Jatun tantakuypaq, ¿wakichikunkiñachu?

1. ¿Imaynatá juk jatun raymita wakichikun?

¹ Juk jatun raymipaqqa, mikhunata, localta ima, wakichina tiyan, chantapis runasta waqyarina, chay tukuy imata ruwayqa manchay llamkʼaypaq, ¿icharí? Chaywanpis, waqyarisqa kaqkunapis, wakichikunallankutaq tiyan, astawanraq chay raymi wak llaqtapi ruwakunan kaptinqa. Manchay llamkʼaypaq kaptinpis, ¿maytachari kusikunchik juk raymipi, sumaq mikhunata familiareswan, amigoswan ima, mikhurispaqa? Jehovamanta sutʼinchaqkunaqa, jallpʼantinpi jatuchaq chayri juchʼuy tantakuykunata ruwanqanku, Diosmanta sumaq yachachiykunata mikhunatajina japʼikunankupaq, chay Jatun Tantakuyqa, sutikun: “Wakichisqallapuni kaychik”, nisqa. Kay tantakuyta wakichinapaqqa, manchaytaña llamkʼakuchkan. Chaywanpis, chay tantakuypi kananchikpaq, yachachikusqanta sumaqta japʼikunanchikpaq ima, sapa juk wakichikunallanchiktaq tiyan (Pro. 21:5).

2. ¿Imatá ruwanayki tiyan chay sumaq mikhunawan miskʼirichikunaykipaq?

² Yachachikusqanta japʼiqanaykipaq. ¿Wakichikunkiñachu chay sumaq mikhunawan miskʼirichikunaykipaq? Kay jatun tantakuypi kimsantin pʼunchayta kanaykipaq, patronniykiwan chay pʼunchaykuna llamkʼaq mana rinaykita parlarillayña. Chantá, ¿imapichus rinaykita, maypichus alojakunaykita ima, yachankiñachu? Ancianosqa, machitusta, unqusqasta ima, jatun tantakuyman rinankupaq yanapaytaqa, mana qunqanankuchu tiyan (Jer. 23:4; Gál. 6:10).

3. ¿Imaptintaq, achkha suyusmanta jatun tantakuyman waqyarisqa kaqkunalla rinanku tiyan?

³ Yachanchikjina, wakin llaqtaspiqa, achkha suyusmanta jatun tantakuykuna ruwakunqa. Sucursalmanta hermanosqa, machkha runaschus sapa localman yaykuyta atisqankumanjinalla hermanosta rinankuta ninku, chayrayku chay tantakuyman waqyarisqa kaqkunalla rinanku tiyan. Imaraykuchus, mana waqyarisqa kaqkuna ima rinkuman chayqa, manchaytachá juntʼaykunkuman.

4. Tantakuypi sapa pʼunchaypaq wakichisqa kanapaq, ¿ima yuyarichiykunataq yanapawasun?

⁴ Chay pʼunchaypaq wakichikusqan niraq qallarichkaptin, tiyanata japʼinaykipaq, ñawpaqmanta wakichikuy. Chantapis, niraq tantakuy qallarichkaptin, wakichisqata ñawiriy, ajinamanta yachachiykunata japʼiqanaykipaq sunquykita wakichinki (Esd. 7:10). Tantakuypaq wakichikusqanta qallarichinapaq hermano, takiykuna uyarikunanta niptinkama, tiyanaykiman riy, ajinamanta takinata takinaykipaq, mañakuyta uyarinaykipaq ima, wakichisqa kanki.

5. ¿Imaynamantá familiayki jatun tantakuypi yachachikusqanta allinta uyarinman?

⁵ Tatas wawasninkuwan khuska tiyaptinkuqa, wawasninkuta umallirichiykunata allinta uyarinankupaq yanapanqanku (Deu. 31:12). Chantapis, Bibliamanta ñawirikusqanta, qampis Bibliaykipi ñawirillaytaq. Chantá, yachachikuchkasqanmanta qillqayqa, sumaqta uyarinaykipaq yanapasunqa, aswan qhipamantaq, imatachus yachachikusqanmanta yuyariyta atinki. Umallirichimuchkaptinku, mana parlanaykipaq nitaq qhasipaq tiyanaykimanta jatarinaykipaq, kallpachakuy. Ama celularniykita japʼichiychu, imaraykuchus chʼaqwaptinqa, tantakuypi kaqkunata mana uyariqta saqinmanchu. Sapa pʼunchaypaq wakichikusqan tukukuptintaq, imatachus yachakusqanchikmanta parlarisunman.

6. ¿Imataq jatun tantakuykunasninchikpi rikukun, imaynatataq ñuqanchikpis kallpachakusunman?

⁶ Jatun tantakuypiqa, hermanosninchikwan khuska juk sunqulla kanchik, chaytaq kay saqra pachapiqa mana rikukunchu (Sal. 133:1-3; Mar. 10:29, 30). Khuskan pʼunchaypitaq, qayllaykipi tiyakuq hermanoswan parlarinaykipaq kallpachakuy. Chaypaqtaq, mikhunata jatun tantakuyman apakunayki may allin kanman. Chantapis, tukuy hermanoswan astawan parlarinaykipaq kallpachakuy (Rom. 1:11, 12).

7. Jatun tantakuyman rinapaq pʼachata akllachkaspa, ¿imapí tʼukurinanchik tiyan?

⁷ Pʼachallikuymanta. Ñawpa tiempopiqa, Jehová, israelitasta pʼachasninkup kantuman flecosta, patitanpitaq azul qʼaytuta churanankuta kamachirqa (Núm. 15:37-41, NM). Chayqa, israelitasta, lantita yupaychaq suyusmanta tʼaqasqa kasqankuta yuyarichiq. Kunan pʼunchaykunapipis, jatun tantakuyman chayri mayman rinapaqpis, Diosninchikta jatunchanapaqjina pʼachallikunanchik tiyan, imaraykuchus runasqa, imaynatachus pʼachallikusqanchikta rikuspa, Diosman qayllaykunkuman. Chayrayku, jatun tantakuyman rinapaq pʼachata akllachkaspaqa, allinta tʼukurinanchik tiyan.

8. Maypichus jatun tantakuy ruwakunqa chaypi, ¿imaynatá willasunman?

⁸ Willanapaq wakichikuna. Ñawpaqmanta wakichikuspaqa, maypichus jatun tantakuy ruwakunqa chay llaqtapi willayta atisunman. Sutʼinchanapaq, juk hermanoqa warminwan, tantakuy tukukusqantawan, juk restauranteman risqa. Chaypi llamkʼaqwan parlarinanpaqtaq, tarjetanta rikuchispa jinata tapusqa: “¿Kayjina tarjetayuq runasta kayman mikhuq jamuqta rikurqankichu?”, nispa. Chaypi llamkʼaq runaqa, rikusqanta nisqa, chaywanpis, mana yachasqachu imapaqchus churakusqankuta. Hermanotaq, sutʼinchaytawan jatun tantakuyman waqyarisqa.

9. ¿Imaynatá Jehovaman wakichisqanmanta agradecesqa kasqanchikta rikuchisunman?

⁹ Jatun tantakuypiqa, hermanosninchik umallirichinku, ruwasqankumanta parlarinku, rikuchinku ima, chaywanpis, chaypi yachachikusqantaqa, Jehová munakuywan sumaq mikhunatajina sapa watapaq wakichin (Isa. 65:13, 14). Ajinata wakichipuwasqanchikmanta, agradecesqa kasqanchikta rikuchinapaqtaq, kimsantin pʼunchayta chay jatun tantakuypi kanapaq, yachachikusqanta japʼiqanapaq ima, allinta wakichikunanchik tiyan. Chayrayku, chay sumaq yachachiykunawan mikhunawanjina miskʼirichikunaykipaq, ¿wakichikunkiñachu?

[5, 6 paginaspi recuadro]

Jatun tantakuypaq yuyarichiykuna

◼ Wakichikusqan. Jatun tantakuypaq wakichikusqanqa, kimsantin pʼunchayta 9.20 qallarinqa. Punkuqa, 8.00 kicharikunqa. Chantapis, tantakuy Diosta jatunchananpaqjina qallarinanpaqqa, takiykuna qallariptinkama tiyananchikman rinanchik tiyan. Viernes, sábado pʼunchaytawanqa, 4.55 tukukunqa, domingotaq 4.00 tukukunqa. Achkha suyusmanta jatun tantakuykunapitaq, jueves pʼunchayta 1.20 qallarinqa, 4.45 tukukunqataq.

◼ Autosta saqinapaq. Jatun tantakuypi, hermanos maypichus autoykita saqinaykita nisunqanku chaypi, mana pagaspalla autoykita saqiyta atinki, chaywanpis chayasqankumanjina kʼuchunchanqanku. Chantapis, allin kanman juk autollapi tantakuyman rinaykichik, imaraykuchus autosta saqinapaq lugarqa, mana jatunchu kayta yachan.

◼ Tiyanapaq. Qamwan jamuqkunallapaq, chayri qamwan tiyakuqkunallapaq, tiyanata japʼiyta atinki.

◼ Mikhuna. Khuskan pʼunchaypi mikhunata rantiq lluqsinamantaqa, allin kanman apakunanchik. Chantapis, tiyananchik uraman yaykunanpaqjina mankasllapi mikhunata apana, manataq imatapis vidriomanta apanachu.

◼ Munasqanchikmanjina qullqita churanapaq. Kay jatun tantakuy allinta ruwakuchkasqanmanta agradecesqa kasqanchikta rikuchinapaqqa, Tantakunapaq Wasipi, jatun tantakuypipis, tukuy sunqu munasqanchikmanjina qullqita churasunman.

◼ Imanarpakuptinchik. Ama qhasi mana kaqta kay primeros auxilios nisqata celularniqta waqyaychu. Manaqa, jatun tantakuypi pillapis imanarpakuptillan, astawan qayllapi kaq yanapaqta waqyay, paytaq usqhayllata Primeros Auxilios nisqaman willanqa. Primeros Auxilios nisqamanta kaqkunataq, ichá hospitalman waqyanqanku.

◼ Zapatos. Sapa wata, urmanapaqjina zapatosta churakusqankurayku chakinkuta qʼiwikunku, urmarpanku ima. Chayrayku, allinta puriyta atinapaqjina zapatosllawan jatun tantakuyman rina, ajinamanta gradasta, rejillasta purichkaspapis mana urmasunchu.

◼ Mana allinta uyariqkuna. Tukuy umallirichiykunaqa, radioniqta (FM) uyarikuyta atinqa. Chayrayku, allin kanman pilasniyuq juchʼuy radiota audifonosniyuqta apakunayki.

◼ Grabación. Mana ima grabadoratapis corrienteman japʼichinachu tiyan. Grabayta atikuptinpis, uyariqkunata mana pantachispalla grabana tiyan.

◼ Wawasta apaykachanapaq carritos, juchʼuyman tukuq sillas ima. Jatun tantakuymanqa, wawasta apaykachanapaq carritosta, juchʼuyman tukuq sillastapis, mana apanachu. Chaywanpis, wawasta tiyachinapaq tiyanata apayta atikun.

◼ Sírvase visitar nisqa formulario. Allin kanman Sírvase visitar (S-43) nisqa formulariota iskayllatapis tantakuyman apakunayki, ajinamanta Diosmanta willasqayki runa astawan yachakuyta munaptin, qillqayta atinki. Chay formulariota qillqaytawanqa, Departamento de Publicaciones nisqaman apay, chayri qutuchakuyniykimanta secretarioman jayway (Nuestro Ministerio del Reino de febrero de 2005, página 6, qhawariy).

◼ Restaurantes. Restaurantesman rispaqa, Diosta jatunchanapaqjina imatapis ruwana.

◼ Hoteles. Kay yuyaychaykunaqa, wakin lugaresllapaq allin kanqa. 1) Maskha cuartospichus qhipakunaykichik kanqa chaykunallata tʼaqachiychik, chantapis chay cuarto machkha runaspaqchus chaylla qhipakuychik 2) Chay hotelman manañana rinkichikchu chayqa, usqhayllata willanaykichik tiyan. 3) Qʼipista apanapaq carritota necesitaqtillaykichik apaychik, chantá usqhayllata kutichipuychik wakkunapis qʼipisninkuta apanankupaq. 4) Chay cuartopi mana waykʼunachu kaptinqa, ama waykʼuychikchu. 5) Cuartota kʼuchunchaqpaq sapa pʼunchay qullqita saqipuychik. 6) Yakuquñita, wak imasta ima khasilla quptinquqa, ama achkhata uqharikuychikchu, wakkunapaqpis kanan tiyan. 7) Hotelpi llamkʼaqkuna achkha ruwanasniyuq kanku, chayrayku tukuy imata ruwachkaspa kʼachas, khuyakuyninyuq, pacienciayuq ima, kasqaykichikta rikuchiychik, chaytataq mayta agradecenqanku. 8) Achkhata chayri wak imasmanta qullqita mañasunqachik chayqa, ama pagaychikchu manaqa usqhayllata kay Departamento de Alojamiento nisqaman willaychik. 9) Cuartoykichikpi ichá imallapis mana allinchu kanman chayqa, usqhayllata kay Departamento de Alojamiento nisqaman willaychik.

◼ Yanapaqkuna. Ancianosta, siervos ministerialesta ima, kay yanapaqkuna (departamento de acomodadores) nisqaman rinankuta mañayku, ajinata ruwaspaqa hermanosninchikta yanapariyta atinqanku, chaytataq Jehová Diosninchikqa, may allinpaq qhawan.

◼ Ñawpaqta chayana. Chay tantakuyman manaraq qallarichkaptin chayanapaq kallpachakuyqa, allinnichikpaq kanqa. Ajinamanta hermanoswan parlariyta, takiykunata uyariyta, qallariypi takinata takiyta, Diosmanta mañakuyta, imatachus qallariypi nikusqanta ima uyariyta, atisunchik. Chantapis ñawpaqta chayaspaqa, hermanosninchik sumaqta uyarinankuta mana pantachisunchu, chaytaq chay tantakuyta, Jehová Diosta ima, may allinpaq qhawasqanchikta rikuchinqa (1 Cor. 14:40).

[5 paginapi recuadro]

Imaynatá Jehovata jatunchasun:

■ Diospa kamachisninjina pʼachallikuna.

■ Mana kay pachajinaqa kʼachanchakunachu.

■ Llampʼu sunqus, allin yuyayniyuq kasqanchikta rikuchina.

[6 paginapi recuadro]

Uyarisqanchikpi tʼukurina:

■ ¿Imaynatá astawan Diosman qayllaykunaypaq yanapawanman?

■ ¿Imaynatá wakkunawan allinta apanakunaypaq yanapawanman?

■ ¿Imaynatá kawsayniypi, willaypi ima yanapawanman?