Diosta jatunchanapaj jina imatapis ruwana
1. ¿Imaraykutaj runas jatun tantakuy kasqanta usqhayllata reparanku?
1 Runasqa jatun tantakuypi kasqanchejta usqhayllata reparanku. Ashkha llajtaspi, jatun tantakuy ruwakushajtin telenejta, radionejta, periodicosnejta ima willakun. Alojamientos, mikhuna lugarespis hermanosmanta juntʼa, ashkha hermanostataj tarjeta solapasniyojta callespi rikukun. Chayrayku jatun tantakuyman rispa, Diosta jatunchanapaj jina imatapis ruwanapaj, wakin yuyaychaykunata qhawarisun (1 Ped. 2:12).
2. Jatun tantakuy ruwakusqan llajtapi, ¿imaynatá pʼachallikusqanchejwan Diosta jatunchasunman?
2 Maychus kajta pʼachallikuna. Ashkha runas, jatun tantakuyninchejpi maychus kajta pʼachallikusqanchejta rikunku. Chaywanpis wakenqa, mikhoj chayri rantej rejtinchej, alojamientoman chayashajtinchej ima, imayna pʼachallisqachus kasqanchejta astawan qhawarenqanku. Chayrayku chay kutispipis Diosta jatunchanapaj jina pʼachallikunanchej tiyan. Jinamanta runasqa, Jehovaj testigosnin kasqanchejta sutʼita reparanqanku (Rom. 12:2). Chantapis runas jatun tantakuyninchejmanta yachanankupaj, waj hermanoswan rejsinakunapaj ima, tarjeta solapasninchejwan purina.
3. ¿Maykʼajtaj pacienciayoj, kʼachas ima kasqanchejta rikuchisunman?
3 Pacienciayoj, kʼachastaj kana. Kay tiempopi ashkha runas, paykunallapi yuyanku, nitaj graciastapis qoyta yachankuchu. Chayrayku pacienciayoj, kʼachastaj kasqanchejqa, kʼajarishaj pʼunchaypi chiri wayrita jina kanqa, astawanraj alojamientospi chayri mikhuna lugarespi llankʼajkunapaj (2 Tim. 3:1-5). Chantapis tiyanasta chayri mosoj publicacionesta japʼishaspa, wajkunaj allinninkuta maskʼana (1 Cor. 10:23, 24). Uj runa ñaupaj kutipi jatun tantakuyman risqanmanta nerqa: “Tantakuypi parlakusqanmanta ni imata yuyarikunichu. Chaywanpis Jehovaj testigosnin imayna kʼachaschus kasqankuta ni jaykʼaj qonqasajchu”, nispa.
4. ¿Imaraykutaj jatun tantakuypi yanapaysikuna?
4 Yanapaysikuna. Cristianosqa yanapaysikusqanchejrayku, rejsisqa kanchej (Sal. 110:3). Qanrí, ¿yanapaysikuwajchu? Uj jatun tantakuy wakichikushajtin, 600 hermanos jina tantakuna lugarta llimphuchaypi yanapakorqanku. Chay localpi llankʼajkunaqa nerqanku: “Tʼukunapaj jinapuni. Ni jaykʼajpis chay chhika runasta tukuy sonqo yanapakojta rikojchu kayku”, nispa. Arí, 2013 watapaj jatun tantakuykunata may kusiywan suyakushanchej. Imaraykuchus chaypeqa, Jehová Diosmanta uyarisun, yachakusuntaj, chantapis payta jatunchayta atisunchej.
[3 paginapi dibujo/foto]
Jatun tantakuypaj yuyarichiykuna
◼ Wakichikusqan. Jatun tantakuypaj wakichikusqanqa, kinsantin pʼunchayta 9:20 qallarenqa. Punkus 8:00 paqarinta kicharikonqa. Chantapis, tantakuy Diosta jatunchananpaj jina qallarinanpajqa, takiykuna qallarejtinkama tiyananchejman rinanchej tiyan. Viernes, sábado pʼunchaytawanqa, 4:50 tukukonqa, domingotaj 3:35 tukukonqa.
◼ Autosta saqenapaj. Jatun tantakuypi, hermanos maypichus autoykita saqenaykita nisonqanku chaypi, mana pagaspalla autoykita saqeyta atinki, chaywanpis chayasqankuman jina kʼuchunchanqanku. Silla de ruedaspi kajkunapaj tʼaqasqa lugarpi, chay letrerowan kaj autoslla chaypi sayayta atinku. Allin kanman uj autollapi tantakuyman rinaykichej, imaraykuchus autosta saqenapaj lugarqa, mana jatunchu kayta yachan.
◼ Tiyanapaj. Qanwan tiyakojkunapaj, autopi rejkunapaj, qanwan Bibliamanta yachakojkunapaj imalla, tiyanasta japʼiyta atinki. Machituspaj, onqosqaspaj ima tʼaqasqa tiyanasqa, mana ashkhachu. Chayrayku ichapis mana tukuy familiachu chaypi tiyakuyta atenqanku. Chay tiyanastaqa machituspaj, onqosqaspaj chantá paykunata yanapajkunapaj imalla saqena (1 Cor. 13:5).
◼ Mikhuna. Khuskan pʼunchaypi mikhunata rantej llojsinamantaqa, allin kanman apakunanchej. Chantapis, tiyananchej uraman yaykunanpaj jina mankasllapi mikhunata apana, manataj imatapis vidriomanta apanachu.
◼ Munasqanchejman jina qolqeta churana. Jatun tantakuy ruwakushasqanmanta agradecesqa kasqanchejta rikuchinapajqa, tukuy sonqo munasqanchejman jina qolqeta churasunman.
◼ Jampis. Jampista ujyashanki chayqa, necesitasqaykita apakuy, imaraykuchus jatun tantakuypi mana chaykuna kanqachu. Diabeteswan onqosqa kasqaykirayku, inyeccionta churakunayki kajtin, jatun tantakuypi, alojasqa kashanki chaypi ima, ama agujasta qʼopa bolsasman wijchʼuychu.
◼ Zapatos. Urmanapaj jina zapatosta churakusqankurayku, sapa wata ashkhas chakinkuta qʼewikunku chayri urmanku. Chayrayku mana urmanapaj jina zapatosllawan jatun tantakuyman rina, ajinamanta gradasta, rejillasta ima purishaspapis mana urmasunchu.
◼ Mana allinta uyarejkunapaj. Tukuy umallirichiykunaqa, radionejta (FM) uyarikuyta atenqa. Chayrayku, allin kanman pilasniyoj juchʼuy radiota audifonosniyojta apakunayki.
◼ Wawasta apaykachanapaj carritos, doblakoj sillas ima. Jatun tantakuymanqa, wawasta apaykachanapaj carritosta, doblakoj sillastapis mana apanachu. Chaywanpis wawasta tiyachinapaj tiyanata apayta atikun, sillasman kʼaskachinapaj jina kajtin.
◼ Sírvase visitar (S-43) nisqa formulario. Allin kanman Sírvase visitar nisqa formulariota apakunayki, ajinamanta mayllapipis kashaspa willajtiyki pillapis astawan yachakuyta munajtin, qhelqanaykipaj. Chay formulariota qhelqaytawanqa, Departamento de Publicaciones nisqaman saqewaj chayri jatun tantakuymanta kutimuytawan qotuchakuyniykimanta secretarioman jaywawaj.
◼ Restaurantes. Restaurantesman rispa, Diosta jatunchanapaj jina imatapis ruwana. Chaypi llankʼajkunaman qolqeta jaywana kajtenqa jaywana.
◼ Alojamiento:
1) Mashkha cuartospichus qhepakunkichej chayllata tʼaqachiychej, chantapis chay cuartopi mashkha runaschus yaykunku chaykunalla qhepakuychej.
2) Waykʼunapaj cuartosllapi waykʼuna.
3) Alojamientopi maletasniykita apajkunaman qolqeta jaywana kajtenqa jayway. Kikillantataj ruway sapa pʼunchay cuartoykita llimphuchajkunawan.
4) Alojamientopi kashaspa yaku qʼoñita, waj imasta ima qojtinkoqa, ama ashkhata oqharikuychu.
5) Alojamientopi llankʼajkunaman kʼacha kaykunasninchejta rikuchina. Llankʼajkuna, ashkha ruwanasniyoj kasqankuta yuyarina. Kʼachas, khuyakuyniyoj, pacienciayoj ima kasqanchejmanta, paykuna mayta agradecekunku.
◼ Yanapakuyta munajkunapaj. Yanapakuyta munajqa kay Departamento de Servicio Voluntario nisqaman chimpanan tiyan. Manaraj 16 watasniyoj kajkuna, tatanku, mamanku chayri waj kuraj runa qhawashajtin yanapakuyta atinkuman.
◼ Yanapajkuna. Tukuy ancianosta, siervos ministerialesta ima kallpachayku kay Departamento de Acomodadores nisqapi yanapakunankupaj. Jinamanta hermanosta yanapanankupaj, maynejpichus tiyakunankuta willanankupaj ima. Kaytaqa Jehová may sumajpaj qhawan.
◼ Ñaupajta chayana. Maypichus jatun tantakuy ruwakonqa chayman horanpi chayanapaj kallpachakoyqa mayta yanapawasun. Hermanoswan parlariyta, manaraj qallarishajtin takiykunata uyariytapis atisunchej, qallarinapaj takiyta takisunchej, kay tantakuypaj mañakuyta chantá allin jamusqa kasqanchejta nikusqanta uyarisun. Astawanpis temprano chayaspa hermanosninchejta mana pantachisunchu, jinamanta Jehovata jatunpaj qhawasqanchejta rikuchisun, pichus imatapis maychus kananta ruwan (1 Cor. 14:40).