Jehová bendecin tukuy sonqo qojkunata

RUWAWAJNINCHEJ Diosqa, runasta jatunpaj qhawasqanta rikuchin, ajllajta saqespa. Chantapis mayta bendecin cheqa yupaychayta yanapajkunata, sutin jatunchasqa kananpaj, munaynin juntʼakunanpaj yanapajkunata ima. Jehovaqa mana munanchu kamachisqa jinalla chayri castiganawanchejta manchachikusqanchejraykulla kasukunanchejta. Astawanpis mayta kusikun agradecesqa kasqanchejrayku, munakusqanchejrayku sirvisqanchejmanta.

Sutʼincharinapaj, Jehovaqa Sinaí chʼin pampapi israelitasman kamachiykunata qorqa Dioswan tinkukuna toldota ruwanankupaj. Pay nerqa: “Qankuna ukhupi ofrendata Tata Diospaj oqhariychej tukuy runas; tukuy sonqowan maytachus qoyta munasqankuman jina apamuchunku”, nispa (Éxo. 35:5-9). Sapa uj atisqanman jina ashkhata chayri pisita kapusqanmanta apayta aterqa. Chay qosqankutaj Diospa munaynin ruwakunanpaj apaykachakorqa. ¿Israelitas chay kamachiyta kasukorqankuchu?

Paykunaqa “tukuy sonqowan qoyta munarqanku” “mashkhatachus sonqonkupi qoyta munasqankuman jina”. Warmis, qharis ima Jehovapaj aparqanku japʼichinasta, jaluchosta, qori anillosta, qorita, qolqe metalta, bronceta, azul telasta, puka panti telasta, puka telasta, sumaj lino telasta, cabra pelosta, pukaman tiñisqa mocho qarasta, tejón qarasta, acacia maderasta, valorniyoj rumista, kʼacha qʼapaj jawinasta, kʼacha qʼapaj jawina aceitestawan. Chantapis “imastachus ruwananku karqa, chaypajqa tukuy imas kurajyarqa” (Éxo. 35:21-24, 27-29; 36:7).

Jehovataqa israelitas kapuyninkumanta tukuy sonqo qosqanku mayta kusicherqa, nitaj qosqankoj valorninchu. Chantapis israelitasqa tukuy sonqo yanapakorqanku. Biblia nisqanman jinataj ‘phushkayta yachaj warmispis phushkarqanku’. Arí, tukuy sumaj yachayniyoj “warmis cabra pelosmanta imastapis phushka[rqanku]”. Chantapis Jehovaqa Bezaleelman yachayta, yuyayta, rejsiyta, kʼacha imasta ruwayta atinanpaj atiyta ima qorqa. Arí, Jehovaqa Bezaleelman, Aholiabman ima yachayta qorqa tukuy ima kamachisqanta juntʼanankupaj (Éxo. 35:25, 26, 30-35).

Jehovaqa niraj chay kamachiyta israelitasman qoshaspa, yacharqa cheqa yupaychayta yanapanankupaj “tukuy sonqowan” kapusqankumanta qonankuta. Chayrayku paykunata bendicerqa, yuyaychayninta qospa, kusisqa kanankupaj yanapaspa ima. Ajinata bendecispa rikucherqa kamachisnin tukuy sonqo qojtinku, munayninta juntʼanankupaj tukuy ima necesitasqankuta qoyta atisqanta (Sal. 34:9). Jehovaman mana michʼakuspa qosunchej chayqa, pay bendeciwasunchej.

Imaynasmantá Yanapayta Atisunman Pachantinpi Willakunanpaj

Kay tiempopipis Pabloj tiemponpi jinallataj, wakenqa qolqenkumanta “mashkhallatapis” tʼaqanku “Pachantinpi willakunanpaj” nisqa cajitasman churanankupaj (1 Cor. 16:2). Qotuchakuykunaqa chay qolqeta sapa killa, suyunkupi Jehovaj testigosninpa sucursalninkuman apachinku. Chantapis munanki chayqa, suyuykipi Jehovaj testigosninpa sucursalnillanmanña apachiwaj. Ima sutiwanchus apachinayki kasqanta yachayta munaspataj, suyuykej sucursalninman wajyariy. Direccionnintataj kay www.jw.org/qu nisqapi tarinki. Kaykunasta sucursalman apachiyta atiwaj:

MANA IMATA SUYASPALLA QOWAJ

Internetnejta bancoman qolqeta churayta atiwaj, chantapis tarjetas de débito chayri crédito nisqanejta qoyta atillawajtaj. Wakin sucursalestaj chayta japʼinankupaj jw.org nisqata chayri Internetpi waj paginata apaykachanku.
Qoyta atiwaj qolqeta, valorniyoj zarcillosta, walqasta, anillosta chayri waj imasta. Chaypajtaj uj cartata qhelqanayki tiyan, mana ni imata suyaspalla apachishasqaykita sutʼinchaspa.

QOSPA MAÑAKAPUYTA ATIWAJ

Qolqeta qoyta atiwaj. Chaytataj necesitaspaqa mañakapuyta atiwaj.
Chaypajtaj uj cartata qhelqanayki tiyan, mañakapuyta atisqaykita sutʼinchaspa.

ÑAUPAJMANTA WAKICHIKUSPA KAY JINASMANTA QOWAJ

Imaynasmantachus Reinomanta pachantinpi willakunanpaj yanapayta atisqaykita yachankiña, chaytataj mana qolqellawanchu nitaj valorniyoj imasllawanchu ruwawaj. Qan yanapayta munanki chayqa suyuykipi sucursalmanraj imaynasmantachus yanapakuyta atikusqanta yachanaykipaj wajyay. Chantapis, mana tukuy suyuspichu kikin leyesta juntʼakun, nitaj impuestosta kikintachu pagakun. Chayrayku, chaymanta allinta yachajkunata tapukuy imaynamantachus yanapayta atisqaykita ajllanaykipaj.

Seguros: Seguro de vida nisqaman qolqeta churasqaykita chayri jubilacionniykipaj tantashasqayki qolqeta, Jehovaj testigosninpa sucursalnin japʼinanpaj uj documentota ruwawaj.

Bancopi qolqeykimanta: Bancoman qolqeta churasqayki documentota, jubilacionniykipaj ruwasqayki documentota ima, sucursalpa sutinman churanaykipaj uj documentota (fideicomiso) ruwawaj, wañupojtiyki suyuykej leyesninman jina sucursal chay qolqeta orqhokapunanpaj.

Bono nisqa, uj empresapi churasqayki qolqe: Chay qolqeta Jehovaj testigosninpa sucursalninman mana imata suyaspalla qoyta atiwaj. Chantapis, wañupojtiyki chay qolqeta sucursal japʼikapunanpaj uj documentota ruwawaj.

Inmuebles (wasi, jallpʼa...): Vendekunanpaj jina wasita, jallpʼata ima Jehovaj testigosninpa sucursalnin japʼikapunanpaj qoyta atillankitaj mana imata suyaspalla chayri wañupunaykikama chayllapipuni tiyakunaykita qhelqawaj.

Qosqayki qolqemanta renta: Qolqeykita chayri bancoman churasqayki qolqemanta documentota, Jehovaj testigosninpa sucursalninman pasapunanpaj uj documentota ruwawaj. Chaymantataj sapa wata uj rentata wañupunaykikama qosunkuman, (chayri pimanchus qonankuta ninki chayman). Chantapis, qolqeykimanta impuestota pisillataña pagankiman.

Testamentos, fideicomisos ima: Qolqeta, chayri waj kapuyniykita Jehovaj testigosninpa sucursalninman, uj notariowan documentota ruwachispa herenciata jina chayri fideicomisopi saqeyta atinki. Kay jinamanta imatapis qoyqa, imatachus qoshanki chaymanta impuestosta pisiyachinman.

Rikunchej jina, ajinasmanta yanapayta munajkunaqa, ñaupajmanta wakichikunanku tiyan. Pachantinpi willakunanpaj yanapayta munajkunapajqa inglespi, castellanopi ima, Donaciones planificadas para favorecer el servicio del Reino en todo el mundo nisqa folleto wakichikun. Chay folletotaj, kunan chayri aswan qhepaman imaynasmantachus qolqeta, waj imastawan qoyta atikusqanta sutʼinchashan. Ichapis mana chay folletopi tukuy ima nisqanchu suyuykipaj jina kanman, imaraykuchus sapa suyupi leyesqa mana kikinchu, nitaj impuestosta kikintachu pagakun. Chayrayku chay folletota leeriytawan, abogadosniykita tapurikuy. Ashkha runasqa sumaj willaykuna pachantinpi willakunanpaj yanapanku, impuestostapis pisillataña paganku. Chay folleto suyuykipi tiyan chayqa qotuchakuyniykipi secretariomanta mañakuwaj.

Astawan yachayta munaspaqa suyuykimanta sucursalman qhelqay chayri wajyariy.