Jesustaqa Jehová jarkʼarqa

WAKIN kuti, Jehovaqa tʼukuna imasta ruwan wawasta jarkʼananpaj. Imaraykuchus wawasqa mana sapallankumanta jarkʼakuyta atinkuchu. Campopi animalitospa ruwasqankoqa, Jehovaj ruwasqanman rijchʼakun. Ichá chayta rikuspa, qallariypeqa mana entiendewajchu.

Campopi kashasqaykipi tʼukuriy. Uj pʼesqetu qayllaykipi rikhurin. Ujnin alanqa pʼakisqa kaspa jinan. Qayllaykojtiykitaj ayqekun, qhatiykojtiykitaj astawanraj ayqekun. Chantá phawaripun. Chay pʼesqetoqa sanito kakushasqa. ¿Yachankichu imaraykuchus chayta ruwasqanta?...

Chay qayllapi pasto chaupipi thapan kasharqa, chaypitaj uñitasnin kasharqa. Chay pʼesqoqa, qan uñitasninta rikuspa wañuchinaykita yuyarqa. Chayrayku karunchasunanpaj alanpis pʼakisqa kanman jina kasharqa. ¿Yachankichu pichus chayman rijchʼakojta jarkʼayta atiwasqanchejta?... Bibliaqa Jehovata kikinchan “irpasninta” sumajta qhawaj ankawan (Deuteronomio 32:11, 12).

Jesusqa Jehovajta aswan munasqa wawan. Payqa cielopi kashaspa, Tatan Jehová jina atiyniyoj karqa, manataj waj qhawanachu karqa. Chaywanpis Jesús Jallpʼapi nacekuspa, uj wawita karqa. Chayrayku jarkʼanata necesitarqa.

Jesusqa Jehovaj munayninta juntʼananpaj, wiñay tukusqa kanan karqa, mana pantaj runataj. Wawallaraj kashajtintaj, Satanasqa wañuchiyta munarqa. ¿Imatá chaypaj ruwarqa? Chantá, ¿imaynatá Jesusta Jehová jarkʼarqa? ¿Yachayta munawajchu?...

Jesús nacekusqanmanta pisi tiemponman, Satanasqa cielopi uj kʼanchayta rikhuricherqa. Chaytaj inti llojsimuy ladomanta, uj estrella jina kʼanchamorqa. Estrellasta qhawaymanta yachaj runastaj, chay kʼanchaypa qhepanta may chhika karuta rerqanku, Jerusalenkama. Chaypitaj tapukorqanku maypichus judiospa reynin nacekunan kasqanta. Bibliaj nisqanta yachaj runasrí, Belenpi nacekunanta nerqanku (Mateo 2:1-6).

Jerusalenta kamachej sajra Herodesqa, Belenpi uj rey nacekusqanta uyarerqa. Chayraykutaj chay yachaysapa runasman nerqa: ‘Chay wawamanta yachamuychej, tarispataj kutimuspa willawankichej’, nispa. ¿Yachankichu imaraykuchus Herodes Jesusta tariyta munasqanta?... Payqa Jesusmanta envidiakorqa, wañuchiytataj munarqa.

¿Imaynatá Wawanta Dios jarkʼarqa?... Estrellasta qhawaymanta yachaj runasqa Jesusta tarispa regalosta jaywarqanku. Diostaj paykunaman uj mosqoypi nerqa, ama Herodesman kutinankuta. Chayrayku waj ñannejta llajtankuman kutiporqanku, niñataj Jerusalenman rerqankuchu. Herodesqa estrellasta qhawaymanta yachaj runas ripusqankuta yachaspa, mayta phiñakorqa. Payqa Jesusta wañuchiyta munarqa. Chayraykutaj kamacherqa, Belén llajtapi tukuy qhari wawasta wañurachinankuta iskay watayojmanta uraman. Jesustajrí niña chaypichu kasharqa.

¿Imaynatá Jesús salvakorqa?... Estrellasta qhawaymanta yachaj runas ripusqankutawan, Jehovaj angelnin Joseman nerqa: ‘Ayqey Egiptoman’, nispa. Ajinamanta Herodesqa Jesusta mana wañucherqachu. Watasninman, Joseqa Jesusta Mariatawan pusariykukuspa Egiptomanta kutinporqa. Diostaj ujtawan uj mosqoypi Joseman nerqa: ‘Riy Nazaret llajtaman’, nispa. Chaypeqa Jesusta ni pí imananmanchu karqa (Mateo 2:7-23).

¿Reparankichu imaynatachus Wawanta Jehová jarkʼasqanta?... Jesús wawa kashaspa wajkuna jarkʼananta necesitarqa. Kunanrí, ¿pitaj Jesús jina jarkʼanata necesitan? ¿Pitaj pʼesqo uñitasman rijchʼakun? ¿Manachu qan?... Wakin kutisqa imanaytapis munasunkuman. ¿Yachankichu pikunachus?...

Biblia nin jina, Satanasqa uj phiña leon jina, oqoykuytataj munawanchej. Leonesqa uñitastapuni munanku. Ajinallatataj Satanás, supaykunasninpis, wawasta astawan wateqashanku (1 Pedro 5:8). Jehovatajrí aswan atiyniyoj. Payta sirvej wawasta jarkʼayta atin, Satanás paykunata imanarpajtinpis yanapayta atin.

Kay libroj 10 yachaqananpi yachakorqanchej jina, Satanaswan supaykunasninwan, ¿imata ruwanatataj munanku?... Qhariwarmi jina puñuykuspa khuchichakunanchejta munanku. Chaytataj Dios chejnikun. ¿Yuyarikunkichu pikunallachus qhariwarmi jina puñuykuyta atisqankuta?... Casarasqa kajkunalla.

Llakikunapaj jina, wakin runasqa wawaswan puñuykuyta munanku. Wakin kutitaj chay wawasqa, chay runasmanta sajra imasta yachakunku, millay imastataj ruwanku. Ajinallataj karqa unay tiempo Sodoma llajtapi. Biblia nin jina, “aswan jovenmanta hasta aswan viejocama” Lotta waturikoj runaswan puñuykuyta munarqanku (Génesis 19:4, 5, Quechua de Cuzce).

Qanpis Jesús jinallataj jarkʼasqa kayta necesitanki. ¿Imamantá? Qanwan qhariwarmi jina puñuykuyta munaj runasmanta, wawasmanta ima. Chay runasqa kʼacha runasman rijchʼakunkuman. Chantá ni piman willanaykipaj, ichá imatapis qoyta munasonqanku. Chay runasqa Satanás jina, supaykunasnin jinataj paykunallapi yuyanku. Sajra munayninkuwan sajsanankupajtaj, wawaswan puñuykunku. ¡Chaytaj may jatun jucha!

¿Yachankichu imatachus sajra munayninkuwan atipachikuspa ruwasqankuta?... Ichapis jispʼanaykita tʼojpisuyta munanqanku chayri jispʼanaykita jispʼanankuwan tinkuchiyta munanqanku. Qantaj ni jaykʼaj chayta ruwanankuta saqenaykichu tiyan. Ni hermanoyki, ni hermanayki, ni mamayki, ni tataykipis chayta ruwasunanchu tiyan. Jispʼanaykitaqa ni pí tʼojpisunanchu tiyan.

¿Imaynamantá cuerpoykita jarkʼawaj khuchi runasmanta?... Ñaupajtaqa jispʼanaykita ni piwan tʼojpichikuychu. Pillapis tʼojpiyta munasojtin, jatunmanta qhaparikuy: “¡Ama tʼojpiwaychu! ¡Mamayman willaykusaj!”, nispa. Qan chaypaj juchayoj kasqaykita nisojtinpis, ama kasuychu. Chayqa llulla. Pillapis chayta ruwasojtin ayqekuy, willakuytaj. ‘Ama pimanpis willankichu’ nisojtinpis, willakunaykipuni tiyan. Kʼachitu regalosta qoyta munasojtinpis chayri imanarpasqayki nisojtinpis, chay runamanta karunchakunaykipuni tiyan. Imatachus ruwasusqantataj willakunayki tiyan.

Mana manchachikunaykichu kajtinpis, cuidakunayki tiyan. Tatayki chayri mamayki pimantapis chayri ima lugarmantapis karunchakunaykita nisojtinku, kasunayki tiyan. Ajinamanta sajrata ruwayta munasojkunamanta jarkʼakunki.