Juicio pʼunchay ¿qayllapiñachu?

¿Dios qhawallanqachu runallataj runa masinta kamachinanta, Jallpʼatataj phiriykunanta? Mana. Nerqanchej jina, Diosqa pikunachus runa masillantataj ñakʼarichishanku chaykunata chinkachenqa. Chayrayku Payqa munan yachananchejta maykʼajchus chayta ruwananta. ¿Imaynatá chayta yachasunman?

Autopi wasinchejman ripushasqanchejmanta parlarina. Autopi rishaspaqa wasinchejman chayashasqanchejtañachus, manachus yachananchejpaj ventanamanta letrerosta chayri wasista qhawarinchej. Ajinallatataj Diosqa chay letreroswan jina Bibliapi reparachiwanchej, niraj juicio pʼunchay chayamushajtin ima señaleschus Jallpʼantinpi rikukunanta. Chay señalesta rikuspataj juicio pʼunchay qayllitapiña kasqanta reparanchej.

Bibliaqa niraj juicio pʼunchay chayamushajtin imaymana llakiykuna rikukunanta nerqa. Chay llakiykuna jinaqa mana jaykʼajpis rikukorqarajchu. Chaykunamanta astawan parlarina.

1. JALLPʼANTINPI SINCHʼI LLAKIYKUNA Mateo 24 capitulopeqa Jallpʼantinpi ashkha llakiykuna kananmanta parlashan. Chaytaj uj señal jina kashan yachananchejpaj juicio pʼunchay qayllitapiña kashasqanta (Mateo 24:3, 14). Chay capitulopeqa guerras kananta, yarqhay kananta, jallpʼa ikhakuykuna kananta ima nishan. Nishallantaj, runasqa munaynillankuta ruwanankuta, ni pita munakunankuta, religionta kamachejkuna chʼaukiyanankuta ima (Mateo 24:6-26). Kay tukuy imas unaymantapacha rikukojtinpis, aswan sutʼita rikukunan karqa juicio pʼunchay qayllapiña kashajtin. Mana chayllachu, kay señalqa kinsa señaleswan khuska rikukunan karqa.

2. RUNASQA SAJRAYASHANKU Bibliaqa qhepa pʼunchaykunapi runas aswan sajrasman tukunankuta nin. Biblia nin: “Runasqa kay jina kanqanku: Imallatapis paykunallapaj munajkuna, qolqeta munakojkuna, runaykachajkuna, tukuypa contranta millayta rimajkuna, jatunchakojkuna, tatasninkuta mana kasojkuna, mana graciasta qoyta yachajkuna, Diosta mana manchachikojkuna, mana sonqoyojkuna, rumi sonqos, qhasimanta tumpajkuna, aychaj sajra munayninta mana atipayta atejkuna, mana khuyarispa sajrata ruwajkuna, allin kajta chejnejkuna, wasanchajkuna, mana qhawarikuspa imallatapis ruwarparejkuna, may kasqankuta yuyakojkuna, kay pachaj kusikuyninta astawan munakojkuna Diosta munakunankumanta nisqaqa”, nispa (2 Timoteo 3:1-4). Arí, kay tukuy imas unaymantapacha karqapuni. Jinapis kay qhepa pʼunchaykunapi astawan yapakunan karqa. Chayrayku Biblia manchay “sajra pʼunchaykuna” kasqanta nin. ¿Reparankichu runas may sajrasman tukushasqankuta?

3. JALLPʼATA PHIRIYKUSHANKU Bibliaqa kay Jallpʼanchejta phirejkunata Dios tukuchinanta nin (Apocalipsis 11:18). ¿Imaynamantá runas Jallpʼanchejta phiriykushanku? Biblia nisqanman jina, Noej tiemponpipis sajra kausaylla rikukorqa. “Diospa ñawpaqempi kay pachaqa imaymana juchawan juntʼa karqa, chejninakuywan ima. Runasqa juchapi pejtusqa karqanku”. Chayrayku Diosqa chayta rikuspa, Noeman nerqa: “Noqa tukuchisaj kay runasta”, nispa (Génesis 6:11-13). Kunanpis kay pachaqa imaymana sajra ruwaykunawan juntʼa kashan. Runaqa ashkha imasta rikhurichin, chayllawantaj runata wañuchinanpaj. Mana chayllachu, runasqa mama qochasta, samanchej chay aireta ima chʼichichashanku, animalestapis, plantastapis chinkachishanku, waj sajra imastawantaj ruwashanku.

Unayqa ni pi runa imatapis rikhurichejchu kay Jallpʼata phiriykunanpaj jinaqa. Kay tiemponchejpirí, runasqa tukuy imata rikhurichispa Jallpʼata phiriykushanku. Runasqa sumachaj imasta rikhurichiyllata yachanku, nitaj yuyaychakunkuchu chay rikhurichisqanku imasllataj Jallpʼanchejta phiriykushasqanta. Jinapis runasqa kay Jallpʼata mana phiriykonqankuchu, imajtinchus Diosninchejqa kay Jallpʼata phiriykushanku chaykunata chinkarparichenqa.

4. JALLPʼANTINPI BIBLIAMANTA YACHACHIKUSHAN Bibliaqa nillarqataj: “Janaj pacha reinomanta evangelio tukuynejpi willasqa kanqa, tukuy runas yachanankupaj; chaypachamá tukukoyqa jamonqa”, nispa (Mateo 24:14). Diospa Reinonmanta willaytaj, tukuy religiones ruwasqankuwan mana kikinchu kanan karqa. ¿Mayqen religiontaj chayta Jallpʼantinpi willashan?

Internetpi jw.org nisqapeqa, Diospa Reinonmanta yachakunapaj libros, revistas, waj imaspiwan tiyan. Chaykunataj 700 kuraj parlaykunapi kashan. ¿Pikunataj chay jinatapuni Diospa Reinonmanta yachachishanku? Unaymantaña, niraj Internet kashajtin Jehovaj testigosnenqa, Diospa Reinonmanta runasman yachachishanchej. Kay 1939 watamantapacha Torremanta Qhawaj revistaj tapanpi “Jehová Diospa Reinonmanta willashan”, nispa nishan. Uj libro tukuy laya religionesmanta sutʼinchashaspa nerqa: “Jehovaj testigosnin Diospa Reinonmanta willasqankoqa, ni imawan kikinchakunchu”, nispa. Jehovaj testigosnenqa runasman yachachimunchej Diospa Reinonqa tumpamantawan sajra kajta chinkachinanta.

JUICIO PʼUNCHAY QAYLLITAPIÑA KASHAN

Kay tawa señales Jallpʼantinpi rikukushasqanta, ¿reparankichu? Pachaj watas kurajtaña kay Torremanta Qhawaj revistaqa willashan, imaschus Jallpʼantinpi rikukusqanmanta tukuy runas reparanankupaj juicio pʼunchayqa qayllapiña kashasqanta. Wakin runastajrí kay revistata leespapis manapuni creenkuchu. Astawanpis yuyanku wajkunata creeykuchiyta munaspalla qhelqakusqanta. Ninkutaj: “Telepi, radiopi, Internetpi, waj imaspiwan tukuy imata rikusqanchejraykulla, tukuy imapis niña ñaupajta jinachu rijchʼawanchej”, nispa. Ajinata nejtinkupis, may chhika runasqa reparanku tukuy ima manaña ñaupajta jinachu kashasqanta.

Runasqa watamanta wata Jallpʼanchejta astawan phiriykushallankupuni. Kay 2014 watapi, wakin científicos imaschus runasta tukuchiyta atisqanmanta parlarqanku. Paykuna nerqanku: “Imaschus runasta tukuchiyta atisqanta qhawarerqayku. Reparaykutaj runaj rikhurichisqan imasqa, ima ratollapis tukuy runasta chinkachiyta atisqanta”, nispa. Rikunchej jina runasqa astawan reparashanku niña ñaupajta jinachu Jallpʼanchej kashasqanta. Kay revistata ruwajkunaqa, leejkunawan khuska kay tukuy imata rikuspa, juicio pʼunchayqa qayllapiña kasqanta sutʼita reparanku. Chayta yachaytaj mana manchachinawanchejchu tiyan. Imajtinchus salvakuyta atisun.