Kay ruwanaqa may jatun

JERUSALENPI uj jatun tantakuy karqa. Rey Davidqa tantaykorqa Israelmanta tukuy kamachejkunata, “aswan allichaj runasta, wapu maqanakojkuna soldadostawan”. Paykunaqa mayta uyariyta munasharqanku, imatachus David ninanta. Jehovaqa Davidpa wawan Salomonta kamacherqa, payta yupaychanapaj templota ruwananta. Rey Davidqa machituña kashaspa, Dios rikuchisqanman jina planosta ruwarqa, chaytataj wawanman jaywaykorqa. David nerqa: “Kay wasi ruwanataj may jatun, imaraykuchus kay ruwanaqa mana runaj tiyakunampajchu kashan, manachayqa Señor Tata Diospaj”, nispa (1 Cró. 28:1, 2, 6, 7, 11, 12; 29:1).

Chantá David paykunata taporqa: “Kunanqa, pitaj qankunamanta Tata Diosman imatapis jaywayta munan?”, nispa (1 Cró. 29:5). Noqanchej chaypi kashasunman karqa chay, ¿imatá ruwasunman karqa? ¿Chay jatun ruwaypi yanapakuwajchu karqa? Israelitasqa yanapakorqanku. Astawanpis paykunaqa “kusikorqanku [...]. Chay tukuy imasta Tata Diosman tukuy sonqosninkuwan qosqankurayku” (1 Cró. 29:9).

Unay watasninmantaj, Jehovaqa mana rikukoj templota sayaricherqa. Chay temploqa ninakun, Jesuspa wañuyninnejta Diosta yupaychayta atisqanchejwan. Chay templotaj Salomonpa templonmanta nisqaqa aswan sumaj (Heb. 9:11, 12). ¿Imaynatá Jehová runasta yanapashan paywan allinyakunankupaj? Chaytaqa ruwashan, runasta Bibliamanta yachachisqanchejnejta (Mat. 28:19, 20). Chayrayku sapa wata may chhika runas Bibliamanta yachakushanku, bautizakushankutaj. Chantapis mosoj congregacionesta sayarichikushan.

Chayrayku aswan ashkha publicaciones imprimikunan tiyan, Tantakuna Wasista ruwakunan chayri allinchakunan tiyan. Chantapis jatun tantakuykunapaj wakin imasta rantikunan chayri alquilakunan tiyan. Diosmanta sumaj willaykunata willaspa yanapakushasqanchejqa may sumajpuni, ¿icharí? (Mat. 24:14).

Jehovata, runa masinchejta ima munakunchej. Yachanchejtaj Diospa Gobiernonmanta usqhayta willamunanchej kasqanta. Chayrayku “Diosman imatapis jaywayta munan[chej]” tukuy sonqowan. Jatun kusiypuni Jehovata ‘tukuy kapuyniychejwan’ jatunchayqa. Jallpʼantinpi Diosmanta yachachikunanpaj qosqanchej, allinta apaykachakushasqanta yachaypis, ¡may kusiy! (Pro. 3:9).

¿Imaynasmantá Yanapayta Atisunman Jallpʼantinpi Willakunanpaj?

Kay tiempopi ashkha hermanos qolqenkumanta “mashkhallatapis” tʼaqanku, “Jallpʼantinpi willakunanpaj” nisqa cajitasman churanankupaj (1 Cor. 16:2). Congregacionesqa chay qolqeta sapa killa, suyunkupi kaj Jehovaj testigosninpa sucursalninkuman apachinku. Chantapis munanki chayqa, suyuykipi Jehovaj testigosninpa sucursalnillanmanña apachiwaj. Ima sutiwanchus apachinayki kasqanta yachayta munaspataj, suyuykej sucursalninman wajyariy. Sucursalpa direccionnintaqa www.jw.org/qu nisqapi tarinki. Kaykunata sucursalman apachiyta atiwaj:

MANAÑA MAÑAKAPUNAPAJ

Internetnejta bancoman qolqeta churayta atiwaj. Tarjetas de débito chayri crédito nisqanejta qoyta atillawajtaj, manachayri celularnejtapis. Wakin sucursalesqa chayta japʼinankupaj jw.org nisqata chayri Internetpi waj paginata apaykachanku.
Qoyta atiwaj: qolqeta, zarcillosta, walqasta, anillosta chayri waj imasta. Chaypajtaj uj cartata qhelqanayki tiyan, manaña kutichipusunankuta nispa.

QOSPA MAÑAKAPUNAPAJ

Qolqeta qowaj, necesitaspataj mañakapuyta atiwaj.
Chaypajtaj uj cartata qhelqanayki tiyan, mañakapuyta atisqaykita sutʼinchaspa.

ÑAUPAJMANTA WAKICHIKUSPA KAY JINASMANTA QOWAJ

Diospa Gobiernonmanta Jallpʼantinpi willakunanpaj, waj jinasmantawan yanapayta atinki. Yanapayta munanki chayqa, suyuykipi sucursaltaraj tapuriy imaynasmantachus yanapakuyta atisqaykita yachanaykipaj. Imaraykuchus mana tukuy suyuspichu kikin leyes tiyan, nitaj impuestostapis kikintachu pagakun. Chayrayku chaymanta allinta yachajkunata tapukuy, imaynamantachus yanapayta atisqaykita ajllanaykipaj. Kay jinasmanta yanapakuwaj:

Seguros: Seguro de vida nisqaman qolqeta churasqaykita chayri jubilacionniykipaj tantashasqayki qolqeta, Jehovaj testigosninpa sucursalnin japʼinanpaj uj documentota ruwawaj.

Bancopi qolqeykimanta: Bancoman qolqeta churasqayki documentota, jubilacionniykipaj ruwasqayki documentota ima, sucursalpa sutinman churanaykipaj uj documentota (fideicomiso) ruwawaj, wañupojtiyki suyuykej leyesninman jina sucursal chay qolqeta orqhokapunanpaj.

Bono nisqa, uj empresapi churasqayki qolqe: Chay qolqeta Jehovaj testigosninpa sucursalninman mana imata suyaspalla qoyta atiwaj. Chantapis uj documentota ruwawaj, wañupojtiyki chay qolqeta sucursal japʼikapunanpaj.

Inmuebles (wasi, jallpʼa...): Vendekunanpaj jina wasita, jallpʼata ima Jehovaj testigosninpa sucursalnin japʼikapunanpaj qoyta atillankitaj, mana imata suyaspalla chayri wañupunaykikama chayllapipuni tiyakunaykita qhelqawaj.

Qosqayki qolqemanta renta: Qolqeykita chayri bancoman churasqayki qolqemanta documentota, Jehovaj testigosninpa sucursalninman pasapunanpaj uj documentota ruwawaj. Chaymantataj sapa wata uj rentata wañupunaykikama qosunkuman. Chantapis qolqeykimanta impuestota pisillataña pagankiman.

Testamentos, fideicomisos ima: Qolqeta, chayri waj kapuyniykita Jehovaj testigosninpa sucursalninman, uj notariowan documentota ruwachispa herenciata jina chayri fideicomisopi saqeyta atinki. Kay jinamanta imatapis qoyqa, imatachus qoshanki chaymanta impuestosta pisiyachinman.

Rikunchej jina, ajinasmanta yanapayta munajkunaqa, ñaupajmanta wakichikunanku tiyan. Jallpʼantinpi willakunanpaj yanapayta munajkunapajqa inglespi, castellanopi ima, Donaciones planificadas para favorecer el servicio del Reino en todo el mundo nisqa folleto wakichikun. Chay folletotaj, kunan chayri aswan qhepaman imaynasmantachus qolqeta, waj imastawan qoyta atikusqanta sutʼinchashan. Ichapis mana chay folletopi tukuy ima nisqanchu suyuykipaj jina kanman. Imaraykuchus sapa suyupi leyesqa waj jina, nitaj impuestosta kikintachu pagakun. Ashkha runasqa sumaj willaykuna Jallpʼantinpi willakunanpaj yanapanku, impuestostapis pisillataña paganku. Chay folleto suyuykipi tiyan chayqa, congregacionniykipi secretariomanta mañakuwaj.

Astawan yachayta munaspaqa, jw.org/qu nisqapi “Diospa Gobiernonmanta willakunanpaj qolqeykiwan yanapakuyta atinki” nisqaman yaykuy, chayri suyuykimanta sucursalta tapurikuy.