“Allinta kawsakuychej mana creejkuna ukhupi”

1. ¿Imaraykutaj jatun tantakuyman rispa, allin kausayniyoj kasqanchejta rikuchinanchej tiyan?

¹ Runasqa, sapa wata jatun tantakuyninchejman risqanchejta qhawawanchej. Chayrayku kausayninchejqa, Diosta yupaychajkuna kasqanchejta rikuchinan tiyan (Lev. 20:26). Chantá kʼachas kasqanchej, rijchʼayninchejpis, Cristoj kamachisnin kasqanchejta rikuchinan tiyan. Qhepan jatun tantakuyninchejman chayri ashkha suyuspaj jatun tantakuykunaman rispa, ¿imaynatá “mana creejkuna ukhupi” allin kausayniyoj kasqanchejta rikuchisunman, Diostataj jatunchasunman? (1 Ped. 2:12.)

2. Jatun tantakuypi kashaspa, ¿ima kutispitaj cristianos kasqanchejta rikuchisun?

² Cristianos kasqanchejta rikuchina. Purajmanta munanakusqanchej, chantá ‘mana creejkunata’ imaynatachus qhawasqanchejpis, mana kay pachamanta runas jinachu kasqanchejta rikuchin (Col. 3:9, 10; 4:5; 2 Tim. 3:1- 5). Chayrayku alojamientospi chayri mikhuna lugarespi llankʼajkunapaj kʼachas kana, pacienciakunataj, ima chʼampay kajtinpis. Chantapis chaypi llankʼajkunaman qolqeta jaywana kajtenqa jaywana.

3. ¿Imatataj tatas ruwananku tiyan, imaraykú?

³ Tatasqa, jatun tantakuypi, mikhoj rispa, chayri alojamientopi wawasninkuta qhawashanallanku tiyan (Pro. 29:15). Uj alojamientopi llankʼaj warmi, uj qhariwarmi Testigosman nerqa: “Jehovaj testigosnin jamunankuta mayta munayku. Wawasniykichejqa, wajkunata jatunpaj qhawanku, kʼachastaj kanku. Kaypi llankʼajkunaqa, allinta qankunamanta parlanku, sapa semana jamunaykichejtataj munaykuman”, nispa.

4. Ima llajtapichus jatun tantakuy ruwakushan chaypi, ¿imaynatataj pʼachallikunanchej tiyan?

⁴ Maychus kajta pʼachallikuna. Pʼachanchejqa, jatun tantakuypaj jina, maychus kajtaj kanan tiyan. Manataj kay pachamanta runas jinachu pʼachallikunanchej tiyan (1 Tim. 2:9). Chantapis alojamientosman chayashaspa chayri chaymanta ripushaspa chantá jatun tantakuy tukukojtinpis allin pʼachallisqallataj kananchej tiyan. Ajinamanta jatun tantakuypi tarjeta solapasninchejmanta mana pʼenqakusunchu. Wajkunamanpis willariyta atillasun. Jatun tantakuyninchejpi allin rijchʼayniyoj kasqanchej, pʼachallikusqanchejpis, llampʼu sonqo runasta Bibliamanta uyarinankupaj yanapanqa, Jehová Diostataj kusichenqa (Sof. 3:17).

Jatun tantakuypaj yuyarichiykuna

◼ Wakichikusqan. Jatun tantakuypaj wakichikusqanqa, kinsantin pʼunchayta 9:20 qallarenqa. Punkus 8:00 paqarinta kicharikonqa. Chantapis, tantakuy Diosta jatunchananpaj jina qallarinanpajqa, takiykuna qallarejtinkama tiyananchejman rinanchej tiyan. Viernes, sábado pʼunchaytawanqa, 4:55 tukukonqa, domingotaj 3:50 tukukonqa.

◼ Ashkha suyuspaj jatun tantakuy. Chay tantakuykunamanqa waj suyusmantapis renqanku. Sucursalqa, allinta qhawarin mashkha sillaschus necesitakusqanta, maypichus autota saqekun chayta, alojamientota ima, chayman jinataj hermanosta, waj suyusmanta hermanostapis wajyarinku. Wakin hermanos mana wajyarisqalla chay jatun tantakuykunaman rinku chayqa, ancha ashkha kankuman. Chayrayku mana jatun tantakuyniykiman riyta atinkichu chayqa, ashkha suyuspaj jatun tantakuyman ama riychu.

◼ Autosta saqenapaj. Jatun tantakuypi, hermanos maypichus autoykita saqenaykita nisonqanku chaypi, mana pagaspalla autoykita saqenki, chaywanpis chayasqankuman jina kʼuchunchanqanku. Silla de ruedaspi kajkunapaj tʼaqasqa lugarpi, chay letrerowan kaj autoslla chaypi sayanqanku. Allin kanman uj autollapi tantakuyman rinaykichej, imaraykuchus autosta saqenapaj lugarqa, mana jatunchu kayta yachan.

◼ Tiyanapaj. Punku kicharikusqantawan ama atipanakupi jina correnachu, tiyanata japʼikoj. Runa masinchejpa allinninta maskʼananchej tiyan. Chaytaj cheqa cristianos kasqanchejta rikuchin, wajkunatapis Diosta jatunchanankupaj tanqan ( Juan 13:34, 35; 1 Cor. 13:4 - 6; 1 Ped. 2:12). Qanwan tiyakojkunapaj, autopi rejkunapaj, qanwan Bibliamanta yachakojkunapaj imalla, tiyanasta japʼiyta atinki. Machituspaj, onqosqaspaj ima tʼaqasqa tiyanasqa, mana ashkhachu. Chayrayku ichapis mana tukuy familiachu chaypi tiyakuyta atenqanku. Chay tiyanastaqa machituspaj, onqosqaspaj chantá paykunata yanapajkunapaj imalla saqena.

◼ Mikhuna. Khuskan pʼunchaypi mikhunata rantej llojsinamantaqa, allin kanman apakunanchej. Chantapis, tiyananchej uraman yaykunanpaj jina mankasllapi mikhunata apana, manataj imatapis vidriomanta apanachu.

◼ Munasqanchejman jina qolqeta churana. Jatun tantakuy ruwakushasqanmanta agradecesqa kasqanchejta rikuchinapajqa, tukuy sonqo munasqanchejman jina qolqeta churasunman. Qolqeta chequenejta churayta munajkunaqa, Watch Tower and Tract Society of Pennsylvania nisqa sutiwan qhelqananku tiyan.

◼ Jampis. Jampista ujyashanki chayqa, necesitasqaykita apakuy, imaraykuchus jatun tantakuypi mana chaykuna kanqachu. Diabeteswan onqosqa kasqaykirayku inyeccionta churakunayki kajtin, jatun tantakuypi, alojasqa kashanki chaypi ima, ama agujasta qʼopa bolsasman wijchʼuychu.

◼ Mana imanarpakunapaj. Mana llustʼanapaj nitaj miskʼanapaj allinta qhawakuna. Urmanapaj jina zapatosta churakusqankurayku, sapa wata ashkhas chakinkuta qʼewikunku chayri urmanku. Chayrayku mana urmanapaj jina zapatosllawan jatun tantakuyman rina, ajinamanta gradasta, rejillasta ima purishaspapis mana urmasunchu.

◼ Mana allinta uyarejkunapaj. Tukuy umallirichiykunaqa, radionejta (FM) uyarikuyta atenqa. Chayrayku, allin kanman pilasniyoj juchʼuy radiota audifonosniyojta apakunayki.

◼ Wawasta apaykachanapaj carritos, doblakoj sillas ima. Jatun tantakuymanqa, wawasta apaykachanapaj carritosta, doblakoj sillastapis mana apanachu. Chaywanpis wawasta tiyachinapaj tiyanata apayta atikun, sillasman kʼaskachinapaj jina kajtin.

◼ Perfumes. Ashkha jatun tantakuykunaqa, jatuchaj wisqʼasqa localespi ruwakun. Chayrayku wajkunaj allinninta maskʼaspa, sinchʼi qʼapaj perfumesta pisillata churakusunman. Ichá wakintaqa sinchʼi qʼapay mana allinta samajta saqenchu chayri umankuta nanachin (1 Cor. 10:24).

◼ Sírvase visitar (S- 43) nisqa formulario. Allin kanman Sírvase visitar nisqa formulariota apakunayki, ajinamanta mayllapipis kashaspa willajtiyki pillapis astawan yachakuyta munajtin, qhelqanaykipaj. Chay formulariota qhelqaytawanqa, Departamento de Publicaciones nisqaman saqewaj chayri jatun tantakuymanta kutimuytawan qotuchakuyniykimanta secretarioman jaywawaj.

◼ Restaurantes. Restaurantesman rispa, Diosta jatunchanapaj jina imatapis ruwana. Chaypi llankʼajkunaman qolqeta jaywana kajtenqa jaywana.

◼ Alojamiento:

Mashkha cuartospichus qhepakunkichej chayllata tʼaqachiychej, chantapis chay cuartopi mashkha runaschus yaykunku chaykunalla qhepakuychej.
Alojamientopi maletasniykita apajkunaman qolqeta jaywana kajtenqa jayway. Kikillantataj ruway sapa pʼunchay cuartoykita llimphuchajkunawan.
Waykʼunapaj cuartosllapi waykʼuna.
Alojamientopi kashaspa yaku qʼoñita, waj imasta ima qojtinkoqa, ama ashkhata oqharikuychu, nitaj jatun tantakuyman apakuychu.
Alojamientopi llankʼajkunaman kʼacha kaykunasninchejta rikuchina. Llankʼajkuna, ashkha ruwanasniyoj kasqankuta yuyarina. Kʼachas, khuyakuyniyoj, pacienciayoj ima kasqanchejmanta, paykuna mayta agradecekunku.
Tatasqa, wawasninkuta alojamientopi kashaspa qhawashanallanku tiyan maypichus kashasqankuta, imatachus ruwashasqankutapis.

◼ Yanapakuyta munajkunapaj. Yanapakuyta munajqa kay Departamento de Servicio Voluntario nisqaman chimpanan tiyan. Manaraj 16 watasniyoj kajkuna, tatanku, mamanku chayri waj kuraj runa qhawashajtin yanapakuyta atinkuman.