Kimsa pʼunchay kallpachakunapaq

1. ¿Imatá jatun tantakuyninchikmanta suyasunman?

¹ Kay pachamanta runasqa Supaypa makinpi kasqankurayku espiritualmente yakumantajina chʼakichikuchkanku, Jehovataq tukuy kamachisninta kallpachachkallanpuni (Isa. 58:11). Jehová sapa wata kimsa pʼunchaypaq jatun tantakuypi chayta rikuchiwanchik. Jatun tantakuyninchik qayllapiña kasqanrayku, ñawpaqmanta wakichikuyqa puraqmanta kallpachakunanchikpaq yanapawasun. ¿Imaynatá wakichikusunman? (Pro. 21:5.)

2. ¿Imastataq ñawpaqmanta wakichikuna tiyan?

² Kimsantin pʼunchayta kanaykipaq llamkʼayniykita, tiempoykita ima sumaqta qhawarikuy. Sapa pʼunchay niraq tantakuy qallarichkaptin machkha tiempopichus chayanaykita, tiyanata japʼikamunaykipaq ima, ¿yachankiñachu? Jehová sumaq mikhunatajina wakichipuwasqanchikta mana pisipaqchu qhawayta munanchik, ¿icharí? (Isa. 65:13, 14.) ¿Yachankiñachu maypichus alojakunaykita, imapichus rinaykita ima?

3. Jatun tantakuy sapa jukta, chayri familianchikta yanapananpaq, ¿imastá ruwasunman?

³ Umallirichikuchkaptin mana wak imaspi yuyanapaq, ¿imastá ruwasunman? Atikuptinqa chʼisisninpi temprano puñuy, umallirichiqta qhaway, Bibliap pʼitisninta maskʼay, cuadernoykipitaq qillqay. Familias khuska tiyakunanku allin kanman, ajinamanta tatas wawasninkuta sumaqta uyarinankupaq yanapanqanku (Pro. 29:15). Chʼisisninpi, familiajina yachakusqankumanta ichapis parlarinkuman. Jatun tantakuypi yachachikusqanta mana qunqanankupaq, Familiapi Diosta Yupaychanapaq Chʼisipi uyarisqankumanta, qillqasqankumanta ima ukhunchariyta atinkuman.

4. Wakkunapis espiritualmente kallpachakunankupaq, ¿imatataq ruwasunman?

⁴ Imaynatá wakkunata yanapasunman. Wakkunapis espiritualmente kallpachasqas kanankuta munanchik. Machitu hermanosninchikpi chayri ima chʼampayniyuq kasqankurayku mana riyta atiqkunapi, ¿tʼukurirqankichu? Qutuchakuypi, ajinapi rikukuq hermanota, ¿yanapariwaqchu? (1 Juan 3:17, 18.) Ancianos, astawanraq willamunapaq kamachiqkuna, paykunata yanapanankuta suyakun.

5. ¿Imaynatá waqyarisunchik? (Kay paginapi recuadrotawan qhawariy.)

⁵ Ñawpa wataspijina, kimsa semana ñawpaqta, jatun tantakuyman runasta waqyarisunchik. Sapa qutuchakuy, tukuy invitacionesninkuta tukunankupaq kallpachakunanku tiyan, tukuy wasisman chayanankupaqpis. Familiaykipi invitacionesniykichikta mana tukunkichikchu chayqa, jatun tantakuyman apaychik, jatun tantakuypa llaqtanpi kachkaptiykichik mayllapipis kachkaspa saqinaykichikpaq. Viernes pʼunchayta imaynatachus jaywanata sutʼinchakunqa. Mana tukunaykichikpaqjina reparaptiykichiktaq jatun tantakuyman yaykuchkaptiykichik juk yanapaqman jaywaychik. Juk invitacionta jallchʼakuyta ama qunqaychu, imaptinchus domingo tardepi qhipa kaq umallirichiypi chaymanta parlakunqa.

6. ¿Ima kʼacha kaykunasninchiktataq jatun tantakuypi rikuchisunman?

⁶ Kʼacha kayninchik wakkunata kallpachan. Kay tiempopi runas “paykunallapaj munajkuna” kaptinkupis, hermanosninchikwan khuska kaspa may kusisqa sientekunchik, imaraykuchus kʼacha kaykunasninkuta rikuchinankupaq kallpachakunku (2 Tim. 3:2-4). ¿Imaynasmantá kʼacha kaykunasninchikta rikuchinchik? Pusaq paqarinta punkus kicharikuptin mana tanqanakuspalla, nitaq usqhayllata yaykuspa wakkunap allinninkuta maskʼasqanchikta rikuchisunchik, tiyanasta japʼiyta atinchik wasinchikpi tiyakuqkunallapaq, autonchikpi riqkunallapaq, Bibliata ñuqanchikwan yachakuqkunallapaq ima. Manaraq qallarichkaptintaq takiykunata uyarinapaq kamachiq tiyakamunata niwaptinchik kasukuna. Celularninchikta chayri wak aparatosninchikta mana chʼaqwananpaqjina churana, mana wakkunata pantachinanpaq. Kʼacha kaykunasninchikta umallirichikuchkaptin mana parlaspa, mikhuspa, puriykachaspa, nitaq celularniqta mensajesta apachispa rikuchinchik.

7. ¿Imaynatá hermanoswan puraqmanta kallpachakusunman?

⁷ Hermanoswan parlarina. Jatun tantakuykunaqa hermanosninchikwan khuska juk sunqulla kanapaq yanapawanchik (Sal. 133:1-3). Wak qutuchakuymanta hermanosta chayri hermanasta riqsinaykipaq, paykunawan masichakunaykipaq ima, ¿manachu allin kanman kallpachakunayki? (2 Cor. 6:13.) Ichá juk hermanollatapis chayri juk familiallatapis sapa pʼunchay riqsinaykipaq kallpachakuwaq. Khuskan pʼunchaytaq chayta ruwanapaq yanapawanchik. Chayrayku juk restauranteman mikhuq lluqsinaykimantaqa allin kanman pisi mikhunallata apakunayki, ajinamanta hermanoswan astawan masichakunaykipaq tiempo kanqa.

8. Jatun tantakuypi, ¿imaraykutaq yanapakunanchik tiyan, chantá imapitaq yanapakusunman?

⁸ Hermanosninchikwan khuska jatun tantakuypi Jehovapaq llamkʼayqa mayta kallpachawanchik. Ichapis kay tantakuypi imallapipis llamkʼawaq, chayri qutuchakuyniyki llimphuchanan kaptin yanapakuwaq (Isa. 6:8). Ni imapi yanapakuchkankichu chayqa, kay Yanapayta Munaqkunapaq nisqaman chimpaykuy. Juk makilla llamkʼaptinchikqa usqhayllata tukunchik, aswan kusiywantaq ruwanchik.

9. Jatun tantakuy pʼunchaykunapi ruwayninchikta, pʼachallikusqanchikta ima, ¿imaraykutaq allinta qhawarikunanchik tiyan?

⁹ Ruwasqanchikqa wakkunata yanapan. Chiqa Diosta jatunchachkasqanchikta mana jatun tantakuyllapichu rikuchisun, manaqa kimsantin pʼunchaykunata. Chayrayku pillapis rikuwaptinchik mana kay pachamanta runasjinachu kasqanchikta reparanan tiyan (1 Ped. 2:12). Pʼachallikusqanchik, kʼachanchakusqanchik ima jatun tantakuypi, hotelpi chayri restaurantepi kaptinchik, Jehovata jatunchananpaqjina kanan tiyan (2 Tim. 2:9, 10). Tarjeta de solapa nisqata churakuptinchikqa, Jehovamanta sutʼinchaqkuna kasqanchikta runas yachanqanku chantapis jatun tantakuymanta, Jehová Diosninchikmanta ima wakkunawan parlarinapaq yanapallawasuntaq.

10. Hotelpi, chayri restaurantepi llamkʼaqkuna jatun tantakuyninchikmanta parlanankupaq, ¿imatá ruwasunman?

¹⁰ Hotelpi chayri restaurantepi llamkʼaqkunawan, ¿imaynatá qhawachikuyta munanchik? Machkha cuartospichus qhipakusunchik chaykunallata tʼaqana tiyan, imaraykuchus wak hermanospis cuartosta maskʼanqanku. Hotelman yaykunapaq chayri lluqsinapaq juntʼa kaptinqa, pacienciayuq, kʼachas ima kana tiyan (Col. 4:6). Chantá restaurantepi chayri hotelpi llamkʼaqkunaman qʼipisninchikta apaysiwasqanchikrayku, cuartonchikta kʼuchunchapuwasqanchikrayku chayri imallatapis ruwapuwasqanchikrayku qullqita regalana.

11. ¿Ima ruwaykunataq chiqa cristianos kasqanchikta rikuchin?

¹¹ Jatun tantakuy pʼunchaykunapi ruwasqasninchikwan, ¿imatá rikuchinchik? Juk periódico nisqanmanjina, maypichus jatun tantakuy ruwakurqa chay localmanta gerente jinata nisqa: “Kʼacha runas kanku, sapa wata jamusqankuqa mayta kusichiwayku”. Qayna wata, ima hotelpichus hermanos qhipakurqanku chaypi juk runa billeteranta chinkachisqa. Billeteranta, tukuy qullqinwan ima kutichipuytawan hotelmanta gerente chay runaman nisqa: “Jehovamanta sutʼinchaqkuna kay qayllapi tantakuyninkuta ruwasqankuqa sumaq karqa, kay hotel paykunallamanta juntʼa kasqanpis. Manachus kaypi kankuman chayqa billeteraykiqa chinkanmanpunichá karqa”, nispa.

12. Jatun tantakuy qayllaykamusqanmanjina, ¿imatá ruwanapaq kallpachakunanchik tiyan, imaraykú?

¹² Kay watapaq jatun tantakuyninchik usqhayllata qayllaykamuchkan. Wakichikusqan mayta kallpachanawanchikpaq achkha tiempota, kallpata ima churakun. Jehová, llaqtan ima wakichipususqankuta uyarinaykipaq, kimsantin pʼunchaykunata kanaykipaq kallpachakuy. Kʼacha kayniyki, allin ruwasqasniyki, kusisqa kasqayki ima wakkunata kallpachananpaqjina kachun. Juk runa qayna wata jamusqanmanta qillqarqa: “Ni jaykʼaq chayjina kusisqa kasqayta yuyarikunichu”, nispa. Ajinallatataq ñuqanchikpis sientekusunhik.

[4 paginapi sutʼinchaynin]

Ñawpa wataspijina, kimsa semana ñawpaqta, jatun tantakuyman runasta waqyarisunchik

[6 paginapi sutʼinchaynin]

Pʼachallikusqanchik, kʼachanchakusqanchik ima jatun tantakuypi, hotelpi chayri restaurantepi kaptinchik, Jehovata jatunchananpaqjina kanan tiyan

[7 paginapi sutʼinchaynin]

Kʼacha kayniyki, allin ruwasqasniyki, kusisqa kasqayki ima wakkunata kallpachananpaqjina kachun

[4-7 paginaspi recuadro]

Jatun tantakuypaq 2011 watapaq yuyarichiykuna

◼ Wakichikusqan. Jatun tantakuypaq wakichikusqanqa, kimsantin pʼunchayta 9.20 qallarinqa. Punkus, 8.00 paqarinta kicharikunqa. Chantapis, tantakuy Diosta jatunchananpaqjina qallarinanpaqqa, takiykuna qallariptinkama tiyananchikman rinanchik tiyan. Viernes, sábado pʼunchaytawanqa, 4.55 tukukunqa, domingotaq 3.40 tukukunqa.

◼ Autosta saqinapaq. Jatun tantakuypi, hermanos maypichus autoykita saqinaykita nisunqanku chaypi, mana pagaspalla autoykita saqiyta atinki, chaywanpis chayasqankumanjina kʼuchunchanqanku. Silla de ruedaspi kaqkunapaq tʼaqasqa lugarpi, pikunachus chay letrerowan kaqkunalla chaypi sayayta atinku. Allin kanman juk autollapi tantakuyman rinaykichik, imaraykuchus autosta saqinapaq lugarqa, mana jatunchu kayta yachan.

◼ Tiyanapaq. Qamwan tiyakuqkunallapaq, autopi qamwan jamuqkunallapaq, qamwan Bibliamanta yachakuqkunallapaq ima tiyanasta japʼiyta atinki (1Cor. 13:5).

◼ Mikhuna. Khuskan pʼunchaypi mikhunata rantiq lluqsinamantaqa, allin kanman apakunanchik. Chantapis, tiyananchik uraman yaykunanpaqjina mankasllapi mikhunata apana, manataq imatapis vidriomanta apanachu.

◼ Munasqanchikmanjina qullqita churanapaq. Kay jatun tantakuy allinta ruwakuchkasqanmanta agradecesqa kasqanchikta rikuchinapaqqa, tukuy sunqu munasqanchikmanjina qullqita churasunman.

◼ Imanarpakuptinchik. Jatun tantakuypi pillapis imanarpakuptillan, aswan qayllapi kaq yanapaqman willay, pichus usqhayllata Primeros Auxilios nisqaman willanqa, chaypi qhawarisqankumanjina yanapanankupaq, paykunalla hospitalman waqyanankupaq ima.

◼ Jampis. Jampista jukyachkanki chayqa, necesitasqaykita apakuy, imaraykuchus jatun tantakuypi mana chaykuna kanqachu.

◼ Zapatos. Urmanapaqjina zapatosta churakusqankurayku, sapa wata chakinkuta qʼiwikunku chayri urmanku. Chayrayku mana urmanapaqjina zapatosllawan jatun tantakuyman rina, ajinamanta gradasta, rejillasta ima purichkaspapis mana urmasunchu.

◼ Mana allinta uyariqkunapaq. Tukuy umallirichiykunaqa, radioniqta (FM) uyarikuyta atinqa. Chayrayku, allin kanman pilasniyuq juchʼuy radiota audifonosniyuqta apakunayki.

◼ Wawasta apaykachanapaq carritos, doblakuq sillas ima. Jatun tantakuymanqa, wawasta apaykachanapaq carritosta, doblakuq sillastapis mana apanachu. Chaywanpis wawasta tiyachinapaq tiyanata apayta atikun.

◼ Sírvase visitar (S-43) nisqa formulario. Allin kanman iskayllatapis Sírvase visitar nisqa formulariota apakunayki, ajinamanta mayllapipis kachkaspa willaptiyki pillapis astawan yachakuyta munaptin, qillqanaykipaq. Chay formulariota qillqaytawanqa, Departamento de Publicaciones nisqaman saqiwaq chayri jatun tantakuymanta kutimuytawan qutuykimanta secretarioman jaywawaq (Reinomanta Willayninchik 2009 noviembre killamanta, página 4 qhawariy).

◼ Restaurantes. Restaurantesman rispa, Diosta jatunchanapaqjina imatapis ruwana. Qullqita regalana kaptinqa, regalana.

◼ Hoteles. Kay yuyaychaykunaqa, wakin lugaresllapaq:

1) Machkha cuartospichus qhipakunaykichik kanqa chaykunallata tʼaqachiychik chantapis chay cuartopi machkha runaschus yaykunku chaykunalla qhipakuychik.

2) Waykʼunapaq cuartosllapi waykʼuna.

3) Hotelpi maletasniykita apaqkunaman qullqita regalay. Sapa pʼunchay cuartoykitapis llimphuchaqpaq qullqita saqiy.

4) Hotelpi kachkaspa yaku qʼuñita, wak imasta ima quptinkuqa, ama achkhata uqharikuychu.

5) Hotelpi llamkʼaqkunaman kʼacha kaykunata rikuchina. Achkha ruwanasniyuq kasqankuta yuyarina. Kʼachas, khuyakuyniyuq, pacienciayuq ima kasqanchikmanta, paykuna mayta agradecekunku.

◼ Yanapakuyta munaqkunapaq. Jatun tantakuypa ruwaykunasninpi yanapakuptinchik astawan kusiyta tarisun (Hech. 20:35). Yanapakuyta munaqqa kay Departamento de Servicio Voluntario nisqaman chimpanan tiyan. Manaraq 16 watasniyuq kaqkuna, tatankup chayri mamankup qhawayninwan yanapakuyta atillankumantaq.

◼ Yanapaqkuna. Tukuy ancianosta, siervos ministerialesta ima kallpachayku kay Departamento de Acomodadores nisqapi yanapakunankupaq, jinamanta hermanosta yanapanankupaq, mayniqpichus tiyakunankuta ima willanankupaq, kaytaqa Jehová may sumaqpaq qhawan.

◼ Ñawpaqta chayana. Maypichus jatun tantakuy ruwakunqa chayman horanpi chayanapaq kallpachakuyqa mayta yanapawasun. Hermanoswan parlariyta, manaraq qallarichkaptin takiykunata uyariytapis atisunchik, qallarinapaq takiyta takisunchik, kay tantakuypaq mañakuyta chantá allin jamusqa kasqanchikta uyarisunchik. Astawanpis temprano chayaspa hermanosninchikta mana pantachisunchu, jinamanta Jehovata jatunpaq qhawasqanchikta rikuchisun, pichus maychus kananta ruwapuwanchik (1 Cor. 14:40).

[5 paginapi recuadro]

¿Imaynatá invitacionta jaywasunman?

Tukuy wasisman invitacionta saqinapaq pisillata parlarina kanman. Ichapis jinata nisunman: “Jallpʼantinpi runasta waqyarichkayku juk sumaq tantakuyman jamurinankupaq. Kay invitacionta qampaq aparimuyku. Kayta ñawirispa, kay tantakuymanta astawan yachakunki”, nispa. Invitacionpa qallariynin yachakuyta munananpaqjina ruwasqa kachkan, qhawarinanpaqtaq invitacionta jayway. Kusiywan kayta ruway. Semana tukukuypi invitacionesta saqichkaspa, atikuptin revistastawan saqiwaq.