Sinchʼi onqoyniyoj kajtiyki

Linda 71 watasniyoj kashan. Pay nin: “Pulmonniypi, rakhu chʼunchulaypi ima cancerniyoj kasqayta niwasqankoqa, qʼaya wañunki nishawankumanpis jina karqa. Jinapis wasiyman chayaytawan nikorqani: ‘Mana chayta ninawankuta piensarqanichu, jinapis imaynamantapis aguantanay tiyan’”, nispa.

Elise 49 watasniyoj kashan. Pay nin: Lloqʼe lado uyaypi nerviosniymanta mal kani. Chaytaj maytapuni nanawan. Wakin kutisqa chay nanay fuerte kasqanrayku umphulla kani. Ñaupajtaqa sapallay sientekusqayrayku mayta llakikorqani, hasta wañuchikuypi piensarqani.

Uj onqosqa runata silla de ruedaspi familian pusaykachashanku

QAN, chayri familiaykimanta pillapis mana jampiyta atinapaj onqoyniyoj kashankichej chayqa, yachankiña chay onqoyqa mayta ñakʼarichikusqanta. Sapa kuti doctorman riy, medicamentosta mana tariyta atiy chayri rantiy, ichá mayta llakichisunki. Medicamentosta tomasqaykipis ichá malta ruwasunki. Onqoyniykimanta llakikuspaqa astawanraj ñakʼariwaj.

¿Imataj ajinapi kashajtiyki yanapasunkiman? Ashkha runastaqa Diosman orakuy, Bibliamanta wakin versiculosta leeriy ima mayta sonqocharqa. Wakinkunatataj familiaresninku, amigosninku ima kʼachamanta yanaparisqanku sonqocharqa.

¿IMATATAJ WAKIN RUNAS RUWARQANKU?

Roberto 58 watasniyoj kashan. Pay nin: “Onqoyniyoj kaspapis Diospi atienekuy. Payqa yanapasonqa ñaupajllamanpuni rinaykipaj. Diosman willarikuy imaynachus kashasqaykita. Paymanta mañakuy atiyninta, familiaykita yanapanaykipaj kallpata qosunanta, onqoyniykita aguantanaykipajpis yanapasunanta”, nispa.

Roberto nillanpuni: “Familianchej ladonchejpi kanankupaj, sonqochanawanchejpaj kallpachakunankoqa may allinpuni. Noqataqa wakin familiaresniy sapa día wajyarimuwanku imaynachus kashasqayta tapurinawankupaj. Waj lugaresmanta amigosniypis kallpacharillawankutaj. Chaytaj mayta sonqochawan, kallpachawantaj ñaupajman rinallaypajpuni”, nispa.

Ichá qanpatapis ujnin amigoyki onqosqa kashan, payta visitariytataj piensarishanki. Chaypajqa imatachus Linda nisqan yanapasunkiman. Pay nin: “Onqosqasqa tukuy runas jinallataj kausakuyta munanku. Nitaj onqoyninkumanta wajkunawan parlariyta munallankuchu. Chayrayku onqosqaswan parlarishaspaqa ama onqoyninmanta parlaychu”, nispa.

Jehová Dios kallpata qowasqanchej, Biblia sonqochawasqanchej, familiaresninchej, amigosninchej munakuwasqanchej imaqa may allinpuni. Imajtinchus chayqa kallpachawasunman sinchʼi onqoyniyoj kajtinchejpis ñaupajllamanpuni rinapaj.

Kay versículos yanapasunkiman

Diospi atienekuy

“Tata Diosta qhaparikorqani, paytaj uyariwarqa. Tukuy manchachikuykunamanta pay librawarqa. Kay wajcha runaqa qhaparikorqa, Tata Diostaj uyarerqa” (Salmo 34:4, 6).

Linda nin: “Diosmantaqa mana onqoyniyta jampinawantachu mañakuni, manaqa aguantanaypaj yanapanawanta, kallpachanawantataj”, nispa.

Bibliata leespa kallpachakuy

“Mana pipis nenqachu: Onqosqa kani, nispaqa” (Isaías 33:24).

Dios imastachus aswan qhepaman ruwananta nisqanpi tʼukuriy. Chayqa aguantanallaykipajpuni yanapasonqa, uj sumaj kausayta suyakushasqaykimantataj mana iskayrayankichu.

Familiaresniykiwan amigosniykiwan yanapachikuy

“Uj kawsaqeqa tukuy tiempopi munakuyniyoj, uj wawqetaj runawan khuska llakiypi sayaykunampaj” (Proverbios 17:17).

Elise nin: Ama wajkunamanta karunchakuychu. Amigosniykiwan yanapachikuy. Wakin kutisqa sapayakunki, Dios qanmanta mana llakikusqantataj yuyanki. Jinapis amapuni Diosmanta karunchakuychu”, nispa.