Mana kʼumuykukorqankuchu

Nabucodonosorqa mosqoypi uj lantita rikusqanmanta qhepaman, uj jatun qori santota ruwacherqa. Chantá Dura nisqa pampapi churacherqa. Babiloniapi tukuy kamachejkunatataj chay santoj ñaupaqenpi tantaykucherqa. Chaymanqa Sadracta, Mesacta, Abednegota ima wajyachillarqataj. Reyqa nerqa: “Putututa, qenata, arpata waqajta uyariytawankama chay santoman kʼumuykukunkichej. Pichus mana kʼumuykukojqa, laurashaj hornoman wijchʼuykusqa kanqa”, nispa. Chay kinsa jovenestaj Jehová Diosllata kasorqanku, nitaj kʼumuykukorqankuchu.

Reyqa nerqa: “Putututa, qenata, arpata tocaychej”, nispa. Tukuy runas chay santoman kʼumuykukojtinkupis Sadracwan, Mesacwan, Abednegowanqa mana kʼumuykukorqankuchu. Wakin runastaj chayta rikuspa reyman nerqanku: “Chay kinsa jóvenes santoykiman mana kʼumuykukunkuchu”, nispa. Reytaj paykunata wajyachispa nerqa: “Santoyman kʼumuykukuyta atinkichejraj. Mana kʼumuykukunkichejchu chayqa, hornoman wijchʼuykusqaykichej. Ni mayqen diospis salvayta atisonqachejchu”, nispa. Paykunataj nerqanku: “Mana kʼumuykukuykumanchu. Diosniyku salvayta atiwayku. Mana salvawajtiykupis nipuni santoykita yupaychasqaykuchu reyníy”, nispa.

Chantá reyqa mayta phiñakuspa kamachisninman nerqa: “Hornota parichiychej qanchis kutimantapis astawan”, nispa. Chantá soldadosninta nerqa: “Kinsantinkuta wataykuspa hornoman wijchʼuykuychej”, nispa. Horno manchay rupha kasqanrayku, wijchʼuykoj soldadosqa chay rato horno punkupi wañorqanku. Chay jovenestaj hornoman wijchʼuykusqa karqanku. Nabucodonosorqa hornota qhawaykuspa tawa runasta purishajta rikorqa, mayta mancharikuspataj nerqa: “¿Manachu kinsallata hornoman wijchʼuykorqanchej? Tawa runasta rikuni, ujnenqa uj angelman rijchʼakun”, nispa.

Nabucodonosorqa hornoman qayllaykuspa qhaparerqa: “Aswan Patapi kaj Diospa kamachisnin, llojsimuychej”, nispa. Tukuypis mayta tʼukorqanku Sadracwan, Mesacwan, Abednegowan mana imanasqas hornomanta llojsimojtinku. Chujchanku, cuerponku, ropankupis mana ruphasqachu kasharqa, nitaj qʼosñikipasqachu.

Nabucodonosorqa nerqa: “Jatunchasqa kachun kay kinsa jovenespa Diosninku. Payqa angelninta kachamorqa paykunata salvananpaj. Chay Dios jinaqa mana waj kanchu”, nispa.

Chay kinsa jóvenes jina, imapi rikukuspapis Jehová Diosta kasukuypuni.