¿Pikunataj Jehovaj munayninta ruwashanku? folletota, ¿imaynatá apaykachasun?
Yachakojkunata Diospa llajtanman pusamunapaj wakichikun
1. ¿Pikunataj Jehovaj munayninta ruwashanku? folleto, ¿imapajtaj wakichikun?
1 ¿Pikunataj Jehovaj munayninta ruwashanku?, nisqa mosoj folletota, ¿apaykachashankiñachu? Kay folletoqa wakichikun: 1) Bibliamanta yachakoj Jehovaj testigosninta astawan rejsinanpaj, 2) imastachus ruwasqanchejta yachananpaj, 3) Diospa llajtan imaynatachus llankʼashasqanta reparananpaj ima. Sapa yachaqana, uj paginallapi kashan. Bibliamanta yachakojman yachachiytawan, 5 chayri 10 minutosllapi sutʼincharinapaj wakichikun.
2. Kay folleto imayna wakichisqachus kasqanta sutʼinchay.
2 ¿Imayna wakichisqataj kashan? Kay folletoqa, kinsapi rakʼisqa kashan. Sapa ujtaj, qallariypi nikusqanman jina Jehovaj llajtanmanta uj imata sutʼinchan. Kay folletoqa 28 yachaqanasniyoj. Sapa yachaqanaj titulonqa uj tapuy, sapa subtitulotaj chay tapuyman kutichin, aswan yanitapitaj qhelqasqa kashan. Tukuynin folletopi 50 kuraj suyusmanta fotos rikhurin, maypichus orqhokusqantapis willakun, chaytaj Jallpʼantinpi willashasqanchejta rikuchin. Ashkha yachaqanaspi, “Yachanaykipaj” nisqa recuadro rikhurin. Yachakojtaj chaypi nisqanman jina ruwanman.
3. ¿Imaynatá kay mosoj folletota yachakojwan ukhunchasunman?
3 ¿Imaynatataj apaykachasunman? Ñaupajtaqa, yachaqanaj tapuyninta leerina. Chantá yachakojwan khuska yachaqanata leerina, subtitulosta sutʼinchaspa. Tukuchanapajtaj, paginaj ura kantunpi tapuykunawan yachakusqanta yuyarichisunman. Munaspaqa tukuynin yachaqanata ujllapi leerisunman, manaqa parrafomanta párrafo. Ima textostachus leenanchejta, sumajta ajllana tiyan. Chantapis dibujosta qhawarichina, “Yachanaykipaj” nisqa recuadrotapis leerina. Allin kanman, yachaqanasta maychus rikhurisqanman jina ukhunchananchej. Chaywanpis wakin kutisqa, ichá yachakoj necesitasqanman jina waj yachaqanata ukhunchasun. Sutʼinchanapaj, jatun tantakuy qayllamushanña chayqa, 11 yachaqanata ukhuncharisunman.
4. ¿Imaraykutaj kay mosoj folleto kapuwasqanchejmanta kusisqa kanchej?
4 Bibliamanta pimanpis yachachishaspaqa, janaj pacha Tatanchejta rejsichinanchej tiyan. Chaywanpis Diospa llajtanta rejsichinallanchejtaj tiyan (Pro. 6:20). Chayta ruwanapaj uj mosoj folleto kapuwasqanchejmanta, ¡may kusisqa kashanchej!