¿Mana trabajoyojchu kashanki? Bibliaj yuyaychaykunasnin yanapasunkiman
Manaña trabajoyoj kajtinchejqa rabiakusunman, llakikusunman, qolqepis pisiwasunman. Ajinapi rikukojtiyki Bibliaj sumaj yuyaychaykunasnin yanapasunkiman mana anchata llakikunaykipaj.
Wajkunaman willariy imaynachus kashasqaykita.
Biblia nin: “Sumaj amigoqa tukuy tiempo munakuyniyoj”, nispa (Proverbios 17:17).
Trabajoykita pierdespaqa llakikuwaj, phiñakuwaj, nitaj yachawajchu imatachus ruwanaykita chayri ichá yuyawaj ni imapaj valesqaykita. Jinapis familiaykiwan, amigosniykiwan imaynachus kashasqaykimanta parlarejtiykeqa, paykuna yanaparisunkuman ama anchata llakikunaykipaj. Chantapis paykunaqa sumaj yuyaychaykunata qosunkuman waj trabajota tarinaykipaj.
Ama anchata llakikuychu.
Biblia nin: “Ama jaykʼajpis phutikuychejchu imachus qʼaya kananmanta, qʼaya pʼunchaypa llakiynenqa kallanqa”, nispa (Mateo 6:34).
Bibliaqa yuyaychawanchej qhepaman imatachus ruwanata sumajta qhawarinata (Proverbios 21:5). Jinapis yuyaychallawanchejtaj ama anchata llakikunata imachus qhepaman kananmanta. Imajtinchus anchata llakikuspaqa ichapis imachus ni jayk’aj pasanqachu chay imasmanta llakikusunman. Chayrayku aswan allin sapa pʼunchay imatachus ruwanallanchejta ruwananchej.
Bibliaqa mana llakiywan atipachikunapaj sumaj yuyaychaykunata qowanchej. Chaymanta astawan yachanaykipaj “¿Imatá ruwasunman mana llakiywan atipachikunapaj?” nisqa yachaqanata leeriy.
Mashkhallatañachus gastanaykita qhawariy.
Biblia nin: “Kausayniypeqa yachakuni: [...] tukuy imayoj kayta, mana imayoj kaytapis”, nispa (Filipenses 4:12).
Kunan imaynachus kausayniyki kashan, chayman jina imatapis ruway. Imapichus qolqesituykita gastanaykitapis sumajta qhawarikuy, ama qolqeykita tukurpachinaykipaj. Chantapis ama qhasi manakajta manuchakuychu (Proverbios 22:7).
Imaynatachus kapususqan qolqellawan kausanaykita yachanaykipaj, “Cómo vivir con menos” nisqa yachaqanata leeriy.
Tiempoykita ama usuchiychu.
Biblia nin: “Allin yachayllawanpuni kausaychej, tiempoykichejta ama usuchispa”, nispa (Colosenses 4:5).
Manaña uj trabajoman horanpichu yaykunayki kajtinpis, sumajta qhawarikuy imatachus ruwashasqaykita ama tiempoykita usuchinaykipaj. Ajinamanta kausayniykipi waj imasta ruwayman yachasqallapuni kanki, qan kikiykitaj jatunpaj qhawakunki.
Ima laya trabajopajpis wakichisqa kay.
Biblia nin: “Ima laya sinchʼi trabajopis runapajqa sumajpuni”, nispa (Proverbios 14:23).
Ima laya trabajollatapis japʼikunaykipaj wakichisqa kay, mana ñaupaj trabajoyki jinachu kajtinpis. Ichapis pisipaj qhawasqa trabajospi trabajanayki kanqa chayri ichá ñaupaj trabajoykimanta nisqa aswan pisillata ganakunayki kanqa.
Ama saykʼuychu.
Biblia nin: “Tutamanta mujuta tarpuy, chʼisiyanankamataj mana samarispa tarpullaypuni, mana yachankichu mayqenchus wiñananta”, nispa (Eclesiastés 11:6).
Trabajota maskʼallaypuni. Tukuyman willay trabajota maskʼashasqaykita, familiaresniykiman, rejsisqasniykiman, trabajomanta ñaupa compañerosniykiman, vecinosniykiman ima. Chantapis trabajota maskʼanapaj agenciasta waturikuy, trabajadoresta maskʼaspa avisosta churajkunata, Internetpi trabajota maskʼasqankuta ima. Ashkha lugaresman rinaykipaj wakichikuy, chaypitaj tapuykunaman kutichinaykipaj, chantapis wakichikuy ashkha lugarespi ima oficiostachus yachasqaykita qhelqaspa entreganaykipaj.