¿Wajkunata yanaparisunmanchu?

UJ WAJCHA suyupi tiyakoj François sutiyoj anciano kayta nerqa: “Votacionesta ruwakusqantawanqa chʼajwas rikhurerqa, ashkha hermanostaj wasinkumanta ayqenanku karqa. Mikhuna, jampispis pisiyarqa, kajpis may valesqa karqa. Bancos wisqʼakaporqanku, qolqeta orqhonapaj maquinaspis chʼusajyaporqanku”, nispa.

Sucursalmanta hermanosqa qolqeta, waj imastawan hermanosman usqhayllata apacherqanku, pikunachus suyuntinmanta Tantakuna Wasisman ayqekorqanku. Maqanakusharqanku chay iskaynin qotusqa ñankunapi mana pitapis pasachillajchu kanku. Chaywanpis Testigos politicaman, chʼajwasmanpis ni imarayku satʼikusqankuta yachasqankurayku, sucursalmanta autosta pasachillaj kanku.

François nerqa: “Ujnin Tantakuna Wasiman rishajtiykoqa armasniyoj runas autoykuman baleamorqanku. Chay balastaj ladituykutapuni pasarqa. Uj soldado noqaykuman usqhayllata jamushasqanta rikuspataj, chay rato kutirispa sucursalman riporqayku. Jehovaman mayta agradecekorqayku mana wañusqaykumanta. Qʼayantenqa chay Tantakuna Wasipi 130 hermanos kashajkuna ayqekuyta atisqanku. Wakenqa sucursalman chamorqanku, chaypitaj paykunata kallpacharqayku, chʼajwas pasanankamataj mikhunata, waj imastawan qorqayku.

”Aswan qhepamantaj, suyuntinmanta ashkha cartas sucursalman chamorqa, mayqenkunapichus hermanos mayta agradecekusqankuta nisharqanku. Waj lugaresmanta hermanos paykunata yanapasqankuta rikuspa, Jehovapi astawan atienekorqanku.”

Jallpʼa ikhakuykuna chayri waj ñakʼariykuna kajtenqa, mana hermanosninchejta “walejlla risuchun; chirimanta qʼoñikamuy, sajsakamuytaj” nispachu ninchej (Sant. 2:15, 16). Manaqa ñaupa cristianos jina, imaspichus pisisqa kasqankupi yanapariyta munanchej. Paykunaqa yarqhay tiempo chamunanta yachaspa “nerqanku sapa uj kapusqanman jina qolqeta tantaspa, apachinankuta Judeapi kaj hermanosman” (Hech. 11:28-30).

Jehovaj kamachisnenqa pisisqa kajkunata tukuy sonqo yanapariyta munanchej, jinallataj Diosmanta yachakunankupajpis (Mat. 5:3). Jesusqa kamacherqa runasta yachachisqasninman tukuchimunata (Mat. 28:19, 20). Noqanchejtaj chayta ruwanapaj tiemponchejta, kallpanchejta, kapuyninchejta ima churanchej. Diospa llajtanqa qolqeta churakusqanmanta wakinta, pisisqa kajkunata yanapanapaj apachin. Chaywanpis chay qolqeqa Diospa Reinonmanta willakunallanpajpuni astawanpis kashan. Chaypaj yanapakuspataj Diosta, runa masinchejtapis munakusqanchejta rikuchinchej (Mat. 22:37-39).

Pachantinpi willakunanpaj qolqeta churakusqanqa mana usuchikunchu, manaqa maychus kajta apaykachakun. Qanrí, ¿pisisqa hermanosta yanapariyta atiwajchu? ¿Yanapayta munawajchu Jesuspa yachachisqasninman tukuchimuna llankʼaypi? Ajina kajtenqa Proverbios 3:27 yuyaychasqanman jina ruway, chaypi nin: “Pichus imapi khuyayniykita mañakusojtenqa, ama: Mana, niychu, ruwanaykipaj jina kashajtenqa”, nispa.