Jatun tantakuypaj yuyarichiykuna
Wakichikusqan. Jatun tantakuypaj wakichikusqanqa, kinsantin pʼunchayta 9:20 qallarenqa. Punkus 8:00 paqarinta kicharikonqa. Chantapis, tantakuy Diosta jatunchananpaj jina qallarinanpajqa, takiykuna qallarejtinkama tiyananchejman rinanchej tiyan. Viernes, sábado pʼunchaytawanqa, 5:00 tukukonqa, domingotaj 4:00 tukukonqa.
Takiykunawan Jehovata jatunchana. Ñaupa tiempopi, Diospa llajtanqa Jehovata jatunchaj kanku takispa. Kay tiempopipis Diosta yupaychanapajqa takillanchejtaj (Sal. 28:7). Chantapis jatun tantakuypeqa, umallirichiykuna qallarinanpajña kashajtin takiykunata churamuyta yachanku. Mana uyarinallapajchu manaqa Jehovata jatunchananchejpaj, paymanta yachakunanchejpajtaj. Chayrayku takiykunata tiyanasninchejmantapacha uyarinanchejta nimuwajtinchejqa kasukunanchej tiyan, nitaj parlanallanchejpunichu tiyan. Imajtinchus chay kʼacha takiykunataqa orquesta de la Watchtower nisqapi llankʼaj hermanos wakichinku. Paykunaqa chayta grabakunanpaj qolqenkuwan Patterson Nueva York llajtaman sapa wata iskay kutita rinku. Chay takiykunata uyariytawan, Jehovata jatunchasun Reinomanta takiykunata takirispa.
Autosta saqenapaj. Jatun tantakuypi, hermanos maypichus autoykita saqenaykita nisonqanku chaypi, mana pagaspalla autoykita saqeyta atinki, chaywanpis chayasqankuman jina kʼuchunchanqanku. Silla de ruedaspi kajkunapaj tʼaqasqa lugarpi, chay letrerowan kaj autoslla chaypi sayayta atinku. Allin kanman uj autollapi tantakuyman rinaykichej, imaraykuchus autosta saqenapaj lugarqa, mana jatunchu kayta yachan.
Tiyanapaj. Punku kicharikusqantawan ama atipanakupi jina correnachu tiyanata japʼikoj. Wajkunaj allinninta maskʼay, mana munasqayki lugarpi tiyakunayki kajtinpis. Chaytaj cheqa cristianos kasqanchejta rikuchin, wajkunatapis Diosta jatunchanankupaj tanqan (Juan 13:34, 35; 1 Cor. 13:5, 6; 1 Ped. 2:12). Qanwan tiyakojkunapaj, autopi rejkunapaj, qanwan Bibliamanta yachakojkunapaj imalla, tiyanasta japʼiyta atinki. Ni imata churaychu tiyanasman mana japʼinki chayqa. Ajinamanta mayqenkunachus chʼusaj kashasqanta yachakonqa. Machituspaj, onqosqaspaj ima tʼaqasqa tiyanasqa, mana ashkhachu. Chayrayku ichapis mana tukuy familiachu chaypi tiyakuyta atenqanku. Chay tiyanastaqa machituspaj, onqosqaspaj chantá paykunata yanapajkunapaj imalla saqena.
Maychus kajta pʼachallikuna. Pʼachanchejqa, jatun tantakuypaj jina, maychus kajtaj kanan tiyan. Manataj kay pachamanta runas jinachu pʼachallikunanchej tiyan (1 Tim. 2:9). Chantapis alojamientosman chayashaspa chayri chaymanta ripushaspa chantá jatun tantakuy tukukojtinpis allin pʼachallisqallataj kananchej tiyan. Ajinamanta jatun tantakuypi tarjeta solapasninchejmanta mana pʼenqakusunchu. Wajkunamanpis willariyta atillasun. Jatun tantakuyninchejpi allin rijchʼayniyoj kasqanchej, pʼachallikusqanchejpis, llampʼu sonqo runasta Bibliamanta uyarinankupaj yanapanqa, Jehová Diostataj kusichenqa (Sof. 3:17).
Celular chayri waj aparatos. Celularniykita chayri waj aparatota apanki chayqa, mana chʼajwananpaj jina churay. Chantapis, fotosta orqhonapaj camarata, filmadorata, tabletata chayri waj aparatota apanki chayqa, mana wajkunata pantachinapaj jina chayri jarkʼanapaj jina apaykachay. Wajkunaj allinninta maskʼaspa, chay tantakuypi kashaspa mana celularnejta mensajesta chayri qhasi mana kajta correosta apachiychu.
Mikhuna. Khuskan pʼunchaypi mikhunata rantej llojsinamantaqa, allin kanman apakunanchej. Chantapis, tiyananchej uraman yaykunanpaj jina mankasllapi mikhunata apana, manataj imatapis vidriomanta apanachu.
Munasqanchejman jina qolqeta churana. Jatun tantakuy ruwakushasqanmanta agradecesqa kasqanchejta rikuchinapajqa, tukuy sonqo munasqanchejman jina qolqeta churasunman. Qolqeta chequenejta churayta munajkunaqa, Watch Tower and Tract Society of Pennsylvania nisqa sutiwan qhelqananku tiyan.
Jampis. Jampista ujyashanki chayqa, necesitasqaykita apakuy, imaraykuchus jatun tantakuypi mana chaykuna kanqachu. Diabeteswan onqosqa kasqaykirayku inyeccionta churakunayki kajtin, jatun tantakuypi, alojasqa kashanki chaypi ima, ama agujasta qʼopa bolsasman wijchʼuychu.
Mana imanarpakunapaj. Mana llustʼanapaj nitaj miskʼanapaj allinta qhawakuna. Urmanapaj jina zapatosta churakusqankurayku, sapa wata ashkhas chakinkuta qʼewikunku chayri urmanku. Chayrayku mana urmanapaj jina zapatosllawan jatun tantakuyman rina, ajinamanta gradasta, rejillasta ima purishaspapis mana urmasunchu.
Mana allinta uyarejkunapaj. Tukuy umallirichiykunaqa, radionejta (FM) uyarikuyta atenqa. Chayrayku, allin kanman pilasniyoj juchʼuy radiota audifonosniyojta apakunayki.
Wawasta apaykachanapaj carritos, doblakoj sillas ima. Jatun tantakuymanqa, wawasta apaykachanapaj carritosta, doblakoj sillastapis mana apanachu. Chaywanpis wawasta tiyachinapaj tiyanata apayta atikun, sillasman kʼaskachinapaj jina kajtin.
Perfumes. Ashkha jatun tantakuykunaqa, jatuchaj wisqʼasqa localespi ruwakun. Chayrayku wajkunaj allinninta maskʼaspa, sinchʼi qʼapaj perfumesta pisillata churakusunman. Ichá wakintaqa sinchʼi qʼapay mana allinta samajta saqenchu chayri umankuta nanachin (1 Cor. 10:24).
Persona que mostró interés (S-43) nisqa formulario. Allin kanman Persona que mostró interés nisqa formulariota apakunayki, ajinamanta mayllapipis kashaspa willajtiyki pillapis astawan yachakuyta munajtin, qhelqanaykipaj. Chay formulariota qhelqaytawanqa, Departamento de Publicaciones nisqaman saqewaj chayri jatun tantakuymanta kutimuytawan qotuchakuyniykimanta secretarioman jaywawaj.
Restaurantes. Restaurantesman rispa, Diosta jatunchanapaj jina imatapis ruwana. Chaypi llankʼajkunaman qolqeta jaywana kajtenqa jaywana.
Alojamiento:
Mashkha cuartospichus qhepakunkichej chayllata tʼaqachiychej, chantapis chay cuartopi mashkha runaschus yaykunku chaykunalla qhepakuychej.
Alojamientopi maletasniykita apajkunaman qolqeta jaywana kajtenqa jayway. Kikillantataj ruway sapa pʼunchay cuartoykita llimphuchajkunawan.
Waykʼunapaj cuartosllapi waykʼuna.
Alojamientopi kashaspa yaku qʼoñita, waj imasta ima qojtinkoqa, ama ashkhata oqharikuychu, nitaj jatun tantakuyman apakuychu.
Alojamientopi llankʼajkunaman kʼacha kaykunasninchejta rikuchina. Llankʼajkuna, ashkha ruwanasniyoj kasqankuta yuyarina. Kʼachas, khuyakuyniyoj, pacienciayoj ima kasqanchejmanta, paykuna mayta agradecekunku.
Tatasqa, wawasninkuta alojamientopi kashaspa qhawashanallanku tiyan maypichus kashasqankuta, imatachus ruwashasqankutapis.
Yanapakuyta munajkunapaj. Yanapakuyta munajqa kay Departamento de Servicio Voluntario nisqaman chimpanan tiyan. Manaraj 16 watayoj kajkunaqa, tatanku, mamanku chayri waj kuraj runa qhawashajtin yanapakuyta atinkuman.