116 yachachiy
Imaynatá wiñaypaq kawsasunman
¿IMATATAQ kay wawita masinkunawan ñawirichkan? Ari, ñawirichkanki chay librollatataq... Biblia yachachisqanmanta librituy. Paykunaqa kay yachayllatataq ñawirichkanku... “Imaynatá wiñaypaq kawsasunman”, nisqata.
¿Imatataq yachakuchkankuman?, wiñaypaq kawsanapaqqa Jehovamanta Jesusmanta yachakuchkanku. Biblia niwanchik: ‘Wiñaypaq kawsanapaqqa kʼata chiqa Diosmanta, Jesucristomantawan yachakunanchikta’.
¿Imaynamanta Jehovamanta, Jesusmantawan yachakusunman? Kay Biblia yachachisqanmanta librituy, nisqata, qallariyninmanta tukukuyninkama allinta ñawirispa. Kay libroqa Jehovamanta, Jesusmantapis mayta yachachiwanchik, ¿ichari? Kaypi imatachus paykuna ruwasqankuta, imatachus ruwanankuta ima willawanchik. Chaywanpis mana kay libritullatachu ñawirinanchik tiyan.
¿Pampapi kaq librota rikunkichu? Chayqa Biblia. Pillawanpis sapa yachachiymanta Bibliap nisqanta ñawirichikuy. Bibliaqa, Jehovata kasukunanchikpaq yanapawanchik, jinamanta wiñay kawsayta japʼinanchikpaq. Chayrayku, sapa pʼunchay Bibliata ñawiriyman yachayakapunanchik tiyan.
Chaywanpis, mana Diosllamantachu nitaq Jesusllamantachu yachakunanchik tiyan. Paykunamanta, yachachisqankumanta ima sumaqta yachasunman, chaywanpis mana wiñay kawsayta tarisunmanchu. Jina kaptinqa, ¿imatataq astawan ruwananchik tiyan?
Yachakusqanchikmanjina kawsananchik tiyan. ¿Judas Iscariotemanta yuyarikunkichu? Jesús 12 apostolesninta akllaspa, paytapis akllallarqataq. Judasqa Diosmanta, Jesusmantapis achkhata yacharqa. Chaywanpis, ¿imata ruwarqa? Pisimanta pisi, payllapaq imatapis munaspa, 30 qullqi phisurayku Jesucristota wasancharqa. Judasqa mana wiñaypaq kawsanqachu.
¿Giezimanta yuyarikunkichu? Paymanta 69 willaypi yachakurqanchik. Payqa wakpa qullqinta, pʼachanta ima munapayarqa. Chayta japʼinanpaq llullakusqanrayku, Jehová payta unquchirqa. Jinallatataq ñuqanchiktapis jasutʼiwasun, mana kamachisqanta kasukuptinchik.
Chaywanpis, rikunchikjina may chhika runa Jehovata kasukurqanku. Ñuqanchikpis paykunajina kayta munanchik, ¿ichari? Maqtʼa Samueljina ruwananchik tiyan, paymanta 55 willaypi yachakurqanchik. Payqa 4 chayri 5 watitayuq tantakunapaq toldopi Diosta yupaychayta qallarirqa. Payjina uñallaraq kaspapis, Diosta yupaychayta atinki.
Tukuypis Jesucristota qhatinanchik tiyan. Payqa juchʼuymantapacha, 87 yachachiypi rikunchikjina, Diospa wasinpi, tatanmanta willarqa. Payjina ñuqanchikpis willananchik tiyan. Tukuyman, may jatun Jehová Diosninchikmanta, chantapis Churin Jesucristomanta parlananchik tiyan. Kayta ruwaspaqa, Diospa musuq paraíso Jallpʼapi wiñay wiñaypaq kawsasunchik.