Octubre

Wakin kutis, ¿nichu kasukuyta atillanchej? David ajinapi rikukorqa. Chayrayku Diosmanta mañakorqa: “Sonqoyta aysay tukuy sonqo kasukusunaypaj”, nispa (Sal. 51:12). Davidqa Jehovata munakorqa, jinapis wakin kutisqa mana kasukuyta atillarqachu. Noqanchejwanpis kikillantaj kanman. ¿Imajtin? Kay kinsa imasrayku: Ñaupaj kaj, mana kasukuyta herenciata jina japʼinchej. Iskay kaj, Satanasqa tukuy imata ruwashan pay jina Diospa contranta oqharikunanchejpaj (2 Cor. 11:3). Kinsa kaj, mana kasukuyta munaj runas chaupipi kausakunchej. “Chay yuyayqa wayra jina tukuynejpi kashan, mana kasukoj runaspitaj trabajashan” (Efe. 2:2). Chayrayku chay kinsa imaswan maqanakunapaj tukuy atisqanchejta kallpachakunanchej tiyan, ajinamanta Jehovata kasukunapaj, pikunamanchus atiyta qon chaykunatapis kasukunapaj. w23.10 pág. 6 párr. 1

¿Imatá yachakunchej Jesús chay milagrota ruwasqanmanta? Kʼumuykukoj sonqo kanata. Jesusqa mana alabakorqachu yakuta vinoman tukuchisqanmanta. Payqa ni jaykʼaj jatunchakojchu imata ruwasqanmantapis. Astawanqa kʼumuykukoj sonqo karqa, tukuy imapi Tatantapuni jatunchaj, paypa atiynillanwantaj imatapis ruwasqanta nej (Juan 5:19, 30; 8:28). Jesús jina kʼumuykukoj sonqo kasun chayqa, mana ruwasqanchejmanta jatunchakusunchu, astawanqa kʼacha Diosninchejta jatunchasun (Jer. 9:23, 24). Paylla jatunchanapaj jinaqa. Mana Jehovaj yanapayninwanqa mana imatapis ruwayta atisunmanchu (1 Cor. 1:26-31). Kʼumuykukoj sonqo runaqa wajkunata yanapasqanmanta mana jatunchachikunchu. Astawanqa chay ruwasqanta Jehová qhawamushasqanta, jatunpajtaj qhawasqanta yachaspa sonqo juntʼasqa (Mateo 6:2-4, kikinchay; Heb. 13:16). Jehovaqa mayta kusikun Jesús jina kʼumuykukoj sonqo kanapaj kallpachakojtinchej (1 Ped. 5:6). w23.04 pág. 4 párr. 9; pág. 5 párrs. 11, 12

Apóstol Pabloqa Dios yuyaychasqanman jina cristianosman nerqa wajkunaj allinninkuta maskʼanankuta. ¿Imaynatá chay yuyaychasqanman jina ruwasunman reunionespi? Wajkunapis comentayta munasqankuta yuyarikuspa. Kaypi piensarina: Amigosninchejwan parlarikushaspaqa mana noqallanchejchu parlaykunchej, saqenchej paykunapis parlarikunallankutataj, ¿icharí? Reunionesninchejpipis ajinallataj. Munanchej atikojtenqa tukuy hermanos comentanankuta. Hermanosninchejta maytapuni kallpachasunman comentanankuta saqespa (1 Cor. 10:24). Chayrayku comentajtinchejqa pisi palabrasllapi kanan tiyan. Ajinamanta tiempo kallanqa ashkha hermanos comentanankupaj. Chantapis comentashaspaqa mana ashkha imasmantachu ujllapi parlaykuna tiyan. Parrafontinmanta parlaykusunman chayqa, wajkunaqa niña imatapis comentayta atinkumanchu. w23.04 págs. 22, 23 párrs. 11-13

Yuyarikunanchej tiyan aswan sumaj kasqanta runasta yanapay, chaytataj ruwasunman predicaspa. Predicaspaqa runasta entiendeyta yachana. Predicacionpeqa imaymana creenciasniyoj runaswan, tukuy ladomanta runaswan, imaymana caracterniyoj runaswan tinkunchej. Apóstol Pablomanta mayta yachakusunman. Payqa runasta entiendej, imaynachus kasqankuman jinataj paykunawan kaj. Payqa “nacionesman kachasqa apóstol” karqa (Rom. 11:13). Chayrayku predicarqa judiosman, griegosman, yachayniyojkunaman, ranchospi tiyakojkunaman, kuraj autoridadesman, reyesmanpis. Pabloqa tukuy laya runaspa sonqonkuman chayananpaj “tukuy runaspaj imaynachus kasqankuman jina” tukorqa (1 Cor. 9:19-22). Payqa sumajtaraj piensarej maymantachus kasqankupi, imatachus creesqankupipis. Chayman jinataj paykunaman predicaj. ¿Imatá paymanta yachakunchej? Predicacionpi sumaj rinawanchejpajqa, noqanchejpis sumajtaraj yuyaycharikunanchej tiyan, piensarinataj imaynatachus sapa runata yanaparinanchejpi. w23.07 pág. 23 párrs. 11, 12

Llampʼu sonqo runaqa kallpayoj, manataj llauchʼichu. Jinapis sinchʼi llakiypi kaspaqa mana atillanchejchu llampʼu sonqo kayta, chaypajqa mayta kallpachakunanchej tiyan. Llampʼu sonqo kayqa “Diospa espiritunpa” poqoyninmanta (Gál. 5:22, 23). Griego parlaypi “llampʼu sonqo” palabrataqa wakin kutis kʼita caballota mansoyachisqankumanta parlanapaj oqharikoj. Tʼukunapaj jinachá karqa uj kʼita caballo manso caballoman tukusqanqa. Pero mansoyajtinpis uj caballoqa kallpayojllapuni. Noqanchejrí, ¿imaynatá llampʼu sonqos kasunman, kallpayojllapunitaj? Sapallanchejmantaqa mana atisunmanchu, Jehovamanta mañakunanchej tiyan espíritu santonta. Tukuypis llampʼu sonqos kayta atinchej. Ashkha kutispi runasqa testigosta qhapariykuwanchej, noqanchejtaj mana siminakunchejchu. Wakin runas chayta rikuspataj testigosta allinpaj qhawanku (2 Tim. 2:24, 25). w23.09 pág. 15 párr. 3

Apóstol Juanqa mosqoypi jina rikorqa 24 ancianosta Jehovata cielopi yupaychashajta. Paykunataj Diosta jatunchasharqanku, nisharqankutaj: “Qanllamin jatunchanapaj jina kanki, yupaychanapaj jina, atiyta japʼinaykipaj jinataj”, nispa (Apo. 4:10, 11). Angelespis Jehovata alabanku, jatunchankutaj ashkha imasrayku. Paykunaqa Dioswan cielopi kashanku, may sumajtataj rejsinku. Imaynatachus imatapis ruwasqanta rikuspa, sutʼita reparanku imayna Dioschus kasqanta. Chayraykutaj sonqonku aysan payta jatunchanankupaj (Job 38:4-7). Noqanchejpis Jehovawan parlashaspaqa jatunchananchej tiyan. ¿Imaynamantá jatunchasunman? Imachus paymanta gustawasqanchejta nisunman, imaraykutajchus payta jatunpaj qhawasqanchejtapis. Bibliata leeshaspa, estudiashaspapis kallpachakuna reparanapaj Jehovamanta imaschus mayta tʼukuchiwasqanchejta (Job 37:23; Rom. 11:33). Chaymantataj Jehovaman willarina chay kʼacha kaykunasninpi tʼukurispa imaynachus sonqonchej kashasqanta. Chantapis noqanchejta yanapawasqanchejmanta, tukuy hermanosta yanapasqanmantapis Jehovata jatunchallasunmantaj (1 Sam. 2:1, 2). w23.05 págs. 3, 4 párrs. 6, 7

Kay 1919 watapi Diospa llajtanqa niña Jatun Babiloniaj makinpichu karqa. Chay watapi “allin kamachi yuyayniyoj” maychus tiemponpi rikhurerqa, yanapananpaj allin sonqoyoj runasta ‘Santo Ñanpi’ puriyta qallarinankupaj (Mat. 24:45-47; Isa. 35:8). Chay ñanta sumajta wakichikusqanrayku, ashkha runas chay ñanta puriyta qallarerqanku. Paykunaqa Jehovamanta astawan yachakorqanku, imastachus ruwayta munasqanmantapis (Pro. 4:18). Chantapis Diosta kusichinankupaj kausayninkupi wakin imaspi cambiarqanku. Chaywanpis Jehovaqa pisimanta pisi cambianankuta suyarqa, llajtantapis watas pasasqanman jina llimphucharqa. Maytachá kusikusun tukuy ima ruwasqanchejwan Diosninchejta kusichispa. Uj ñan purinapaj jinallapuni kananpajqa, allinchasqa kanan tiyan. 1919 watamantapacha ‘Santo Ñanta’ allinchakorqa. Ajinamanta ashkha runas Jatun Babiloniamanta llojsipuspa chay ñanta rinankupaj. w23.05 pág. 17 párr. 15; pág. 19 párr. 16

Diospa Llajtanta Kamachejkunaqa, paykunata yanapakoj hermanosta wakichishanku. Chay yanapakojkunaqa ashkha ruwaykunasniyoj kanku, sumajtataj yanapakushanku. Chayrayku paykunaqa sumaj wakichisqa kashanku Cristoj ovejitasninta sumajta cuidanankupaj. Manchay ñakʼariy tiempo tukukunanpajña kashajtin ajllasqa cristianos cieloman apasqa kajtinku, kay jallpʼapi Diospa llajtanqa payta yupaychashallanqapuni. Jesucristo Kamachejninchej kasqanrayku, Diospa kamachisnenqa ñaupajllamanpuni risunchej. Chay tiempopi uj qotu ujchasqa nacionesqa contranchejta oqharikonqanku. Paykunatataj Bibliaqa sutichan Magogmanta Gog nispa (Eze. 38:18-20). Jinapis chayqa pisi tiempollata kanqa, nitaj munayninkuwanchu llojsenqanku. Mana Diosta yupaychajta saqechiyta atiwasunchu, astawanpis Jehová salvawasun. Mosqoypi jina Juanqa waj ovejasmanta kaj “may chhika runasta” rikorqa, Señortaj payman nerqa chay “may chhika” runasqa “manchay ñakʼariymanta” llojsimushasqankuta. Chaypi sutʼita reparanchej Jehovaqa salvanawanchejtapuni (Apo. 7:9, 14). w24.02 págs. 5, 6 párrs. 13, 14

¿Imatá ruwasunman Jehová espíritu santonta qonawanchejpaj? Paymanta mañakuna, Palabranta estudiana, llajtanmantataj ama karunchakunachu. Chayta ruwasun chayqa, ‘Diospa espiritunpa poqoyninta’ kausayninchejpi rikuchisun (Gál. 5:22, 23). Jehová espíritu santonta qonawanchejpajqa kausayninchej, yuyayninchejpis llimphu kanan tiyan. Sichus sajra yuyaykuna noqanchejpi saphichakunanta saqesunman, chayman jinataj ruwasunman chayqa, espíritu santota niña japʼisunmanchu (1 Tes. 4:7, 8). ¿Imatawán ruwananchej tiyan? Pablo nerqa: “Diospa sutʼinchasqantaqa ama pisipaj qhawaychejchu”, nispa (1 Tes. 5:20). Kay versiculopi ‘sutʼinchasqanta’ nispaqa, Jehová Dios espíritu santonnejta imastachus willawanchej chaymanta parlashan. Chay willaykunamanta ujtaj kashan Jehová Diospa pʼunchayninmanta, qayllitapiñataj kashasqanmanta willaykuna. Noqanchejqa mana yuyanchejchu Jehová Diospa pʼunchayninpaj ashkharaj faltasqanta, chayri Armagedonta mana rikunanchejta. Astawanpis chay pʼunchay chayamunallantaña mayta suyakushanchej. Chayrayku ‘Diosta tukuy sonqo yupaychasqanchejta ruwasqasninchejwan’ rikuchinchej, llimphu kausayniyojllapunitaj kanchej (2 Ped. 3:11, 12). w23.06 pág. 12 párrs. 13, 14

Celularninchejpi pornografiamanta foto rikhurimuwajtinchej, ¿imatá ruwasunman? Chay ratopacha uj ladota qhawarina. ¿Imataj chaypaj yanapawasunman? Yuyarikuna Jehovawan sumaj amigos kasqanchej ni imawan kikinchakusqanta. Pero wakin fotosqa mana pornografiamantapunichu kankuman. Jinapis sajra munayninchejta noqanchejpi rijchʼarichinman. Chay jina fotostapis mana qhawanachu tiyan. Imaraykuchus mana munasunmanchu ni sonqollanchejpipis qhenchachakuyta (Mat. 5:28, 29). Tailandia suyumanta David sutiyoj anciano nin: “Tapurikuytapuni yachani: ‘Kay fotos mana pornografiamantapunichu kajtinpis, ¿munanmanchu Jehová qhawanallayta?’, nispa. Chaypi piensareyqa yanapawan allin kajtapuni ajllanaypaj”. Jehovaj sonqonta nanachiyta manchachikusun chayqa, atillasun allin kajta ajllayta, “Jehová Diosta manchachikuymin yachaypa qallariynenqa”. w23.06 pág. 23 párrs. 12, 13

Chay ‘ukhu cuartosqa’ ichapis congregacioneswan ninakun. Sichus chay tiempopi hermanosninchejwan ujchasqasllapuni kasunchej chayqa, Jehovaqa nisqanman jina jarkʼawasunpuni. Chayrayku mana hermanosninchejta aguantanallachu, manaqa paykunata tukuy sonqo munakuna. Mana ajinata munakojtinchejqa ichapis mana salvakuyta atisunchu. Jehová Diospa pʼunchaynenqa manchay llakiypuni kanqa tukuy runaspaj (Sof. 1:14, 15). Jehovaj kamachisninpis llakiykunapi rikukullasuntaj. Jinapis kunanmantapachaña wakichikusun chayqa, sonqo tiyasqa kayta atisun, wajkunatapis yanapasun. Aguantayta yachakusunña chayqa ima kajtinpis aguantallasunpuni. Khuyakuyta yachakusunña chaytaj tukuy atisqanchejta ruwasun hermanosninchejta yanaparinapaj, necesitasqankutapis jaywarinapaj. Hermanosninchejta kunanmantapachaña munakuspataj paykunawan ujchasqasllapuni kasun. Jehovaqa paraisopi wiñay kausayta qowasunchej. Chaypeqa niña yuyarikusunchu desastres naturalesmanta, nitaj waj llakiykunamantapis (Isa. 65:17). w23.07 pág. 7 párrs. 16, 17

Bibliaqa Diosta kasukoj kamachisninmanta parlaspa kallpayoj runasmanta jinapuni parlan. Chaywanpis wakin kuteqa aswan kallpayoj kajkunapis yuyarqanku mana kallpayojchu kasqankuta. Wakin kuti Davidqa ni imata manchachikorqachu, nerqataj: “Uj orqota jina sinchʼita sayachiwarqanki”, nispa. Wakin kutistaj kallpan mana kasqanta yuyarqa, sinchʼitataj mancharikorqa (Sal. 30:7). Sansonpis Jehová espíritu santonta qojtenqa manchay kallpayoj karqa. Chaywanpis reparallarqataj Dios atiyta mana qojtenqa “mayqen runa jinallataj mana kallpayoj” kasqanta (Jue. 14:5, 6; 16:17). ¿Pitaj kallpata paykunaman qorqa? Jehová. Apóstol Pablopis nillarqataj Jehovamanta jamoj atiyta necesitasqanta (2 Cor. 12:9, 10). Payqa onqoyta yachaj (Gál. 4:13, 14). Chantapis allin kajta ruwananpaj mayta kallpachakoj (Rom. 7:18, 19). Wakin kutistaj mayta llakikoj, wañuchinankutataj manchikoj (2 Cor. 1:8, 9). Jinapis pay nerqa: “Pisi kallpayoj kaspaqa atiyniyoj kani”, nispa. ¿Imaynamanta? Necesitajtin Jehová payman kallpata qorqa, ajinamanta atiyniyoj karqa. w23.10 pág. 12 párrs. 1, 2

Sichus wakin kutis pisipaj qhawakuyta yachanchej chayqa, yuyarikuna Jehová llajtanman pusamuwasqanchejta (Juan 6:44). Allin imasta ruwasqanchejta noqanchej mana reparakojtinchejpis, Jehovaqa chayta reparan, yachantaj imaynachus kasqanchejta (2 Cró. 6:30). Chayrayku may valorniyojpaj qhawawasqanchejta niwanchej chayqa, mana llullakushawanchejchu (1 Juan 3:19, 20). Ichapis wakinninchejtaqa sonqonchej juchachallawanchejpuni niraj Jehovata rejsishaspa imastachus ruwasqanchejmanta (1 Ped. 4:3). Wakintaj ichapis unaytaña Jehovata tukuy sonqo sirvishanku. Jinapis sajra munayninkuwan maqanakushallankupuni. Noqanchejrí, ¿ajinallapitajchu rikukushanchej? Jina kajtenqa, maytachá sonqochawasunman Jehovaj ñaupa kamachisninpis ajinallataj sientekusqankuta yachay. Apóstol Pabloqa pantasqasninpi tʼukurispa nerqa: “¡Ay, imanallasajtaj!”, nispa (Rom. 7:24). Payqa juchasninmanta arrepientekuspañapis bautizakuspañapis, “apóstoles ukhupi aswan juchʼuypaj” qhawakullarqapuni, juchasapasmantataj pay “aswan juchasapa” kasqanta yuyarqa (1 Cor. 15:9; 1 Tim. 1:15). w24.03 pág. 27 párrs. 5, 6

Rey Jehoás mana allinta ruwasqanmantaqa kayta yachakusunman: Yanapanawanchejpaj jina sumaj amigosta maskʼakunanchej tiyan, nisunman Jehovata munakoj, paytataj kusichiyta munaj amigosta. Amigosninchejqa mana edadnillanchejmantachu kananku tiyan. Jehoaspis Jehoiadamanta nisqaqa aswan joven karqa. Amigosniykipi piensariy, kaykunatataj tapurikuy: “¿Amigosniy yanapawankuchu aswan sinchʼi creeyniyoj kanaypaj? ¿Yanapawankuchu Jehovaj kamachiykunasninman jina kausakunaypaj? ¿Paykunaman gustanchu Jehovamanta parlariy, imatachus Bibliapi yachakusqankumantapis? Jehovaj kamachiykunasninta, ¿respetankuchu? Pantajtiy, ¿paykuna cheqanchawankuchu, chayri imatachus uyariyta munasqallaytachu niwanku?” (Pro. 27:5, 6, 17). Amigosniyki Jehovata mana munakunkuchu chayqa, mana chay jina amigosta necesitankichu. Pero amigosniyki Jehovata munakunku chayqa, sumaj amigos qanpaj kanku. Amapuni paykunamanta kacharikuychu (Pro. 13:20). w23.09 pág. 9 párrs. 6, 7

Alfa letraqa griego alfabetopi ñaupaj kaj letra, omega letrataj qhepa kaj letra. Jehovaqa “Alfataj Omegataj” kani nikuspa, imatachus qallarisqanta tukuchasqantapuni nishawanchej. Jehovaqa Adantawan Evatawan ruwaytawan, paykunaman nerqa: “Miraychej, ashkhayaychejtaj. Jallpʼantinman juntʼaykuychej, tarpuychejtaj”, nispa (Gén. 1:28). Jehovaqa imachus munaynin kasqanta willashaspa, “Alfa” nispapis nishanman jina karqa. Aswan qhepaman Adanpatawan Evajtawan kasukoj miraynenqa kay jallpʼaman juntʼaspa paraisoman tukuchenqanku, mana pantaj runastaj kanqanku. Chay juntʼakojtintaj Jehovaqa “Omega” nispapis ninman jina kanqa. Jehovaqa cielota, kay jallpʼata, chaypi kajkunatawan ruwayta tukuspa, uj garantiata jina qowarqanchej, imatachus runaspaj jallpʼapajpis munasqanta juntʼananpaj. Chay qanchis kaj día tukukuytataj munaynenqa tukuynin juntʼakonqa (Gén. 2:1-3). w23.11 pág. 5 párrs. 13, 14

Judiosqa tawa killasta jinapuni viajananku karqa Babiloniamanta Israelkama. Jehovataj nerqa chayanankukama ni ima jarkʼananta. Diosta kasukoj judiosqa yacharqanku imankuta saqepojtinkupis chayri imata ruwajtinkupis, Israelman kutipojtinkoqa ashkha bendicionestaraj japʼinankuta. Aswan sumaj bendiciontaj karqa Jehovallata yupaychasqanku. Babiloniapeqa Jehová Diosta yupaychanapajqa ni uj templollapis karqachu. Nillataj karqachu altar, nitaj sacerdotespis. Chayrayku israelitasqa Moisespa Leynin nisqanman jina mana ofrendasta jaywayta aterqankuchu. Chantapis Jehovata yupaychaj judiosmantaqa, aswan ashkha karqanku llulla diosesta yupaychaj runas. Chayrayku Jehovata manchachikoj may chhika judiosqa, llajtankuman kutipuyta mayta munasharqanku, Jehovallata watejmanta yupaychanankupaj. w23.05 págs. 14, 15 párrs. 3, 4

“Kʼanchaypa wawasnin jinallapuni” kausakunanchejpajqa necesitanchej Diospa espíritu santonta. ¿Imajtin? Kay chʼichi mundopeqa mana atikullanchu llimphu kausayniyojllapuni kay (1 Tes. 4:3-5, 7, 8). Espíritu santoqa yanapawasunman kay mundoj yuyayninwan mana chimpachikunapaj. Chay yuyaykunaqa mana Jehová Dios yuyasqanman jinachu kanku. Chantapis yanapallawasunmantaj ‘tukuy imapi kʼacha kanapaj, cheqan kajta ruwanapaj, cheqa kajman jinataj kausakunapaj’ (Efe. 5:9). Jesusqa nerqa: “Tataykichejqa espíritu santota qonqa mañakojkunaman”, nispa (Luc. 11:13). Chaypi reparanchej espíritu santota japʼinapajqa Jehovamanta mañakuna kasqanta. Chantapis espíritu santota japʼillanchejtaj tantakuykunapi hermanosninchejwan khuska Jehovata jatunchaspa (Efe. 5:19, 20). Espíritu santowan yanapachikusunchej chayqa, Jehovata kusichinapaj jina kausakusunchej. w24.03 págs. 23, 24 párrs. 13-15

Pacienciayoj kayta necesitanchej chayqa, Jehová Diosmanta mañakuna. Pacienciaqa Diospa espiritunpa poqoyninmanta (Gál. 5:22, 23). Chayrayku Jehovamanta mañakuna espíritu santonta qonawanchejta, espiritoj poqoyninmanta kaj imasta kausayninchejpi rikuchinapajpis yanapanawanchejta mañakunallataj. Sichus imapi rikukushaspa mana pacienciakuyta atishanchejchu chayqa, Diospa espíritu santonta ‘mañakunallapuni’ (Luc. 11:13). Chantapis Jehovamanta mañakullasunmantaj pay jina yuyanapaj yanapanawanchejta. Orakuytawantaj tukuy atisqanchejta kallpachakuna sapa día pacienciakunapaj. Mana saykʼuspa Jehovamanta yanapata mañakullasunpuni chayqa, tukuy atisqanchejtataj pacienciakunapaj kallpachakullasunpuni chayqa, Jehová yanapawasun aswan pacienciayoj kanapaj. Jehovaj wakin ñaupa kamachisninpi tʼukuriypis yanapallawanchejtaj. Bibliaqa ashkha pacienciayoj runasmanta parlan. Paykunapi tʼukurisun chayqa, paykuna jina pacienciayoj kayta yachakusun. w23.08 págs. 22, 23 párrs. 10, 11

Jesusqa apóstol Pedroman sutʼita rikucherqa Jehová cuidanantapuni. Jesusqa kausarimuytawan Pedrota chay waj apostolestawan uj milagronejta yanaparqa, ashkha pescadosta japʼinankupaj (Juan 21:4-6). Chay milagrotaj Pedroman sutʼitachá rikucherqa, Jehovaqa tukuy ima necesitasqanta qoyta atisqantapuni. Ichapis chaypi Pedro yuyarikorqa imatachus Jesús Jehovamanta nisqanta. Jesusqa nerqa Jehovaqa Gobiernonta ñaupajta maskʼajkunata cuidanantapuni (Mat. 6:33). Pedroqa chayta yachasqanrayku, predicayta kausayninpi ñaupajman churarqa, manataj pescado negociontachu. Pedroqa Pentecostés 33 watapi, mana manchachikuspa runasman willararqa, chaytaj ashkha runasta yanaparqa sumaj willaykunata japʼikunankupaj (Hech. 2:14, 37-41). Aswan qhepamantaj ashkha samaritanosta, mana judiosta ima yanaparqa Cristoj discipulosninman tukunankupaj (Hech. 8:14-17; 10:44-48). Sutʼita reparanchej Jehovaqa Pedromanta mayta valekusqanta, tukuy laya runasta llajtanman pusamunanpaj. w23.09 pág. 20 párr. 1; pág. 23 párr. 11

Babilonios Jerusalenta thuñisqankumanta iskay watanman jina, rey Nabucodonosorqa mosqoyninpi uj jatun lantita rikorqa, chaytaj ni puñukojtapis saqejchu. Chayrayku Babiloniamanta tukuy yachayniyojkunata, Danieltapis nerqa imatachus mosqokusqanta, imatajchus niyta munasqantapis sutʼinchanankuta. Mana sutʼinchajtinkutaj tukuyninkuta wañuchinanta nerqa (Dan. 2:3-5). Danielqa chay rato imatapis ruwanan karqa, manaqa ashkha runas wañunkuman karqa. Chayrayku “Danielqa reypaman rispa uj tiempota suyarinanta mañakorqa reypa mosqokusqan imatachus niyta munasqanta sutʼita willananpaj” (Dan. 2:16). Chayta ruwananpajqa sinchʼi creeyniyoj kanan karqa, mana manchachikojtaj. Imajtinchus Bibliaqa mana ninchu Daniel ñaupajta mosqoykunata sutʼinchasqantaña. Chayrayku payqa kinsa amigosninwan parlarerqa, paykunamantaj “nerqa cielopi kaj Diosmanta khuyakuyninta mañakunankuta, chay pakasqa imata paykunaman sutʼinchananpaj” (Dan. 2:18). Jehovaqa mañakuykunasninkuman kuticherqa, yanapanwantaj Danielqa Nabucodonosorpa mosqoyninta sutʼinchayta aterqa. Ajinamanta Danielwan amigosninwanqa mana wañuchisqachu karqanku. w23.08 pág. 2 párr. 4

Pacienciakusqanchej imaspichus yanapawasqanchejpi piensarina. Pacienciakoyqa yanapawanchej aswan kusisqa kanapaj, aswan sonqo tiyasqataj kanapaj. Chayrayku pacienciakoyqa allinninchejpajpuni. Yanapallawanchejtaj wajkunawan allinta apanakunapaj, congregacionpis astawan ujchasqa kananpaj. Pillapis sonqonchejta nanachinawanchejpaj jina imata ruwajtenqa mana usqhayllata phiñarpakunachu. Ajinamantataj yanapakusun chay problema mana jatunyananpaj (Sal. 37:8; Pro. 14:29). Nitaj chayllachu, Tatanchej Jehová jina ruwasunchej, paymantaj astawan qayllaykusunchej, chaytaj imamantapis aswan sumaj. Yachakunchej jina, pacienciayoj kayqa may sumajpuni, tukuytataj mayta yanapawanchej. Pacienciakuy mana atikullajtinpis Jehovaqa yanapawasun pacienciakuyta yachakunallapajpuni. Paraisota pacienciawan suyakunanchejkamaqa kayta sutʼita yachanchej: Jehovaqa “payta manchikojkunata cuidan, munakuyninta suyakojkunata” (Sal. 33:18). Chayrayku tukuyninchej kallpachakunanchej tiyan pacienciawan pʼachawan jina pʼachallikunallapajpuni. w23.08 pág. 22 párr. 7; pág. 25 párrs. 16, 17

Santiagoqa sutʼita reparacherqa qhapaj runawan kʼacha kaspa, wajcha runatataj pisipaj qhawaspaqa, mana creeyniyojchu kasqanchejta, creeyniyoj kasqanchejta nishajtinchejpis (Sant. 2:1-5, 9). Chantapis uj runamanta parlarqa, pichus hermanonta chayri hermananta ropamanta chayri mikhunamanta pisichikushasqanta rikuspapis, mana yanaparerqachu. Chay runa creeyniyoj kasqanta nejtinpis, mana ruwaykunasninwanchu rikuchisqanrayku qhasilla karqa (Sant. 2:14-16). Santiagoqa Rahabmanta parlarqa, nerqataj payqa ruwasqasninwan creeyniyoj kasqanta rikuchisqanta (Sant. 2:25, 26). Rahabqa Jehovamanta parlajta uyarisqanrayku, yacharqa israelitasta yanapashasqanta (Jos. 2:9-11). ¿Imatataj Rahab ruwarqa Jehovapi creesqanta rikuchinanpaj? Iskay wateqaj israelitasta pakaykorqa mana wañuchisqa kanankupaj. Chayrayku Rahabqa Abrahán jinallataj cheqanpaj qhawasqa karqa, pantaj warmi kajtinpis, nitaj israelitachu kajtinpis. Paymanta yachakunchej creeyninchejta ruwaykunasninchejwanpuni rikuchina kasqanta. w23.12 pág. 5 párrs. 12, 13

Cristianosqa mana pata patallantachu Bibliata entiendeyta munanchej. Yachakuyta munanchej “Diospa pakasqa yachaynintapis”, chaytataj ruwasunman espíritu santoj yanapayninwan (1 Cor. 2:9, 10). Ichapis Jehovaman astawan qayllaykuchinawanchejpaj jina imatapis estudiayta qallarisunman. Chaypajtaj ashkha imas kan estudianapaj. Ichapis ukhunchasunman imaynatachus Jehová ñaupa tiempomanta kamachisninman munakuyninta rikuchisqanta, imaynatatajchus chay noqanchejtapis munakuwasqanchejta rikuchisqanta. Chantapis estudiasunman imaynatachus Jehová ñaupa tiempomanta israelitas payta yupaychanankuta munasqanta. Chaytataj kikinchasunman imaynatachus kay tiempopi payta yupaychananchejta munasqanwan. Chantapis estudiasunman Jesús kay jallpʼapi kashaspa ruwasqasninwan ima profeciastachus juntʼasqanta. Chaypajtaj yanapachikusunman Jehovaj testigosnin yachaqanasta maskʼanankupaj nisqa publicacionwan. Bibliata sumajsituta estudiayqa creeyninchejta sinchʼiyachenqa, yanapawasuntaj “Diospa yachayninta” tarinapaj (Pro. 2:4, 5). w23.10 págs. 18, 19 párrs. 3-5

Apóstol Pedro “mayta” ninanpaj ima palabratachus griego parlaypi oqharisqanqa, “tukuy ladoman aysarispa qhataykuy” niyta munan. Chay versiculoj tukukuyninpitaj nerqa chay munakoyqa, hermanosninchejpa juchasninkuta pʼampasqanta. Chayqa kanman uj telata tukuy ladoman aysarispa qhataykuy jina, mana uj iskay juchasta pʼampanallanpajchu, manachayqa “ashkha juchasta”. Kay versiculopi “pʼampan” nispa nisqanqa, “perdonay” niyta munan. Imaynatachus ima manchatapis uj telawan qhataykuspa pʼampaykunchej, ajinallatataj munakuypis wajkunaj pantasqasninkuta pʼampaykun. Hermanosninchejta munakusqanchejqa may jatun munakuypuni kanan tiyan, pantasqasninkuta perdonananchejpaj jina, mana perdonayta atinapaj jinallachu kajtinpis (Col. 3:13). Wajkunata perdonaspaqa sutʼita rikuchinchej munakuyninchej jatun kasqanta, Jehovatataj kusichiyta munasqanchejta. w23.11 págs. 10-12 párrs. 13-15

Rey Josiasqa 26 watasniyoj kashajtin templota allinchayta qallarerqa. Templota allinchashajtinkutaj, ‘Jehová Diospa Leyninmanta librota tarerqanku, mayqentachus Moisesnejta qosqa karqa chayta’. Josiasqa imatachus chay libropi nisqanta uyariytawan, chay rato Jehovaj Leyninta kasukuyta qallarerqa (2 Cró. 34:14, 19-21). ¿Qanpis Bibliata sapa día leeyta munawajchu? Chayta ruwanaykipaj kallpachakushankiña chay, ¿Bibliata leeywan gustachikushankichu? Yanapasoj versiculosta yuyarikunaykipaj, ¿imatá ruwanki? Josiasqa 39 watasniyoj jina kashajtin uj imapi pantaykorqa, chayraykutaj wañuyman chayarqa. Jehovamanta yanapata mañakunanmantaqa payllapi atienekorqa (2 Cró. 35:20-25). ¿Imatá paymanta yachakunchej? Ima edadniyoj kaspapis, mashkha unaytaña Bibliata estudiaspapis, Jehovaj yanapayninta maskʼanallanchejpuni tiyan. Chaypajtaj paymanta mañakunapuni yuyaychanawanchejta, Palabranta estudiana, wiñay tukusqa cristianospa yuyaychaykunasnintapis japʼikuna. Chayta ruwasun chayqa, mana jatun juchaspi urmallasunchu, astawanpis kusisqa kausakusunchej (Sant. 1:25). w23.09 pág. 12 párrs. 15, 16

Biblia willawanchej ñaupa tiempopeqa ashkha warmis Jehovata sirvisqankuta, munakusqankutataj. Paykunaqa munayninkuwan mana atipachikojkuna karqanku, tukuy ima ruwasqankupitaj creeyninkuta rikucherqanku (1 Tim. 3:11). Congregacionniykipeqa ashkha wiñay tukusqa hermanaschá kallantaj, paykunamantapis ashkha imasta yachakuwaj. Sipasllaraj kanki chayqa, piensariy mayqen hermanasmantachus yachakuyta atisqaykita, paykuna jina ruwanaykipajtaj kallpachakuy. Chaypajqa ima kʼacha kaykunasniyojchus kasqankuta qhawariy, piensariytaj imaynamantachus paykuna jina kayta atisqaykipi. Wiñay tukusqa kanapajqa kʼumuykukoj sonqo kana. Kʼumuykukoj sonqo warmeqa Jehová Diosninchejpata sumaj amigan, tukuywantaj sumajta apanakun. Jehovata munakoj warmeqa, kʼumuykukoj sonqowan, imatachus 1 Corintios 11:3 nisqanta tukuy sonqo japʼikun. Chaypi sutʼinchan Jehovaqa pikunamanchus congregacionpi, familiaspipis uma kanankupaj atiyta qosqanta. w23.12 pág. 19 párrs. 3-5

Jehovaqa munan qosas warminkuta munakunankuta, ni imata faltachinankuta, sumaj amigonku kanankuta, Diosmanta mana karunchakunankupajtaj yanapanankuta. Qosasqa sumajta tanteayta yachananku tiyan, warmista respetananku tiyan, atienekunapaj jinataj kananku tiyan. Casarakunki chayqa wawas rikhurinman. Uj sumaj tata kanaykipajtaj Jehová Diosmanta yachakuwaj (Efe. 6:4). Jehovaqa mana pʼenqakorqachu Jesusman niyta mayta munakusqanta, allinpajtaj qhawasqanta (Mat. 3:17). Tata kanki chayqa, wawasniykita munakusqaykita ninaykipuni tiyan, allinta ruwajtinkutaj felicitanayki tiyan. Jehová jina ruwaj tatasqa, wawasninkuta wiñay tukusqa cristianosman tukunankupaj yanapanku. ¿Imaynatá kunanmantapacha sumaj tata kanaykipaj wakichikuwaj? Familiaykiman, hermanosmanpis munakuyniykita rikuchispa, paykunata munakusqaykita nispa, jatunpajtaj qhawasqaykita nispa (Juan 15:9). w23.12 págs. 28, 29 párrs. 17, 18

Jehovaj kamachisnenqa tukuy runas jinallataj llakiykunapi rikukunchej, onqonchejtaj. Pero mana chayllachu, wakin runasqa Jehovaj llajtanta chejnikunku. Noqanchejtaj paykuna churanakuwasqanchejta, qhatiykachawasqanchejtapis aguantananchej tiyan. Jehovaqa chay imas pasanawanchejmanta mana jarkʼawanchejchu, jinapis chay imaspi rikukushajtinchej yanapanawanchejta niwanchej (Isa. 41:10). Jehovaj yanapanwanqa kusisqallapuni kayta atisunman, allin kajta ajllasunman, sinchʼi llakiypi kashaspataj paypa ladollanpipuni kasunman. Jehová niwanchej “sonqo tiyaykuyta” qonawanchejta (Fili. 4:6, 7). ¿Imataj chay sonqo tiyaykuy? Sonqonchej phaj nirisqan, nitaj llakiywan atipachikuy. Chaytataj tarinchej Jehovaj amigosnin kasqanchejrayku. Chay sonqo tiyaykuytaj may sumaj, chaytataj “runas mana entiendeyta atinkuchu”. ¿Maykʼajllapis sonqo ukhumantapacha maytapuni Jehovamanta mañakorqanchejchu, repararqanchejtajchu sonqonchej phaj nirisqanta? Chay ‘sonqo tiyaykuytaqa’ Dioslla qowanchej. w24.01 pág. 20 párr. 2; pág. 21 párr. 4

Jehovata munakojkunaqa tukuy sonqowan sutinta jatunchayta munanku. Rey Davidqa yacharqa Diospa sutinta jatunchaspaqa Jehovata jatunchashasqanta. Diospa sutinmanta parlaspaqa imaynachus kasqanmanta parlashanchej: kʼacha kaykunasninmanta, sumaj ruwasqasninmantapis. Davidqa Tatan Jehovaj sutinta santopaj qhawarqa, jatunchaytataj munarqa. Payqa nerqa ‘tukuy sonqonwan’ chayta ruwayta munasqanta. Levitaspis chayllatataj ruwarqanku, Jehovata jatuncharqanku. Paykunaqa kʼumuykukoj sonqowan repararqanku ni mashkha palabraswanpis Jehovata munasqanman jina jatunchayta atisqankuta (Neh. 9:5). Jehovaqa maytachá kusikorqa levitas ajinata sonqomantapacha jatunchasqankuta uyarispa. w24.02 pág. 9 párr. 6

Imatapis mana ruwayta atejtinchejqa Jehovaqa mana phiñakonqachu (2 Cor. 8:12). Pantasqasninchejmanta yachakuna. Imastachus allinta ruwanchejña chayta yuyarikuna. Bibliaqa nin: “Diosqa cheqan, manataj qonqapunchu ruwasqasniykichejta”, nispa (Heb. 6:10). Noqanchejpis chayta amallataj qonqapunachu. Astawanpis piensarina imastachus juntʼasqanchejpiña: Jehovaj amigonña kasqanchejpi, predicasqanchejpiña chayri bautizakusqanchejpiña. Chaykunata juntʼayta aterqanchejña chayqa, kunan imatachus ruwayta munashanchej chaytapis juntʼayta atillasuntaj. Jehovaj yanapayninwanqa ruwayta munasqanchejta juntʼayta atisun. Ruwayta munasqanchejta juntʼanapaj kallpachakushaspaqa kusiyta tarisun, imaynatachus Jehová yanapashawasqanchejta reparaspa (2 Cor. 4:7). Mana saykʼusunchu chayqa, aswan sumaj bendicionestaraj japʼisun (Gál. 6:9). w23.05 pág. 31 párrs. 16-18

Jehovaqa mayta munan kamachisninman munakusqanta, allinpaj qhawasqantataj rikuchiyta. Biblia nisqanman jina, payqa iskay kutispi Jesusta nerqa munasqa Wawan kasqanta, paytataj allinpaj qhawasqanta (Mat. 3:17; 17:5). ¿Qanpis munawajchu Jehová chayllatataj nisunanta? Mana cielomantapachachu parlamuwajtinchejpis Palabrannejta parlawanchej. Imastachus Jesús discipulosninman munakuywan nisqanta leespaqa, Jehovapis kikillantataj nishawasunman jina sientenchej. Jesusqa Tatan jinapuni imatapis ruwaj. Paytaj discipulosnin pantaj runas kajtinkupis, paykunata nejpuni munakusqanta. Chayta leespataj yuyarikuna Jehovapis kikillantataj noqanchejta nishawasqanchejta (Juan 15:9, 15). Pruebaspi rikukuspaqa ama yuyanachu Jehová niña munakuwasqanchejta. Astawanpis pruebaspi kaspaqa, rikuchiyta atinchej Jehovata mayta munakusqanchejta, paypitaj atienekusqanchejta (Sant. 1:12). w24.03 pág. 28 párrs. 10, 11