Iskay pʼunchayniyuq jatun tantakuypaq wakichikusqan
Jehovaqa jatunchasqapuni kanqa, ¿imaynatá jatunchasuman? Jehovata jatunchayta munaqkuna, ¿ima chʼampaykunatataq atipananku tiyan? ¿Diosta jatunchaqkunaqa ima tʼinkakunatataq japʼichkanku? Qhipan watapaq iskay pʼunchayniyuq jatun tantakuypi kay tapuykunaman kutichikunqa, sutichakunqataq: “Tukuy imata ruwaychej Dios jatunchasqa kananpaq”, nisqa (1 Cor. 10:31). ¿Imatá kay tantakuypi Diosmanta yachaqakusunchik?
Diosmanta Parlayta Yachanapaq tantakuyta ruwaytawan, superintendente de distrito nisqaqa, kaykunata umallirichinqa “¿Imaraykutaq Diosta jatunchana tiyan?”, “Dios kamachisqanmanjina kawsananchik tiyan”, tukuypaq umallirichiypiqa kaymanta parlanqa “¿Pikunataq Diosta kunan jatunchachkanku?” Kaywantaq tukuchanqa, “Jallpʼantinpi Diosta khusqa jatunchana”. Chanta superintendente de circuito nisqaqa, kay kimsa umallirichiykunata qunqa: “Diospa jatun kayninta lliphipirichisqanchikmanta kusikuna”, “Imapi qutuchakuykuna llamkʼananku tiyan”, qhipa umallirichiynintaq kay 2 Pedro 1:12 nisqa sutʼinchanqa, sutichakuntaq “Chiqa kaqta yachakusqaykichikpi sinchita sayallaychikpuni”, nisqa. Yachakullasunchiktaq imaraykutaq “Precursoresjina llamkʼayqa Diosta jatunchan”. Iskay jatuchaq umallirichiykunapis kanqa. Ñawpaq kaq umallirichiyqa sutichakun: “Diosta tukuy kawsayninchikpi jatunchana”, chay umallirichiypiqa 1 Corintios 10:31 imachus niyta munasqanta astawan ukhunchakunqa. Iskay kaq umallirichiypitaq sutichakunqa: “Jehovata yupaychanapaq llamkʼana”, kaypitaq imaymanamantachus runaman willamusqanchikmanta parlakunqa. Domingo pʼunchaytaq Atalayap miskʼinmanta yachakusunchik, sapa pʼunchaypaq Bibliap pʼitinta ñawirillasuntaq. Chantapis, Bibliamanta wakin yachakuq runakunaqa bautizakunqanku.
Achkha runaqa mana Diospi yuyayta munankuchu, ruwasqankullapi yuyasqankurayku mana Jehovap jatun kayninpi tʼukullankupischu (Juan 5:44). Mana chaymanjinataq ñuqanchikqa, tiempochakusun tʼukurinanchikpaq imaynatachus ‘tukuy imata ruwasunman Dios jatunchasqa kananpaq’. Ñawpaqmantapacha wakichikuna jatun tantakuyman iskaynin pʼunchayta kananchikpaq.