Runasta Diosta uyarinankupaj yanapana
1. “Reinoyki jamuchun” nisqa jatun tantakuypi, ¿ima folletostaj llojserqa, chantá imaraykutaj yachachinapaj sumaj kasqanta ninchej?
1 Qayna wata “Reinoyki jamuchun” nisqa jatun tantakuypi, Diosta uyariy, chantá Diosta uyariy wiñay wiñaypaqtaq kawsanki nisqa mosoj folletos llojserqa, kay folletosqa pisi qhelqasniyojlla kanku. Kunantaj Diosta uyariy wiñay wiñaypaqtaq kawsanki nisqa folleto, 431 qallusman tijrakonqa.
2. ¿Pikunapajtaj kay folletos wakichikun?
2 ¿Pikunapajtaj kay folletos wakichikun? ¿Willaypi pikunawantaj tinkukunchej? Qhawarinachej:
• Uj hermano, uj runawan Diosmanta parlarishaspa, —ñaupaj kutirayku chayri kutejtin— mana leeyta atisqanta chayri pisillata leeyta atisqanta reparan.
• Uj hermano, waj qallupi parlaj runaman Diosmanta parlarin, chay qallupitaj mana kanchu chayri wakin publicacioneslla tiyan. Chantapis ichá chay lugarpeqa, mana tukuy runaschu qallunkupi leeyta atinku.
• Uj hermano, Diosmanta yachachin joqʼara runasman makiwan parlaspa.
• Uj tata, manaraj leeyta yachaj wawitanman, Diosmanta yachachiyta munan.
3. Diosta uyariy nisqa folleto, ¿imayna wakichisqataj kashan?
3 ¿Imayna wakichisqataj kay folletos kashanku? Diosta uyariy nisqa folletoqa aswan pisi qhelqasniyoj. Sapa paginaj tukukuyninpitaj yachaqananta entiendenapaj rimaykuna, Bibliamanta versículos ima rikhurin. ¿Imapajtaj? Kaypi tʼukuriy; pillapis waj qallupi dibujosniyoj folletota, ashkha qhelqasniyojta yachakunapaj jaywawajtinchej, ¿yanapawasunmanchu? ¿Mana icharí? Jinallataj Bibliamanta orqhosqa publicacionespis ashkha qhelqasniyoj, leeyta mana yachajkunata mana yanapanchu. Chayrayku kay folletoqa, sumaj wakichisqa ashkha dibujosniyoj kashan. Uj dibujomanta waj dibujoman rinapajtaj uj flechitawan jina rikuchishan.
4. Diosta uyariy wiñay wiñaypaqtaq kawsanki nisqa folleto, ¿imayna wakichisqataj kashan? Sutʼinchariy.
4 Diosta uyariy wiñay wiñaypaqtaq kawsanki nisqa folletoqa, Diosta uyariy nisqa folleto jinallataj kikin dibujosniyoj. Kay folletoqa, leeyta yachakushanku chayri pisillata leenku chaykunapaj wakichikun. Diosta uyariy nisqa folletowan yachachishanchej chayqa, Diosta uyariy wiñay wiñaypaqtaq kawsanki nisqa folletowan sutʼinchanapaj yanapachikuna. Sapa yachaqanataj iskay paginapi kashan. Sapa yachaqanaj pata kantunpitaj, uj tapuy rikhurin, chaytataj chay yachaqanallapitaj sutʼinchashan. Chay folletoj dibujosninpi rimaykuna, Bibliamanta versículos ima rikhurin. Wakin paginaspitaj recuadritos rikhurin, chaykunatataj yachakojwan atisqanman jina ukhunchana.
5. ¿Maykʼajtaj, imaynatataj kay folletosta runaman jaywarisunman?
5 ¿Imaynatá kaykunawan runaman willamusunman? Atikojtenqa, wasimanta wasi willashaspa, kay folletosmanta mayqellanwanpis parlarisunman, kay killa mana kay folletoswan llankʼashaspapis (“¿Imaynatá saqesunman?”, nisqa recuadrota leey). Yachakuyta munajman kutispa, kay folletota apanpuyki nispa jaywarisunman.
6. ¿Imaynatá kay folletoswan runaman yachachisunman?
6 Diosta uyariy nisqa folletoqa, mana Yachachin libro jinachu tapuykunasniyoj, chayraykutaj mana chay librowan jinachu yachachisun. Runasmanqa, cuentosmanta uyariy mayta gustan. Chayrayku yachakojman Bibliamanta yachachinapaj, folletoj dibujosninmanta willarina. Chantá imapajchus chay dibujos wakichisqa kasqantapis sutʼincharina. Kʼachamanta yachachina, parlarinantataj saqena. Paginaj tukukuyninpi Bibliamanta versículos rikhurisqanta leena, chantá sutʼincharina. Entiendesqanta yachanapajtaj tapuykunata ruwana. Diosta uyariy wiñay wiñaypaqtaq kawsanki nisqa folletowan yachachishanchej chayqa, sapa dibujoj rimayninta, versiculonta ima leena.
7. ¿Imaynatá yachakojta sumajta yanapasunman?
7 Yachakojkunata sumajta yanapana. Yachakojtaqa, Bibliamanta yachakushasqan, Diosmanta astawan yachakunanpaj, leeyta yachakuyta munananpaj ichá yanapanman (Mat. 5:3; Juan 17:3). Chantá, Diosta uyariy nisqa folletowan yachakushan chayqa, tiempo pasasqanman jina leeyta, Diosta uyariy wiñay wiñaypaqtaq kawsanki nisqa folletomanta ima yachakonqa. Yachakojqa, folletosmanta mayqellanwanpis yachakuyta tukojtin, niraj bautizakunanpaj wakichisqachu kashan. Chaypajqa, Yachachin librota chayri waj publicacionta, Bibliata sumajta entiendenanpaj ukhunchanan tiyan.
8. ¿Imaraykutaj may agradecesqa kashanchej?
8 Runas wiñaypaj kausayta munaspaqa, Jehovallata uyarinanku tiyan (Isa. 55:3). Imaraykuchus Jehovaqa, “tukuy runas [mana leeyta yachakojkuna ima] salvasqa kanankuta” munan (1 Tim. 2:3, 4). Chayrayku, ¡Jehová Diosman may agradecesqas kashanchej kay folletosta orqhosqanmanta! Imaraykuchus kay folletoswanqa, runasta Diosta uyarinankupaj yanapasun.
[3 paginapi recuadro]
¿Imaynatá saqesunman?
Wasiyojman folletoj 2, 3 paginasninta rikuchiytawan tapuriy: “¿Kay jina sumaj kʼacha huertapi tiyakuyta munawajchu? [Kutichinanta suyariy.] Bibliaqa, Jallpʼanchej uj kʼachitu huertamanta tukunanta nin, chaypitaj manaña ni pipis wajcha kanqañachu nitaj pipis onqonqañachu. ¿Imatataj chaypi kausanapaj ruwananchej tiyan? [Kinsa paginaj pata kantunpi rikhurej rimayta leey, mayqentachus Isaías 55:3 versículo sutʼinchashan.] Kay versiculoqa, Diosta uyarinanchejta nishan. ¿Imaynatá Diosta uyarisunman?”. Chantá 4, 5 paginasta ukhunchariy. Mana tiempoyoj kajtintaj, folletota saqey, waj pʼunchay ukhunchanaykichejpaj kutinaykitataj niy.