Yanapakuspaqa bendecisqa kasunchej

UNAYMANTAPACHA runasqa, Jehová Diosman kapuyninkumanta jaywajpuni kanku. Israelitaspis uywasta jaywaj kanku. Cristianospis Diosman uj sumaj jaywanata jina jaywanchej, payta sirvinapaj tukuy imata ruwaspa. Chantapis Jehová Diosmanqa tiemponchejmanta, kapuyninchejmantawan jaywallasunmantaj (Heb. 13:15, 16). Chayta ruwajtinchejqa kusisqa kasunchej, ashkha bendicionestataj japʼisunchej. Kunantaj Diospa kamachisninmanta yachakuna.

Anamanta parlarina. Payqa wawitayoj kaytapuni munarqa, jinapis mana wawayoj kayta aterqachu. Chayrayku Anaqa Diosmanta mañakuspa, nerqa: ‘Sichus uj wawata qowanki chayqa, noqa chay wawataqa qopusqayki tukuy kausayninpi kamachiyki kananpaj’, nispa (1 Sam. 1:10, 11). Tiemponmantaj Anaqa wawitayoj karqa, Samuel sutitataj churarqa. Anaqa Samuelta ñuñumanta pʼitisqantawan, Dioswan tinkukuna toldoman aparqa, chaypi Diosta sirvinanpaj. Jehová Diostaj Anata bendicerqa, nisqanta juntʼasqanrayku. Tiemponmantaj Anaqa phishqa wawasniyoj karqa. Wawan Samueltaj profeta karqa, Bibliamanta wakin librostapis qhelqarqa (1 Sam. 2:21).

Noqanchejpis Ana jina, Samuel jinataj tukuy atisqanchejta ruwasunman Diosta yupaychanapaj. Jesustaj nerqa, Diosta yupaychanapaj tukuy imata saqejtinchej, ashkha bendicionesta japʼinanchejta (Mar. 10:28-30).

Dorcasmanta parlarina. Payqa apostolespa tiemponpi kausakorqa. Bibliataj Dorcasmanta parlaspa nin, may rejsisqa kasqanta ‘allin ruwanasta ruwasqanrayku, wajchasta yanapasqanrayku ima’. Jinapis “Dorcasqa onqoykuspa wañuporqa”. Congregacionninmanta hermanostaj, may llakisqas kasharqanku. Ajinapi hermanosqa apóstol Pedrota usqhayllata wajyachimorqanku, chaynejpi kashasqanta yachaspa. Chayaytawantaj Pedroqa Dorcasta kausaricherqa. Chayta rikuspa hermanosqa maytachá kusikorqanku. Bibliataj ñaupaj kutirayku parlan, chay kuti uj apóstol uj wañusqata kausarichisqanta (Hech. 9:36-41). Diosqa, Dorcaspa ruwasqanta mana qonqaporqachu (Heb. 6:10). Noqanchejtaj Dorcas jina ruwanapaj mayta kallpachakusunman.

Apóstol Pablomantapis mayta yachakusunman. Payqa tiempochakoj hermanosta yanapananpaj. Chayrayku Corintomanta cristianosman jinata qhelqarqa: “Noqaqa tukuy ima kapuwasqanta, kausayniytapis kusiywan qankunarayku tukuchisaj”, nispa (2 Cor. 12:15). Arí, Pabloqa wajkunata yanapaspa, mayta kusikoj. Diostaj payta allin ñawiwan qhawaj, wajkunata yanapasqanrayku (Hech. 20:24, 35).

Reparanchej jina, Jehová Diosqa munan tiempochakunanchejta payta sirvinapaj, hermanosta yanapanapaj ima. Chantapis Diosta jatunchallasunmantaj qolqesitunchejwan yanapakuspa. Qolqesitunchejwanqa jallpʼantinpi willakunanpaj yanapakunchej. Chantapis misionerosta, betelitasta, waj hermanostawan yanapanapaj kashan. Chay qolqesitunchejwanqa, yanapakullanchejtaj publicaciones, videos ima waj parlaykunaman tijrachikunanpaj. Jinallataj terremotos kasqanrayku llakiykunapi rikukoj hermanosta yanapanapaj, Tantakuna Wasis ruwakunanpaj chayri allinchakunanpaj. Qolqesitunchejwan yanapakusun chayqa, ashkha bendicionesta japʼisunchej. Astawanqa Jehová Diosta jatunchasunchej ‘tukuy kapuyninchejwan’ (Pro. 3:9; 22:9).

Kay Jinasmanta Jallpʼantinpi Willakunanpaj Qolqesituykiwan Yanapakuwaj

Apóstol Pabloj tiemponpi jina, kay tiempopipis ashkha hermanos qolqenkumanta “mashkhallatapis” tʼaqanku, “jallpʼantinpi willakunanpaj” nisqa cajitasman churanankupaj (1 Cor. 16:2). Congregacionesqa chay qolqeta sapa killa, suyunkupi kaj Jehovaj testigosninpa sucursalninkuman apachinku. Atejtiykeqa suyuykipi Jehovaj testigosninpa sucursalninman, cheqanta apachiwaj. Ima sutiwanchus apachinayki kasqanta yachayta munaspataj, suyuykej sucursalninman wajyariy. Sucursalpa direccionnintaqa www.jw.org/qu nisqapi tarinki. Kaykunata sucursalman apachiyta atiwaj:

MANAÑA MAÑAKAPUNAPAJ

Internetnejta bancoman qolqeta churayta atiwaj. Tarjetas de débito chayri crédito nisqanejta qoyta atillawajtaj. Wakin sucursalesqa chayta japʼinankupaj jw.org nisqata chayri Internetpi waj paginata apaykachanku.
Qoyta atiwaj: qolqeta, aretesta, collaresta, anillosta chayri waj imasta. Chaypajtaj uj cartata qhelqanayki tiyan, manaña kutichipusunankuta nispa.

QOSPA MAÑAKAPUNAPAJ

Qolqeta qowaj, necesitaspataj mañakapuyta atiwaj.
Chaypajtaj uj cartata qhelqanayki tiyan, mañakapuyta atisqaykita sutʼinchaspa.

ÑAUPAJMANTA WAKICHIKUSPA KAY JINASMANTA QOWAJ

Diospa Gobiernonmanta Jallpʼantinpi willakunanpaj, waj jinasmantawan yanapakuyta atinki. Yanapakuyta munanki chayqa, suyuykipi sucursaltaraj tapuriy imaynasmantachus yanapakuyta atisqaykita yachanaykipaj. Imaraykuchus mana tukuy suyuspichu kikin leyes tiyan, nitaj impuestostapis kikintachu pagakun. Chayrayku chaymanta allinta yachajkunata tapukuy, imaynamantachus yanapakuyta atisqaykita ajllanaykipaj. Kay jinasmanta yanapakuwaj:

Seguros, jubilakusqayki ima: Seguro de vida nisqaman qolqeta churasqaykita chayri jubilacionniykipaj tantashasqayki qolqeta, Jehovaj testigosninpa sucursalnin japʼinanpaj uj documentota ruwawaj.

Bancopi qolqeykimanta: Bancoman qolqeta churasqayki documentota, sucursalpa sutinman churanaykipaj uj documentota ruwawaj, wañupojtiyki suyuykej leyesninman jina sucursal chay qolqeta orqhokapunanpaj.

Bono nisqa, uj empresapi churasqayki qolqe: Chay qolqeta Jehovaj testigosninpa sucursalninman mana imata suyaspalla qoyta atiwaj. Chantapis uj documentota ruwawaj, wañupojtiyki chay qolqeta sucursal japʼikapunanpaj.

Inmuebles (wasi, jallpʼa...): Vendekunanpaj jina wasita, jallpʼata ima Jehovaj testigosninpa sucursalnin japʼikapunanpaj qoyta atillankitaj, mana imata suyaspalla chayri wañupunaykikama chayllapipuni tiyakunaykita qhelqawaj.

Testamentos, fideicomisos ima: Qolqeta, chayri waj kapuyniykita Jehovaj testigosninpa sucursalninman, uj notariowan documentota ruwachispa herenciata jina chayri fideicomisopi saqeyta atinki. Kay jinamanta imatapis qoyqa, imatachus qoshanki chaymanta impuestosta pisiyachinman.

Reparanchej jina, ajinasmanta yanapakuyta munajkunaqa, ñaupajmantaña wakichikunanku tiyan. Jallpʼantinpi willakunanpaj yanapayta munajkunapajqa inglespi, castellanopi ima, Donaciones planificadas para favorecer el servicio del Reino en todo el mundo nisqa folleto wakichikun. Chay folletotaj, kunan chayri aswan qhepaman imaynasmantachus qolqeta, waj imastawan qoyta atikusqanta sutʼinchashan. Ichapis mana chay folletopi tukuy ima nisqanchu suyuykipaj jina kanman. Imaraykuchus sapa suyupi leyesqa waj jina, nitaj impuestosta kikintachu pagakun. Ashkha runasqa Jallpʼantinpi Diosmanta willakunanpaj yanapakunku, impuestostapis pisillataña paganku. Chay folleto suyuykipi tiyan chayqa, congregacionniykipi secretario cargoyoj ancianomanta mañakuwaj.

Astawan yachayta munaspaqa, jw.org/qu nisqapi “Diospa Gobiernonmanta willakunanpaj qolqeykiwan yanapakuyta atinki” nisqaman yaykuy, chayri suyuykimanta sucursalta tapurikuy.