35 yachachiy
Jehová kamachiykunata qun
EGIPTOMANTA lluqsisqankumanta iskay killanman, israelitakuna Sinaí urquman chayarqanku, chay urquqa Horeb nispa sutichakullaqtaq. Chaypi Diosninchik lawraq sachʼamanta Moiseswan parlarqa. Llaqtaqa jarakunanpaq chaypi qhipakurqa.
Moisés urquman wicharinankama, israelitakuna urapi suyarqanku. Jehová Moisesman nirqa israelitakuna kasukunankuta ima, paypaq akllasqa llaqta kanankuta. Moisés urqumanta uraykamuytawan israelitakunaman Jehová nisqanta willarqa. Tukuytaq, Diospa llaqtan kayta munasqankurayku, Jehovata kasukunankuta nirqanku.
Jehovaqa, mancharikunapaqjina urqu puntata qʼusñiwan pʼampaykurqa. Chantapis sinchi trueno qhunrurun nichkaqta uyarikurqa. Chantapis pay jinata llaqtaman parlarqa: ‘Ñuqa Jehová Diosniyki kani, Egiptomanta urqhumurqayki’, nispa. Chanta jinamanta kamachin: ‘Ñuqamanta jawaqa wak diosniyki ama kachunchu’, nispa.
Chantapis, Diosqa israelitasman wak jisqʼun kamachiykunata, chayri leyes nisqata qullarqataq. Israel llaqtataq mayta manchachikurqa. Chayrayku, Moisesta nirqanku: ‘Qamlla parlawayku. Diosqa ama ñuqaykuwanqa parlachunchu ari, ama wañunaykupaq, nispa’.
Chaymanta Jehová Moisesman nirqa: ‘Jamuy, urquman wicharimuy, maypichus ñuqa kachkani, chayman; ñuqataq iskay pʼalta rumista qusqayki. Chay rumispi leyesta qillqani llaqtay kasukunanpaq’, nispa. Moisestaq watiqmanta urquman wicharirqa, 40 pʼunchayta, tutatawan chaypi qhipakurqa.
Diosqa may chhika kamachiykunata llaqtanman qurqa. Moisestaq chayta qillqarqa. Chantapis Diosqa iskay laja rumita Moisesman qurqa. Chaypiqa Diosninchik 10 kamachiykunata llaqtanpaq qillqarqa. Chaytaq, Chunka Kamachiykuna nispa sutichakun.
Kay Chunka Kamachiykunaqa jatun kamachiykuna kanku. Jinallataq chay wak achkha kamachiykuna llaqtanman qusqanpis. Juknin kay: ‘Jehová Diosniykita tukuy sunquykiwan, tukuy almaykiwan, tukuy kallpaykiwan, tukuy yuyayniykiwan ima, munakunayki tiyan’. Juknintaq kay: ‘Runa masiykita qam kikiykitajina munakunayki tiyan’, nispa. Diospa Churinqa, Jesucristo, kay iskay kamachiykuna astawan kuraq kasqankuta nirqa. Qhipaman Diospa Churinmanta, yachachisqanmanta ima, yachakusunchik.
Éxodo 19:1-25; 20:1-21; 24:12-18; 31:18; Deuteronomio 6:4-6; Levítico 19:18; Mateo 22:36-40.