¿Yacharqankichu?

¿Imaynatá ninata ñaupa tiempopi waj lugaresman apaj kanku?

GÉNESIS 22 capituloqa, uj kuti Abraham karu lugarman risqanta nin, Jehovapaj uj jaywanata qʼolachinanpaj. Chaypajtaj Abrahamqa “llantʼata Isaacman qʼepiriykucherqa, paytaj cuchillota, ninatawan oqhariykukorqa; chantá iskaynillanku kachaykukorqanku” (Gén. 22:6).

Chay versiculopi parlakusqan ninamanta, uj yachayniyoj runa nerqa: “[Abrahamwan Isaacwan] nichá ninata chay karu lugarman laurashajta chayachinkumanchu karqa”, nispa. Bibliaqa mana ninchu, imaynatachus ninata ñaupa tiempopi runas japʼichisqankuta. Chayrayku chay versiculopi “nina” nispaqa, ichapis imachus ninata japʼichinapaj necesitakusqanmanta parlashan.

Wakin yachayniyoj runasrí, chay tiempopi ninata japʼicheyqa mana atikullasqanta ninku. Ichapis runaqa brasasta vecinosninkumanta qorichikoj kanku, manataj paykunapunichu ninata japʼichej kanku. Chayrayku Bibliamanta yachaj runasqa yuyanku, Abraham ñaupaj chʼisimanta nina brasasta apasqanta, cadenitaswan aysasqa tʼuru mankitapi (Isa. 30:14). Ajinata nina brasasta apaspaqa, maypipis llantʼata churaykuspa ninata japʼichiyta atillanman karqa.