytapuni sonqochawanchej. Diospa Gobiernon bendicionesta apamunanmanta mana iskayrayanchejchu. Jesús kay jallpʼapi kashaspa ima milagrostachus ruwasqanqa uj mashkhitalla karqa. Diospa Gobiernonpi Rey kashaspaqa may chhika milagrostaraj ruwanqa. w23.04 pág. 3 párrs. 5-7

Congregacionninchejpi ashkha publicadores kajtenqa mana comentayta atillasunmanchu ashkha hermanos makita oqharisqankurayku. Ichapis yuyasunman manaña makita oqharinanchejta, manaqa comentasqallankutaña uyarikunanchejta. Jinapis comentanapaj makita oqharinallapuni. Ashkha comentariosta wakichikuna, amataj ujllatachu. Ajinamanta ñaupaj parrafospi mana comentachiwajtinchejqa, qhepan parrafospi comentachiwasunpuni. Torremanta Qhawaj revistata wakichikushaspaqa reparana imaynatachus sapa párrafo titulonman japʼisqa kashasqanta. Ajinamanta ima tapuyllamanpis kutichiyta atisun. Chantapis comentanapajqa Diospa pakasqa yachayninmanta parlaj parrafosta astawan wakichikusunman. Chay jina parrafostaqa mana explicayta atikullanchu, chayrayku uj mashkhalla makinkuta oqhariyta yachanku. Chaywanpis, ichá ashkha reunionespiña mana comentachiwanchejchu. Jina kajtenqa niraj tantakuy qallarishajtin, Torremanta Qhawaj tantakuyta apaykachaj hermanota nina mayqen parrafopichus kutichiyta munasqanchejta. w23.04 págs. 21, 22 párrs. 9, 10

Joseqa Jehovaj nisqanman jinapuni imatapis ruwaj. Chayrayku sumaj qosa karqa. Jehovaqa kinsa kutispi Joseman nerqa imatachus familianwan ruwananta. Josetaj chay rato kasukorqa mana atikullajtinpis (Mat. 1:20; 2:13-15, 19-21). Jehovata kasukusqanraykutaj Joseqa Mariata jarkʼarqa, cuidarqa ima. Chayrayku Mariaqa astawanrajchá Joseta munakorqa, respetarqataj. Qosas, qankunapis José jina ruwawajchej. Familiaykichejta cuidanaykichejpaj Bibliapi yuyaychaykunata maskʼaychej. Cambianaykichej kajtinpis, Bibliaj yuyaychaykunasninman jinapuni ruwaychej. Ajinamanta señoraykichejta munakusqaykichejta rikuchinkichej. Chayta ruwankichej chayqa, matrimonioykichejqa astawan sinchʼi sayasqa kanqa. Vanuatumanta uj hermana 20 watasmanta astawanña casada. Pay nin: “Qosay Jehovaj yuyaychaykunasninta maskʼasqanta rikuspa, chayman jinataj ruwasqanta rikuspa, payta astawan respetani. Pay cuidanawanmanta mana iskayrayanichu, yachanitaj sumajtapuni imatapis ajllasqanta”, nispa. w23.05 pág. 21 párr. 5

Babiloniamanta Israelman kutipoj judiosqa ‘Diosninkupaj tʼaqasqa nacionman’ tukunanku karqa (Deu. 7:6). Jinapis Jehovata kusichinankupaj wakin imaspi cambianallankupuni karqa. Ichapis Babiloniapi nacekoj ashkha judiosqa babilonios jinasina piensayta qallarerqanku, millay kausayniyojtaj karqanku. Ñaupaj kaj grupo judíos Israelman kutipusqankumanta watasninman kamachej Nehemiasqa mayta tʼukorqa, chay judiospa wawasnin mana hebreota parlayta yachasqankumanta (Deu. 6:6, 7; Neh. 13:23, 24). ¿Imaynatá chay wawas Jehovata munakunkuman karqa, paytataj yupaychayta atinkuman karqa mana hebreota parlayta yachaspari? Diospa Palabranqa hebreopi qhelqasqa karqa (Esd. 10:3, 44). Arí, chay judiosqa ashkha imaspi cambiananku karqa. Israelpi tiyakuspataj cambiayta atillankuman karqa. Imajtinchus chaypeqa Jehovallata yupaychay pisimanta pisi sayarichisqa kasharqa (Neh. 8:8, 9). w23.05 pág. 15 párrs. 6, 7

Ruwayta munasqanchejta juntʼanapaj sonqonchej aysawajtinchejpis, imapis pasarqonmanpuni. Chayraykutaj mana juntʼayta atisunmanchu. Ichapis chayta juntʼarqonapajña kashasunman, jinallapitaj “mana yuyasqallamanta” imapis pasanman. Chayraykutaj niña tiemponchej kanmanchu chayta ruwanapaj (Ecl. 9:11). Chantapis ichá uj problema kapuwanchej, chaytaj desanimachiwanchej, niñataj kallpanchejpis kanchu chayta ruwanapaj (Pro. 24:10). Pantaj runas kasqanchejraykutaj imapipis pantarqosunmanpuni, chayrayku ruwayta munasqanchejta mana juntʼayta atillasunmanchu (Rom. 7:23). Chayrí saykʼusqa kasqanchejraykullachus mana juntʼayta atishanchejchu (Mat. 26:43). ¿Imataj yanapawasunman chay imaspi rikukojtinchej? Ima jarkʼaypis kajtenqa kallpachakunallanchejpuni tiyan. Biblia nisqanman jinaqa, ichapis ashkha problemaspi rikukusunman. Jinapis Bibliaqa nillawanchejtaj juntʼayta atisqanchejta. Ajina problemaspi rikukuspapis ñaupajllamanpuni rispaqa, Jehovata kusichiyta munasqanchejta rikuchinchej. Jehovaqa maytapuni kusikun ruwayta munasqanchejta juntʼanapaj kallpachakushasqanchejta rikuspa. w23.05 pág. 30 párrs. 14, 15

Precursor kanki chayqa, yachakunki ashkha runaswan trabajayta. Yachakullankitaj qolqeta sumajta apaykachayta (Fili. 4:11-13). Allin kanman precursor auxiliarta orqhonayki. Ashkhastaqa chay yanaparqa precursor regularta orqhonankupaj, chaytaj yanapasunkiman construccionpi yanapakunaykipaj, chayri betelita kanaykipaj. Congregacionmanta tukuy hermanos kallpachakunanku tiyan, ancianos kanankupaj. Bibliaqa nin ancianos kayta munajkunaqa “sumaj ruwanata” munashasqankuta (1 Tim. 3:1). Ñaupajtaqa siervo ministerialraj kanayki tiyan. Siervos ministerialesqa ancianosta ashkha imaspi yanapanku. Ancianospis siervos ministerialespis kʼumuykukoj sonqowan hermanosninkuta yanapanku, astawanpis sonqo kʼajaywan predicanku. w23.12 pág. 28 párrs. 14-16

Josiasqa jovencitollaraj kashaspa Jehovata sirviyta qallarerqa. Payqa Diosninta aswan sumajta rejsiyta munarqa, munaynintataj ruwayta. Josiaspajqa rey kay mana facilchu karqa. Chay tiempopeqa, casi tukuy runas llulla diosesta yupaychasharqanku. Chayrayku Josiasqa mana manchachikoj kanan karqa, llulla diosesta yupaychayta saqechinanpaj. Chaytapunitaj ruwarqa. Josiasqa niraj 20 watasniyoj kashaspa, llulla diosesta yupaychayta chay nacionmanta chinkachiyta qallarerqa (2 Cró. 34:1, 2). Allin jovencitollaraj kaspapis, Josías jina kawaj. ¿Imaynamanta? Jehovamanta, kʼacha kaykunasninmantapis astawan yachakuspa. Chayta ruwanki chayqa, sonqoyki aysasonqa Jehovaman kausayniykita qopunaykipaj. Kausayniykita Jehovaman qopusqayki, ¿imaynatá yanapasonqa? Lukemanta parlarina, payqa 14 watitasniyoj bautizakorqa. Pay nerqa: “Kunanmantapacha Jehovatapuni kausayniypi ñaupajman churasaj, kallpachakusajtaj payta kusichinaypaj”, nispa (Mar. 12:30). Qanpis Luke jina ruwanki chayqa, ashkha bendicionesta japʼinki. w23.09 pág. 11 párrs. 12, 13

Tesalonicamanta congregacionpi piensarina. Chay congregacionqa apóstol Pablo paykunaman cartanta qhelqashajtin, niraj uj watayojpischu karqa. Ichapis ancianosqa manaraj chaykama experienciayojchu karqanku, pantarqankutaj, jinapis hermanosqa respetananku karqa. Noqanchejpis manchay ñakʼariy tiempo qayllaykamusqanman jina, astawanrajchá ancianospi atienekunanchej kanqa. Ichapis centralninchejmanta, chayri sucursalmanta hermanospa kamachiykunasninkutaqa mana japʼiyta atisunchu. Chayrayku kunanmantapachaña congregacionninchejmanta ancianosta munakuna, respetanataj. Ima kajtinpis yuyaynillanchejpipuni kana, nitaj pantasqasnillankuta qhawanachu. Ama qonqanachu Jehovaqa Cristonejta chay hermanosta ñaupajman pusashasqanta. Imaynatachus monteraqa soldadoj umanta jarkʼan, ajinallatataj suyakusqanchej salvacionpis yuyayninchejta jarkʼan. Sutʼita yachanchej kay mundopi imaschus kasqanqa qhasi manakajlla kasqanta (Fili. 3:8). Chantapis suyakuyninchejqa sonqonchejta tiyaykuchin, manchikuywan mana atipachikunapajtaj yanapawanchej. w23.06 págs. 11, 12 párrs. 11, 12

“Mana yuyayniyoj” warmej parlasqanta tukuy uyarejkunaqa, ajllananku tiyan chay invitacionta japʼikuytachus manachus. ¿Imaraykutaj khuchichakuy juchamanta ayqekunanchej tiyan? Proverbios libro nisqanman jina, chay “mana yuyayniyoj” warmeqa nin: “Yakutaqa suwasqatapuni aswan miskʼita tomarikunchej”, nispa (Pro. 9:17). ¿Imawantaj ninakun chay ‘yaku’? Bibliapeqa casado kausaypi qhariwarmi jina puñuykuyta frescarikoj yakituswan kikinchan (Pro. 5:15-18). Casadosqa qhariwarmi jina kusisqas puñuykuyta atillanku. Suwasqa ‘yaku’ kajtintajrí mana ajinachu. Chay suwasqa yakusqa ichapis ninakun mana casaraspalla qhariwarmi jina puñuykuywan. Chaytaj Diospa leyninta pʼakin. Khuchichakojkunaqa pakayllapi chayta ruwanku suwa jina. Chay ‘suwasqa yakoqa’ paykunapaj may miskʼi kaspa jinanman, pakayllapi ruwashasqankuta yuyasqankurayku. Jinapis paykunallataj engañakushanku. Jehovaqa tukuy imata qhawamushan, paytaqa mana engañankumanchu. Jehovaj ñaupaqenpi mana allinpaj qhawasqa kayqa may llakiypuni, manapuni miskʼi yaku jinachu (1 Cor. 6:9, 10). w23.06 págs. 22, 23 párrs. 7-9

Ichapis reparakunki kikillantapuni orakushasqaykita, predicaspapis niña ñaupajta jinachu kusisqa kasqaykita. Ama yuyaychu Jehová espíritu santonta niña qoshasusqanta. Pantaj runas kasqanchejrayku, wakin kutisqa chay pasawasunmanpuni. Kusikuyniyki pisiyashan chayqa, apóstol Pablopi tʼukuriy. Payqa Jesús jina ruwananpaj mayta kallpachakorqa. Chaywanpis yacharqa wakin kutisqa allin kajta ruwananpaj sonqon mana aysanallanta. Payqa wakin kutis mana allinchu sientekuspapis, imatachus Jehovapaj ruwananta nisqanta juntʼaytapuni munarqa. Qanpis amapuni sonqoyki imaynachus kashasqanman jinallachu imatapis ruway. Sonqoyki chayta ruwanaykipaj mana aysasojtinpis allin kajtapuni ruway. Ajinamanta tiempowan sonqoykipis chayta ruwayman aysallasonqataj (1 Cor. 9:16). w24.03 págs. 11, 12 párrs. 12, 13

Hermanosninchejta munakusqanchejta rikuchisunman paykunata tukuy sonqo japʼikuspa, amigosninchej kanankutataj saqespa (2 Cor. 6:11-13). Congregacionespeqa imaymana hermanos tiyan, nitaj tukuychu kikin uywasqa kanchej. ¿Imatá ruwasunman tukuyta astawan munakunapaj? Allin imasta ruwasqasninkuta qhawayta yachana. ¿Imaynatá hermanosninchejta munakusqanchejta rikuchisunman? Jehová jina paykunata qhawanapaj kallpachakuspa. Manchay ñakʼariy tiempopeqa hermanosninchejta munakunanchejpuni kanqa. Chay tiempo qallarejtin, ¿imaynatá Jehová jarkʼawasun? Ñaupa tiempopi Jehovaqa llajtanman kamacherqa Babiloniata thuñejtinku salvakunankupaj imatachus ruwanankuta. Pay nerqa: “Nacionníy, ukhu cuartosniykiman yaykuy, punkutataj wisqʼaykakamuy. Uj rato pakakuy Diospa phiñakuynin thasnukunankama”, nispa (Isa. 26:20). Ichá noqanchejpis chay kamachiyllatataj kasukunanchej kanqa manchay ñakʼariy tiempopi. w23.07 págs. 6, 7 párrs. 14-16

Kay tapuykunapi tʼukuriy: “¿Wajkuna ninkumanchu mana nisqaytapunichu valechisqayta, pacienciakusqayta, wajkunaj nisqankutapis uyarisqayta? Chayri, ¿ninkumanchu nisqaytapuni ruwachiyta munasqayta, ima kajtinpis uj kamachiyman jinapuni ruwakunanta munasqayta, kʼullutaj kasqayta? ¿Uyarinichu wajkunaj nisqankutapis? Atikojtintaj, ¿paykuna nisqankuman jinachu ruwani?”, nispa. Mana nisqanchejtapunichu valechisun chayqa, astawan rijchʼakusun Jehovaman, Jesusmanpis. Kausayninchejpi imapis cambiajtin, chay cambioman yachaykukunapaj kallpachakunanchej tiyan. Ichapis kaymanta jinalla sinchʼita onqoykusunman, qolqemanta pisichikusunman chayri tiyakunchej chaypi politicarayku chʼajwas rikhurinman. Chay imasqa mana yuyasqanchej problemaspi rikhurichiwasunman (Ecl. 9:11). Jehovaj llajtanpi waj asignacionman cambiawajtinchejpis prueba jinallataj noqanchejpaj kanman. Kay tawa imasta ruwasunman allin rinawanchejpaj: 1) Kausayninchej manaña ñaupajta jinachu kasqanta entiendena. 2) Imatachus kunanmantapacha ruwananchejpi piensarina, manataj ñaupajta ruwasqanchejpichu. 3) Reparana ima sumaj imaschus kapuwasqanchejta. 4) Wajkunatapis yanaparina. w23.07 págs. 21, 22 párrs. 7, 8

Profeta Danieltaqa Joven kashajtin, babilonios may karuman presota apakaporqanku. Jinapis Danielqa jovencitollaraj kaspapis, babiloniospa rikusqankuman jinaqa sumaj qhawasqa joven karqa. Payqa ‘ni iman imanasqa, sumaj rijchʼayniyoj’ karqa, may rejsisqa familiamantataj (1 Sam. 16:7). Chayrayku paytaqa yachacherqanku reypa kamachina wasinpi sirvinanpaj (Dan. 1:3, 4, 6). Jehovaqa Danielta munakorqa, ñaupaqenpi allin runa kananpaj kallpachakusqanrayku. Jehovaqa payta unayta sirvej kamachisninmanta parlashaspa Noemanta, Jobmanta jina, Danielpa sutintawan oqharerqa. Chaypachataj Danielqa 20 watasniyojchus nirajchus kasharqa (Gén. 5:32; 6:9, 10; Job 42:16, 17; Eze. 14:14). Danielqa unayta kausakorqa, kausaynintaj tʼukunapaj jina karqa. Jehovataj payta munakullarqapuni (Dan. 10:11, 19). w23.08 pág. 2 párrs. 1, 2

Niraj uj wasita rantikushaspa rispapuni allinta qhawarimusunman, ¿icharí? Bibliata leespa, estudiaspapis ajinallatataj ruwasunman. Usqhay usqhayllata Bibliata leerpasun chayqa, pata patallanta yachakusun, nisunman ‘Diospa Palabranmanta qallariy yachachiykunallata’ (Heb. 5:12). Chayrayku chay wasita jina sumajta qhawaykurinanchej tiyan, nisunman tukuy imitata sumajta ukhuncharinanchej tiyan. Bibliata sumajta estudianapajqa sumajta qhawaykurina imaynatachus uj versículo waj versiculowan ujchasqa kashasqanta. Mana imapichus creesqallanchejwanchu contentakunanchej tiyan, manaqa yachananchej tiyan imaraykuchus chaypi creesqanchejta. Diospa Palabranta sumajsituta entiendenapajqa, Bibliamanta pakasqa yachachiykunata sumajta ukhunchananchej tiyan. Apóstol Pabloqa cristianosman nerqa Diospa Palabranta sumajta estudianankuta, ajinamanta “cheqa kajpa anchonta, largonta, sayayninta, ukhunta ima” sumajta entiendenankupaj. Jinamanta paykunaqa creeypi “sumaj saphichasqa”, “sinchʼi sayasqataj” kankuman karqa (Efe. 3:14-19). Noqanchejpis kikillantataj ruwananchej tiyan. w23.10 pág. 18 párrs. 1-3

Bibliaqa parlan pikunachus pacienciayoj karqanku chaykunamanta. Allin kanman paykunamanta estudiananchej. Davidmanta parlarina. Payqa jovencitollaraj kashaspa Israelpi rey kananpaj ajllasqa karqa, jinapis kamachiyta qallarinanpajqa ashkha watastaraj suyanan karqa. Simeonwan Anawantaj, Mesiasta suyanankukama Jehovata tukuy sonqo sirvillarqankupuni (Luc. 2:25, 36-38). Paykunamanta estudiashaspa kay tapuykunapi piensarisunman: “¿Imataj paykunata yanaparqa pacienciakunankupaj? ¿Ima bendicionestataj japʼerqanku pacienciakusqankurayku? ¿Imaynatá paykuna jina ruwayman?”, nispa. Mana pacienciayoj kajkunamantapis ashkha imasta yachakullasunmantaj (1 Sam. 13:8-14). Kay tapuykunapi piensarisunman: “¿Imaraykutaj mana pacienciakorqankuchu? Mana pacienciakusqankurayku, ¿imaspitaj rikukorqanku?”, nispa. w23.08 pág. 25 párr. 15

Apóstol Pedroqa ni imarayku Jesusmanta kacharikorqachu. Payqa ima kajtinpis Jesusta qhatillarqapuni. Uj pacha ajina kasqanta sutʼita rikucherqa, maypachachus Jesuspa nisqanta discipulosnin mana entienderqankuchu chaypacha (Juan 6:68). Ashkhasqa Jesusta mana sutʼinchananta suyaspalla saqerparerqanku. Pedrotajrí mana chaytachu ruwarqa. Payqa tukuypa ñaupaqenpi Jesusman nerqa: “Nisqasnillayki wiñay kausayman pusan”, nispa. Jesusqa yacharqaña Pedropis waj apostolesninpis payta saqerparinankuta. Jinapis Pedroman nerqa sutʼita yachasqanta pay kutirikunanta, Jehovatataj kasukunallantapuni (Luc. 22:31, 32). Jesusqa yacharqa “runaqa cheqa kajtapuni ruwayta” munasqanta, “cuerpontajrí mana chaypaj jinachu” kasqanta (Mar. 14:38). Chayrayku Pedro payta mana rejsisqanta nejtinpis, Jesusqa mana nerqachu ni jaykʼaj kutirikunanta. Kausarimuytawantaj, Pedroman sapallanpisina rikhurerqa (Mar. 16:7; Luc. 24:34; 1 Cor. 15:5). Chaytaj maytachá Pedrota kallpacharqa. w23.09 pág. 22 párrs. 9, 10

Diosqa paypi creej runaspa juchasninkuta qʼalata perdonapun, pampachapun, manaña ujtawan chay juchasninkumanta yuyarikunchu (Sal. 32:1, 2). Jehovaqa creeyninkurayku paykunata cheqan runaspaj qhawan, mana juchayojta jinataj. Diosninchej Abrahanta, Davidta, waj kamachisnintapis cheqan runaspaj qhawajtinpis, paykunaqa pantaj runasllapuni, juchasapasllapuni karqanku. Chaywanpis Diosqa paypi creesqankurayku, paykunata mana juchayojta jina qhawarqa, astawanraj payta mana yupaychaj runaswan kikinchaspa (Efe. 2:12). Apóstol Pabloqa Romanosman Cartata qhelqashaspa sutʼita nerqa, Jehovaj amigosnin kanapajqa creeyniyojpuni kana kasqanta. Ajina karqa Abrahanwan Davidwan ima, noqanchejwanpis ajinallataj kanman. w23.12 pág. 3 párrs. 6, 7

Tukuy cristianos Jehovaman jaywanasta jina jaywayta atinchej. ¿Imaynatá chayta ruwasunman? Diospa Gobiernonta tiemponchejwan, kallpanchejwan, kapuyninchejwan ima yanapakuspa. Noqanchejmanta aswan sumaj kajta Jehovaman qosun chayqa, payta yupaychayta atisqanchejta may sumajpaj qhawasqanchejta rikuchisun. Apóstol Pabloqa Diosta yupaychayninchejpi kay imasta ruwayta mana saqenanchejchu kasqanta nerqa: Jehovamanta mañakunapuni kasqanta, suyakuyninchejmanta wajkunaman parlarina kasqanta, hermanosninchejwan tantakunanchej kasqanta, purajmantataj kallpachanakunanchej kasqanta, “astawanraj Diospa pʼunchaynin qayllaykamushasqanta reparaspa” (Heb. 10:22-25). Apocalipsis libroj qhepa kaj capitulosninpeqa Jehovaj angelnin nin: “¡Diosta yupaychay!”, nispa. Chaytataj iskay kutitapuni nin, chayta ruwananchejpuni kasqanrayku (Apo. 19:10; 22:9). Kay imasta ni jaykʼaj qonqakunachu: Jehovaj mana rikukoj jatun templonmanta pakasqa imasta yachakusqanchejta, jatun Diosninchejta yupaychayta atisqanchej may sumaj kasqantapis. w23.10 pág. 29 párrs. 17, 18

Tukuypis kay kamachiyta kasukuyta munanchej: “Purajmanta munanakunallapuni”. Jinapis yuyarikunanchej tiyan imatachus Jesús nisqanta. Pay nerqa: “Casi tukuypa munakuynin chiriyaponqa”, nispa (Mat. 24:12). Chaywanqa mana nisharqachu ashkha discipulosnin niña munanakunankuta. Pero kay mundomanta runas ukhupeqa manaña munakuy kanchu. Chayrayku sumajta qhawarikunanchej tiyan mana paykuna jina kanapaj. Chaypaj kay tapuyman kutichisun: ¿Imaynallamantapis yachayta atisunmanchu hermanosninchejta sinchʼitachus manachus munakushasqanchejta? Hermanosninchejta sinchʼitachus manachus munakushasqanchejtaqa yachasunman, imapis pasajtin imatachus ruwasqanchejpi (2 Cor. 8:8). Ujninmanta parlaspa apóstol Pedro nerqa: “Tukuy imamanta astawanqa purajmanta mayta munanakuychej. Munakoyqa ashkha juchasta pʼampan”, nispa (1 Ped. 4:8). Chayrayku munakuyninchejqa pruebaman churakun hermanosninchej pantajtinku, chayri sonqonchejta nanachiwajtinchej. w23.11 pág. 10 párrs. 12, 13

Wakin hermanosnillanchejta munakushasunman chayqa, imatachus Jesús munakuymanta nisqanta mana kasukushasunmanchu. Ichapis wakin hermanosninchejwanqa aswan sumaj amigos kanchej, imaynatachus Jesuspis wakin discipulosninwan karqa ajina (Juan 13:23; 20:2). Jinapis apóstol Pedro yuyarichiwanchej tukuy hermanosta ‘familianchejta jina’ munakunanchej kasqanta (1 Ped. 2:17). Pedroqa kayta yuyaycharqa: “Sonqomantapacha mayta munanakuychej”, nispa (1 Ped. 1:22). Kay versiculopi “mayta munanakuychej” nispa nisqanqa, pikunatachus mana munakuyta atillanchejchu chaykunatapis munakuna kasqanta niyta munan. Kaypi piensarina: ¿Imatataj ruwasunman ujnin hermanonchej imatapis ruwawajtinchej, chayri sonqonchejta nanachiwajtinchej? Ichapis paytaqa mana munakuyta atillasunmanchu, manaqa kikillanwantaj kutichiyta munasunman. Chaytaj mana allinchu kanman. Pedroqa Jesusmanta yachakorqa chayta ruwayqa Diosta mana kusichisqanta (Juan 18:10, 11). Pedro qhelqarqa: “Ama sajramanta sajrallawantaj kutichiychejchu, insultasojtiykichejpis ama insultallaychejtajchu. Astawanpis bendeciychej”, nispa (1 Ped. 3:9). Wajkunata mayta munakusun chayqa, kʼachas kasun. w23.09 págs. 28, 29 párrs. 9-11

Wawasqa tʼukunapaj jinapuni usqhayllata wiñarqonku. Paykunaqa jinallamanta wiñarqospa jinanku. Wiñay tukusqa cristianosman tukunapajtaj kallpachakunanchej tiyan, chayqa mana jinallamantachu (1 Cor. 13:11; Heb. 6:1). Chaypajqa Jehovawan sumaj amigos kananchej tiyan. Chantapis necesitanchej espíritu santowan yanapanawanchejta. Ajinamanta kʼacha kaykunasniyoj kananchejpaj, allinta imatapis ruwayta yachakunanchejpaj, aswan qhepapajtaj wakichikunanchejpaj (Pro. 1:5). Runataqa Jehová ruwarqa, qharitawan warmitawan (Gén. 1:27). Yachanchej jina qhariwan warmiwanqa, rijchʼayninkupi mana kikinchu kanku. Pero waj imaspipis nillataj kikinchu kanku. Jehovaqa qharimanpis warmimanpis waj jina ruwaykunata qorqa. Chaykunata juntʼanankupajtaj mana kikin kʼacha kaykunasniyojchu kananku tiyan, nitaj kikin imastachu ruwayta yachananku tiyan (Gén. 2:18). w23.12 pág. 18 párrs. 1, 2

Jesusqa munarqa wajkunapis Tatanpa sutinta oqharinallankutataj. Chay tiempopi religionta kamachejkunamanta wakenqa, ichapis yuyaj kanku Diospa sutinta mana oqharinankuta may santo kasqanrayku. Chay costumbrenkutaj mana Bibliaman jinachu karqa. Chayrayku Jesusqa mana chay costumbrenkuman jinachu ruwarqa. Astawanpis Tatanpa sutinta jatuncharqa. Uj kutipi Jesusqa gerasenospa jallpʼankupi supayniyoj runata sanoyacherqa. Runastaj mancharikuspa Jesusta mayta rogakorqanku chaymanta ripunanta (Mar. 5:16, 17). Chaywanpis payqa munarqa tukuy runas Jehovaj sutinta rejsinankuta. Chayrayku niraj ripushaspa chay runaman nerqa, Jehová imatachus payrayku ruwasqanta tukuy runasman willananta, nitaj paymanta willanantachu nerqa (Mar. 5:19). Reyninchej Jesusqa munan noqanchejpis kikillantataj ruwananchejta, munan tukuy runasman Diospa sutinta rejsichinanchejta (Mat. 24:14; 28: 20). Chayta ruwaspaqa Jesusta kusichinchej. w24.02 pág. 10 párr. 10

Jehovaj llajtanpi kayqa may sumajpuni. Kay qhepa pʼunchaykunapi kausay mayta sajrayajtinpis, Jehová yanapawasqanchejrayku hermanosninchejwan ujchasqa familia jina kanchej (Sal. 133:1). Payqa yanapallawanchejtaj familianchejpipis kusisqa kanapaj (Efe. 5:33–6:1). Chantapis yachayta qowanchej mana llakiywan atipachikunapaj, kusisqallapunitaj kanapaj. Wakin kutisqa Jehovata yupaychanallapajpuni mayta kallpachakunanchej tiyan. ¿Imarayku? Kay imasrayku: Imatachus wajkuna ruwasqanku, nisqankupis sonqonchejta nanachiwasunman. Chantapis pantajtinchej desanimakusunman, astawanraj kutin kutita kikillantapuni pantajtinchej. Jehovataqa sirvinallapuni kay imas kajtinpis: 1) uj hermano sonqonchejta nanachiwajtinchej, 2) qhariwarmi jina mana allintachu kausakojtinchej, 3) pantasqasninchejrayku desanimakojtinchej. w24.03 pág. 14 párrs. 1, 2

Wakin hermanosninchejqa Jehovapaj astawan llankʼayta qallarinku. Ichapis wakenqa rinku Diospa Gobiernonmanta Willajkunapaj Escuelaman, chayri maypichus astawan willajkuna necesitakun chayman ripunku. ¿Qanpis ajinata ruwayta atiwajchu? Jina kajtenqa ruwayta qallariypacha. Jehovaj kamachisnenqa imaynallamantapis paypaj astawan llankʼayta munanchej (Hech. 16:9). Pero ichapis manaraj chayta ruwayta atinkichu. Jina kajtenqa ama yuyaychu chayta ruwayta atejkunamanta nisqa aswan pisi valorniyoj kasqaykita. Aswan sumajqa tukukuykama sinchʼita sayay kashan (Mat. 10:22). Kayta amapuni qonqakuychu: Sichus atisqaykiman jina, imatachus ruwayta yachasqaykiman jinataj, Jehovaman aswan sumaj kajta qonki chayqa, payqa mayta kusikonqa. Ajinamanta bautizakuytawan Jesuspa qhepanta rillankipuni (Sal. 26:1). w24.03 pág. 10 párr. 11

Tatanchej Jehovaqa arrepientekojtinchej perdonanawanchejta niwanchej (Sal. 86:5). Paytaj nisqanta juntʼanpuni. Chayrayku tukuy sonqo arrepientekunchej chayqa, perdonawasunpuni. Yuyarikuna payqa mana sajrachu kasqanta. Yachan imatachus ruwayta atisqanchejta, ni jaykʼajtaj mañawasunmanchu mana ruwayta atisqanchejtaqa. Payman aswan sumajnin kajta qoshanchej chayqa, jatunpis juchʼuypis kachun, may valorniyojpaj qhawan. Piensarinallataj Jehovaj ñaupa tiempo kamachisninpi, paykunaqa Jehovata tukuy sonqo sirverqanku. Chaykunamanta ujnin apóstol Pablo kashan. Payqa may chhika watasta karusta viajarqa, ashkha congregacionestataj rikhuricherqa. Pero chaymantaqa kausaynin cambiasqanrayku, niña ñaupajta jina predicayta aterqachu. ¿Chayrayku niñachu Jehová allinpaj qhawarqa? Mana ajinachu karqa. Pabloqa atisqanta ruwallarqapuni, Jehovataj bendecillarqapuni (Hech. 28:30, 31). Ajinallatataj noqanchejpis mana tukuy tiempochu atisun kikillantapuni Jehovapaj llankʼayta. Chaywanpis payqa mana mashkhatachus paypaj ruwasqanchejtachu qhawan, manachayqa imaraykuchus chayta ruwasqanchejta. w24.03 pág. 27 párrs. 7, 9

Jesuspa discipulosnenqa sapanpi orakusqanmanta mayta yachakorqanku. Jesusqa may ocupasqapuni kaj, runastaj payman jamojpuni kanku. Chayrayku orakunanpajqa tiempochakunan karqa (Mar. 6:31, 45, 46). Jesusqa tutamanta jatarikuyta yachaj Tatanwan sapallanpi parlarikunanpaj. Uj kuti tutantin Tatanmanta mañakorqa uj jatun ruwayta niraj ruwashajtin (Luc. 6:12, 13). Wañupunan ñaupaj chʼisitaj Jehovamanta kutin kutita mañakorqa, kay jallpʼapi ruwanasninmanta aswan mana atinata ruwananraj kasqanrayku (Mat. 26:39, 42, 44). Jesusmanta yachakunchej may ocupasqas kaspapis Jehovamanta mañakunapaj tiempochakuna kasqanta. Ichapis Jesús jina horarioyoj kana tiyan orakunapaj. Ichapis tutamantaña jatarikusunman chayri chʼisin orakunapaj aswan tardecituta puñukapusunman. Chayta ruwaspa Jehovaman may agradecesqa kasqanchejta rikuchisun, kay sumaj regalota qowasqanchejmanta. w23.05 pág. 3 párrs. 4, 5

Bibliamanta sutʼinchaj uj diccionario nisqanman jina, kay diapaj versiculopi “juntʼa kashan” nispa nisqanqa mayumanta may chhika yaku noqanchejman jamusqanta niyta munan. Chaytaj reparachiwanchej may jinatapunichus Jehová ajllasqa cristianosta munakusqanta. Ajllasqa cristianosqa yachanku, “Tata Diospa munakusqasnin” kasqankuta (Jud. 1). Paykunaqa apóstol Juan jina ninkuman: “Reparaychej imaynatapunichus Tata Dios munakuwasqanchejta, Diospa wawasnin sutichasqa kananchejpaj”, nispa (1 Juan 3:1). ¿Ajllasqa cristianosllatachu Jehová munakun? Mana, tukuynin kamachisninta munakun. ¿Imataj astawan rikuchiwanchej Jehová munakuwasqanchejta? Juchamanta kacharichiwasqanchej. Chaypi reparanchej Jehovaqa ni pi jina munakuwasqanchejta (Juan 3:16; Rom. 5:8). w24.01 pág. 28 párrs. 9, 10

Kay diapaj ajllasqa textoqa rikuchiwanchej imatachus David ruwasqanta wañuy patapi kashajtin manchikuyninta atipananpaj. Payqa imatachus Jehová aswan qhepaman ruwananpi tʼukurerqa. Yacharqa Jehová maychus tiemponpi salvananta. Jehovaqa Davidman nisqaña Israelpa reynin kananta (1 Sam. 16:1, 13). Davidqa yachallarqataj Jehovaqa chay nisqanta juntʼanantapuni, mana qhasitachu imatapis parlasqanrayku. Noqanchejmanrí, ¿imata ruwanantataj Dios niwanchej? Payqa mana niwanchejchu, kay tiempopi ni ima problemayoj kausakunanchejta. Chaywanpis kay tiempopi ima pasawajtinchejpis, Jehovaqa niwanchejña paraisopi tukuy problemasninchejta chinkachinanta (Isa. 25:7-9). Chantapis Diosninchejqa may atiyniyoj wañusqasta kausarichinanpaj, jampinawanchejpaj, tukuy enemigosninchejtapis chinkachinanpaj (1 Juan 4:4). w24.01 pág. 6 párrs. 12, 13

Imaraykuchus Jehovaman kausayninchejta qopusqanchejpi, bautizakusqanchejpi ima piensarina. Chaytaqa ruwarqanchej Jehovaj ladonmanta kayta munasqanchejrayku. Yuyarikuna imachus yanapawasqanchejta kaypuni cheqa kaj kasqanta reparanapaj. Jehovata rejsispa Tatanchejta jina qhawakorqanchej, respetarqanchej, munakorqanchejtaj. Creeyninchej wiñasqanrayku juchasninchejmanta arrepientekorqanchej, chantá Jehovaj chejnisqan imasta ruwayta saqeporqanchej, payta kusichisqan imastataj ruwayta qallarerqanchej. Jehová perdonawasqanchejta yachaspataj mayta kusirikorqanchej (Sal. 32:2). Reunionesman riyta qallarerqanchej, sumaj imasta yachakusqanchejmantataj wajkunaman willariyta qallarerqanchej. Kunanqa Jehovaman kausayninchejta qopunchejña, bautizakunchejñataj. Kausayman pusaj ñanpi purishanchej, nitaj chaymanta llojsipuyta munanchejchu (Mat. 7:13, 14). Chayrayku sinchʼita sayana Jehovata yupaychaypi, kamachiykunasnintataj kasukuypi. w23.07 pág. 17 párr. 14; pág. 19 párr. 19

Piensarinanchej tiyan Jehovaj munayninta ruwanata nisqanchejpi. Chay kallpata qowasun ima juchamanpis mana urmanapaj. Jina kajtin, ¿coqueteasunchu pichus casarasqa kajwan? Ni imarayku. Jehovaman kausayninchejta qopushaspaqa nerqanchejña mana chayta ruwananchejta. Ama saqenachu sonqonchejpi sajra munaykuna saphichakunanta. Ajinamanta mana kallpachakushananchejchu kanqa sonqonchejmanta chayta orqhonapaj. Ni imarayku “sajra runaspa ñanninta” japʼirinachu (Pro. 4:14, 15). Jesuspa kausaynin mayta yanapawasunman, payqa Tatanta kusichiytapuni munarqa. Noqanchejpis Jehovaman kausayninchejta qopusqanchejrayku, imaschá payta mana kusichinchu chay imasta chay rato qhesachasun, ni tumpitata piensarispa (Mat. 4:10; Juan 8:29). Problemaspi kaspapis juchaman tanqasqa kaspapis, rikuchiyta atinchej Jesuspa qhepallantapuni riyta munasqanchejta. Jehovataj chayta ruwanapaj yanapawasun. w24.03 págs. 9, 10 párrs. 8-10