“¿Imajtin Dios qhawallarqari?”

UJ JATUN LLAKIYTA RIKUSPA ICHÁ NERQANCHEJ: “¿IMARAYKUTAJ DIOS QHAWAMULLANRI?”, NISPA. CHAYRI NOQANCHEJ MANCHAY LLAKIYPI KASHASPA, ICHÁ NERQANCHEJ: “DIOSQA NICHÁ NOQAMANTA LLAKIKUNCHU”, NISPA.

Sheila sutiyoj warmeqa, Estados Unidospi tiyakun. Payqa Diospi creej familiapi wiñakorqa. Pay nin: “Diosqa tukuyta ruwawarqanchej. Noqataj chayta yachaspa wiñakorqani. Jinapis may karupi kashasqanta yuyarqani. Yacharqani Dios mana chejnikuwasqanta. Pero nillataj munakuwasqanta reparajchu kani”, nispa. ¿Imaraykutaj Sheila ajinata yuyaj? Payllataj nin: “Llakiykunaqa familiayta qhepan qhepanta qhatirerqa. Diostaj mana yanapawarqaykuchu”, nispa. Ichá qanpis, Sheila jinallataj yuyanki.

Ichá pay jinallataj yachanki, Tukuy Atiyniyoj Diosqa kasqantapuni. Jinapis mana reparankichu qanmanta llakikusqanta. Ñaupa tiempomanta cheqan runa Jobpis, yacharqa Dios may atiyniyoj, may yachayniyojtaj kasqanta. Jinapis uj kuti yuyarqa, Diosqa paymanta mana llakikusqanta (Job 2:3; 9:4). Jobmanqa qhepan qhepanta llakiykuna chayarqa. Ajina llakiypi kaspa, Diosman nerqa: “Imaraykutaj uyaykita pakawanki? Imajtintaj enemigoykita jina qhawawankiri?”, nispa (Job 13:24).

¿Imatá Biblia niwanchej? ¿Dioschu juchayoj ima llakiypis kananpaj? ¿Diosninchej runasmanta, sapa ujninchejmantapis llakikunchu? ¿Diosninchej rejsiwanchejchu, entiendewanchejchu, khuyakuwanchejchu? Problemasninchejpi, ¿yanapawasunmanchu? ¿Imaynatá chayta yachasunman?

Qhepan yachaqanaspi, imayna ruwasqachus kasqanchejta yachakusun (Romanos 1:20). Chantá imatachus Biblia Diosmanta nisqanta qhawarisun. Ajinapi yachasun, Diosninchej munakuwasqanchejtapuni. Astawan Diosta rejsispaqa, ‘noqanchejmanta llakikusqantapuni’ reparasun (1 Juan 2:3; 1 Pedro 5:7).