Piwanchus willaq lluqsinki payta yanapay
1. Iskaymanta iskay willaq riy, ¿imaraykutaq may allin?
1 Juk kuti Jesusqa, Diosmanta runasman willamunankupaq 70 discipulosninta “iskaymanta iskay kacharqa” (Luc. 10:1). Ajinamanta paykunaqa, willaypi puraqmanta yanapanakurqanku, kallpachanakurqankutaq. Juk hermanowan willaq lluqsispa, ¿imaynatá payta yanapawaq?
2. Piwanchus willaq lluqsinchik pay willachkaptin, ¿imatataq ruwananchik tiyan, imaraykutaq?
2 Allinta uyariy. Piwanchus willaq lluqsinki pay juk runawan parlachkaptin, allinta uyariy (Sant. 1:19, 20). Bibliamanta juk pʼitita ñawiripuptinqa, qampis Bibliaykipi chay pʼitita ñawirillaytaq. Chantá pichus parlachkaqta allinta uyariy. Parlarichkasqankuta sumaqta uyarinki chayqa, wasiyuqpis sumaqta uyariyta munallanqataq.
3. Piwanchus willaq lluqsinki chay hermano juk runawan parlachkaptin, ¿maykʼaqtaq allin kanman yanaparinayki?
3 Maykʼaqchus parlananchik kasqanta yachay. Piwanchus willaq lluqsinki chay hermano willachkaptinqa, paylla parlarinanta saqinayki may allin (Rom. 12:10). Pay parlachkaptin, ama qampis parlallaytaqchu. Chaywanpis juk tapuyman mana kutichiyta atiptin, imamantachus chay hermano parlarichkarqa chayllamantapuni parlaspa kutichiy (Pro. 16:23; Ecl. 3:1, 7). Ajinamanta chay hermano imamantachus parlachkasqanta jatunpaq qhawachinki (1 Cor. 14:8).
4. Willaq risqanchikmanta kusisqas kutimunanchikpaq, ¿imatataq ruwananchik tiyan?
4 Chay 70 discípulos willaq risqankumanta ‘kusisqas kutimurqanku’ (Luc. 10:17). Ñuqanchikpis, willaq risqanchikmanta kusisqas kutimunanchikpaqqa, piwanchus willaq lluqsinchik pay willachkaptin, allinta uyarina, chantá yanapata necesitaptillan parlarina.