Rusia Ucraniaman yaykuykun

24 de febrero de 2022 paqarinpi, Rusiamanta soldados Ucraniaman yaykuykorqanku. Waj suyusmanta gobiernos mana guerra kananpaj tukuy imata ruwasqankoqa qhasilla karqa. Kay guerra qallarisqanrayku, ¿imataj mundontinpi kanqa? Naciones Unidas nisqamanta secretario general António Guterres pasaj diasllapi nerqa: “Mana yachanchejrajchu kay guerra may chhika runastachus sufrichinanta, nitaj imastachus chinkachinantapis. Chantapis mana yachanchejrajchu kay guerra kasqanrayku Europapi, chantá mundontinpi may jina mancharisqaschus runas kanankuta”, nispa.

¿Kay imas pasananmanta Biblia parlarqañachu?

• Jesucristoqa qhepa pʼunchaykunamanta parlaspa nerqa: “Uj nacionqa waj nacionwan maqanakonqa, uj gobiernopis waj gobiernowan maqanakonqa”, nispa (Mateo 24:7). Kay tiempopeqa Jesuspa nisqan juntʼakushan, chayrayku guerras tiyan. Chaymanta astawan yachanaykipaj “¿Ima señaltaj rikuchin ‘qhepa pʼunchaykunapi’ kausashasqanchejta?” nisqa yachaqanata leeriy.

• Bibliapi Apocalipsis libroqa, guerrata uj puka caballopi lloqʼasqa kajwan kikinchan, chay lloqʼasqa kajtaj ‘jallpʼamanta allin kausayta chinkachin’ (Apocalipsis 6:4). Kay tiempopi guerras kasqan chay profeciaman jina kasqanta yachakunaykipaj, “¿Ima niyta munan tawa caballospi lloqʼasqa kajkuna?” nisqa yachaqanata leeriy.

• Daniel libroqa parlan ‘norte ladomanta reywan’ “sur ladomanta reywan” japʼinakunankumanta (Daniel 11:25-45). Chaymanta astawan yachanaykipaj Daniel capítulo 11 juntʼakusqan nisqa videota qhawariy. Chaypi yachakunki imaraykuchus Rusia, paywan ujchasqa naciones ima norte ladomanta reywan ninakusqankuta.a

• Apocalipsis libroqa parlallantaj “Tukuy Atiyniyoj Diospa jatun pʼunchayninpi” guerra kananmanta (Apocalipsis 16:14, 16) Chay guerrapeqa mana nacionespurachu maqanakonqanku, imaynatachus kunan maqanakushanku ajinata. Chay guerramanta astawan yachakunaykipaj “¿Imataj Armagedón?” nisqa yachaqanata leeriy.

¿Imaraykutaj ninchej qhepaman uj sumaj kausay kananta?

• Bibliaqa niwanchej ‘Diosqa jallpʼantinpi guerrasta tukuchinanta’ (Salmo 46:9). Dios imastachus ruwasaj nisqanmanta astawan yachanaykipaj “La esperanza real de un mañana mejor” nisqa yachaqanata leeriy.

• Jesusqa discipulosninman yachacherqa Diospa Gobiernon jamunanta mañakunankuta (Mateo 6:9, 10). Chay Gobiernoqa cielopi kashan, kay jallpʼapitaj Diospa munayninta ruwanqa. Diostaj munan mundontinpi allinta kausakunanchejta. Imastachus Diospa Gobiernon runasrayku ruwananta yachanaykipaj, ¿Imastataj Diospa Gobiernon ruwanqa? nisqa videota qhawariy.

Ucraniapeqa 129 milmanta astawan Jehovaj testigosnin tiyan. Paykunataj mundontinmanta Jehovaj testigosnin jinallataj, Jesús jina ruwanku, manataj politicaman satʼikunkuchu, nitaj guerramanpis rinkuchu (Juan 18:36). Jehovaj testigosnenqa ‘Diospa Gobiernonmanta sumaj willaykunata’ jallpʼantinpi willashanku. Paykunaqa willanku kay tiempomanta llakiykuna manaña kananta, guerraspis chinkananta (Mateo 24:14). Noqaykuman qhelqarimuwayku chayri wajyarimuwayku imatachus Biblia nisqanmanta astawan yachakunaykipaj.