Diospa nisqanta juntʼanankuta ninku

Israelitasqa Egiptomanta llojsiytawan, iskay killanman jina Sinaí orqoman chayarqanku, chaypitaj qhepakorqanku. Jehová Diostaj Moisesta nerqa Sinaí orqoman wicharinanta. Chaypitaj payman nerqa: “Noqa israelitasta librarqani. Paykuna kasuwanqanku, leyesniytapis juntʼanqanku chayqa, noqapaj sumaj nación kanqanku”, nispa. Moisestaj kutimuytawan chayta israelitasman willarqa. Israelitastaj nerqanku: “Jehová Diospa tukuy nisqasninta kasusqayku”, nispa.

Moisés ujtawan orqoman wicharejtin, Jehová Dios nerqa: “Minchha israelitaswan parlasaj. Paykunaman nimuy ama orqoman wicharimunankuta”, nispa. Moisestaj uraykamuytawan israelitasman nerqa Diosta uyarinankupaj wakichikunankuta.

Minchhantintaj, israelitasqa orqopi yana phuyuta, lliuj lliujkunatawan rikorqanku. Chantá pututoj waqasqanta, rayospa sonasqanta ima uyarerqanku. Jehová Diosqa ninapi orqoman uraykamorqa. Israelitastaj mancharisqa kasharqanku. Orqoqa qʼosñiwan juntʼa kasharqa, kharkatisharqataj. Pututoj waqasqantaj astawan sinchʼita uyarikorqa. Chantá Diosqa nerqa: “Noqa Jehová Dios kani. Mana waj dioskunata yupaychanaykichejchu tiyan”, nispa.

Moisesqa orqoman wicharillarqataj. Chaypitaj Jehová Diosqa llajtapaj leyesta qorqa. Chay leyespi willarqa imaynatachus yupaychanankuta, imaynatachus kausakunankuta ima. Moisestaj chayta qhelqarqa, israelitaspajtaj leeporqa. Israelitastaj nerqanku: “Jehová Diospa tukuy nisqasninta ruwasqayku”, nispa. Juntʼasqankutachus manachus qhepan capitulopi yachakusunchej.