Cristop qhipanta purina Diosta jatunchanapaq
1. ¿Imatá ruwanapaqtaq qhipan jatun tantakuyninchik yanapawasun?
1 Bibliaqa, Jehová, Tukuy Atiyniyuq Dios, ‘jatun kayninwan pʼachallisqa’ kasqanta niwanchik (Sal. 104:1). Jesusqa, Tatanta jatunchananpaqjina, tukuy imata parlarqa, ruwarqa ima (Juan 17:4). Tukuypis Jesusjina Jehová Diosninchikta jatunchayta atisunchik, jamuq jatun tantakuyninchikpi: “¡Jesuspa qhipanta purina!”, nisqapi.
2. ¿Imaynatá ñawpaqmanta wakichikuyqa Jehovata jatunchananchikpaq yanapawasun?
2 Jehovata jatun kayninmanjina yupaychana. Jehová jatun tantakuyta ñuqanchikpaq wakichin, chayrayku chayman rinapaq ñawpaqmanta wakichikuptinchikqa, Jehovata jatunchasunchik. ¿Patronniykiwan parlankiñachu, wakichikuchkankiñachu viernesmantapacha, tukukunankama jatun tantakuypi kanaykipaq? ¿Ñawpaqta chayanaykipaq wakichikunkiñachu, tiyanata maskʼakunaykipaq, sapa pʼunchay qallarinapaq hermanosninchikwan khuska Diosman takinaykipaq, mañakuypi kanaykipaq ima? ¿Maypichus tantakusunchik chaypi hermanosninchikwan khuska mikhunapaq, mikhunata apakunaykipaq wakichikunkiñachu? Sapa pʼunchay qallarinapaq, umachaq hermanonchik manaraq takina uyarikuchkaptin tiyakunanchikta niwaptinchik, hermanoswan parlarichkaspapis, maypichus tiyakusunchik chayman rina, tantakuy qallarinanta suyanapaq.
3. ¿Imaynatá Jehovata jatunchasunchik, jatun tantakuypi sumaqta uyarispa?
3 Sumaqta tantakuypi uyarispa, janaqpachapi kaq Tatanchikta jatunchallasuntaq. Juk periodista, juk jatun tantakuyta rikuspa, jinata qillqarqa: “Tantakuyman riqkunaqa, chʼinsitu tukuy parlakusqanta uyarinku, jinamanta mayta Diosmanta yachakuyta munasqankuta rikuchinku”, nispa. Chantapis nillarqataq: “May chhika wawas [...], mana creenapaqjina, mana tiyanasninkumanta jatarikuspa, Santa Bibliap pʼitinkunata maskʼanku”, nispa. Tantakuy ruwakuchkaptinqa, mana qhasi mana kaqta parlanapaq tiempochu, nitaq mikhunapaq, qhasita puriykachanapaq. Waynasqa, sipaskunapis, tatasninkuwan khuska yachachikusqanta uyarinanku tiyan (Deu. 31:12; Pro. 29:15). Jinamanta wakkunata jatunpaq qhawasunchik, Jehovamantaq yachachiwasqanchikmanta pachis nisunchik.
4. ¿Imaraykutaq jatun tantakuyman rispa Diosta jatunchanapaqjina pʼachallikunanchik tiyan?
4 Diosta jatunchanapaqjina pʼachallikunachik. Qayna wata jatun tantakuypi, kay umallirichiypiqa: “Cristiano kasqanchikmanjina allinta purinanchik tiyan” nisqapi, sutʼinchakurqa imaynatachus Diospa kamachisnin, chiqa cristianos kasqankumanjina allinta pʼachallikunankupaq, kʼachanchakunankupaqpis, mayta kallpachakusqankumanta. Achkha hermanos chay yuyaychaykunata japʼisqankumanta pachis ninku. Kay watapi, jinallatataq kallpakunanchik tiyan. Pʼachallikusqanchikqa Jehovata munakusqanchikta rikuchin, paymanta sutʼinchasqanchiktataq may sumaqpaq qhawachin. Sapa pʼunchay Diosta jatunchanapaqjina ‘maychus kaqta pʼachallikunanchik’, tiyan (1 Tim. 2:9, 10).
5. Mana jatun tantakuypi kachkaspapis, ¿imaynatá pʼachallikusunchik?
5 ¿Jatun tantakuyman rinallapaqchu allinta pʼachallikunanchik tiyan? Yuyariy, tukuypis maypichus jatun tantakuy ruwakuchkan chaypi, tarjetitanchikta qhawanqanku. Chayrayku pʼachallikusqanchikqa, mana kay saqra pachamanta runap pʼachallikusqanjinachu kanan tiyan, manaqa mayllapipis kachkaspa, jatun tantakuyman rinapaqjina pʼachallikunanchik tiyan, mana jukjina pantaloneswan, cortos nisqawan, chayri pukllana camisetaswan. Jinamanta, Jehovap kamachisnin kasqanchikta rikuchisunchik, sunquntataq kusichisunchik.
6. ¿Imataq kanqa Diosta jatunchanapaqjina imatapis ruwaptinchik?
6 ¿Imataq kanqa jinata ruwaptinchik? Diosta jatunchanapaqjina imatapis ruwayqa, wak runaswan Diosmanta, parlananchikpaq, allinpaq qhawanawanchikpaq ima yanapawanchik. Juk tantakuy tukukuptin, jinata juk policia nirqa: “Mana jaykʼaqpis kayjina kʼacha runastaqa qhawarqaykuchu. Qamkunaqa, Dios munasqanmanjina kawsankichik”, nispa. Ari, maychus kaqta ruwaspaqa, jatunpaq qhawanakunchik, puraqmanta munanakunchik, astawanpis Jehovata jatunchanchik (1 Ped. 2:12). Mana chayllachu, astawanpis Diosta manchachikusqanchikta, Jehová Tatanchik yachachiwasqanchikta may sumaqpaq qhawasqanchikta rikuchillasuntaq (Heb. 12:28). Jatun tantakuyninchikta: “¡Jesuspa qhipanta purina!” manchayta suyakuspa, atisqanchikmanjina Diosta jatunchanallapuni kachun.
[3 paginapi recuadro]
Kimsa pʼunchayniyuq jatun tantakuypaq yuyariykuna
◼ Tantakuyta qallarinapaq. Kay wakichiyqa kimsantin pʼunchay 9.20 qallarinqa, punkuqa pusaq horamantapacha kichakunqa. Reinomanta takiykunata uyariytawan, tantakuyninchik jatunpaq qhawasqa kananpaq, tukuypis tiyakamunanchik tiyan. Viernes pʼunchaypi, sábado pʼunchaypipis tantakuyqa 5.05 tukukunqa, domingo pʼunchaypitaq 4.10 tukukunqa.
◼ Mana qhasipaq tiyanasta japʼinachu. Qamwan jamuqkunallapaq, chayri wasiykipi kaqkunallapaq tiyanata japʼiyta atinki.
◼ Mikhuna. Khuskan pʼunchaypi mikhunata rantiq lluqsinaykimantaqa, mikhunata apakuy, imallapipis apakuspataq tiyanap uranman churawaq. Mana mikhunata jatuchaq mankaspi apanachu, nitaq alcoholniyuq ima ukyaykunatapis apanachu.
◼ Munasqanchikmanjina qullqita churana. Kay jatun tantakuy allinta ruwakunanpaq, chantapis runaman astawan willamunapaq ima, Tantakuy Wasipi, jatun tantakuypipis, tukuy sunquwan qullqita atisqanchikmanjina churasunman.
◼ Imanarpakuptinchik. Kaymanqa mana qhasillapaq rinachu tiyan. Pillapis jatun tantakuypi unquykuptin, chayri urmaptin yanapaqman willachun, paytaq “Departamento de primeros auxilios” nisqaman willanqa, yanapanankupaq.
◼ Mana allinta uyariqkunapaq. Tukuy umallirichiykunaqa radiopi FM, nisqapi uyarikunqa, chayrayku allinta uyarinankupaq ichapis juchʼuy radituta apakunkuman.
◼ Grabadoras. Jatun tantakuyman, grabadorata apaptinchikqa mana corrienteman churanachu, umallirichiykunata tukuy allinta uyarinankupaq mana grabadorata sinchita chʼaqwachinachu.
◼ Sírvase visitar formularios nisqata. Jatun tantakuypi Diosmanta astawan yachakuyta munaq runawan parlaptinchikqa kay formulario S-43 nisqaman sutinta, maypi wasin kasqanta ima, qillqayta atisunman. Tukuy Jehovamanta sutʼinchaqkuna jukta chayri iskay formulariosta jatun tantakuyman apananku tiyan. Kay formulariotaqa Departamento de Publicaciones de la asamblea, nisqamanta urqhuyta atinkuman. Chay formulario nisqata juntʼachiytawantaq chay departamento nisqaman jaywananku tiyan, chayri qutuchakuypi, kuraqkunamanta secretarioman jaywankuman (Reinomanta willayninchik 2005 watamanta febrero killamanta suqta paginata qhawariy).
◼ Restaurantespi. Wakin llaqtakunapiqa, restaurantespi mikhuyta jaywaqman qullqita saqiyta yachanku.