¿Mashkha testigostaj mundontinpi tiyan?

¿Imaynatá yachanchej mashkhachus kasqanchejta?

Jehovaj testigosnenqa kanku pikunachus sapa killa Diospa Gobiernonmanta runasman predicamunku chaykuna (Mateo 24:14). Paykunamanta wakenqa bautizasqas kanku, wakintaj predicamunapaj aprobasqa kanku manaraj bautizasqa kajtinkupis.

¿Jehovaj testigon kanapaj qolqeta churanachu?

Mana. Jehovaj testigon kanapaj chayri ima cargota japʼinapajpis, mana qolqeta churanamantachu kashan (Hechos 8:18-20). Chayrayku mana yachakunchu pikunachus qolqesitunkuwan yanapakusqankuta. Tukuy testigosqa atisqankuman jina mundontinpi Diosmanta willakunanpaj yanapakunku tiemponkuwan, kallpankuwan, kapuyninkuwan ima (2 Corintios 9:7).

¿Imaynapí yachankichej mashkhachus sapa killa predicasqaykichejta?

Tukuy testigosqa congregacionniykupi sapa killa predicasqaykumanta uj informeta entregayku.

Chay informestataj congregacionniyku sucursalman apachin. Sapa sucursaltaj centralniykuman chay informesta apachin.

Sapa agosto killa tukukuytataja yachakun mashkha testigoschus sapa lugarpi kasqaykuta. Tukuy chaykunata yupaykuspataj yachayku mashkha testigoschus mundontinpi kasqaykuta. Kay jw.org® nisqapi “Mundontinpi” nisqa cheqaman yaykuspa, yachawaj sapa suyupi mashkhachus kasqaykuta, imaynatachus llankʼashasqaykuta ima. Noqaykoqa chaykunata leespa mayta kusikuyku, imaynatachus ñaupa cristianospis kusikorqanku, ajinata (Hechos 2:41; 4:4; 15:3).

¿Yupankichejchu testigosta jina pikunachus mana qankunawan khuska predicankuchu, chaywanpis reunionesniykichejman jamunku, chayri Bibliamanta yachakushanku chaykunata?

Paykunata mana testigosta jina yupajtiykupis, kusikuyku reunionesniykuman jamusqankumanta. Paykunamanta ashkhasqa sapa wata Jesuspa Wañuyninta Yuyarinapaj tantakuyman jamunku. Chaypitaj yachayta atiyku tukuy jamojkunamanta mashkhachus mana testigochu kasqankuta. 2024 watapeqa, Jesuspa Wañuyninta Yuyarinapaj tantakuyman jamorqanku: 21.119.442.

Ashkha runasqa reunionesniykuman mana jamojtinkupis mana pagaspalla Bibliamanta noqaykuwan yachakunku. 2024 watapeqa, sapa killa Bibliamanta yachakojkunaqa karqanku 7.480.146.

Autoridades censasqankuman jina aswan ashkha testigos kankichej qankuna nisqaykichejmanta nisqaqa, ¿imaraykutaj paykunaj nisqankuwan nisqaykichej mana igualanchu?

Censashajtinkoqa runasta tapunku mayqen religionmantachus kasqankuta. Por ejemplo, Estados Unidos suyupi censota ruwajkunaqa, runasta tapurinku uj religionniyojchus manachus kasqankuta. Runastaj chayman yuyasqankuman jinalla kutichinku, manataj ruwasqankupi rikuchinkuchu. Noqaykutajrí mana tukuy pikunachus testigo kani nejkunatachu yupayku, manaqa pikunachus Diospa Gobiernonmanta predicamunku, informetataj sapa killa entreganku chaykunallata.