¡Diosmanta jamoj sumaj willaykuna! folletota, ¿imaynatá apaykachasun?
Bibliamanta yachakuyta munajkunaman kutinapaj, yachachinapaj ima wakichikun
1. “Sonqonchejta jarkʼana” nisqa jatun tantakuypi, ¿ima mosoj folletotaj llojserqa yachakuyta munajkunaman kutinapaj, Bibliamanta yachachinapaj ima?
1 “Sonqonchejta jarkʼana” nisqa jatun tantakuypeqa, may kusiywan ¡Diosmanta jamoj sumaj willaykuna! nisqa folletota japʼerqanchej. Kay folletoqa yachakuyta munajkunaman kutinapaj, Bibliamanta yachachinapaj ima wakichikun. ¿Imatataq Diosninchik ruwananchikta munan? nisqa folletoj cuentanmantataj orqhokun. Chaywanpis chay folletoman rijchʼakun, imajtinchus yachaqanasnenqa juchʼuylla kanku. Chayrayku runata wasi punkunpi Bibliamanta yachachinapaj, may sumaj. Diosninchik munan nisqa folletoqa, cristiano kanapaj imatachus ruwanamanta parlan, yachakuyta qallarejkunataj chaykunata ichá mana japʼikuyta atillankumanchu. Mana chayman jinataj, mosoj folletoqa Bibliapi tarikoj sumaj willaykunamanta parlan (Hech. 15:35).
2. ¿Imaraykutaj Sumaj willaykuna folleto orqhokun?
2 ¿Imaraykutaj kay mosoj folleto orqhokun? Kunankamaqa, Yachachin librowan runata Bibliamanta yachachinchej. Chaywanpis wakenqa, uj libromanta yachakuyta manchachikunku. Chayrayku Jallpʼantinpi hermanos, niraj librowan yachachishaspa, cheqa kajta pisi parlayllapi sutʼinchanapaj publicacionta mañakorqanku. Kay folletotaj chaypaj orqhokun. Chantapis uj folletoqa, ashkha qallusman tijrachikuyta atin.
3. ¿Imapitaj mosoj folleto Bibliata ukhunchanapaj waj publicacioneswan mana kikinchu?
3 ¿Imayna wakichisqataj kashan? Bibliata ukhunchanapaj publicacionesninchejtaqa, pillapis leeytawan sapallanmanta entiendeyta atinman. Chaywanpis kay folletoqa, wajpa yanapayninwanpuni yachakunapaj wakichisqa kashan. Chayrayku runaman saqeshaspaqa, uj chayri iskay parrafosllatapis paywan ukhuncharina. Folletoj parrafosnenqa juchʼuylla kanku, punkullapi chayri llankʼayninku chaypipis ukhunchanapaj jina. Ñaupaj yachaqanamanta qallariy allin kajtinpis, mayqen yachaqanamantapis qallariyta atillasunman.
4. ¿Imaynatá kay folleto Bibliawanpuni yachachinapaj yanapawasun?
4 Ashkha publicacionesninchejpi, tapuykunaj kutichiynenqa parrafospi tarikun. Chaywanpis kay folletopi kutichiykunaqa Bibliapi astawan tarikun. Imajtinchus runasqa Bibliamanta yachakuyta munanku, publicacionesninchejmanta nisqaqa. Chayrayku Bibliamantapuni leekunanpaj, casi ni mayqen textopis parrafospi qhelqasqachu kashan. Ajinamanta runasqa, yachakusqanku Diosmantapuni jamusqanta reparanqanku (Isa. 54:13).
5. ¿Imaraykutaj sapa yachachimunapaj sumajta wakichikunanchej tiyan?
5 Kay folletoqa mana tukuy textostachu sutʼinchan. Astawanqa yachakoj, yachachejta tapukunanpaj jina wakichisqa kashan. Chayrayku sapa yachachimunapaj, sumajta wakichikuna tiyan. Chaywanpis mana anchata parlanachu. Bibliamanta textosta sutʼinchaspa mayta miskʼichikuspapis, yachakoj entiendesqanta sutʼinchananta saqena. Sutʼita entiendenanpajtaj, allin yuyaywan tapuspa yanapana (Hech. 17:2).
6. Kay folletowan: 1) ¿Imaynatá Diospi, Bibliapi ima mana creejkunata yanapasunchej? 2) ¿Imaynatá wasimanta wasi willasun? 3) ¿Imaynatá wasi punkupi yachachiyta qallarisun? 4) ¿Imaynatá yachakuyta munajkunaman kutispa yachachisun?
6 Kay folletotaqa maykʼajllapis runaman saqeyta atisun, imaynatachus Bibliamanta yachachinapaj publicacioneswan ruwanchej ajinata. Ashkha hermanos, runata wasi punkunpi kay folletowan yachachiyta qallarenqanku. Chaywanpis jatun tantakuypi nikorqa jina, yachakuyta munajkunaman kutispapis kay folletowan “yachachispa miskʼichiku[llasuntaj]”. (Kay 13-15 paginaspi recuadrosta qhawariy.)
7. ¿Imaynatá kay folletowan runata yachachisunman?
7 ¿Imaynatá runata yachachisun? Qallarinapajqa yana letraspi tapuyta, parrafontawan ima leerisunman. Chantá winkusqa textosta Bibliapi maskʼasunman. Maychus kajta entiendenanpajtaj, sumaj tapuykunata ruwana. Niraj qhepan tapuyta ukhunchashaspa, yachakoj entiendesqanta yachanapaj, qallariypi leesqanchej tapuyman kutichinanta nisunman. Ñaupaj kutista waturishaspa, allin kanman uj tapuyllata ukhunchananchej. Aswan qhepamantaj tukuynin yachaqanata ukhunchasunman.
8. Bibliata leenapaj, ¿imatá ninanchej tiyan, imaraykutaj?
8 Yanitapi tapuykunaj kutichiynenqa, “leey” nisqa textospi kashan. Chaykunata leenapajtaj, mana allinchu kanman ninanchej, “Apóstol Pablo qhelqarqa”, chayri “Jeremiaspa profecian nin”, nispa. Jinata nispaqa, runaspa nisqallankuta leeshasqanchejta yuyachisunman. Chayrayku aswan allin ninanchej, “Diospa Palabran nin”, chayri “Qhawariy imatachus Bibliaj profecian nisqanta”, nispa.
9. ¿Tukuy textostachu leenanchej tiyan?
9 ¿Tukuy textostachu leenanchej tiyan, chayri “leey” nisqa textosllatachu? Yachakojman jina tʼukurinanchej kanqa. Folletopi textosqa mana hojata juntʼachinapajchu churakun, manaqa yachachiykunata sutʼinchasqankurayku ajllakun. Chaywanpis wakin yachakojkunaqa pisi tiempoyojlla kanku, wakintaj pisillata leenku chayri mana anchata yachakuyta munankuchu. Chayrayku ichá “leey” nisqa textosllata maskʼananchej kanqa.
10. ¿Maykʼajtaj Yachachin librowan yachachiyta qallarisunman?
10 ¿Maykʼajtaj Yachachin librowan qallarina? Yachakojwan ashkha kutistaña kay folletota ukhunchanchej chayqa, Yachachin librowan yachachiyta qallarisunman, chayri tukunakama folletota ukhunchasunman. Maykʼajchus Yachachin librowan qallarinataqa, allinta tʼukurina tiyan. Chayta ruwaytawan, ¿libroj qallariyninmantapachachu yachachina? Mana ima kamachiypis chaypaj kanchu. Yachakojkunaqa mana kikinchu kanku. Chaywanpis folletopi yachakusqankuta, Yachachin libropi ujtawan ukhunchayqa, mayta yanapanman.
11. ¿Imaraykutaj kay mosoj folletota apaykachana?
11 Kay tiempopeqa, manaña sumaj willaykuna kanchu. Chaywanpis noqanchejqa, kay sumaj willaykunata willashanchej: Diospa Reinon kamachishasqantaña, tumpamantawantaj sumaj kausayta apamunanta, maypichus cheqan kausaylla kanqa (Mat. 24:14; 2 Ped. 3:13). Chay willaykunata uyarejkunaqa, cheqamantachá kayta ninku: “Orqo patasninta sumaj willaykunata apamojpa chakisnenqa may kʼachitus kanku, allin kawsaymanta sumaj willayta apamoj, pichus salvacionmanta willaraspa, Sionman nin: Diosniykeqa kamachishan, nispa, chay” (Isa. 52:7). Diosta rejsiymanta chʼakichikojkunata, ¡kay mosoj folletopi sumaj willaykunawan yanapana!
[13 paginapi sutʼinchaynin]
Diospi, Bibliapi ima mana creejkunata yanapanapaj
● Wakin lugarespi runaqa, “Diosmanta”, “Bibliamanta” ima parlariyta qallarejtinchej, mana uyariyta munawanchejchu. Paykunamanqa imaschus runasta llakichisqanmanta parlarisunman: ichá sumaj gobiernota necesitakusqanmanta, familiaspaj yuyaychaykunamanta, imachus qhepaman kananmanta ima. Chantá ashkha kutista waturiytawan, Dios kasqantapuni, Bibliapi atienekuyta atisqanta ima rikuchispataj, Sumaj willaykuna folletota jaywasunman.
[14 paginapi sutʼinchaynin]
Wasimanta wasi willanapaj
● “Diosqa imatachus runaspaj munasqanta, tukuyman willawanchej. Chaywanpis ichá tapukunki: ‘¿maykʼajllapis Dios llakiykunata chinkachinmanchu?’, nispa. [Kutichinanta suyariy.] Kay folletoqa, imaynatachus Biblia chay tapuyman kutichisqanta yachanapaj yanapawanchej. [Folletota jayway, chantá 1 yachaqanaj ñaupaj parrafonta, Jeremías 29:11 ima leey.] Leerisqanchejman jina, ¿Diosninchej sumaj kausayta qowasunchu? [Kutichinanta suyariy.] Munaspaqa kay folletowan qhepakuwaj. Qhepanta kutimojtiytaj, kay iskay parrafotañataj qhawarisunman. Chaypitaj imaynatachus Dios, runaspa ñakʼariyninta chinkachinanta yachasunman.” Wasiyoj tiempituyoj chaytaj, qhepan parrafota, chaypi tarikoj textostawan ukhunchasunman. Qhepan tapuyta kutichinapajtaj, waj pʼunchay kutinanchejta nisunman.
● “Wakin runasqa, chʼampaykunapi kaspalla Diosmanta mañakunku. Qanrí, ¿Diosmanta mañakunkichu? [Kutichinanta suyariy.] ¿Tukuy mañakuykunatachu Dios uyarinman? Chayri, ¿wakillantachu? [Kutichinanta suyariy.] Kay folletoqa, imaynatachus Biblia kay tapuykunaman kutichisqanta sutʼinchan. [Folletota jayway, chantá 12 yachaqanaj ñaupaj parrafonta “leey”, winkusqa textostawan.] Dios uyariyta munawasqanchej, ¿manachu kusichiwanchej? Chaywanpis mañakusqanchejta astawan uyarinanpajqa, payta rejsinanchej tiyan. [Iskay yachaqanata kichaspa, yanitapi tapuykunata rikuchiy.] Munajtiykeqa kay folletota saqeykiman. Waj kutipitaj, imaynatachus Biblia kay tapuykunaman kutichisqanta ukhunchasunman.”
● “Ashkha runasqa, imapichus kay pacha tukukunanmanta llakikunku. ¿Maykʼajllapis allin kausay kanmanchu? [Kutichinanta suyariy.] Bibliaqa sumaj kausayta suyayta atisqanchejta nin. Kay tapuykunamantaj kutichin.” Folletota jayway, chantá 32 paginapi rikhurej tapuykunamanta ujta ajllachiy. Chaymanta ajllasqan yachaqanawan, imaynatachus Bibliamanta yachachisqanchejta rikuchiy. Yachaqanaj qhepan tapuyninta kutichinaykipajtaj, waj pʼunchay kutinaykita nin.
[15 paginapi sutʼinchaynin]
Wasi punkupi yachachiyta qallarinapaj
● “Kay paqarenqa runasta kay folletowan Bibliamanta uj chhikanta yachachishayku. Kay folletoqa, kay 15 tapuykunata Bibliawan kutichin. [Folletoj tapanta, wasanta ima rikuchiy.] ¿Bibliata entiendey atikullanmanchu? [Kutichinanta suyariy.] Kay folletoj yachaqanasnenqa entiendeyta atinapaj jinalla. [Kinsa yachaqanata kichaspa, 3 kaj tapuyninpa ñaupaj parrafota ukhunchay, chantá Apocalipsis 21:4, 5 leey. Atikojtenqa qhepan parrafota, “leey” nisqa textostawan ukhunchaychej.] Munajtiykeqa kay folletota saqeykiman. Allin kanman uj yachaqanallatapis ukhunchayta tukunayki. Gustasojtenqa astawan yachakullawajpuni. Qhepanta jamojtiy, ñaupaj yachaqanata ukhunchasunman, uj paginalla.”
[15 paginapi sutʼinchaynin]
Yachakuyta munajman kutinapaj
● “Taripasusqaymanta mayta kusikuni. Kay folletota apanporqayki, tapuykunasninchejman Bibliawan kutichishan. [Folletota jayway, 32 paginatataj rikuchiy.] ¿Mayqentataj astawan yachakuyta munawaj? [Kutichinanta suyariy, chantá ajllakusqan yachaqanata rikuchiy.] Imaynatachus Biblia kay tapuyman kutichisqanta qhawarisunchej.” Uj chayri iskay parrafosta ukhunchaspa, “leey” nisqa textostawan leespa, imaynatachus Bibliamanta yachachisqanchejta rikuchiy. Bibliamantataj yachachiyta qallarinkiña. Chantá folletota wasiyojman saqey, waj pʼunchay kutinaykipajtaj parlariy. Uj yachaqanata ukhunchayta tukuytawan, waj yachaqanata ajllachiwaj chayri qallariymantapacha ukhunchawajchej.