¿Pitaj Jehovaj testigosninta rikhuricherqa?

Kay tiempomanta Jehovaj testigosnenqa 1900 watamanta aswan ñaupajta rikhurerqanku. Chay wataspi Pittsburgh (Pensilvania, Estados Unidos) llajtapi uj juchʼuy qotu runas Bibliata estudiayta qallarerqanku. Chantapis imatapunichus Biblia yachachisqanta, iglesiaspa yachachisqankuwan kikincharqanku. Imatachus yachakusqankumantataj runasman willayta qallarerqanku. Librosta orqhorqanku, periodicospi llojsinanpaj qhelqarqanku, uj revistata ima orqhorqanku. Chay revistataj kunan sutikun: Torremanta Qhawaj. Jehová Diospa Gobiernonmanta willashan.

Bibliata estudiajkumanta ujnin kajqa Charles Taze Russell karqa, paytaj Torremanta Qhawaj revistata orqhorqa, chantá chay tiempopi runasman Bibliamanta yachachiyta ñaupajman aparqa. Chayta ruwaspataj mana uj mosoj religiontachu rikhuricherqa. Astawanpis Russell, Bibliamanta Yachakojkuna ima (chay sutiwan rejsichikorqanku) Jesuspa yachachiykunasninta rejsichiyta, ñaupa cristianos jinataj ruwayta munarqanku. Ñaupa tiempomanta cristiana qotuchakuytaqa Jesús rikhuricherqa, chayrayku nisunman Jesús rikhurichiwasqaykuta (Colosenses 1:18-20).