Jamojkunata napaykuna
1. ¿Ima tantakuytaj Diosmanta willanapaj may sumaj, imaraykutaj?
1 Jesuspa Wañuyninta Yuyarinapaj tantakoyqa, runaman Diosmanta willanapaj may sumaj. Kay wataqa, 10 millonesmanta aswan runas chay tantakuyman jamunankuta suyashanchej. Jamojkunaqa Jehová, Jesús ima may jatun munakuyninkurayku, juchamanta rantiwasqanchejta yachanqanku (Juan 3:16; 15:13). Chantapis Jehová, Jesusnejta rantiwasqanchejrayku, ima bendicionestachus japʼiyta atisqankuta yachanqanku (Isa. 65:21-23). Chaywanpis mana umallirichejllachu Diosmanta willarenqa. Tukuypis jamojkunata napaykurispa Diosmanta willayta atisun (Rom. 15:7).
2. ¿Imaynatá jamojkunata yanaparisunman?
2 Tantakuy qallarinankama chukusqalla suyanamantaqa, allin kanman jamojkunata napaykunanchej. Paykunaqa ichá mancharisqas kashanqanku, imachus kananta mana yachasqankurayku. Kʼachamanta parlarisqanchej, napaykurisqanchej ima, manaña manchachikunankupaj yanapanqa. Wakenqa ichá uj invitacionta japʼikusqankurayku jamonqanku. Yachanapaj allin kanman tapurinanchej, sichus pillatapis rejsisqanta, ñaupaj kutiraykuchus jamusqanta ima. Ichapis Bibliata, takina libronchejta ima mañarinapaj, paywan khuska tiyakusunman. Chantapis Tantakuna Wasipi tantakusun chayqa, tumpata rejsichisunman. Umallirichiy tukukusqantawan, tapuykunasninta kutichisunman. Waj qotuchakuy tantakunanpaj usqhayllata llojsina kajtintaj, ichapis nisunman: “Kay tantakuymanta qanwan astawan parlariyta munayman. ¿Maypí taripaykimanri?”, nispa. Chantá wasinpi waturisunman. Ancianosqa manaña willayman llojsej hermanosta kallpachanankupaj, jamusqankutachus manachus qhawarenqanku.
3. ¿Imaraykutaj jamojkunata napaykunanchejpuni tiyan?
3 Wakin jamojkunaqa, Jehovaj llajtan kusisqa, sonqo tiyasqa, ujchasqa ima kasqanta, ñaupaj kutirayku reparanqanku (Sal. 29:11; Isa. 11:6-9; 65:13, 14). Chayta reparanankutaj, imaynatachus paykunata napaykunanchejmanta kashan.