Willaq lluqsispa ama tiemponchikta usuchinachu
1 Qhawasqanchikmanjina achkharaq ruwanapaq kachkan, chaywanpis pisi tiempollaña kapuwanchik (Juan 4:35; 1 Cor. 7:29). Sumaqmanta tiemponchikta apaykachasunchik chayqa, willaq lluqsispa mana tiemponchikta usuchisunchu.
2 Wakichikuy. Manaraq Tantakuy Wasiman richkaspa, publicacionesta wakichikunayki tiyan, amataq qunqaychu imatachus runaman ninaykipaq wakichikusqaykita. Chay tantakuy Diosmanta mañakuywan tukusqantawan, maymanchus willaq richkankichik chayman usqhayta riychik. Jinamanta, qampis wak kunapis willaq lluqsispa tiemponkuta sumaqmanta apaykachachkanqanku manataq usuchinqankuchu.
3 Qam qututa willamunaykipaq urqhunki chayqa, tantakuyta tiemponpi qallariy, chunka chayri chunka phichqayuq minutosllata parlariy, amataq ancha unaytaqa parlaychu. Manaraq kachachkaspa tukuypis yachananku tiyan mayniqtachus rinankuta, piwanchus lluqsinankuta ima.
4 Willachkaspa. Willanapaq tantakuy tukukuptin ama qhipakuspa tiempota usuchiychu, manaqa mayniqtachus kachasunku chayman riypacha. Qutuwan lluqsiptiyki ama ancha unayta parlaychu, ichapis wakkuna suyachkasunkuman. Ichapis, juk runa allinta uyariwaptinchik, wak pʼunchay kutimusaq nisunman, chayri siminakuyta munaqkunamanta allinllamanta ripusunman (Mat. 10:11).
5 Allinta uyariqkunaman kutispaqa, tʼukuriy juk chiqanpi machkha runamanchus rinaykita, jinamanta mana kutin kutita chay chiqallanmantaq rinaykipaq. Wakin kutiqa allin kanman manaraq richkaspa telefononiqta waturiy chay runa wasinpichus manachus kasqanta yachanapaq (Pro. 21:5).
6 Kunan tiempopi cosecha tiempopijina achkha runata uqharikuchkan (Mat. 9:37, 38). Juk chhikamantawan kay llamkʼayninchik tukukunqa. Chayrayku, willachkaspa tiemponchikta mana usuchispa, runata allinta yanapananchik tiyan.