¿Imaynatá Diosmanta willachkaspa kallpachanakusunman?
1 Tukuypis, ‘maychus tiemponpi sunquchanapaqjina juk palabrata’ niwaptinchikqa, mayta kusikunchik (Pro. 25:11). Diosmanta hermanosninchikwan willachkaspa, parlayninchik kallpachanapaqjina kananpaq, ¿imatá ruwasunman?
2 Parlasqanchik kallpachanapaqjina kachun. Hermanosninchikwan willachkaspa, Diosta yupaychayninchikmanta parlaptinchik, paykunata sumaqta kallpachasunchik (Sal. 37:30). Ichapis imamantachus runaman parlasun, chayri willayninchikpi imaynachus riwasqanchikmanta, parlarisunman (Hech. 15:3). Chantapis, tantakuypi uyarisqanchikmanta, chayri revistasta, Bibliata ima, ñawirisqanchikmanta, parlasunman. Jinallatataq tukuypaq tantakuypi umallirichiyta uyarisqanchikmanta, parlarillasunmantaq.
3 Willachkaptinchik runa tapuwasqanchikman mana kutichiyta atiptinchik, mayta llakikunchik. Chaywanpis punkumanta jatariytawan juk chhikanta, piwanchus lluqsinchik hermanowan, imaynatachus jukpiwan chay tapuyman kutichinamanta parlarisunman, chaypaqtaq ichá kay Razonamiento librota, qhawarisunman. Chantapis, piwanchus lluqsinchik hermano sumaqta runaman willaptin, allinta ruwasqanta, nisunman.
4 Ñuqanchik parlayta qallarina. Librota yachaqanapaq tantakuymanta, ¿mayqin hermanowantaq manaña anchata willaq lluqsinkichu? “Purajmanta kallpachanakunanchejpaj” ñuqanchik chay hermanota parlapana tiyan, ñuqanchikwan willaq lluqsinanpaq (Rom. 1:12). Precursores regulares, auxiliares ima, tutamanta, chayri tutasnin paykunawan pillapis lluqsiptin mayta kusikunku, imaptinchus chay horastaqa, wakillan willaq lluqsinku. Ichapis ñuqanchikpis paykunawan willaq lluqsinapaq tiempochakusunman. Qutuchakuypi, ¿kanchu mayqin hermanopis unqusqa kasqanrayku mana willayman lluqsiyta atiq? Jina kaptinqa, chay hermanota yanapasunman, Bibliamanta runaman yachachiq richkaspa, payta pusaspa (Pro. 27:17).
5 Ima juchʼuy ruwaykunallapipis, hermanosninchikta sumaqta ruwanki niyqa, mayta kallpachanqa. Kayta ruwaytaqa mana qunqanachu tiyan, hermanosninchikwan willaq lluqsispa ‘puraqmanta kallpachanakunanchikpaq’ (1 Tes. 5:11).