“Yachachiy kʼacha kawsayniyoj allin ruwaj hermanosman”

1, 2. ¿Imatá wakin runas trabajomanta yuyanku?

ASHKHA runasqa, runasta trabajonkuman jina allinpaj chayri pisipaj qhawanku. Wakin lugarespi runasqa, pitapis rejsispa tapurinkupuni: “¿Imapí trabajanki?”, nispa.

² Bibliapis wakin kutis runaspa sutisninkuta oqharispa, imapichus trabajasqankutawan willan. Mateomanta nin “impuestota cobraj”, Simonmantataj nin “suela ruwaj”, Lucasmantatajrí “munasqa doctor” nispa (Mat. 10:2-4; Hech. 10:6; Col. 4:14). Waj kutispitaj, Bibliaqa ima llankʼaytachus Jehová qosqanmanta parlan. Rey Davidpi, profeta Eliaspi, apóstol Pablopi tʼukurina. Paykunaqa Jehovamanta japʼisqanku llankʼayta, sumajpaj qhawarqanku. Noqanchejpis Jehová ima llankʼaytachus qowasqanchejta sumajpaj qhawananchej tiyan.

3. ¿Imaraykú kuraj hermanos jovenesta wakichinanku may allin? (Patapi kaj dibujota qhawariy).

³ Jehovata sirvispa mayta kusikunchej, llajtanpi ima llankʼaytachus qowasqanchejtapis jatunpaj qhawanchej. Chayrayku chay llankʼayta tukuy atisqanchejman jina ruwallaytapuni munanchej. Jinapis tukuy machuyapunchej, niñataj joven jinachu imatapis ruwanchej (Ecl. 1:4). Chayrayku Diospa llajtanqa wakin imasta ruwanan tiyan. Kay tiempopi ni jaykʼaj jina Diosmanta tukuynejpi willakushan, chaypajtaj Diospa llajtanqa imastachus runa rikhurichisqanwan yanapachikushan. Jinapis machu runasqa, wakin kutis mana atillankuchu mosoj imasman yachaykukuyta (Luc. 5:39). Chantapis machuyapojtinchej, kallpanchej pisiyapun (Pro. 20:29). Chayrayku may allin, kuraj hermanosqa jovenesta wakichinanku, Diospa llajtanpi astawan llankʼaykunata japʼinankupaj (Salmo 71:18 leey).

4. ¿Imaraykú wakin hermanos mana yanapachikuyta atillankuchu? (“¿Imaraykú wajkunata mana wakichinkuchu?”, nisqa recuadrota leey).

⁴ Diospa llajtanpi aswan ruwanasniyoj kajkunaqa, mana atillankuchu joveneswan yanapachikuyta. Ichá wakin hermanosqa, llakikunkuman Diospa llajtanpi munasqa llankʼayninkuta niña ruwanankumanta. Ichá sonqonku nanan, chay llankʼayninkuta wajman saqepunankupi yuyajtinku. Chayrí yuyanku, chay llankʼayta mana paykuna ruwajtinkoqa mana allinchu llojsinanta. Manachayqa yuyanku, wajkunata wakichinankupaj mana tiempoyojchu kasqankuta. Joven hermanostaj congregacionpi astawan ruwaykunata niraj japʼishankuchu chayqa, pacienciakunanku tiyan.

5. ¿Ima tapuykunamantaj kay yachaqanapi kutichisunchej?

⁵ ¿Imaraykú kuraj hermanos, jovenesta jatuchaj ruwaykunata japʼinankupaj yanapananku tiyan? ¿Imaynatá chayta ruwankuman? (2 Tim. 2:2). ¿Imaraykutaj jóvenes unaytaña imatapis ruwaj hermanosmanta yachakunanku tiyan? ¿Imaraykú jóvenes chay kuraj hermanosta jatunpaj qhawananku tiyan, paykunawan llankʼashaspa? Qallarinapaj, qhawarina imaynatachus rey David wawanta, uj jatun llankʼaypaj wakichisqanta.

DAVIDQA SALOMONTA YANAPARQA

6. ¿Imatá David ruwayta munarqa, chantá imatá Jehová nerqa?

⁶ Davidqa ashkha watasta qhatiykachasqa karqa, tukuynejmantaj ayqeykachakorqa. Rey kaytawanrí uj sumaj wasipi tiyakorqa. Chayrayku profeta Natanman nerqa: “Noqaqa cedromanta ruwasqa kamachina wasipi tiyakuni, Diospa arcanrí toldo urallapi kashan”, nispa. Davidqa uj sumaj templota Jehovapaj ruwayta munarqa. Natantaj kuticherqa: “Imachus sonqoykipi kashan, chay tukuyta ruwallay; Diosqa qanwan kashan”, nispa. Jinapis Jehovaqa mana chaytachu munarqa. Chayrayku Natanta kachaspa Davidman willacherqa: “Noqa tiyakunaypaj wasitaqa mana qanchu ruwachipuwanki”, nispa. Chantá Jehovaqa Davidman nerqa paywanpuni kananta, jinapis templotaqa ujnin wawan ruwananta. ¿Imaynataj David kasharqa? (1 Cró. 17:1-4, 8, 11, 12; 29:1).

7. ¿Imatá David ruwarqa, Jehová mana paychu templota ruwananta nejtin?

⁷ Davidqa Jehovapaj uj templota ruwapuytapuni munarqa. Chayrayku mana paychu ruwananta yachaspa, ichá sonqo pʼakisqa kasharqa. Jinapis wawan Salomón templota ruwananpaj, tukuy imata wakicherqa. Davidqa trabajajkunata tantarqa, jinallataj qorita, qolqeta, bronceta, fierrota, maderatapis. Payqa mana llakikorqachu, pichus templota ruwaspa jatunchasqa kananmanta. Chay temploqa Salomonpa templon sutiwan rejsikun. Astawanpis Davidqa, Salomonta nerqa: “Kunanqa wawáy, Tata Diosqa qanwan kachun, Señorniyki Tata Diospa Templonta jatarichiyta atinaykipaj, imaynatachus qan ruwanaykita nisqanman jina”, nispa (1 Cró. 22:11, 14-16).

8. 1) ¿Imaraykú David yuyanman karqa Salomón niraj wakichisqachu kasqanta? 2) ¿Imatá David ruwarqa?

⁸ (1 Crónicas 22:5 leey). Davidqa yuyanman karqa, Salomón mana chay jatun llankʼayta ruwananpaj wakichisqachu kashasqanta. Imaraykuchus temploqa “may mentasqa”, may kʼachitutaj kanan karqa, Salomontajrí jovencitollaraj karqa. Jinapis Davidqa yacharqa, Jehová Salomonta yanapananta chay llankʼayta ruwananpaj. Chayrayku tukuy atisqanta Salomonta yanaparqa, templopaj tukuy imata wakichispa.

WAJKUNATA YACHACHISPA KUSIKUY

9. ¿Imatataj kuraj hermanos ruwankuman jovenesta wakichispa kusikunankupaj? Uj kikinchaywan sutʼinchay.

⁹ Kuraj hermanosqa mana llakikunankuchu tiyan, Diospa llajtanpi wakin ruwanasninkuta jovenesman qonankumanta. Tukuypis yachanchej, Diospa llajtan ñaupajman rinan aswan sumaj kasqanta. Jovenesta jatuchaj ruwaykunata japʼikunankupaj wakichiytaj chaypaj yanapanqa. Uj tata wawanman autota apaykachayta yachachisqanpi tʼukurina. Tataqa wawan wiñasqanman jina autota apaykachayta yachachin. Wawan jovenña kajtintaj, licenciata orqhospa payllaña apaykachan. Jinapis tataqa wawanta wakin kutis yuyaycharinraj autota sumajta apaykachananpaj. Wakin kutistaj autota puraj apaykachanku. Tata machuyapusqanman jinataj, wawallanña autota apaykachan. ¿Tata wawanta yachachisqanmanta llakikunmanchu? Mana, astawanpis kusikun wawan paypa cuentanmanta autota apaykachasqanmanta. Ajinallatataj kuraj hermanospis kusikunku, yachacherqanku chay jóvenes Diospa llajtanpi jatuchaj ruwaykunata japʼejtinku.

10. ¿Imatataj Moisés yuyarqa wajkuna sumaj llankʼayta japʼinankumanta?

¹⁰ Allinta qhawarikunanchej tiyan, Diospa llajtanpi ruwanasta wajkuna japʼejtinku ama envidiakunapaj. Wakin israelitas profetas jina sutʼinchayta qallarejtinku, imatachus Moisés ruwasqanmanta yachakuna (Números 11:24-29 leey). Josueqa israelitas profetas kanankumanta jarkʼayta munarqa. Moisestajrí nerqa: “Qanqa noqarayku chaytapis jarkʼaytachu munashanki? Allin kanman, Tata Diosqa tukuynin israelitasman Espirituta qonan, ajinamanta Tata Diospa sutʼinchajkunan kanankupaj”, nispa. Moisesqa yacharqa Jehová llajtanta ñaupajman apashasqanta. Chayrayku jatunchachikunanmantaqa, tukuy israelitas sumaj ruwanasniyoj kanankuta munarqa. Noqanchejrí, ¿wajkuna Diospa llajtanpi sumaj llankʼayta japʼisqankumanta kusikunchejchu?

11. ¿Imatá uj hermano nerqa wajkunata wakichinamanta?

¹¹ Ashkha hermanos may unayta Jehovapaj sinchʼita llankʼarqanku. Paykunataj joven hermanosta wakicherqanku, Diospa llajtanpi jatuchaj ruwaykunata japʼinankupaj. Hermano Petermanta parlarina. Payqa Jehovapaj 74 watasta tiempo juntʼasqata llankʼarqa, chaykunamanta 35 watastaqa Europamanta ujnin Betelpi llankʼarqa. Payqa chaypi ashkha watasta Departamento de Servicio nisqamanta encargado karqa. Chantá paypa cuentanmanta hermano Paul yaykorqa. Paulqa Petermanta aswan joven karqa, paytataj Peter yachacherqa. Peter chay llankʼayninta wajman qopusqanmanta, ¿llakikorqachu? Mana. Pay nin: “Mayta kusikuni ashkha hermanos jatuchaj ruwaykunata japʼinankupaj wakichisqa kasqankumanta. Paykunaqa ruwanasninkuta sumajta juntʼashanku”, nispa.

KURAJ HERMANOSTA JATUNPAJ QHAWANA

12. ¿Imatá Roboampa kausaynin yachachiwanchej?

¹² Salomonpa wawan Roboamqa, rey kaytawan kuraj runaswan yuyaychachikorqa mosoj llankʼayninta juntʼananpaj. Jinapis chay yuyaychaykunata japʼikunanmantaqa, joven masisninpa yuyaychasqanta uyarerqa. Chayrayku may llakiypi rikukorqa (2 Cró. 10:6-11, 19). ¿Imatataj chaymanta yachakusunman? Kurajkunamanta, nisunman pikunachus imatapis unaytaña ruwanku, chaykunamanta yuyaychaykunata mañakoyqa may sumaj. Jinapis jovenesqa mana chayraykuchu imatapis ñaupajta jinapuni ruwananku tiyan. Kurajkunaj yuyaychasqankutaqa jatunpaj qhawananku tiyan, nitaj usqhayllatachu yuyananku tiyan chay hermanospa yuyaychasqanku mana walejchu kasqanta.

13. ¿Imatá jóvenes ruwananku tiyan kuraj hermanoswan llankʼashaspa?

¹³ Wakin kutis jovenesqa encargados jina churasqa kanku, kuraj hermanospa chayri unaytaña llankʼaj hermanospa ruwanasninkumanta. May allin kanman jovenesqa kuraj hermanosmanta yachakunanku. Chunka ujniyoj parrafopi yachakorqanchej jina, hermano Paulqa Betelpi Peterpa cuentanmanta encargado jina yaykorqa. Pay nin: “Peterwan yuyaychachikunaypaj tiempochakorqani. Noqawan khuska llankʼaj hermanostapis, kikinta ruwanankupaj kallpacharqani”, nispa.

14. ¿Imatá yachakunchej Pablowan Timoteowan khuska llankʼasqankumanta?

¹⁴ Timoteoqa Pablomanta aswan joven karqa, unaytataj Diospaj khuska llankʼarqanku (Filipenses 2:20-22 leey). Pabloqa Corintopi cristianosman nerqa: “Kachamorqaykichej munasqa Timoteota; payqa kasukoj waway jina. Payqa yuyarichisonqachej imaynachus Cristo Jesuspi kawsayniy kasqanta, tukuynejpi sapa [congregacionpi] yachachisqayman jina”, nispa (1 Cor. 4:17). Chaypi reparanchej, Pablowan Timoteowan khuska allinta llankʼasqankuta, yanapanakusqankutataj. Pabloqa tiempochakorqa, Timoteoman ‘imaynachus Cristo Jesuspi kausaynin kasqanta’ yachachinanpaj. Timoteotaj sumajta yachakorqa. Pabloqa Timoteota mayta munakorqa, yacharqataj Timoteo Corintomanta hermanosta sumajta yanapananta. Ancianosqa waj hermanosta Pablo jina wakichinkuman, chay hermanos congregacionta ñaupajman apanankupaj.

SAPA UJ SUMAJ RUWANAYOJ KANCHEJ

15. Imapis waj jinamanta ruwakojtin, ¿imaynatá Romanos 12:3-5 yanapawasunman?

¹⁵ Kay tiempopi ashkha tʼukuna imas rikukushan. Jallpʼapi Diospa llajtanqa, tukuy imapi mayta wiñashan. Chayrayku ashkha imas waj jinamanta ruwakushan. Noqanchejpis wakin imasta niña ñaupajta jinachu ruwananchej tiyan, chaytaj ichá mana atikullanchu. ¿Imataj yanapawasunman? LLampʼu sonqo kay. Chantapis allinninchejta maskʼanamantaqa, Diospa Gobiernonta ñaupajman churana. Ajinata ruwaspa, ujchasqallapuni kasunchej. Pabloqa romano cristianosman nerqa: “Ama qankuna kikiykichejmanta aswan sumaj kasqaykichejta yuyakuychejchu”, nispa. Chantá Pablo sutʼincharqa: “Cuerponchejpeqa ashkha imasnin tiyan, manataj tukuyninkuchu uj rejllata ruwanku”, nispa. Chaywantaj nisharqa, congregacionpi sapa uj waj jina ruwanasniyoj kasqanta (Rom. 12:3-5).

16. ¿Imatataj sapa cristiano ruwanman Diospa llajtan ujchasqallapuni kananpaj, allinpitaj kausakunapaj?

¹⁶ Tukuyninchej Diospa Gobiernon ñaupajman rinanpaj yanapakuyta munanchej, chaypajtaj ima ruwanatapis tukuy sonqo japʼikunchej. Kuraj hermanosqa jovenesta wakichinkuman. Jovenestajrí ima llankʼaytapis japʼikunanku tiyan llampʼu sonqowan, kuraj hermanosta jatunpaj qhawaspataj. Hermanostaj warminkuta agradecekunku, paykunata tukuy tiempo yanapasqankumanta. Qosayoj warmisqa Priscila jina ruwankuman. Payqa qosan Aquilata tukuy sonqo yanaparqa (Hech. 18:2).

17. 1) ¿Imatá Jesús yachachisqasnin ruwanankuta yacharqa? 2) ¿Ima llankʼaypajtaj Jesús yachachisqasninta wakicherqa?

¹⁷ Jesusmanta mayta yachakusunman. Payqa wajkunata tukuy sonqo wakicherqa. Jesusqa yacharqa kay Jallpʼamanta ripojtin, llankʼayninta wajkuna ruwanankuta. Yachachisqasnenqa pantaj runas karqanku. Jinapis Jesusqa yacharqa, paykuna sumaj willaykunata tukuynejpi willamunankuta, pay ruwasqanmanta astawanraj (Juan 14:12). Chayrayku Jesusqa yachachisqasninta sumajta wakicherqa. Paykunataj chay llankʼayta sumajta ruwarqanku (Col. 1:23).

18. 1) ¿Ima llankʼaytataj paraisopi japʼisunchej? 2) ¿Ima llankʼaytataj kunan ruwashanchej?

¹⁸ Jesús wañupusqantawan, Jehovaqa payta kausarichimorqa. Chantá astawan llankʼayta qorqa, churarqataj “tukuy kurajkunaj, atiyniyojkunaj, kallpayojkunaj, kamachejkunaj patankuman” (Efe. 1:19-21). Diosman cheqa sonqo kajtinchejqa, niraj Armagedón chayamushajtin wañupuspapis, kausarimusunchej, paraisopitaj sumaj llankʼayta japʼisunchej. Kay tiempopipis uj sumaj llankʼayta ruwashanchejña. Diosmanta sumaj willaykunata willashanchej, runastataj Jesuspa yachachisqasninman tukuchishanchej. Chayrayku machitus chayri jóvenes kaspapis, sapa ujninchej “Señorpa ruwaynimpi” astawan ruwayta atisunman (1 Cor. 15:58).