Manchachikuyniykiwan ama atipachikuychu
1. ¿Imaraykutaj wakin willajkuna Bibliamanta mana yachachiyta munankuchu?
1 ¿Mana allinta yachachiyta yuyasqaykiraykuchu mana pimanpis Bibliamanta yachachiyta munasqaykita ninki? Ñaupa tiempomanta Diospa wakin kamachisnin Moisés, Jeremías ima mana ruwayninkuta juntʼayta atinankuta yuyarqanku (Éxo. 3:10, 11; 4:10; Jer. 1:4-6). Kunanpis Jeremías, Moisés jinallataj sientekusunman. ¿Imatá ruwasunman manchachikuyninchejta atipanapaj?
2. ¿Imaraykutaj wasimanta wasi willaj rispapis, Bibliamanta yachachimunanchejpuni tiyan?
2 Jehovaqa, mana jaykʼaj imatachus mana ruwayta atisqanchejtaqa mañawanchejchu (Sal. 103:14). Chayrayku runasta Jesuspa ‘yachachisqasninman tukuchimuyta’, ‘yachachiyta’ ima kamachiwasqanchejta juntʼayta atillasunman (Mat. 28:19, 20). Chaywanpis Jehovaqa, chay llankʼayta mana aswan yachayniyojkunallamanchu qon (1 Cor. 1:26, 27). Chayrayku wasimanta wasi willaj rispapis, Bibliamanta yachachimunanchejpuni tiyan.
3. ¿Imaynatá Jehová, Bibliamanta yachachinapaj yanapawanchej?
3 Jehová yanapawanchej. Runata Jesuspa discipulonman tukuchinanchejpaj “ateyqa” Diosmanta jamun (2 Cor. 3:5). Payqa, cheqa yachachiykunata llajtannejta yachachiwanchej, chay yachachiykunatataj kay pachamanta yachayniyoj runasqa mana yachankuchu (1 Cor. 2:7, 8). Chantapis, Bibliapi Sumaj Yachachej Jesús imaynatachus yachachisqanta qhelqacherqa, Jesús jina ruwananchejpaj. Tantakuykunanejtapis yanapallawanchejtaj. Imaymana yanapastataj qowanchej kay Yachachin librota jina, chaykunaqa cheqa kajta entiendenapaj jinalla, sutʼitataj yachachinku. Chayraykutaj Bibliamanta yachacheyqa atikullan.
4. ¿Imaraykutaj Jehová yanapanawanchejta ninchej?
4 Jehová Diospa yanapayninwan, Moisés, Jeremías ima ruwayninkuta juntʼarqanku (Éxo. 4:11, 12; Jer. 1:7, 8). Chayrayku Jehovaj yanapayninta mañakuna. Cheqamantapuni Payqa yanapayninta qowasunchej, imaraykuchus Bibliamanta yachachispaqa, Paymanta cheqa kajta yachachishanchej (1 Juan 3:22). Chayrayku Bibliamanta runaman yachachiyta qallarinaykipaj kallpachakuy. Chayta ruwaspaqa, ashkha bendicionesta japʼinki.