Jatun tantakoyqa cheqa kajta rikuchin
1. Israelitas fiestasninkupi, ¿imastá ruwayta atej kanku?
1 Ñaupa tiempomanta israelitasqa, watapi kinsa kutita fiestasninkuta ruwanankupaj tantakoj kanku. Chay fiestasman qharislla rinanku kajtinpis, ashkha familias Jerusalenman rej kanku (Deu. 16:15, 16). Chay tantakuykunapeqa, cheqa kajpi tʼukuriyta aterqanku. Sutʼincharinapaj paykunaqa kaykunapi tʼukuriyta atej kanku: Jehová Dios may khuyakuyniyoj kasqanpi, pichus tukuy kamachisninman necesitasqankuta qon (Deu. 15:4, 5). Chayri Jehová yanapananpi, jarkʼananpi ima atienekuyta atisqankupi (Deu. 32:9, 10). Diospa llajtan jinaqa, cheqan kayninta rikuchinankupi ima (Deu. 7:6, 11). Kunanpis, jatuchaj tantakuykunaqa, kikinta ruwanallapajtaj yanapawanchej.
2. ¿Imaynamantá jatun tantakuy cheqa kajta entiendenapaj yanapawanchej?
2 Jatun tantakoyqa cheqa kajta entiendenapaj yanapawanchej. Jatuchaj tantakuykunapeqa: umallirichiykuna, rikuchiykuna, hermanosta tapuriykuna, dramas ima kan. Chaykunataj cheqa kajta entiendenapaj, yachakusqanchejman jina kausanapaj ima yanapawanchej (Juan 17:17). Diospa llajtanqa, Jallpʼantinmanta runaspaj yachachiykunata mayta wakichishan (Mat. 24:45-47). Chay tantakuypi kanaykipaj, sumajta uyarinaykipaj ima, ¿wakichisqachu kashanki?
3. ¿Imataj jatun tantakuypi sumajta yachakunapaj yanapawasun?
3 Chay tantakuypi sumajta yachakunapajqa, sumajta uyarinanchej tiyan, kinsantin pʼunchaytataj rinanchej tiyan. Ñaupajmanta patronniykiwan chay pʼunchaykuna llankʼaj mana rinaykita parlariy. Chantapis chay tantakuypi sumajta yachakunaykipaj, chʼisisnin allinta samarikuy. Umallirichejta qhaway, parlashasqanmantataj cuadernoykipi anotakuy. Ama celularniykita waj aparatosniykita ima japʼichiychu. Umallirichikushajtin, ama wajkunawan parlaychu, nitaj celularnejta mensajesta apachiychu.
4. ¿Imaynatá tatas wawasninkuta jatun tantakuypi sumajta yachakunankupaj yanapankuman?
4 Qanchis kaj wataspi, chʼujllas fiestapi israelitasqa, Leymanta leejta uyarinankupaj tantakoj kanku. Tukuy familias “wawas” ima uyarinankupaj, yachakunankupaj ima tantakoj kanku (Deu. 31:12). Kunanpis, jatun tantakuypi umallirichiykunata familias khuska tiyakuspa uyarisqankumanta, wawitas mana puñuspa sumajta uyarisqankumanta ima, mayta kusikunchej. Ichapis allin kanman tantakuypi anotakusqaykichejta sapa chʼisi yuyarinaykichej. Tatasqa, wawasninkuta “munayninta ruwajta” mana saqenankuchu tiyan “wampu kayqa wawajpa sonqompi kasha[sqanrayku]”. Allin kanman jatun tantakuypi samarejtinchej, maypi alojasqa kashajtinkupis wawasninkuta waynuchusña kajtinkupis qhawananku (Pro. 22:15; 29:15).
5. ¿Imaynatá ruwasqasninchej cheqa kajta allinpi rikuchin?
5 Ruwasqasninchej cheqa kajta allinpi rikuchin. Jatun tantakuy ruwakun chay llajtapi kashajtinchej, ruwasqasninchej cheqa kajta allinpi rikuchin (Tito 2:10). Alojamientopi llankʼajkunaqa, alojakojkuna kʼacha, pacienciayoj kasqankumanta mayta kusikunku (Col. 4:6). Qayna wata uj alojamientopi qhepakojkunamanta, alojamientomanta dueño nerqa: “Jehovamanta sutʼinchajkuna alojakusqankumanta kusikuyku, imaraykuchus kʼachas runas kanku. Alojamientopi llankʼajkunatapis jatunpaj qhawanku, alojamientotapis cuidanku”, nispa.
6. Jatun tantakuy ruwakushan chay llajtapi kashajtinchej, ¿imaynatá pʼachallikusqanchej cheqa kajta allinpi rikuchinman?
6 Tarjeta de solapa nisqata churakusqanchejqa, mana hermanosninchej pichus kasqanchejta yachanallankupajchu, nitaj jatun tantakuyman risqanchejta rikuchinallapajchu, manaqa Jehová Diosta yupaychasqanchejta runa yachananpaj. Runasqa, chay tarjetayoj kasqanchejta reparaspa, maychus kajta pʼachallikusqanchejta, mana kay pachamanta runas jinachu aychaj munayninta rijkʼarichinapaj jina pʼachallikusqanchejta yachanqanku (1 Tim. 2:9, 10). Chayrayku maychus kajta pʼachallikuna, jatun tantakuy ruwakushan chay llajtapi kashaspa, maypichus alojakushanchej chayman rinaykipaj ima. Mana allinchu kanman uj jina pantaloneswan, camisetaswan pʼachallikunanchej, imaraykuchus chayqa Jehovamanta sutʼinchaj kasqanchejta mana rikuchinmanchu. Chay tantakuy uj estadionpi ruwakojtinpis maychus kajta pʼachallikuna tiyan. Tantakuy tukukusqantawan, mikhoj riyta munaspaqa, maychus kajta pʼachallikunanchej tiyan, imaraykuchus Diosta yupaychaj jinallapuni kanchej.
7. Jatun tantakuypi, ¿imaynamantá hermanoswan kusirikusunman?
7 Israelitasqa, tukuy llajtasmanta hermanoswan fiestasninkupi kusikoj kanku, chaytaj ujchasqa kanankupaj yanapaj (Hech. 2:1, 5). Jatuchaj tantakuykunapeqa, waj lugaresmanta hermanoswan khuska kaspa kusikunchej. Runasqa, chayta rikuspataj mayta tʼukunku (Sal. 133:1). Mikhunata rantikoj rinamantaqa, aswan allin kanman mikhunata apakamunanchej, hermanoswan rejsinakunapaj, parlapayarikunapaj ima.
8. ¿Imaraykutaj jatun tantakuypi yanapakunanchej tiyan?
8 Runasqa, jatun tantakuyninchej sumaj wakichisqa kasqanmanta tʼukulla qhepakunku, astawanraj chaypi llankʼajkuna ni imata mañaspalla yanapakusqankumanta. Qanrí jatun tantakuypi tukuy sonqo, ¿yanapakuyta munawajchu? (Sal. 110:3.) Ashkha tatas jatun tantakuypi wawasninkuwan khuska yanapakunku, ajinamanta wawasninkuta wajkunata yanapakuyta yachachinku. Manchali kasqaykirayku mana masichakuyta atejtiykeqa, jatun tantakuypi llankʼay amigosta ruwakunaykipaj yanapasonqa. Uj hermana nerqa: “Jatun tantakuypeqa, mana ni pita rejserqanichu, manaqa familiayta, amigosniyta imalla. Chay tantakuypi yanapakusqaymantapacha ashkha hermanosta, hermanasta ima rejsini. Chaytaj, ¡mayta kusichiwarqa!”, nispa. Jatun tantakuypi yanapakoyqa, ashkha hermanoswan masichakunapaj yanapawanchej, chaytaj mayta kusichiwanchej (2 Cor. 6:12, 13). Niraj yanapakunkichu chayqa, qotuchakuyniykimanta ancianosta tapuriy, yanapakunaykipaj imatachus ruwanaykita.
9. ¿Imatá wajkuna jatun tantakuyman jamunankupaj ruwasun?
9 Cheqa kajta yachakunankupaj wajkunata wajyarina. Ñaupaj wataspi jina jatun tantakuyman kinsa semana ñaupajta wajyarisunchej. Qotuchakuykuna willanku chaypi tukuy runasta wajyarinankupaj mayta kallpachakonqanku (“¿Imaynatá invitacionta jaywasunman?”, nisqa recuadrota leey). Puchoj invitacionestaqa, jatun tantakuyman apanayki tiyan, waj hermanos mayllapipis kashaspa runaman chay invitacionesta saqenankupaj.
10. Jatun tantakuyman wajyariy may allin kasqanmanta, wakin experienciasmanta parlariy.
10 Runas, invitacionesta saqejtinchej, ¿chay tantakuyman jamunkuchu? Uj kuti jatun tantakuypi uj yanapaj hermano, uj matrimoniota maypichus tiyakunankupaj yanaparqa. Paykuna hermanoman nerqanku: “Kay tantakuypaj uj invitacionta saqewarqayku, imapajchus kasqanta yachayta munaspataj jamuyku”, nispa. Chay matrimonioqa, chay tantakuyman rinankupaj 300 kilometros kurajta autopi viajarqanku. Waj kuti uj hermana wasimanta wasi willashaspa uj runaman invitacionta jaywarqa. Astawan yachayta munasqanta reparaspa, hermanaqa chay invitacionmanta astawan sutʼincharqa. Pisi tiemponmantaj jatun tantakuypi chay runata, amigontawan mosoj publicacionta japʼishajta rikorqa.
11. ¿Imaraykutaj sapa wata jatun tantakuykunaman rinanchej may allin?
11 Israelitas fiestasta ruwasqankoqa, Jehovaj qosqan karqa paykuna “tukuy sonqo [payta] sirvi[nankupaj]” (Jos. 24:14). Kikillantaj jatun tantakuykunapis “cheqapi[...] puri[nallapajpuni]” nisunman Diosta yupaychanallapajpuni yanapawanchej (3 Juan 3). Cheqan kajta munakojkunata, jatun tantakuykunaman sumajta yachakoj sapa wata rinankupaj kallpakusqankumanta Jehová Dios bendecinanta munayku.
[12 paginapi sutʼinchaynin]
Jatun tantakuy ruwakun chay llajtapi kashajtinchej, ruwasqasninchej cheqa kajta allinpi rikuchin
[13 paginapi sutʼinchaynin]
Jatun tantakuyman kinsa semana ñaupajta wajyarisunchej
[11-14 paginaspi recuadro]
Jatun tantakuypaj yuyarichiykuna
◼ Wakichikusqan. Jatun tantakuypaj wakichikusqanqa, kinsantin pʼunchayta 9.20 qallarenqa. Punkus, 8.00 paqarinta kicharikonqa. Chantapis, tantakuy Diosta jatunchananpaj jina qallarinanpajqa, takiykuna qallarejtinkama tiyananchejman rinanchej tiyan. Viernes, sábado pʼunchaytawanqa, 4.55 tukukonqa, domingotaj 3.40 tukukonqa.
◼ Autosta saqenapaj. Jatun tantakuypi, hermanos maypichus autoykita saqenaykita nisonqanku chaypi, mana pagaspalla autoykita saqeyta atinki, chaywanpis chayasqankuman jina kʼuchunchanqanku. Silla de ruedaspi kajkunapaj tʼaqasqa lugarpi, pikunachus chay letrerowan kajkunalla chaypi sayayta atinku. Allin kanman uj autollapi tantakuyman rinaykichej, imaraykuchus autosta saqenapaj lugarqa, mana jatunchu kayta yachan.
◼ Tiyanapaj. Qanwan tiyakojkunallapaj, autopi qanwan jamojkunallapaj, qanwan Bibliamanta yachakojkunallapaj ima tiyanasta japʼiyta atinki (1 Cor. 13:5).
◼ Mikhuna. Khuskan pʼunchaypi mikhunata rantej llojsinamantaqa, allin kanman apakunanchej. Chantapis, tiyananchej uraman yaykunanpaj jina mankasllapi mikhunata apana, manataj imatapis vidriomanta apanachu.
◼ Munasqanchejman jina qolqeta churana. Kay jatun tantakuy ruwakushasqanmanta agradecesqa kasqanchejta rikuchinapajqa, tukuy sonqo munasqanchejman jina qolqeta churasunman.
◼ Imanarpakojtinchej. Jatun tantakuypi pillapis imanarpakojtillan, aswan qayllapi kaj yanapajman willay, pichus usqhayllata Primeros Auxilios nisqaman willanqa, chaypi qhawarisqankuman jina yanapanankupaj, paykunalla hospitalman wajyanankupaj ima.
◼ Jampis. Jampista ujyashanki chayqa, necesitasqaykita apakuy, imaraykuchus jatun tantakuypi mana chaykuna kanqachu. Diabeteswan onqosqa kasqaykirayku, inyeccionta churakunayki kajtin, agujasta jatun tantakuypi, alojasqa kashanki chaypi ima, ama qʼopa bolsasman wijchʼuychu.
◼ Zapatos. Urmanapaj jina zapatosta churakusqankurayku, sapa wata ashkhas chakinkuta qʼewikunku chayri urmanku. Chayrayku mana urmanapaj jina zapatosllawan jatun tantakuyman rina, ajinamanta gradasta, rejillasta ima purishaspapis mana urmasunchu.
◼ Mana allinta uyarejkunapaj. Tukuy umallirichiykunaqa, radionejta (FM) uyarikuyta atenqa. Chayrayku, allin kanman pilasniyoj juchʼuy radiota audifonosniyojta apakunayki.
◼ Wawasta apaykachanapaj carritos, doblakoj sillas ima. Jatun tantakuymanqa, wawasta apaykachanapaj carritosta, doblakoj sillastapis mana apanachu. Chaywanpis wawasta tiyachinapaj tiyanata apayta atikun.
◼ Sírvase visitar (S-43) nisqa formulario. Allin kanman iskayllatapis Sírvase visitar nisqa formulariota apakunayki, ajinamanta mayllapipis kashaspa willajtiyki pillapis astawan yachakuyta munajtin, qhelqanaykipaj. Chay formulariota qhelqaytawanqa, Departamento de Publicaciones nisqaman saqewaj chayri jatun tantakuymanta kutimuytawan qotuchakuyniykimanta secretarioman jaywawaj (Reinomanta Willayninchik 2011 mayo killamanta, página 3 qhawariy).
◼ Restaurantes. Restaurantesman rispa, Diosta jatunchanapaj jina imatapis ruwana. Qolqeta regalana kajtenqa, regalana.
◼ Alojamiento.
1) Mashkha cuartospichus qhepakunaykichej kanqa chaykunallata tʼaqachiychej, chantapis chay cuartopi mashkha runaschus yaykunku chaykunalla qhepakuychej.
2) Waykʼunapaj cuartosllapi waykʼuna.
3) Alojamientopi maletasniykita apajkunaman qolqeta regalay. Sapa pʼunchay cuartoykita llimphuchapususqankumantataj qolqeta saqey.
4) Alojamientopi kashaspa yaku qʼoñita, waj imasta ima qojtinkoqa, ama ashkhata oqharikuychu.
5) Alojamientopi llankʼajkunaman kʼacha kaykunata rikuchina. Llankʼajkuna, ashkha ruwanasniyoj kasqankuta yuyarina. Kʼachas, khuyakuyniyoj, pacienciayoj ima kasqanchejmanta, paykuna mayta agradecekunku.
◼ Yanapakuyta munajkunapaj. Jatun tantakuypa ruwaykunasninpi yanapakojtinchej astawan kusiyta tarisun (Hech. 20:35). Yanapakuyta munajqa kay Departamento de Servicio Voluntario nisqaman chimpanan tiyan. Manaraj 16 watasniyoj kajkuna, tatankoj chayri mamankoj qhawayninwan yanapakuyta atillankumantaj.
◼ Yanapajkuna. Tukuy ancianosta, siervos ministerialesta ima kallpachayku kay Departamento de Acomodadores nisqapi yanapakunankupaj, jinamanta hermanosta yanapanankupaj, maynejpichus tiyakunankuta ima willanankupaj, kaytaqa Jehová may sumajpaj qhawan.
◼ Ñaupajta chayana. Maypichus jatun tantakuy ruwakonqa chayman horanpi chayanapaj kallpachakoyqa mayta yanapawasun. Hermanoswan parlariyta, manaraj qallarishajtin takiykunata uyariytapis atisunchej, qallarinapaj takiyta takisunchej, kay tantakuypaj mañakuyta chantá allin jamusqa kasqanchejta uyarisunchej. Astawanpis temprano chayaspa hermanosninchejta mana pantachisunchu, jinamanta Jehovata jatunpaj qhawasqanchejta rikuchisun, pichus maychus kananta ruwapuwanchej (1 Cor. 14:40).
[14 paginapi recuadro]
¿Imaynatá invitacionta jaywasunman?
Tukuy wasisman invitacionta saqenapaj pisillata parlarina kanman. Ichapis jinata nisunman: “Jallpʼantinpi runasta wajyarishayku uj sumaj tantakuyman jamurinankupaj. Kay invitacionta qanpaj apamuyku. Kayta leespa, kay tantakuymanta astawan yachakunki”, nispa. Kusiywan kayta ruway. Semana tukukuypi invitacionesta saqeshaspa, atikojtin revistastawan saqewaj.