Diospa Reinon, ¿imatá ruwanqa?

Ñaupa yachaqanaspi rikorqanki jina, Jehovaj testigosnenqa Diospa Reinonta may jatunpaj qhawanku. Imatachus chay Reino tumpamantawan ruwananta yachaspa, ichá kusirikunki. Chaywanpis, ichá mana creellawajchu Diospa Reinon chay tukuy imata ruwanantapuni.

Yuyaywan imatapis ruwayqa may allin, nitaj ima nisqatapis creenallachu tiyan (Proverbios 14:15). Bereamanta cristianos chayta ruwarqanku.a Paykunaqa Reinomanta willayta ñaupaj kutirayku uyarispa mana creellarqankuchu, manaqa Bibliapi Qhelqasqasta sumajtaraj ukhuncharqanku, “cheqachus manachus kasqanta” yachanankupaj (Hechos 17:11). Nisunman chay uyarisqankuta Bibliaj nisqanwan kikinchaspa, cheqapuni kasqanta repararqanku.

Jehovaj testigosnenqa, Bereamanta cristianos jina ruwanaykita munayku. Mana pagaspalla Bibliamanta noqaykuwan yachakuwaj. Chaytaj imatachus Reinomanta yachachisqayku, Bibliaj nisqanman jinachus manachus kasqanta yachanaykipaj yanapasonqa.

Chantapis, mana chay Reinollamantachu yachakunki, kay tapuykunaspa kutichiynintapis tarillankitaj:

• ¿Maymantá jamunchej?

• ¿Kay kausayllachu kanman?

• ¿Imaraykú Dios ñakʼariy kananta saqen?

• ¿Maymantaj wañupuspa ripunchej?

• ¿Jallpʼanchej thuñisqachu kanqa?

• Familianchejpi kusisqa kausakunanchejpaj, ¿imatá ruwana kanman?

Astawanpis, Bibliamanta yachakusqayki Diosman qayllanaykipaj yanapasonqa (Santiago 4:8). Dioswan astawan masichakojtiykeqa, imaynatachus chay Reino yanapashasusqanta, aswan qhepamanpis imaynatachus yanapasunanta sutʼita reparayta atinki. Jesusqa Tatanmanta mañakushaspa kayta nerqa: “Kaymin chay wiñay kawsayqa: Qan kʼata cheqa Diosta rejsisunanku, kachamusqayki Jesucristotapis”, nispa (Juan 17:3).