Cristiano Kausayninchej tantakuypaj referencias
© 2023 Watch Tower Bible and Tract Society of Pennsylvania
1 AL 7 DE ENERO
BIBLIAMANTA SUMAJ YACHACHIYKUNA | JOB 32, 33
Llakiypi kajkunata yanapariy
it-1-S pág. 796
Elihú
Elihú fue imparcial, y no concedió ningún título lisonjero a nadie. Reconoció que, al igual que Job, estaba hecho de barro, y que el Todopoderoso era su Creador. No tuvo la intención de asustar a Job, sino que le habló como un verdadero amigo, dirigiéndose a él por nombre, algo que no habían hecho Elifaz, Bildad y Zofar. (Job 32:21, 22; 33:1, 6.)
Pisi kallpayojkunata Jehová jina qhawana
8 Ichapis wakin hermanosninchej onqoyrayku, sinchʼi llakisqas kashasqankurayku chayri tʼaqanasqa familiayoj kasqankurayku pisi kallpayoj kashanku, chayta yachaytaj paykunata yanapanapaj tanqawasun. Ichá noqanchejpis wakin kutis ajinallapitaj rikukusunman. Jehovaqa israelitasman niraj Sumaj Jallpʼaman yaykushajtinku yuyaricherqa paykunapis Egiptopi pisi kallpas, wajchas ima kasqankuta, chayraykutaj hermanosninkuta ñakʼarishajta rikuspa sonqonkuta mana rumiyachinankuta nerqa. Paykuna ukhupi wajchasta pisi kallpasta yanapanankutataj munarqa (Deu. 15:7, 11; Lev. 25:35-38).
9 Llakiypi rikukoj hermanosninchejta mana juchachanachu, nitaj yuyanachu paykunamanta aswan sumaj kasqanchejta. Astawanpis Dioswan allinpi kanallankupajpuni yanapana (Job 33:6, 7; Mat. 7:1). Sutʼincharinapaj, motota apaykachaj accidentakuspa hospitalman yaykojtin, ¿pichus juchayoj kasqantarajchu doctor tapun? Mana. Astawanpis usqhayllata jampin. Noqanchejpis kikillantataj hermanosninchej chʼampaykunasninkurayku llauchʼiyajtinku, usqhayllata creeypi sinchʼita sayanankupaj yanapananchej tiyan (1 Tesalonicenses 5:14 leey).
10 Hermanosninchejpa llakiyninpi tʼukurisunchej chayqa, ichá mana yuyasunchu pisi kallpas kasqankuta. Sutʼincharinapaj, uj hermana mana creyente qosan payman churanakusqanta unaytaña aguantan. Uj mamataj wawasnillanwan tantakuykunaman rin. Waynas, sipaskuna imataj yachaywasipi sajra ruwaykunaman tanqasqas kaspapis cheqa kajmanta japʼikullankupuni. Paykunaqa Jehovata munakunku, Paymantaj cheqa sonqollapuni kayta munanku. Paykuna Jehovata sirvinankupaj tukuy imata ruwashasqankupi tʼukureyqa, yanapawasunchej paykuna “creeypi qhapaj” kasqankuta reparanapaj, pisi kallpayojman rijchʼakojtinkupis (Sant. 2:5).
Maykʼajchus parlanata yachana
17 Jobta waturikoj rejkunamanta ujqa, Elihú karqa. Payqa Abrahanpa mirayninmanta karqa. Job, Elifaz, Bildad, Zofar ima parlashajtinku, Elihuqa chʼinsitumanta uyarerqa. Tawantinkuta sumajta uyarisqanrayku, Jobta khuyakuywan yuyaycharqa, yuyayninmantaj kutiricherqa (Job 33:1, 6, 17). Elihuqa Jehová Dios jatunchasqa kananta munarqa. Chayrayku mana mayqen runatapis jatuncharqachu, nitaj paypis jatunchasqa kayta maskʼarqachu (Job 32:21, 22; 37:23, 24). Elihumanta yachakunchej, uj tiempo kasqanta chʼinlla uyarinapaj (Sant. 1:19). Chantá yachakullanchejtaj, pitapis yuyaychashaspaqa Jehová Diosta jatunchananchej kasqanta, manataj noqanchejtachu.
18 Yachanchej jina, parlayta atisqanchejqa Jehová Diospa regalon. Paytaj Palabranpi yachachiwanchej, maykʼajchus imaynatatajchus parlanata. Chayta kasukuspaqa, chay regalomanta agradecekusunchej. Yachayniyoj rey Salomonqa, Dios yuyaychasqanrayku ajinata qhelqarqa: “Maychus tiempompi uj palabrata nisqaqa qolqewan tʼikanchasqa qori manzana jina”, nispa (Pro. 25:11). Sichus wajkunata sumajta uyarisun, niraj parlashaspataj allinta piensarisun chayqa, parlasqanchejqa qori manzana jina kanqa, manchay kʼachitu, may valorniyojtaj. Ajinamantataj anchata chayri pisillata parlaspapis, wajkunata kallpachanapaj jina parlasun, Jehová Diostataj kusichisun (Pro. 23:15; Efe. 4:29). Chantapis parlayta atisqanchejmanta Jehová Diosman agradecekusun.
Sumaj yachachiykunata maskʼana
Jehovaman Qayllaykullaypuni
10 Rijchʼayninchejmanta llakikuypis mana juchachu. Chaywanpis, mana machuyayta munaspa tukuy imata ruwachikoyqa mana allinchu. Machuyashasqanchejqa wiñay tukusqa, sumajpaj qhawasqa, sumaj runas ima kasqanchejta rikuchinman. Bibliapi nin: “Machuyaspa yuraj uma kayqa sumaj pillumin; chayqa tarikun cheqan ñanta purisqapi”, nispa (Pro. 16:31). Jehovaqa ajinata qhawawanchej, noqanchejpis ajinallatataj qhawakuna (1 Pedro 3:3, 4 leey). ¿Allinchu kanman allin rijchʼayniyoj kanapaj kausayninchejta wañuy pataman churaspa operachikuy chayri uj tratamientota ruway? Ima edadniyoj chayri ima rijchʼayniyoj kajtinchejpis, Diospa kusikuynin aswan sumaj, imajtinchus allinpaj qhawawanchej (Neh. 8:10). Mosoj pachallapi ni imamanta onqosunchu, waynasman, sipasmantaj tukusun (Job 33:25; Isa. 33:24). Chaykamataj, yachaywan imatapis ajllana, creeyniyojtaj kana, chayqa Jehovaj qayllallanpipuni kanapaj yanapawasun (1 Tim. 4:8).
8 AL 14 DE ENERO
BIBLIAMANTA SUMAJ YACHACHIYKUNA | JOB 34, 35
¿Yuyankichu qhasimanta sufrishasqaykita?
¿Imaynataj Dios?
Diosqa cheqan kajtapuni ruwan. Payqa ni jaykʼaj ima sajratapis ruwanchu (Job 34:10). Jehová Diosqa justiciata ni jaykʼaj qʼewinchu. Biblia paymanta nin: “Cheqan kayman jina kay pachapi kaj chhika runasta juzganqa”, nispa (Salmo 9:8). Diosqa runaj sonqonta sumajta rejsin. Chayrayku ni pi payta engañayta atinmanchu, justiciata ruwaspataj ni jaykʼaj pantanchu (1 Samuel 16:7). Diosqa yachan kay jallpʼapi mana cheqan ruwaykuna, sajra ruwaykunapiwan kasqanta. Niwanchejtaj sajra runas “kay pachamanta tʼirasqa” kanankuta (Proverbios 2:22).
¿Imataj chinkanqa Diospa Gobiernon jamojtin?
5 ¿Imatá Jehová ruwanqa? Jehovaqa runasman tiempota qoshan sajra ruwayninkuta saqenankupaj (Isa. 55:7). Kay sajra mundo tumpamantawan chinkachisqa kananta Jehová nejtinpis, niraj sajra runasta juzganchu. ¿Imataj kanqa manchay ñakʼariy tiempo chayamunankama kausayninkuta mana cambiayta munaj runasmanta? Jehovaqa chinkachinanta nin (Salmo 37:10 leey). Kay tiempopi sajra runasqa sajra ruwayninkuta pakanku, ashkha kutispitaj mana castigasqaschu kanku (Job 21:7, 9). Chaywanpis Bibliaqa nin: “Diosqa sumajta qhawan imaynatachus runa thaskisqanta, rejsintaj ima rijchʼajtachus purisqanta. Mana kanchu laqha, chay jina tuti laqha, chaypi millayta ruwaj sajra runa pakakunampajqa”, nispa (Job 34:21, 22). Jehovamantaqa mana imatapis pakayta atisunmanchu. Payqa sajra runaspa tukuy ima ruwasqankuta qhawamushan. Armagedón pasayta may jinata maskʼaspapis, manaña sajra runasta tarisunchu. Imaraykuchus wiñaypaj chinkachisqas kanqanku (Sal. 37:12-15).
Ama Jesusmanta karunchakunachu
19 Kay tiempopipis runasqa, Jesuspa tiemponpi jinallataj yuyanku. Kay tiempomanta ashkha runasqa, mana politicaman chhapukusqanchejrayku Diosmanta willasqanchejta mana uyariyta munawanchejchu. Paykunaqa eleccionespi pillapajpis votananchejtapuni munanku. Jinapis noqanchejqa sutʼita yachanchej uj runata kamachinawanchejpaj ajllakuspaqa, Jehová Diosta qhesachashasqanchejta (1 Sam. 8:4-7). Runasqa mayta munanku escuelasta, hospitalesta ruwachinanchejta, chayri imaynallamantapis runasta yanapananchejta. Jinapis noqanchejqa kausayninchejpi predicacionta ñaupajman churanchej, manataj kay mundomanta problemasta allinchaytachu. Chayrayku ashkha runasqa, mana Diosmanta willasqanchejta uyariyta munankuchu.
20 ¿Imatá ruwasunman mana Jesusmanta karunchakunapaj? (Mateo 7:21-23 leey). Noqanchejqa, Jesús imatachus kamachiwasqanchejtapuni kausayninchejpi ñaupajta juntʼayta munanchej (Mat. 28:19, 20). Ama saqenachu kay mundomanta políticos umanchejta muyuchinawanchejta. Nillataj kay mundomanta chʼajwasta allinchayta munaspa umanchejta muyuchikunachu. Noqanchejqa mayta runa masisninchejta munakunchej, problemasniyoj kasqankumantataj llakikunchej. Jinapis paykunataqa mayta yanapasunman Diospa Gobiernonmanta yachachispa, Jehová Diosman qayllaykunankupaj yanapaspa ima.
Sumaj yachachiykunata maskʼana
Jehovata jatunchana tukuy sonqo llankʼaspa
3 Joven Elihuqa imatachus Jobwan chay kinsa runaswan parlarisqankuta uyarisharqa. Parlayta tukojtinkutaj Elihuqa Jehovamanta Jobta tapurerqa: “Sichus imatapis allinta ruwanki chayqa, imatataj qonki paymanri? Paypajqa ni ima allintapis ruwashankichu”, nispa (Job 35:7). ¿Elihupis nisharqachu Diosta sirvinapaj kallpachakusqanchej qhasilla kasqanta? Mana. Jehovaqa mana chay kinsa runasta jinachu Elihuta kʼamerqa. Elihuqa nisharqa Jehová tukuy imayoj kasqanrayku yupaychananchejta mana necesitasqanta. Ni imata ruwayta atisunmanchu Jehová qhapaj kananpaj, aswan atiyniyoj kananpaj ima. Ima kʼacha kaypis, imata ruwayta atisqanchejpis Paymanta jamun. Paytaj imaynatachus chaykunata apaykachasqanchejta qhawamushan.
15 AL 21 DE ENERO
BIBLIAMANTA SUMAJ YACHACHIYKUNA | JOB 36, 37
¿Imaraykutaj atienekusunman Jehová wiñay kausayta qonawanchejpi?
¿Diosta rejsiyta atisunmanchu?
WIÑAYPAJ KASQANTA. Bibliaqa yachachiwanchej Dios “wiñaymanta wiñaykama” kasqanta (Salmo 90:2). Payqa mana qallariyniyojchu, nitaj tukukuyniyojchu, wiñaypajtaj kausanqa. Chayrayku “noqanchejqa mana chayta entiendeyta atisunmanchu, nitaj watasnintapis yupayta atisunmanchu” (Job 36:26).
¿Imaraykú yachana tiyan? Diosqa niwanchej payta allinta rejsejtinchej wiñaypaj kausananchejta (Juan 17:3). Dios mana wiñaypajchu kausanman chayqa chay niwasqanchej qhasilla kanman. Chaytaqa “Wiñay Rey[lla]” juntʼanman (1 Timoteo 1:17).
Diosman agradecekuna tukuy imata qowasqanchejmanta
6 Yakoqa kapuwanchej jallpʼanchej intimanta mana ancha karupichu, nitaj ancha qayllapichu kasqanrayku. Jallpʼanchej intimanta tumpitawan qayllapi kanman chayqa, yakoqa tʼimpuspa wawsirpapunman. Jallpʼataj chʼakipacha kanman, nitaj kausay kanmanchu. Jallpʼanchej intimanta tumpitawan karupi kanman chaytaj, tukuynin yaku chhullunkapunman. Jallpʼapitaj ritʼiwan chhullunkallawan juntʼa kanman. Jehová Dios jallpʼata maychus kananman churasqanrayku, yakoqa jallpʼamanta mana tukukapunchu, kausaytaj kallanpuni. Inteqa qochasmanta, mayusmanta yakusta wawsichin, chaytaj phuyusman tukun. Inteqa sapa wata millones millones litros yakusta wawsichin. Chay wawsitaj chunka diata jina cielopi qhepakun, chaymantataj watejmanta urmamun. Chaynejta parapis ritʼipis kan. Chantá chay yakusqa, qochasman, mayusman kutirinku watejmanta jamunankupaj. Jehová Diosqa yakusta ajinata ruwarqa, jallpʼanchejpi yaku kanallanpajpuni. Chaytaj rikuchiwanchej, Jehová Diosninchej may atiyniyoj, yachayniyojtaj kasqanta (Job 36:27, 28; Ecl. 1:7).
Suyakuyninchejta astawan sinchʼiyachina
16 Wiñay kausayta suyakusqanchejqa Jehová Diosmanta uj sumaj regalo. Maytapuni suyakushanchej chay allin kausay kanallantaña, nitaj iskayrayanchejchu juntʼakunanmanta. Suyakuyninchejqa barco sayachina gancho jina, imajtinchus pruebaspi kashajtinchej, qhatiykachasqa kashajtinchej, wañuy patapi kashajtinchejpis sinchʼita sayachiwanchej. Chantapis suyakuyninchejqa montera jina, imajtinchus yuyayninchejta jarkʼan, yanapawanchejtaj sajra kajta qhesachanapaj, allin kajmantataj chʼipakunapaj. Biblia suyakuyta qowasqanchejqa astawan Diosman qayllaykuchiwanchej, mayta munakuwasqanchejtataj rikuchiwanchej. Suyakuyninchejta sinchʼillatapuni japʼeyqa, may sumaj noqanchejpaj.
Sumaj yachachiykunata maskʼana
it-1-S pág. 519
¿Imaynatá willanakoj kanku?
Ñaupa tiempopeqa ashkha imaynasmanta imatapis willanakoj kanku. Uj lugarmanta noticiasta chayri waj lugarmanta noticiasta, parlaspapuni willanakoj kanku (2Sa 3:17, 19; Job 37:20). Viajajkunaqa imachus karu lugarespi pasasqanta, uj llajtapi samarikushaspa willaj kanku, chayri ashkha viajajkuna mikhunata, yakuta, waj imastapis conseguinankupaj sayaj kanku chaypipis willanarikullajtaj kanku. Asiamanta, Africamanta, Europamanta viajajkunaqa Palestinantapuni pasaj kanku. Chayrayku chaypi tiyakojkunaqa, imachus waj suyuspi pasasqanta yachayta atillaj kanku. Chay suyumanta noticiasta, waj suyumanta noticiastapis llajtaspa mercado plazasninkupi willaj kanku.
22 AL 28 DE ENERO
BIBLIAMANTA SUMAJ YACHACHIYKUNA | JOB 38, 39
¿Tiempochakunchejchu Diospa ruwasqasninta qhawarinapaj?
Jehovapi pacienciawan suyakuna
7 Jehová imaynatachus Jallpʼata ruwasqanmanta Bibliaqa nin “medidasninta churasqanta”, “ima patapichus” sayachisqanta, “cimiento esquina jatun rumita” churasqanta ima (Job 38:5-7). Chantapis Diosqa ruwasqasninpi sumajta piensarejpuni (Gén. 1:10, 12). Angelesqa Jehovata sapa kuti mosoj imata ruwajta rikuspa, maytachá kusikorqanku (Job 38:6, 7). ¿Imatá Jehovamanta yachakunchej? Jehovaqa Jallpʼata, estrellasta, sachʼasta, animalesta, runata ima may chhika wataspi ruwasqanta. Ruwasqasninta qhawarispataj Diosqa “rikorqa tukuy ima ruwasqanqa sumajpuni kasqanta” (Gén. 1:31).
Wañusqas kausarimunanku, ¿imatá Diosmanta yachachiwanchej?
2 Jehová Diosqa Wawan Jesustaraj ñaupajta ruwarqa. Chaymantataj “tukuy ima paynejta ruwasqa karqa”. Tukuy ima nispaqa, may chhika angelesmantawan parlashanchej (Col. 1:16). Jesusqa Yanapaj Maestro jina karqa. Tatanwan khuska llankʼaspataj, mayta kusikorqa (Pro. 8:30). Paywan Jehová Dioswanqa, cielotawan jallpʼatawan ruwarqanku. Angelestaj chayta rikuspa, mayta kusikorqanku. Chayrayku kay jallpʼa ruwasqa kasqantawan, Jehová Diosta jatuncharqanku. Jinapis Jehová Diosqa mana jallpʼallatachu ruwarqa. Payqa chaypi tukuy ima kajtawan ruwarqa, jinallataj runastapis. Angelestaj tukuy chay imasta rikuspa, Jehová Diosta maytachá jatuncharqanku (Job 38:7; Pro. 8:31). Jehová Diosqa tukuy ima ruwasqanpi munakuyniyoj, yachayniyojtaj kasqanta rikuchiwanchej (Sal. 104:24; Rom. 1:20).
Jehovata ruwasqasninnejta aswan sumajta rejsina
8 Jehovaqa atienekunapaj jina. Payqa Jobwan parlashaspa yanaparqa paypi astawan atienekunanpaj (Job 32:2; 40:6-8). Jehovaqa payman ashkha ruwasqasninmanta parlarqa, chaykunamanta wakin karqanku estrellas, phuyus, rayos ima. Animalesmantapis parlallarqataj, chaykunamanta wakin karqanku kʼita toro, caballo ima (Job 38:32-35; 39:9, 19, 20). Tukuy chaytaj Jobta yanaparqa mana Jehová may atiyniyoj kasqanta reparanallanpajchu, manaqa munakuyniyoj, may yachayniyoj kasqanta reparananpajpis. Jehová Jobwan parlarisqanqa payta yanaparqa ni jaykʼaj jina astawan Jehovapi atienekunanpaj (Job 42:1-6). Noqanchejpis Jehovaj ruwasqasninmanta yachakuspaqa, yuyarikunchej payqa noqanchejmanta nisqa may yachayniyoj, may atiyniyojtaj kasqanta. Chantapis tukuy problemasninchejta chinkachiyta atin, chinkachenqapunitaj. Chaypi piensariytaj paypi astawan atienekunapaj yanapawanchej.
Sumaj yachachiykunata maskʼana
it-2-S pág. 199
Leyesta Churaj
Jehovaqa Leyesta Churaj Dios. Mana pipis kanchu Jehová jina leyesta sumajta churajqa. Tukuy ima ruwasqanpaj, animalespajpis Jehová kamachiykunata jina churarqa (Job 38:4-38; Sl 104:5-19; Job 39:1-30). Runapis Jehovaj ruwasqallantaj kasqanrayku chay kamachiykunata respetanan tiyan. Runaqa yuyayniyoj kanchej, reparaytataj atinchej imachus allin, imatajchus mana allin kasqanta, reparayta atillanchejtaj Diosta yupaychayta atisqanchejta. Chayrayku llimphu kausayniyoj kanamanta kamachiykunatapis kasukunallanchejtaj tiyan (Ro 12:1; 1Co 2:14-16). Chantapis Jehovaqa angelespajpis kamachiykunata churapullantaj (Sl 103:20; 2Pe 2:4, 11).
Tukuy imapaj Jehová kamachiykunata churasqantaqa mana pʼakiyta atisunmanchu (Jer 33:20, 21). Tukuy imapaj kamachiykunata jina churasqanqa maychus kajpuni kanku, atienekunapaj jinataj. Chayrayku cientificosqa chay leyesmanta valekuspa calculayta atinku mashkhatachus killa, planetas, waj imaspis kuyusqankuta. Calculasqankutaj casi maychus kajsitupuni kashan. Chay leyesta pʼakejkunaqa chay rato reparanku mana pʼakinapaj jinachu kasqanta. Llimphu kausayniyoj kanamanta kamachiykunasninwanpis ajinallataj. Mana pʼakiyta atisunmanchu, pʼakejtinchejqa sufrisunpuni. Ichapis wakin kuti castigotaqa mana chay ratopunichu japʼisun. Chaywanpis chay kamachiykunataqa necesitanchejpuni, imaynatachus tukuy imapaj kamachiykunata churasqantapis necesitanchej ajinata. “Ni pipis Diosmanta burlakuyta atinchu. Runaqa imatachá tarpun, chayllatataj oqharenqa” (Gál 6:7; 1Ti 5:24).
29 DE ENERO AL 4 DE FEBRERO
BIBLIAMANTA SUMAJ YACHACHIYKUNA | JOB 40–42
¿Imatá Jobmanta yachakunchej?
w10 15/10 págs. 3, 4 párrs. 4-6
‘¿Pitaj Jehovaj yuyayninta rejsin?’
4 Jehovaj ruwasqasninpi tʼukurispaqa, mana yuyasqanchejman jinallachu juzgananchej tiyan. Diosqa, Salmo 50:21 pʼitipi chaymanta nin: “Yuyarqanki noqaqa qan jina kasqayta”, nispa. Chantapis 175 watas ñaupajta, Bibliata ukhunchaj runa nerqa: “Runasqa, leyesta ruwasqankuman jinalla, imatachus allinpaj qhawasqankuman jinallataj Diosta juzganku. Leyesta churasqankupis paykunapaj, Diospaj ima, kasqanta yuyanku”, nispa.
5 Imatachus Diosmanta yuyasqanchejqa, mana munasqanchejman jinallachu, nitaj yuyasqanchejman jinallachu kanan tiyan. ¿Imarayku? Juchasapa kasqanchejrayku, mana tukuy imatachu yachayta atisqanchejrayku ima, Bibliata ukhunchaspaqa, Jehovaj wakin ruwasqasnin mana allinchu kasqanta yuyasunman. Israelitasqa, Jehová mana allintachu ruwasqanta yuyaspa pantarqanku. Chayrayku, Jehová paykunaman nerqa: “Qankunarí niwankichej: Tata Diospa ruwasqanqa mana cheqanchu, nispa. Israel ayllu, uyariway kunanqa: Manachu cheqanta ruwashani? Qankunaj ruwasqasniykichejmari mana cheqanchu”, nispa (Eze. 18:25).
6 Jehovata, runas kamachiykunata churasqankuman jinalla mana juzganapajqa, mana tukuy imatachu yachayta atisqanchejta, wakin kuti pantasqata yuyasqanchejta ima, reparakuna tiyan. Jobpis, chayta reparakunan karqa. Imajtinchus, ñakʼariykunapi rikukuspa nanaynillanpi yuyarqa, aswan allin ruwaykunamantataj qonqaporqa. Chaywanpis Jehovaqa, munakuywan sumajta sutʼincharqa. Jobqa, Jehová 70 kutista tapojtin, mana kutichiyta aterqachu, ajinamanta Jehovaqa, mana tukuy imatachu yachasqanta reparacherqa. Jobtaj yuyasqanta llampʼu sonqowan cheqanyacherqa (Job 42:1-6, ñawiriy).
Jehovalla sumaj kamachej kasqanta ama qonqanachu
12 ¿May jatun llakiypi kashajtinchu Jehová Jobta kʼamerqa? Mana, ni Jobpis ajinatachu yuyarqa. Astawanqa chay jina jatun llakiypi kashaspa Job reparakorqa mana allintachu yuyashasqanta, chayraykutaj nerqa: “Kunanqa chay nisqaymanta pʼenqakuni, qanmantaj kutirikamuyki jallpʼa patapi, ushpha patapi ima tiyaspa”, nispa. Jehová Jobman imatachus nisqanqa kallpachananpaj, sonqochananpaj ima karqa (Job 42:1-6). Niraj Jehová Jobta yuyaycharishajtin, uj jovenpis Eliú sutiyoj Jobta yuyaycharerqa (Job 32:5-10). Jobqa chay yuyaychasqanta allinta japʼikorqa, chayrayku Jehovaqa Jobta allinpaj qhawarqa (Job 42:7, 8).
“Jehová Diospipuni atienekuy”
17 Mana Jobllachu llakiypi kaspa sinchʼita sayarqa, aguantarqataj. Apóstol Pabloqa hebreosman cartanpi wajkunamantawan parlarqa, nerqataj: ‘May chhika testigoswan muyurisqa kashanchej, jatun phuyuwan jinapuni’, nispa (Heb. 12:1). Paykunaqa sinchʼi pruebaspi kaspapis Jehovamanta mana karunchakorqankuchu (Heb. 11:36-40). Ajina sinchʼita sayasqankutaj mana qhasipajchu karqa. Paykunaqa kausashaspa mana Jehovaj nisqasninta tukuyninta juntʼakojta rikorqankuchu. Jinapis Jehovapi atienekullarqankupuni. Paykunaqa sutʼita yacharqanku Jehovaj ñaupaqenpi allinpaj qhawasqa kasqankuta. Chayrayku mana iskayrayarqankuchu Jehovaj tukuynin nisqasninta juntʼakojta rikunankumanta (Heb. 11:4, 5). Paykunaj kausayninkoqa yanapawanchej Jehovapi atienekunallapajpuni.
18 Kay mundomanta runasqa astawan sajrayapushanku (2 Tim. 3:13). Satanasqa Diospa kamachisninta pruebaman churashallanpuni. Ima pruebaspi rikukunanchej kajtinpis, tukuy sonqo Jehovata sirvinallapuni, “kausaj Diospi atienekusqanchejrayku” (1 Tim. 4:10). Jehová Jobta yanapasqanpi reparanchej, payqa manchay munakuyniyoj, khuyakuyniyojtaj kasqanta (Sant. 5:11). Noqanchejpis ama Jehovamanta karunchakunachu. Yachanchej Jehovaqa ‘sonqo kʼajaywan payta maskʼajkunata tʼinkasqanta’ (Hebreos 11:6 leey).
Sumaj yachachiykunata maskʼana
it-1-S pág. 377 párr. 5
Burlakuy
Jobqa Jehovaj ñaupaqenpi mana juchayojllapuni karqa paymanta mayta burlakojtinkupis. Jinapis pantasqata yuyasqanrayku uj imapi pantaykorqa, chaymantataj cheqanchasqa karqa. Elihú payta nerqa: “Mana pipis Job jinaqa asipayasqachu karqa. Jobqa paymanta burlakusqankuta yakuta jina ujyashan”, nispa (Job 34:7). Jobqa paypuni razonniyoj kasqanta rikuchiyta munarqa. Chayrayku Dios cheqan kajta ruwashasqanta rikuchinanmantaqa, pay cheqan kajta ruwashasqanta rikuchiyta munarqa (Job 35:2; 36:24). Payqa yuyarqa “amigosnenqa” paymanta burlakushasqankuta, manataj Diosmantachu. Paymantapuni burlakushasqankuta yuyasqanqa chaywan gustachikushanmanpis jina karqa, imaynatachus yakuta tomaywan gustachikunchej ajinata. Aswan qhepaman, ñapis tukukuypiña Diosqa sutʼincharqa chay burlakojkunaqa paymanta llullasta parlashasqankuta, mana Jobmantachu (Job 42:7). Chayman rijchʼakojllatataj Israel uj reyta mañakojtin, Jehovaqa profeta Samuelman nerqa: “Mana qantachu qhesachashasunku, manachayqa noqata. Mana munankuchu noqa reyninku kanayta”, nispa (1Sa 8:7). Jesustaj discipulosninman nerqa: “Sutiyraykutaj [mana qankunaraykuchu] tukuy naciones chejnisonqachej”, nispa (Mt 24:9). Chayta yuyarikoyqa cristianosta yanapan pipis burlakojtin, allin yuyaywan aguantanankupaj, aguantasqankuraykutaj tʼinkata japʼinankupaj (Lu 6:22, 23).
5 AL 11 DE FEBRERO
BIBLIAMANTA SUMAJ YACHACHIYKUNA | SALMO 1–4
Diospa Gobiernonta apoyana
“Tukuy nacionesta kharkatichisaj”
8 ¿Imatá runas ruwanku Diospa kamachisnin sumaj willaykunata willajtinku? Ashkha runasqa chay willayta uyarispa phiñarikunku (Salmo 2:1-3 leey). Nacionesqa oqharikushanku. Paykunaqa Jehovaj churasqan reyta qhesachanku. Runasqa ninku Diospa Gobiernonmanta willasqanchej mana sumaj willaykunachu kasqanta. Wakin gobiernosqa ni predicajtapis saqewanchejchu. Paykunamanta ashkhastaj Diosta sirvisqankuta ninku, jinapis paykunallapuni kamachiyta munanku. Jesuspa tiemponpeqa autoridades payman churanakorqanku. Kay tiempomanta autoridadespis Diospa kamachisninta qhatiykachaspa Cristoj contranpi oqharikushanku (Hech. 4:25-28).
Kay pachaj imasninman mana satʼikunachu
11 Qolqeta jatunpaj qhawajtinchej. Qolqenchejta, kapuyninchejta ima, jatunpaj qhawanchej chayqa, ichá cheqa sonqos kayta mana atillasunchu. Sutʼincharinapaj, 1970 wata chaynejpi Malauipi ashkha hermanos kapuyninkuta saqerqanku, uj partido politicoman mana ujchakusqankurayku. Wakin hermanostajrí kapuyninkuta mana saqeyta munarqankuchu. Chaymanta yuyarikuspa, Ruth sutiyoj hermana nin: “Wakin hermanos noqaykuwan jarkʼakuna lugaresman ayqespapis, politicaman satʼikuspa wasinkuman kuterqanku”, nispa. Jinapis chay lugarmanta ashkha hermanos cheqa sonqosllapuni karqanku, pisi qolqeyoj kananku kajtinpis, kapuyninkuta chinkachinanku kajtinpis (Heb. 10:34).
Sumaj yachachiykunata maskʼana
it-2-S págs. 1085, 1086
Tʼuna paja
Chayqa kashan granojta trigojta chayri waj imaspata qaritan chayri pajan. Chaytaj trillaspa wayrachejtinku llojsin. Bibliaqa chayta astawan oqharin uj kikinchayta jinalla, jinapis chaypi reparanchej imaynatachus ñaupaj tiempopi trillasqankuta. Granota chayri trigota oqharisqankutawanqa, pajanqa manaña paykunapaj sirvejñachu, chayta mana mikhuyta atisqankurayku. Chayrayku “tʼuna paja” palabrastaqa oqharikun imapis mana valorniyoj kasqanta ninapaj, pisipaj qhawasqa kasqanta ninapaj ima, allin kajmanta tʼaqaspa wijchʼunapaj.
Ñaupajtaqa trillajraj kanku granomanta qaritan llojsipunanpaj. Chaymantataj wayrachej kanku, chaypitaj wayraqa tʼuna pajata polvota jina apakapoj, granotaj erapi qhepakoj (WAYRACHIY nisqata leeriy). Chaywan kikinchaspa sutʼita reparanchej, contranpi oqharikojkunata imaynatachus Jehová llajtanmanta orqhosqanta, sajra runasta, contranpi oqharikoj nacionestapis imaynatachus chinkachinanta (Job 21:18; Sl 1:4; 35:5; Isa 17:13; 29:5; 41:15; Os 13:3). Diospa Gobiernonqa enemigosninta tʼunata ruwanqa, wayrataj tʼuna pajata jina tukuyninta apakaponqa (Da 2:35).
Manaña sirvej tʼuna pajataqa tantaykuspa ruphaykuchej kanku. Ajinamanta manaña wayra apamuspa watejmanta granowan chajruykunanpaj. Juan Bautistaqa nerqa llulla religionespi kaj sajra runaswan chayman rijchʼakojllataj pasananta. Trillajqa, nisunman Jesucristoqa trigota pirwanman jallchʼanqa, “pajatataj mana wañoj ninawan kanaykonqa” (Mt 3:7-12; Lu 3:17; TRILLAY nisqata leeriy).
12 AL 18 DE FEBRERO
BIBLIAMANTA SUMAJ YACHACHIYKUNA | SALMO 5–7
Wajkuna imata ruwajtinkupis Jehovata sirvinallapuni
Bibliaqa llakiykunata aguantanapaj kallpachawanchej
7 ¿Mayqen amigonchejpis chayri familianchejpis sonqonchejta nanachiwarqanchejchu? Jina kajtin, rey Davidpa kausaynin mayta yanapawasunman. Paytaqa wawan Absalón wasancharqa, gobiernontataj qhechuyta munarqa (2 Sam. 15:5-14, 31; 18:6-14).
8 Ñaupaj kaj, Diosmanta mañakuna. Davidpa kausayninmanta leerishaspa, Jehovaman sutʼita willakuna wajkuna sonqonchejta nanachiwasqanchejrayku imaynachus kashasqanchejta (Sal. 6:6-9). Chantá chay llakiyta aguantanapaj, ima yuyaychayllatapis tarinapaj yanapanawanchejta mañakuna.
Bibliaj yachachiykunasninpi sinchʼita creenallapuni
3 Ichapis cheqa cristianos munanakusqankurayku, noqanchejpis testigoman tukorqanchej. Jinapis mana chayraykullachu Diosta sirvinanchej tiyan. Jina kanman chayqa, uj hermano, uj anciano chayri uj precursor jatun juchapi urmajtin, noqanchejpis urmasunman. Jinallataj kanman chay hermanos sonqonchejta nanachiwajtinchej. Chantapis mayqen hermanopis, Diosta wasanchaspa “testigosqa falsos kanku” niwasunman chayqa, ichapis niña Jehová Diosta sirvisunmanchu. Chayrayku Diospa llajtanpipuni kasqanchejmanta mana iskayrayanapajqa, creeyninchej sinchʼi kanan tiyan. Jinapis waj runasraykulla Diospi creesun chayqa, creeyninchejqa mana sinchʼichu kanqa. Jehová Diosta, hermanostapis munakoyqa, creeyniyoj kanapaj yanapawanchej. Jinapis creeyninchej sinchʼi kananpajqa, mana chayllatachu ruwana tiyan. Astawanpis Bibliata sumajta estudiana, entiendenataj. Chantapis chay yachakusqanchej cheqapuni kasqanta reparana (Rom. 12:2).
4 Jesús nerqa wakin runas Diospa palabranta “kusiywan” japʼikuspapis, llakiykunapi kaspa urmanankuta (Mateo 13:3-6, 20, 21 leey). Ichapis wakenqa mana entiendenkuchu, Jesuspa yachachisqasnin llakiykunasniyoj kanankuta (Mat. 16:24). Chayrí piensarqanku, testigos kaspa ni ima llakiyniyoj kanankuta. Manachayrí piensarqanku, Jehová Dios tukuy problemasninkuta chinkachinanta. Jinapis kay sajra mundopi kausakusqanchejrayku, llakiykunaqa kapuwasunpuni. Chantapis kausayninchejpi imapis kanqapuni. Chayrayku mana tukuy tiempochu kusisqa kasun (Sal. 6:6; Ecl. 9:11).
Sumaj yachachiykunata maskʼana
it-2-S pág. 1005
Sepultura
Romanos 3:13 versiculopi apóstol Pabloqa Salmo 5:9 versiculopi nisqanman jina nerqa, engañaj sajra runaspa “tonqorinkoqa sepultura jina kicharisqa” kasqanta. Sepulturamanqa wañusqaspa cuerponku juntʼaykun, chaypitaj ismunku. Ajinallataj sajra runaspa tonqorinku kicharikojtin, parlasqankoqa wañuchinapaj jina, ismusqa jinataj (Mateo 15:18-20, kikinchay).
19 AL 25 DE FEBRERO
BIBLIAMANTA SUMAJ YACHACHIYKUNA | SALMO 8–10
‘Jehová Diosníy, jatunchasqayki’
Jehovaj familianmanta kasqanchejta jatunpaj qhawana
6 Jehovaqa Jallpʼata wakichipuwarqanchej. Jehovaqa niraj runata ruwashaspa Jallpʼataraj sumajta wakicherqa chaypi tiyakunankupaj (Job 38:4-7; Jer. 10:12). Kʼacha Tatanchej Jehovaqa kay Jallpʼata tukuy imayojta ruwapuwarqanchej kusisqa tiyakunanchejpaj (Sal. 104:14, 15, 24). Payqa sapa kuti piensarejpuni imastachus ruwasqanpi, repararqataj ‘sumaj kasqanta’ (Gén. 1:10, 12, 31). Chantapis Diosqa, runasta may valorniyojpaj qhawasqanrayku, Jallpʼapi tukuy ima ruwasqanta qhawanankupaj churarqa (Sal. 8:6). Diosqa munan cheqan runas wiñaypaj kusisqa kananchejta, tukuy ima ruwasqantataj cuidananchejta. Allin kanman chaymanta sapa kuti Jehovaman agradecekunanchej.
Diosman agradecekuna tukuy imata qowasqanchejmanta
10 ¿Imatá ruwasunman parlayta atisqanchejmanta Jehová Diosman agradecekunapaj? Kausay jinallamanta rikhurisqanpi creejkunawan parlarisunman. Paykunaman willarisunman, imaraykuchus Dios tukuy imata ruwasqanpi creesqanchejta (Sal. 9:1; 1 Ped. 3:15). Chay runasqa ninku kay jallpʼa, plantas, animales, runaspis, jinallamanta rikhurisqankuta. Chaytataj creechiyta munawanchej. Noqanchejrí uyariyta munajkunaman, Jehová Diospuni jallpʼatapis cielotapis ruwasqanta sutʼinchasunman. Chaypajtaj Bibliawan, kay yachaqanapi imatachus yachakusqanchejwan ima yanapachikusunman (Sal. 102:25; Isa. 40:25, 26).
Wajkuna yachakunankupaj jina parlana
13 Tukuy sonqo takirina. Reunionespeqa Jehovata jatunchananchejpaj takinchej. Hermana Saramanta parlarina. Payqa yuyan mana sumajta takisqanta. Jinapis takispa Jehovata jatunchayta munan. Chayrayku reunionespaj wakichikushaspaqa, takiykunatapis wakichikullantaj. Payqa takiykunata ensayan, sumajtataj letranta kikincharin imatachus reunionespi parlakunanwan. Pay nin: “Ajinata wakichikusqayqa yanapawan imamantachus chay takiy parlashasqanpi piensarinaypaj, nitaj imaynatachus takisqaypichu”, nispa.
Sumaj yachachiykunata maskʼana
it-1-S pág. 649
Dedo, I
Bibliaqa nin Diosqa pʼalta rumispi Chunka Kamachiykuna dedonwan qhelqasqanta (Éx 31:18; Dt 9:10), dedollanwantaj milagrosta ruwasqanta (Éx 8:18, 19, sutʼinchaynin), cielotapis ruwasqanta (Sl 8:3, sutʼinchaynin). Génesis libropi Dios tukuy imata ruwasqanmanta parlashasqanpi reparanchej, “dedo”·nispaqa Diospa espíritu santonmanta parlashasqanta, nisunman atiyninmanta. Chaypeqa nin Diospa atiynin (rú·aj, “espiritun”) yaku patapi kayman jaqayman kuyuykachashasqanta (Gé 1:2). Griego Qhelqasqastaj sutʼita rikuchiwanchej chayqa ajinapuni kasqanta. Mateo nin Jesusqa “Diospa espiritunwan” supaykunata qharqosqanta. Lucastaj nin “Diospa dedonwan” supaykunata qharqosqanta (Mt 12:28; Lu 11:20, sutʼinchaynin).
26 DE FEBRERO AL 3 DE MARZO
BIBLIAMANTA SUMAJ YACHACHIYKUNA | SALMO 11–15
Paraisopi sumaj kausay kananpi tʼukurina
w06-S 15/5 pág. 18 párr. 3
Puntos sobresalientes del libro primero de los Salmos
11:3. ¿Qué fundamentos están demolidos? Son los fundamentos en los que se basa la sociedad humana: la ley, el orden y la justicia. Cuando estos se corrompen, reina el desorden social y desaparece la justicia. En semejantes condiciones, “[todo el] que sea justo” debe confiar plenamente en Dios (Salmo 11:4-7).
¿Sajra ruwaykuna chinkanmanchu?
Bibliaqa nin tumpamantawan Dios kay Jallpʼamanta sajra ruwaykunata chinkachinanta. Arí, kay sajra pachata, “mana cheqan kajman jina kawsaj runasta” ima Jehová juicio pʼunchayninpi chinkachenqa (2 Pedro 3:5-7). Ni pi, runasta ñakʼarichenqañachu. Jinapis, ¿imaynatá yachasunman Dios sajra kausayta chinkachinanta?
Bibliaqa nin Jehová mayta chejnikusqanta “sajra ruwajta” (Salmo 11:5). Diosninchejqa munan, sonqo tiyasqa, cheqan kajman jinataj kausakunanchejta (Salmo 33:5; 37:28). Chaytaj rikuchin Diosqa sajra ruwaykunata mana wiñaypajchu saqenanta.
Pacienciawan Jehovapi suyakunachej
15 Davidqa 13 Salmopi Jehová Diosta tawa kutitapuni taporqa maykʼajkamachus llakiykunasnin kananta. Chantá pacienciawan Diospi suyakorqa. ¿Imarayku? Imaraykuchus Davidqa Jehová Dios mana saqerparinanpi atienekorqa. May kusisqataj suyakorqa Jehová uj pʼunchay llakiykunasninta tukuchinanta. Chayrayku David nerqa: “Noqarí munakuyniykipi atienekuni, sonqoytaj kusikun, imaraykuchus qan salvawanki. Tata Diosman takisaj allinta ruwawasqanmanta”, nispa (Sal. 13:5, 6). Chantapis Davidqa tʼukurerqa imaynatachus ñaupajpi, llakiypi kashajtin Jehová yanapasqanta. Jehová Diospi suyakusqanqa mana qhasipajchu karqa.
Diosqa Reinonnejta munayninta Jallpʼapi juntʼan
16 Mana manchachikuy kanqachu. Isaías 11:6-9 versiculospi nisqanqa chaypachamá tukuynin juntʼakonqa. Qharis, warmis, wawas ima, maypipis kashaspa mana manchachikusunchu, ni animalesta nitaj runastapis. Mayman rispapis wasinchejpi jina kasun. Mayuspi, qochaspi, mama qochaspi ima waytʼayta atisun; lomasta, qʼomer pampastataj puriyta atisun. Tutayajtintaj, ni ima manchachiwasunchu. Ezequiel 34:25 versiculospi nisqanman jina, Diospa kamachisnenqa “chʼin pampaspi tiyak[onqanku], jinallataj orqospipis puñuk[onqanku]”.
Sumaj yachachiykunata maskʼana
¿Mosojyachisqañachu kanchej?
12 Kunanpis Pabloj tiemponpi jina, sajra runas chaupillapitaj kausakushanchej. Kay pacha runasqa ichapis kamachiykunata chayri yuyaychaykunata kasukuy, ñaupa runasllapaj kasqanta yuyankuman. Yachachejkunapis tataspis, wawasta munasqankuman jina ruwajta saqellanku. Chantapis imapunichus allin, imatajchus mana allin kasqanta ni pi yachasqanta ninku, chayraykutaj sapa uj imatapis ajllakunan kasqanta. Religionniyoj kajkunapis kikillantataj yuyanku, nitaj Diospa kamachiykunasnintaqa kasunkuchu (Sal. 14:1). Cristianospis chay chaupipi kausakuspaqa kikinta yuyayta qallarisunman. Mana allinta qhawarikojtinchejtaj qotuchakuypi nikusqanta ni kasukuyta munasunmanchu, mana allinchu rijchʼawajtinchejtaj thutuyta qallarisunman. Chayri Biblia imatachus kusirikuymanta, Internetmanta, kay pachapi jatun yachayta maskʼaymanta ima yuyaychasqantapis, mana kasukuyta munasunmanchu.