Kay jallpʼapi wiñay kausay kanqapuni

WIÑAYPAJ KAUSAKOYQA, ¡MAY SUMAJ KANQA! Tatanchej Jehovaqa, kay jallpʼapi wiñay kausayta qoyta munawanchej. Jinapis mana tukuychu chayta creenku. Wakenqa ninku: “Wañusunpuni á”, “mana wañuspa, imatá ruwasunman”, nispa. Wakintaj yuyanku, cielollapi wiñay kausay kananta. ¿Jinachu kanman?

Allin kanman, ñaupajta Bibliaj nisqanta yachanayki. Bibliaqa willawanchej, mashkha unayta kausanapajchus ruwasqa kasqanchejta. Chantá nillawanchejtaj, imapajchus Dios kay jallpʼata, runasta ima ruwasqanta. Willallawanchejtaj imaraykuchus wañusqanchejtapis.

TʼUKUNAPAJ JINA RUWASQA KANCHEJ

Diosninchejqa kay jallpʼapi tukuy ima kajta ruwarqa. Jinapis runasqa mana animalitoswan chayri waj kausajkunawan kikinchu kanchej. Biblia nisqanman jina, Diosqa “payman rijchʼakojta” ruwawarqanchej (Génesis 1:26, 27). Chayrayku runasqa Diosman ashkha imaspi rijchʼakunchej, munakuyta atinchej, cheqan kajta ruwaytapis.

Mana chayllachu, runasqa piensayta atinchej, allin kajta, mana allin kajtapis reparayta atinchej. Chantapis Diosta rejsiyta munanchej, payman qayllaykuytapis. Diosninchej ajinata ruwawasqanchejrayku, cielopiwan jallpʼapiwan kaj imasta rikuspa, may kʼachitu kasqankuta reparanchej. Reparallanchejtaj runas kʼachitu imasta ruwasqankuta, takiykunata uyarispapis kusirikunchej. Jinapis aswan sumajqa Diosta sirviyta atisqanchej. Chay tukuy imasta ruwayta atisqanchejrayku, animaleswan mana kikinchu kanchej.

Diosninchej pisi watasllata kausananchejta munanman karqa chayqa, nichá ruwawasunmanchu karqa chay tukuy imasta ruwayta atinanchejpaj. Nillataj chay imasta sapa kuti aswan sumajta ruwayta munasunmanchu karqa. Chayqa rikuchiwanchej, Diosninchejqa kay jallpʼapi wiñayta kausakunanchejpaj ruwawasqanchejta.

DIOSPA MUNAYNIN

Wakin runasqa yuyanku, Diosqa kay jallpʼapi mana wiñayta kausananchejpajchu ruwawasqanchejta. Astawanqa ninku: “Jallpʼanchejqa uj alojamiento jinalla. Diostaj runasta chaypi churan, pichus cieloman rinanpaj jina kasqanta yachanallanpaj”, nispa. Ajina kanman chayqa, Diosninchej sajra ruwaykunamanta juchayoj kanman. Diosninchejrí mana jinachu. Bibliaqa paymanta nin: “Tukuy ñankunanqa cheqampuni. Payqa mana llullakoj Dioschu. Payqa mana jaykʼajpis pantanchu. Payqa cheqanmin, cheqa kajta ruwajtaj”, nispa (Deuteronomio 32:4).

Bibliaqa sutʼita willan, imapajchus Dios kay jallpʼata ruwasqanta. Biblia nin: “Janaj pachaqa Diosninchejpata, kay pachatataj runasman qorqa”, nispa (Salmo 115:16). Rikunchej jina, Diosqa kay jallpʼata ruwarqa chaypi wiñaypaj kausakunanchejpaj. Chantapis kusisqa kausakunanchejpaj tukuy imata churapuwarqanchej (Génesis 2:8, 9).

“Janaj pachaqa Diosninchejpata, kay pachatataj runasman qorqa” (Salmo 115:16).

Bibliaqa niwanchej, imapajchus Dios ruwawasqanchejta. Diosqa ñaupa tatasninchejman kamacherqa: ‘Kay pachaman juntʼaychej. Jallpʼa patapi tukuy kausajkunatataj kamachiychej’, nispa (Génesis 1:28). Adanwan Evawanqa kay jallpʼata cuidananku karqa, uj kʼachitu lugarmantaj tukuchinanku karqa. Chayta ruwaytaj, ¡may sumajpuni karqa! Chantapis wawasninkuwan khuska wiñaypaj kay jallpʼapi kausakunanku karqa. Paykunaqa mana cielopi kausanankupajchu ruwasqa karqanku.

¿IMARAYKU WAÑUNCHEJ?

Bibliaqa willawanchej, Diospa ujnin angelnin paypa contranpi oqharikusqanta. Chay angelta Satanás sutiwan rejsikun. Payqa Diospa munaynin juntʼakunanta mana munarqachu. ¿Imatataj chaypaj ruwarqa?

Satanasqa Adantawan Evatawan engañaykorqa, Diospa contranta oqharikunankupaj. Satanasqa paykunata nerqa, Jehová Diosqa mana allinninkutachu munasqanta, paykunalla imachus allin, imatajchus mana allin kasqanta ajllayta atisqankuta. Adanwan Evawantaj Supayta uyarispa, Diosta mana kasorqankuchu. Chayta ruwasqankurayku, Dios nisqanman jina wañorqanku. Ajinamanta kay jallpʼapi uj paraisopi wiñaypaj kausakuyta pierderqanku (Génesis 2:17; 3:1-6; 5:5).

Adanwan Evawan juchallikusqankurayku, runasqa mayta sufrinchej. Biblia nin: Adán “runanejta jucha kay mundoman yaykumorqa, jucharaykutaj wañuypis tiyan. Ajinamanta wañoyqa tukuy runasman chayarqa, tukuyninku juchallikusqankurayku”, nispa (Romanos 5:12). Ñaupa tatasninchejqa, juchatawan wañuytawan herenciata saqewarqanchej. Chayrayku wañunchej. Diosninchejqa mana wañunapajchu ruwawarqanchej.

KAY JALLPʼAPI WIÑAY KAUSAY KANQAPUNI

Ñaupa tatasninchej juchallikojtinkupis, Diosqa imatachus kay jallpʼapaj, runaspaj ima munasqanta juntʼanqapuni. Diosninchejqa munakuwasqanchejrayku, cheqan kajtapunitaj ruwasqanrayku, Wawanta kachamorqa. Ajinamanta juchamanta, wañuymantawan kacharichinawanchejpaj. Apóstol Pablo nerqa: “Juchaj pagonqa wañuymin. Diospa regalonrí wiñay kausay, Señorninchej Cristo Jesusnejta”, nispa (Romanos 6:23). Diosqa chay jinatapuni munakuwasqanchejrayku, “uj kʼata Wawanta qorqa, ajinamanta pillapis paypi creejqa mana wañunanpaj, manachayqa wiñay kausayniyoj kananpaj” (Juan 3:16). Jesús noqanchejrayku wañusqanrayku, imatachus Adán pierdesqanta watejmanta japʼisunchej.a

Diosninchejqa pisimantawan kay jallpʼata uj kʼachitu huertaman tukuchenqa, nisunman uj paraisoman. Chaypi kausakunanchejpajqa, Jesuspa nisqanta ruwananchej tiyan. Pay nerqa: “Kʼullku punkunta yaykuychej, imaraykuchus wañuyman pusaj ñanqa anchotaj jatuntaj, chayninta yaykojkunataj ashkhas kanku. Punkoqa kʼullkumin, kʼullkullataj kausayman pusaj ñanpis, chayta tarejkunaqa pisilla kanku”, nispa (Mateo 7:13, 14). Wiñay kausayta japʼinanchejqa, noqanchejmanta kashan. Qanrí, ¿chay kausayta japʼiyta munankichu?