Kay 20 octubremanta, 16 noviembrekama juk musuq tratadowan willakunqa
1 Lunes 20 octubre killamanta tukuy jallpʼantinpi, kay, Chiqa kutichiykunata yachayta munawaqchu, nisqa tratadowan tawa semana juntʼata, willay qallarikunqa. Kay willayqa ruwakuchkan, runas chiqa kaqmanta astawan yachanankupaq (Juan 17:17).
2 Kay tratadoqa, suqta tapuykunaman kutichichkan: ¿Dios ñuqanchikmanta interesakunchu? ¿Maykʼaqllapis jatuchaq maqanakuykuna, ñakʼariy ima, chinkanqachu? ¿Maymantaq wañupuspa rinchik? ¿Ima suyakuytaq wañusqaspaq tiyan? Dios uyarinawanpaq, ¿imaynatá mañakuyman? ¿Imaynatá kusiy kawsayta tariyman? Kay tapuykunamanqa cristiano nichikuqkuna religionkunapis, mana sutʼita kutichiyta atinkuchu. Chantá, mana cristiano nichikuqkunapis kaytaqa tapukullankutaq, ichapis Biblia chay tapuykunaman kutichisqanta mana yachaspa. Chayrayku nisunman, runas kay musuq tratadota, kusiywan japʼinankuta.
3 Maypichus willanchik chaypi, tukuyman jaywana. Kay musuq tratadota, maypichus qutuchakuyniyki willan chaypi, wasimanta wasi rispa, tukuyman jaywanaykipaq kallpakuy. Chantá, willachkankichik chay jatun kaptinqa, ichapis ancianos, mana chay wasipi runata taripaptinku, chay wasiman juk tratadota saqinata ninqanku. Chantapis mana qunqakuychu vecinosniykiman, familiaresniykiman, llamkʼayniykipi chayri escuelapi, riqsisqasniykiman ima, jaywariyta. ¿Octubrepi chayri noviembrepi precursor auxiliarjina kayta atiwaqchu? Chantapis wawasniykimanta, chayri pimanchus Bibliamanta yachachichkanki chaykunamanta, publicadorjina llamkʼananpaqjinaña kaptinkuqa, ancianoswan parlariy.
4 ¿Imatá niwaq? Kay tratadota achkha runasman jaywarinapaq pisillata parlarina tiyan: chay suqta tapuykunamanta jukninta tapuriytawan, chay tratadopi kutichiyninta sutʼinchariy. Ajinamanta maypichus willankichik chaypi sumaqta willakunqa. Astawan yachakuyta munaptinkuqa, qillqarikuy chay runaman kutiyta, mana qunqanaykipaq. Semanap tukukuyninpitaq chay tratadota revistastawan khuska, apayta atiwaq. Kay 16 noviembre killakama chay tratadowan willakunqa, chaymantataq Yachachin libronchikta willayman apayta atisunchik, chantá kay musuq tratadoqa, wak tratadosjina kanqa runaman jaywanapaq.
5 Bibliamanta yachachiyta qallarinapaq. Kay tratadoqa, runata Bibliamanta yachachiyta qallarinapaq urqhukun. ¿Imaynatá ruwasunman? Astawan yachakuyta munaqman kutispa, tapurisunman mayqin yachachiychus chay tratadomanta payta sunquchasqanta, chantá qhipa kaq paginapi, yachakuyta munaqkunamanta sutʼinchachkasqanta rikuchispa, Yachachin librota jaywayta atisunman. Chantapis atikuptinqa, chay libromanta mayqinmantachus yachayta munasqanmanta, juk parrafota chayri iskay parrafota, yacharichiyta atisunman.
6 Jehovaqa, payta ‘tukuy sunquwan, chiqa kaqmanjina’ yupaychayta munaqkunata, maskʼamunanchikta kamachiwanchik (Juan 4:23). Ñuqanchikpis chay runasta yanapayta munanchik, chayrayku chay ¡sumaq willaypi yanapakuna!