Kay 2010 watapaq juk pʼunchaypaq jatun tantakuy
1. a) Pasaq wataspi juk pʼunchaypaq jatun tantakuykunapi, ¿Bibliamanta ima yachachiykunatataq sutʼinchakurqa? b) Chayjina tantakuykunapi willayniykipi yanapasunanpaqjina, ¿imatá yachakurqanki?
1 Pasaq wataspi juk pʼunchaypaq jatun tantakuykunapi; “Jehovap makisninpi llinkʼi tʼurujina kanchik”, “Diosmanta ruwana japʼisqaykita juntʼallaypuni”, nisqamanta ima parlakurqa (Isa. 64:8; Col. 4:17). Tunpamantawantaq 2010 watapaq juk pʼunchaypaq jatun tantakuy ruwakunqaña, kay 1 Corintios 7:29 pʼiti nisqanmanjina wakichikunqa, mayqinpichus pisi tiempollaña kasqanmanta sutʼinchakunqa. ¿Maytacharí chay tantakuyman riyta munachkanchik?
2. ¿Imatá ruwasunman juk pʼunchaypaq tantakuyta, tukuy sunqu suyanapaq?
2 Qutuchakuypi, kay tantakuy maykʼaqchus ruwakunanta willakusqantawan, tukuy sunqu suyay. Wakin tatasqa, chay fechata calendarionkupi marcanku, wawasninkuwan khuskataq machkha pʼunchaykunachus faltasqanta yupanku, chay tantakuypaq imastachus necesitanankumantapis parlarinku. Familiapi Diosta Yupaychanapaq Chʼisipi, pasaq watasmanta juk pʼunchaypaq tantakuykunamanta qillqasqaykichikta ñawiriyta atiwaqchik. Chantá kay Benefíciese, libroqta 13-16 paginasninta ñawiriwaqchik, qam, familiayki ima ‘allinta uyariyta’ yachanaykichikpaq (Luc. 8:18).
3. Chay tantakuypi uyarisqanchik sumaqta yanapanawanchikpaq, ¿imatá ruwananchik tiyan?
3 Yachakusqanchikmanjina ruwana. Juk jatun tantakuy tukukusqantawanqa: “¡May sumaq yachachiykuna!”, niqta uyarillanchikpuni. Arí, may sumaqpuni, imaraykuchus chay tantakuyqa Jehová Diospa jukninkaq bendicionnin (Pro. 10:22). Chayrayku, uyarisqanchikpi tʼukurina, sunqunchikpitaq japʼina, yachakusqanchikmanjina ruwanapaq (Luc. 8:15). Chaypaqtaq wasiykichikman ripuchkaspa, familiaykiwan chayri pikunachus qamwan autopi richkanku, paykunawan uyarisqaykichikmanta parlariychik. Imatachus ruwayta munasqaykichikmanta, willaypi imachus yanapasunaykichikmanta ima, parlarillaychiktaq. Ajinata ruwaspaqa, yachakusqaykichikta mana qunqapunkichikchu (Sant. 1:25).
4. Juk pʼunchaypaq jatun tantakuy, ¿imarayku may sumaq kananta nisunman?
4 Imatachus necesitasqanchiktapuni regalawaptinchikqa, ¿maytachari kusikunchik? Chayrayku Jehová juk pʼunchaypaq jatun tantakuypaq, imatachus wakichipuwasqanchikta may kusiywan suyachkanchik. Chiqamanta chay yuyaychaykunaqa mayta yanapawasun, imaraykuchus Tatanchik Jehovaqa, necesitasqanchikta quwasun: kallpachawasun, yachachiwasun ima, ajinamanta imatachus kamachiwasqanchikta juntʼayta atinapaq (2 Tim. 4:2; Sant. 1:17).