Ucraniapi guerra kasqanrayku mundontinpi mikhuna pisiyashan

Kay 19 de mayo de 2022 fechapi, Consejo de Seguridad de las Naciones Unidasmanta kajkunaman, 75 jatuchaj autoridades kayta willarqanku: “COVID-19 onqoy kasqanrayku, tiempopis cambiasqanrayku mundontinpi mikhunaqa pisiyasharqa. Jinapis Ucraniapi guerra kasqanwanqa astawan mikhuna pisiyashan, wakin lugarespi yarqhay kananpaj jina”, nispa. Chaymanta qhepatataj The Economist nisqa periódico nerqa: “Kay mundopeqa ashkha problemasña tiyan, jinapis guerra kasqanwanqa aswan ashkha runasraj yarqhaywan kanqanku”, nispa. Bibliaqa kay tiempopi yarqhaykuna kananmanta parlan, jinapis chay tiempopi yanapanawanchejpaj sumaj yuyaychaykunata qowanchej.

Bibliaqa nerqaña yarqhay kananta

•  Jesusqa nerqa: “Uj nacionqa waj nacionwan maqanakonqa, uj gobiernopis waj gobiernowan maqanakonqa. [...] Yarqhaykuna [...] ima kanqa”, nispa (Mateo 24:7).

•  Apocalipsis libroqa tawa caballospi lloqʼasqas kajkuna llojsimusqankumanta parlan. Chaykunamanta ujnenqa guerrawan ninakun. Chaypa qhepanta llojsimojtaj yarqhaywan ninakun. Chay caballo llojsimojtenqa mikhuna mana tariy atina kanan karqa, ancha valesqapitaj vendenanku karqa. Biblia nin: “Chantá uj yana caballota rikorqani. Caballopi lloqʼasqa kajtaj makinpi uj balanzata japʼisharqa. Chantá [...] ujninku nerqa: Iskay libra trigo uj jornal pagopaj, sojta libra cebadataj uj jornal pagollapaj kanqa”, nispa (Apocalipsis 6:5, 6, Diospa Qhelqachisqan).

Yarqhay kananmanta Bibliaj profeciasnenqa kay tiempopi juntʼakushan. Kay tiempotataj Bibliaqa ‘qhepa pʼunchaykuna’ nispa sutichan (2 Timoteo 3:1). Qhepa pʼunchaykunamanta, chay tawa caballosmantawan yachakunaykipaj, 1914 watamantapacha kay mundoqa uj jinaman tukun nisqa videota qhawariy, “¿Ima niyta munan tawa caballospi lloqʼasqa kajkuna?” nisqa yachaqanatawan leeriy.

¿Imaynatá Biblia yanapawanchej?

•  Bibliapeqa sumaj yuyaychaykuna tiyan, chaykunataj yanapawasunman ima llakiy kajtinpis, tukuy ima valesqa kajtinpis chayri mikhuna pisejtinpis. Chay yuyaychaykunamanta wakinta leeriy “Cómo vivir con menos” nisqa yachaqanapi.

•  Chantapis Bibliaqa uj suyakuyta qowanchej. Bibliaqa nin ‘jallpʼapi ashkha trigo poqonanta’, tukuypajtaj jinantin mikhuna kananta (Salmo 72:16). ¿Imaraykutaj Bibliaj nisqanpi atienekusunman? ¿Imaynataj qhepaman kausay kanqa? Chayta yachanaykipaj “La esperanza real de un mañana mejor” nisqa yachaqanata leeriy.