2. Llakiykunata atipanapaj

ANCHATA PHUTIKUY

Rosmery nin: “Imitallamantapis anchata phutikoj kani. Tukuy imatataj piensaj kani”, nispa. Bibliamanta, ¿ima versiculotaj Rosmeryta yanaparqa? Ujnenqa Mateo 6:34 karqa. Chaypi nin: “Ama phutikuychejchu imachus qʼaya kananmanta, imaraykuchus qʼaya pʼunchaypa llakiynenqa kallanqa. Sapa pʼunchaypa llakiynenqa kallan”, nispa. Chay versiculoqa Rosmeryta yanaparqa qʼayantin diamanta mana llakikunanpaj. Pay nin: “Imaschus niraj kasqanmanta anchata phutikoj kani, manapis llakiykunasniyojchu kayman jina. Qhasillatataj llakikoj kani, imajtinchus mana imapis kajchu”, nispa.

Jasminrí anchata llakikusqanrayku manaña paypichu kasharqa. Pay nin: “Sapa semana waqaj kani, wakin chʼisistaj ni puñuypis japʼiwajchu. Llakiykunarayku sonqoyqa qʼala pʼakisqa kasharqa”, nispa. Bibliamanta, ¿ima versiculotaj payta yanaparqa? Jasminqa 1 Pedro 5:7 yanapasqanta nin. Chaypi nin: “Tukuy llakiyniykichejta Diospa makinman saqeychej, imaraykuchus payqa qankunamanta llakikun”, nispa. Pay nillantaj: “Jehová Diosmanta mana saykʼuspa mañakorqani, tiemponmantaj payqa mañakuyniyta uyariwarqa. Uj llasa qʼepimantapis samarichiwanman jina kasharqani. Wakin kutisqa llakikunirajpuni, jinapis niña anchatachu”, nispa.

RUWANASTA QHEPAPAJ SAQEY

Isabela sutiyoj sipas nin: “Tatayqa imatapis qhepapajpuni saqej, noqapis kikillantaj kani. Wakin kutisqa teleta qhawanayrayku chayri samarikunayrayku, ruwanasniyta qhepapaj saqeni. Chantataj apurakunayrayku patan uranta ruwani. Chaytaj mana allinchu”, nispa. Paytaqa 2 Timoteo 2:15 yanaparerqa. Chaypi nin: “Tukuy atisqaykita ruway, Diospa ñaupaqenpi allinpaj qhawasqa kanaykipaj. Jinallataj ni imamanta pʼenqakoj llankʼaj runa kanaykipaj”, nispa. Isabela nillantaj: “Mana munarqanichu Jehová Dios noqamanta pʼenqakunanta, imatapis qhepatapuni ruwasqayrayku”, nispa.

Katy sutiyoj sipastaj nin: “Ima trabajotapis entreganay horasllataña ruwaj kani. Chantataj waqaj kani, niña puñojchu kani, llakikojtaj kani. Onqoykunaypaj jina kaj kani”, nispa. Paytaqa Proverbios 13:16 yanaparqa. Chaypi nin: “Yuyayniyoj runaqa yachayninwan imatapis ruwan, wampu runatajrí wampu kayninta rikuchin”, nispa. ¿Imatá chay versiculomanta yachakorqa? Pay nin: “Yuyayniyoj runaqa ima ruwanatapis ñaupajsitumantaña wakichikun. Noqapis uj cuadernota wakichikuni. Chaymantaj anotakuni imastachus ruwanay kasqanta. Chayqa yanapawan ruwanasniyta tiemponpi juntʼanaypaj, nitaj qhepapaj saqenaypaj”, nispa.

SAPAYAKUY

Cristina nin: “Qosayqa tawa juchʼuy wawitasniyojta saqerawaspa riporqa”, nispa. Bibliamanta, ¿ima versiculotaj payta yanaparqa? Paytaqa Proverbios 17:17 yanaparqa. Chaypi nin: “Uj kawsaqeqa tukuy tiempopi munakuyniyoj, uj wawqetaj runawan khuska llakiypi sayaykunampaj”, nispa. Payqa cristiano hermanosninwan yanapachikorqa. Cristina nin: “Paykunaqa tukuy imaymanamanta yanapariwarqanku. Wakenqa mikhunitata, tʼikitastawan aparinpuwarqanku. Wasimanta cambiakunayku kajtinpis, kinsantin kutispi ashkhas yanaparej jamuwarqanku. Trabajota tarikunaypajpis yanapariwarqanku. Paykunaqa mana sapayta saqerpariwarqankuchu”, nispa.

Anamanta parlarqanchejña, paypis uj tiempota sapitan kasqanta yuyarqa. Llakiykunasnin pasasqantawan imaynachus kashasqanmanta yuyarikuspa nin: “Tukuypis familiasniyoj, amigosniyoj kusisqa kasharqanku. Noqatajrí ni piniyoj, llakisqataj kasharqani”, nispa. Paytaqa Salmo 68:6 yanaparqa. Chaypi nin: “Diosqa sapan runata familia ukhupi tiyachin”, nispa. Ana nin: “Kay versiculota leerispaqa, yachakorqani Diosqa uj sumaj familiata qoyta munawasqanchejta, payta munakojkunawan khuska kusisqas, munakuypi ujchasqataj kananchejpaj. Jinapis Salmo 37:4 reparachiwarqa, chay jina familiayoj kanaypajqa Jehová Diosmanraj qayllaykunay kasqanta. Chaypi nin: ‘Tata Diosta munakuspa mayta kusikuy, paytaj sonqoykej munasqanta qosonqa’, nispa”.

Ana nillantaj: “Jehová Diosman astawan kʼaskaykunay karqa. Payqa ni pi jina munakuwanchej. Chantá Diosta munakojkuna ukhumanta amigosta tarinaypaj, uj listata wakichikorqani. Chaymantaj churarqani imastachus paykunawan khuska ruwanayta. Chantapis wajkunapi allin kajta qhawayta yachakorqani, manataj pantasqasninkutachu”, nispa.

Diosta yupaychajkunaqa, pantaj runasllataj kanku. Jehovaj testigosnenqa, tukuy runas jinallataj llakiykunasniyoj kayku. Jinapis Bibliamanta yachakusqaykurayku, kallpachakuyku wajkunata atikusqanman jina yanaparinaykupaj. Chay jina amigostaqa tukuy munasunman, ¿icharí? Jinapis wakin llakiykunasninchejta, munaspapis mana chinkachiyta atisunmanchu. Ichapis sinchʼi onqoyniyoj kashanchej chayri familianchejmanta pillapis wañupun. Jinapi kajtinchej, ¿Biblia yanapawasunmanchu?