¿Yachaywasipaq wakichisqachu kachkanki?
1. Yachaywasiman rispa, ¿imatataq ruwayta atiwaq?
1 ¿Kunallanraqchu chayri watastañachu yachaywasiman richkanki?, Diosta yupaychaq wayna kasqakirayku, yachaywasipi chʼampaykuna, churanakuykuna ima rikhurinqa. Chaywanpis ‘chiqa kaqmanta willayta’ atinki (Juan 18:37). ¿Wakichisqachu kachkanki?
2. ¿Imarayku nisunman yachaywasipaq wachichisqaña kasqaykita?
2 Kaypi tʼukuriy kawsayniykipi allin risunanpaqqa: Jehová, allin kamachi yuyayniyuq, tatasniyki ima, sumaqtaña wakichisunku. (Pro. 1:8; 6:20; 23:23-25; Efe. 6:1-4; 2 Tim. 3:16, 17). Ichá yachankiña, yachaywasiman rispa imastachus ruwanaykita. Yachaywasi imaynachus kasqanta riqsinki chayqa, Bibliamanta yachakusqaykita willanaykipaq wakichikuy (Pro. 22:3). Chantá kay Waynaspata sipaskunapta tapukuyninku juk kaq, iskay kaq librospi, ¡Despertad!, revistaspi ima, qamkunapaqjina Bibliamanta urqhusqa yuyaychaykunasninpi, allinta tʼukuriy.
3. ¿Imaymanasmantá Jehovamanta sutʼinchaq kasqaykita rikuchiwaq, willawaq ima?
3 Yachaywasiqa tukuy imaymanamanta Jehovamanta sutʼinchaq kasqaykita rikuchinaykipaq willanaykipaq ima, sumaq. Wakinqa; imaynachus kasqaykita pʼachallikusqaykita, kʼachanchakusqaykita, parlasqaykita ima, sumaqta qhawanku. Chantapis profesoresta, compañerosniykita jatunpaq qhawasqaykita, notasniyki allin kasqanta ima, reparallankutaq. Kawsayniykipipis imatachus ruwayta munasqaykita sutʼita rikunqanku. ¿Manachu wakjina kasqaykimanta tapusunqanku? (Mal. 3:18; Juan 15:19; 1 Tim. 2:9, 10.) Tapususqankuqa imaspichus creesqaykita sutʼinchanaykipaq yanapasunqa. Chantapis watantinpi suyuta jatunchanapaq raymis, wak fiestas ima kanqa. Chay raymista paykunawan khuska mana ruwasqaykimanta tapusuptinku, ¿imatá kutichinki? “¿Religionniy mana saqiwanchu, chayri Jehovamanta sutʼinchaq kasqayrayku ninkichu?” Chayri, ¿munakusuq Diosmantachu sutʼinchanki? Chaypaqqa Jehovap yuyaychaynin, allinta wakichikusqayki ima, profesoreswan, compañerosniykiwan, wakkunawan ima, parlanaykipaq yanapasunqa (1 Ped. 3:15).
4. ¿Imarayku niwaq yachaywasipi allin risunanta?
4 Yachaywasiman riytaqa ichá manchachikuchkanki, chaywanpis mana sapaykichu kachkasqaykita yuyarikuy. ¿Manachu mayta kusikunki yachaywasipipis Diosmanta willayta atisqaykimanta? Chayrayku, ¡kallpachakuy! Yachaywasiman rinaykipaq wakichisqa kanki.